Friday, May 08, 2009

كوليكشن 2

طلب جواز

كبرت في دماغي من كم يوم أكتب طلب جواز للعروسة المطلوبة

كانت الفكرة تتدور حول أنها لازم تكون مهندسة زراعية فاهمة و شاطرة ليه بقة علشان ناخد حتة أرض و نعيش فيها و خلاص و ننغلق و نبعد عن الناس و نعيش كده مع نفسنا

و حتي ممكن الموضوع يتتطور و لما نخلف إن شاء الله حتي منوديش العيال المدرسة ونعيش منغلقين علي نفسنا المهم يوم الأربعاء بعد تمخض الفكرة في رأسي كان يوم الحنة بتاع الواد عماد الأهتم ده عامل شغال معايا المهم و إحنا في طريقنا كانت الدنيا حوالينا معظمها حقول قمح كان شكلها جميييييل قوي و تحس إنها أقرب للمعان الدهب بجد مش مبالغة و الله طبعا كمان منساش أقولكم إن معظم العمال و الناس اللي معايا في الشركة بعد أما بيروحوا و يوم الجمعة و السبت شغالين حاليا في حصاد القمح اللي هي أسمها عندهم غلة و بيجوا لونهم كأنهم كده بلغة الفرافير لسه جايين من مارينا بيلمعوا من الشمس

:)

الفكرة ترسخت في دماغي أكتر و كتبت عنها

ياتري في حد هيتقدم بطلب و لا مفيش

عارف طبعا مفيش

.

يوم الأربعاء السابق السيد مدير الإنتاج فقعني خازوق محترم و لا خازوق سليمان الحلبي عند مدير المصنع اللي هو أساسا أتخنق مني و كرهه اليوم اللي عمل معايا فيه إنترفيو و قبلني فيه لقيته جاي بيقولي مدير الإنتاج بيقول عليك مش بتشتغل و قاعد في المكتب و هو اللي بيلف علي طول قعدنا في شد و جذب و حسيت بغبن رهيب حلوة غبن دي محدش ينكر المهم بعد ما كنت خلاص هاتخنق و كان نفسي أعيط رجعت البيت و أنا راجع سمعت أغنية كل ما بنقيد شمعة اللي كتبت عنها في البوست اللي فات و غالبا الساعاتي سرقها مني و عملها في الفيس بووك زي ما أحمد مهني سرق فكرتي بعد ما قريت شيكاغو و كتبت عنها هنا و هو أخد الفكرة و ألف عليها قصة قصيرة بس الحمد لله كل شئ موثق هنا و مكتوب بالتاريخ و الاخ جوجل يشهد علينا

بمناسبة جوجل مش عارف حابب قوي متصفح النت بتاع جوجل ده حلو قوي و سهل و مرتاح له لله في لله

المهم بعد أما روحت و كان مدير المصنع قالي بلاش نكمل كلام دلوقتي علشان أنت شكلك رايح لسكة غلط علي أساس أنا كنت خلاص ثانية و هأقوله أشوف وشك بخير

المهم رجعت البيت كتبت اولا طلب نقل و جددت الإستقالة اللي كنت ماشي بها و صليت إستخارة و حسيت براحة و رحت الشغل و الورقتين لسه في المكتب مستعدين للطلوع في أي لحظة

تخيلوا رئيسك يخزوقك طيب زميلك ماشي اللي تحت منك أوكي إنما مديرك اللي الفرق بينكم بتاع خمستاشر سنة خبرة يا نهار أسود خايف من أية و لا هأعمله أية يعني

الله أعلم

لو عرفت هأقولكم

.

خالي كمان في المستشفي و مش عارف أروح أزوره

.

أنفلونزا الخنازير شغالة الله ينور

.

أة في قناة علي الراديو جديدة أسمها محطة مصر النشرة اللي فيها بيشتغل معها موسيقي تحسسك كده غن الحرب هتقوم حتي لو بتذيع خروج الأهلي من بطولة افريقيا و إن شاء الله حصول الإسماعيلي علي الدوري

وشك حلو عليهم

:)

.

الأمتحانات بعد كم يوم و مش عارف أذاكر و لا أخلص حاجات الشغل و لا أروح أرمي نفسي في النيل زي الرجل بتاع الدقهلية النهاردة

.

الواحد بيسمع أخبار السياسة و الرياضة اليومين دول بيضحك

يعني مثلا إسرائيل النهاردة بترد علي تسريبات وجود نشاط إشعاعي في مصر و بتقول هنعرف بطريقتنا الخاصة

قشطة يعني علني

و بالنسبة للرياضة

حسام حسن بيقول للاعيبه هنلاعب الإسماعيلي و لو في تل أبيب

و كمان القيعي يشبه تقليص القائمة بقانون الإصلاح الزراعي .

أيش جابك يا صعلوك جنب الملوك

مش فاهم أنا

.

أمبارح خرجت مع أنتيمي من الكلية كنت حكيت لكم عنه من فترة و هو واد جدع و غلبان و طيب و فرحان بصداقته و ربنا يديمها

و كنت قبل كده فضفضت معه في الموضوع أياه و أمبارح أتكلمنا عن الشغل و البنت اللي هو رايح يتقدم لها النهاردة أدعو له ربنا يوفقه علشان هو مجنون

.

مش عارف كان في حاجات كتير نفسي أكتب عنها بس كل يوم بأرجع من الشغل مش شايف قدامي و أنام زي القتيل للصبح النهاردة الحمد لله بعد يوم نوعا ما كويس و عملت فيه شئ كويس كتبت أهوة

ياريت بقة تعليقات بلاش قلة أدب بقة و اللي يقرا لازم يعلق زي الناس المحترمة اللي بتعلق

مش هينفع كده

في مقطع موسيقي نفسي أنزله علي المدونة التانية بس مش عارف هأنزله أمتي ياريت تسمعوه و تقولولي رأيكم

.

يارب أنا عاصي

و لا يغفر الذنوب إلا أنت فأغفر لي ذنوبي

يارب لا تزيد من ذنوبي بذنوب لن ترضاها و لن أرضها و مش هأسامح نفسي لو عملتها

يارب أعيني علي عدم فعل الذنب اللي كل شوية الشيطان بيوحي لي بيه

يارب ضاقت قوي

أفرجها يارب

14 comments:

روح said...

ياربي كل مرة كدة
انا اول تعليق!!!

عشان تعرف يابني تعبانين معاك اد اية
وبنعمل اللي علينا اهو...

جميل وانت متابع
الدنيا واللي بيحصل فيها

ويارب عقبالك لما تخطب ونرتاح من همك
ها كام مهندسة واقفة
علي باب المدونة لغاية دلوقتي.؟؟؟

يا مراكبي said...

:-D

ماشي .. الكوليكشن ده أحسن من اللي فات

إن شاء الله دايما أحسن

Unknown said...

ان شاء الله ربنا هيستجيب
(:

Towtor said...

بجد غريبه قوى ..اول امبارح كنت بفكر فى نفس فكرتك...زوج وبيت صغير فى مزرعة او اى حاجه شبه كده وانفصل عن العالم ..يمكن الكهربا بس تكون الحاجه الوحيدة اللى نحتاجها ...مايهمناش حاجه فى الحياه غير اننا نزرع الارض ونهتم باولادنا ..مايهمنيش وقتها غير ولادى وبيتى وشغلى فى المزرعة بتاعتنا وانسى الدنيا اللى بره المواصلات والحزب الوطنى والاهلى و شغلى و الدبلومة والماجستير .. انسى الدنيا وارجع اعيش زى اى ست بلاش فى الريف المصرى من ميت سنه لا خليها الريف الانجليزى ..تفتكر ده هروب من الواقع ولا مجرد حلم لحياه هادية .
ضحكتنى اوى لما قلت ان رئيسك "عملك زونبة كبيرة "تصدق حصلت معايا الاسبوع اللى فات ..مبطلتش ضحك بعدها .. حسيت انى رجعت لابتدائى رغم انى عمرى ما وقفت عند الحاجات دى ولا اخدت بالى منها .
على فكرة موضوع المزرعة مش محتاج مهندسة زراعية ..انت لو عندك الارادة وطول البال وشوية فلوس ممكن تعمل اللى بتفكر فيه.
الدعاء اللى فى اخر البوست جميل قوى ..فعلا لمس قلبى .,. ربنا يكرمك ويوفقك ..
معلش طولت عليك
على فكرة انا مهندسة كهربا واحنا فى الخدمة بردو

Meshmesha

catroz said...

لهجتك فى الكتابه معرفش ليه و اللهم اجعلوا خير بتقول انك مبسوط
يا انت مبسوط يانا المذاكرة اكلت مخىىى:D

المهم خليها على ربنا و صلى استخاره ..
ربنا يكرمك صاحبك و عقبال سيادتك
ممممممم
الف سلامه على عمو وربنا يسترر
ممممممم ايه تانى
ااه الموسيقى هبقى اسمعها اكيد ان شاء الله

ااه المذاكرة
هو انت لسه بتدرس اصلا:D
امال عامل فيها كبير و بتاع ليه
يلا ربنا يكرمك و شد حيلك كلناااا لها ..
البوست ده غير انوا كان فيه نبره سعاده غريبه كمان حسيت انى بسمع نشره الساعه 9 بالليل..:D

بلوجك من البلوجز اللى فعلاااااااا بتوحشنى .. بتبقى على بالى و ببقى عاوزة ادخل اقلب فيها اقرا حاجات جديده ولا قديمه حتى ..
فعلا البلوج دى بتوحشنىىىىىىىى

ربنا يكرمك يارب و كل حاجه تبقى كويسه

ذاكر و ارفع راسنا الله يكرمك

^_^

No Fear said...

روح
السلام عليكم
مش عارف أنت بتكوني قاعدة علي باب المدونة
ربنا يكرمك و نتعب علشانك في الخير إن شاء الله
.
هنعمل أية غير الفرجة علي الدنيا و اللي بيحصل فيها
دعواتك
.
مفيش غير واحدة بس اللي قدمت طلب إلي حد الأن
:(
كنت فاكرهم أكتر من كده
:))))))

No Fear said...

يامراكبي
السلام عليكم
معرفش ليه الناس شايفه الكوليكشن ده أحسن
بس ماشي أحسن أحسن
يارب دايما إلي الأمام

No Fear said...

إسراء
السلام عليكم
ياااااااااااااااارب

No Fear said...

Towtor
السلام عليكم
منورة المدونة
تعليقك كبير و محترم
ربنا يوفقك و يرزقك باللي تتمنيه و يكون فيه الخير لك
.
طيب فين السي في بتاعك علشان نقيم
شغال كهربا كهرب

No Fear said...

catroz
السلام عليكم
لا حضرتك أنا كبير إن شاء الله
بأذاكر تمهيدي ماجستير
بالرغم من إني مش شايف نبرة التفاؤل دي فين بس كويس الحمد لله
.
نشرة تسعة
ماشي ماشي
.
ربنا يكرمك بتحرجيني بذوقك
طبعا أنت عارفة مش أي حد بيكتب بالأسلوب العبقري اللي بأكتب به
هاحاول أجي علي نفسي و أكتر في الكتابة شوية علشان خاطركم
.
دعواتكم ربنا يكرمك في موضوع المذاكرة ده

اعشق فى الليل ضوء القمر said...

حلو فكرة تجميع أكثر من شئ فى حاجة واحدة كوليكشن بجد

انا ماما said...

اسفة جدا على التاخير في التعليق
انت عارف المذاكرة والامتحانات
ربنا معاك في امتحاناتك ومعانا كمان :))
مبروك لصاحبك وعقبالك
والف سلامة على عمو
ومتزعلش من المدير عشان ده بقة الطبيعي
مدير موظف غفير محدش بقة بيحب لحد ان يعلا دلوقتي
ولا يهمك
وابقة خلي بالك من انفلونزا الخنازير
سلام

No Fear said...

أعشق في الليل
السلام عليكم
يهمنا رضاء العميل
:)

No Fear said...

Pinky
السلام عليكم
ربنا يكرمك
مفيش مشكلة مش هأعلق لك المشنقة يعني لو معلقتيش
بس لو حصلت تاني و أتأخرتي هتشوفي
:)
ربنا يوفقك و يوفقني في الإمتحانات
.
ده يمكن اللي أدي الواحد الأمل اليومين اللي فاتوا دول هي أنفلونزا الخنازير
:)