السلام عليكم و رحمة الله

عملا بما لايفعله بعض الإصدقاء هأكتب بوستات ورا بعض يعني لسه منزل واحد أمبارح و هانزل واحد طويل النهاردة معرفش طلبت معايا رغي

المهم

الكلام النهاردة كتير

علشان الناس اللي مش فاضية تقصر من الأول

و للأسف في حاجات كنت مجهزها بس في ناس سبقتني و كتب عنها

:)

كان في موضوع بأجهزه من زمان لاقيت الصديقة كوشيا للأسف كتبت واحد زيه و الموضوع التاني الأهرام كتبت عنه النهاردة

المهم

نبدا بالموضوع اللي الأهرام كتبت عنه النهاردة موضوع هل تتحول بؤر المخدرات بالقليوبية لباطنية جديدة

أنا شغلي في العبور و انا راجع ساعات الطريق الدائري بيكون مقفول فبناخد طريق خلفي كده أسهل نوعا ما المهم من فترة انا عارف الطريق ده بعد الإنتقال للشغل الجديد كنت في الطريق بأسمع اللي معايا في العربية بيقولوا هنا كوم السمن و الجعافرة و حتت تانية مكنتش واخد في بالي و يوم بعد يوم فهمت و عرفت إن الحتت دي معروفة لعامة الشعب إنها مصدر و معقل تجارة الحشيش في مصر تقريبا كنت بسأل نفسي لما الناس التعبانة اللي معايا في الشركة و متعرفش في حياتها غير الشغل و البيت و معاناة العيشة تعرف الحتت دي أومال فين الجهاز اللي يسمي المباحث و مكافحة المخدرات و كنت بسأل هم فين و بيعملوا أية؟

و جه طبعا في دماغي علي طول موضوع النخيلة و سيد حنفي اللي لحد دلوقتي مش عارف هو أعدم و لا هرب و كمان أفتكرت حملة كان قام بيها حبيبي مصطفي الحسيني أسمها أفضحوا تجار الكيف

و قلت هو الموضوع ده شغل مين الناس و لا البوليس و المباحث و طبعا الناس هتتبرع و تقول الشرطة فيها ناس بتاخد فلوس من الناس دي و حاجة مقابل حاجة زي فيلم الجزيرة كده

بس انا هأطلع طيب و أقول لا الشرطة مش بتعمل كده

بس الشرطة بتعمل أية؟

كانت فين اول ما المناطق دي أتعرفت و قويت كده معتقدش إنها طلعت فجاة و لا هبطت من السماء أكيد كانت لهم بداية و طبعا لما سكتنا عليهم كبروا للدرجة دي

و الشرطة للأسف و الجرايد حتي متحركتش جامد غير لما بدأ إستشهاد الظباط واحد ورا التاني لحد ما وصلوا تلاتة دلوقتي هنا كرامة الشرطة أتجرحت و بدأت في التتضييق عليهم و وضع الأكمنة و كأن مسئولية جهاز الشرطة حماية نفسه بس و الشعب لا

أكيد في ناس أبرياء كتير ماتوا هناك في خناقات و مشاجرات مكنش لهم علاقة بيها و محدش أتكلم و لا بان لهم أثر حتي

يارب الشرطة تنجح في السيطرة عليهم سريعا و في نفس الوقت تمنع وجود بؤر جديدة في مكان تاني

.

الموضع التاني

الجواز

:)

مش عارف أحيانا بيكون نفسي أتجوز علشان يكون عندي اولاد بس هو ده السبب الوحيد اللي بيخليني نفسي أتجوز بس في نفس الوقت خايف من حاجات كتير الجواز في حد ذاته مسئولية كبيرة

و خايف أظلم اللي أتجوزها لأني هأطلب منها تكون حد تاني انا نفسي فيه و هي مش هتفهم أنا باعمل كده ليه و خايف يكون في ده خداع ليها

و خايف منجحش في الجواز و مسئوليته

و نفسي اعرف مراتي المدونة بتاعتي و مخافش من اللي كتبته هنا قبل كده

ساعات بيكون نفسي اتجوز واحدة مدونة تعرف المدونة هنا علشان تقصر علي حاجات كتير و خلاص و هي تبقي فاهمة كل حاجة

و خايف أكون أب فاشل و زوج فاشل

و كمان في نفس الوقت نفسي ميكنش في شئ حد يلوي ذراعي بيه يعني لو في أي وقت حبيت أسيب الشغل و مفكرش في حاجة و خايف أضيع من أعول و ادخل تحت حديث سيدنا محمد كفي بالمرء ذنب أن يضيع من يعول

و الظروف و الجو و البيئة اللي حوالينا خليت تربية الأولاد شئ صعب قوي وسط البيئة الفاسدة اللي إحنا عايشين فيها

و كمان في حاجة خايف أكون ضعيف قدام أولادي

يعني تخيلوا كده واحد ماشي في الشارع لا ليه و لا عليه يلاقي واحد بيرمي بلاه عليه في الشارع و طلع عربجي و لا حاجة الواحد هيعمل أية لو معه عيلته

و كمان تخيلوا لو واحد سايق عربيته و دخل شارع غلط و أتجاه عكسي ممكن يتحبس فيها

:)

.

الشغل

الحمد لله الدنيا تمام في الشغل و مدير المصنع متهاون معايا شوية و أنا بدات أدخل الجو الحمد لله بس لسه طالب مني حاجات كتير و عمال يطلب و يطلب نوع من أنواع بيديني فرص يعني و ربنا يكرم

الغريب في موضوع الشغل إني مش قلقان مش عارف إيمان الحمد لله إن شاء الله و لا لامبالاة و بطيخ لا قدر الله

.

أحلي ما في الحياة عيشة البطيييييييييييييييييييييييييييييييييخ

أصدقائي علي المسنجر عددهم قل الحمد لله لستاشر و علي الفيس بوك إنهار العدد للعشرينيات و من أخر شهر فبراير الحياة لوووووووووووووووز و بطيييييييييييييييييييييييييييييييييخ و معرفش حاجة عن أي حاجة

و السلام ختام

بأسأل في الدين

سبحان الله اليومين دول طلع فتوتين مش فاهمهم

واحدة من شيخ الأزهر تبيح نقل الأعضاء من المحكوم عليهم بالإعدام بدون أخذ موافقتهم و لا موافقة أهلهم

و أستند في حكمه علي إن جسد المحكوم عليه بالإعدام مش ملكه مش فاهم إزاي

في شيوخ معارضة و حتي الأطباء مش موافقة علشان بتقول إن لازم اللي يتبرع بأعضائه يكون مش مجبر و لا مقيد و غير فاقد لحريته و حتي لو واحد محكوم عليه بالإعدام وافق إنه يتبرع مش هيعملوا عملية النقل ده علي لسان الدكتور حمدي السيد نقيب الأطباء

أنا عندي سؤال لفضيلة شيخ الأزهر

مين اللي قال إن جسم المحكوم عليه بالإعدام مش من حقه علي قد ما فهمت يعني يمكن أكون أنا اللي فهمي قليل

ثاني حاجة هو المحكوم عليه بالإعدام ده خلاص الجرم اللي عمله أخد جزاءه ربنا يعني قال اللي يقتل نفسا بغير نفس يقتل ده حكم ربنا كان ممكن ربنا يقول ممكن نمثل بجسده بعد كده لو ربنا شايف إن الحكم بالإعدام غير كافي ممكن يكون اللي أتحكم عليه بالإعدام ده تاب توبة جعلته أحسن من أي حد مثل المرأة التي زنت و ذهبت لرسول الله اعترفت بذنبها و تابت

و الله اعلم

لو حد شايف إني فاهم غلط يوضح لي و أنا مش بأفتي أنا بسأل محدش يستهبل و يفهمني غلط

انا بأصلي بالعافية

.

الفتوي التانية

لا يجوز إجبار المواطنين علي دفع الزكاة بالقوة

و الفتوي دي من مجمع البحوث الإسلامية

انا قريت الشرح للفتوي دي و ملخصه إنه مش المفروض نجبر أحد علي إخراج زكاته و أين يخرجها و علي مين يصرفها

أنا سؤالي بقة

هو مش سيدنا أبوبكر الصديق رضي الله عنه حارب حروب كتير أستشهد فيها صحابة كتير علشان بعض الناس منعت فلوس الزكاة

و قال لو منعوني من شئ كانوا يعطونه لرسول الله لحاربتهم عليه

هي مش دي كانت فلوس الزكاة و لا أية؟

و في المسلسلات التاريخية الحمضانة الي بنتفرج عليها في حاجة أسمها بيت مال المسلمين كانت فلوسه بتتجمع منين

و يعني اللي عاوز يصرف فلوس زيادة محدش يعرف عنها حاجة يتصدق مش لازم فلوس الزكاة و الزكاة مش تتطوع دي فرض

علي ما أنا فاهم يعني

يعني لو واحد شاف واحد بيزكي بفلوسه مش بيكون رياء يعني زي الصلاة اللي بيشوف حد بيصلي الصلوات الخمس مش بيكون بيتفضل علي ربنا ده فرض عليه

اللي عاوز يتتطوع و يخلص مع ربنا بيقوم الليل مثلا

و الله اعلم

لو حد يعرف شيخ الأزهر او حد في مجمع البحوث و لا موافق علي الكلام ده ياريت يفهمني بجد

علشان أنا محتار و مش فاهم

و الله أعلم

EgyRec Again :)))

السلام عليكم و رحمة الله و بركاته

أزيكم يا شباب أخباركم أية؟

يارب يكون كله تمام

خلاصة البوست ده بدأت معارك ضارية في الشغل الجديد اللي أنتقلت له مع مدير المصنع و مدير الإنتاج مدير المصنع ده راجل فاهم قوي و المقابلة اللي عملتها معه هي تقريبا اللي شجعتني علي الإستقالة من الشركة اللي كنت فيها و أروح الشركة دي بس هو شخصية كويسة مقدرش أغلط فيه و لا أقول عليه و لا كلمة بس فاكر الناس كلها محترفة إكسل و تتطلب أي معلومة من أي حد تجيبه طلبه هو مش واخد باله إنه هو مدير المصنع و أنا مهندس إنتاج في واحد زيي فاهم الدنيا أكتر من و الخبايا أكتر مني و هو سبب الأزمة كلها الواد ده بقة من تاني يوم لي في الشركة الناس كرهتني فيه ومحدش شافني غير و قالي خلي بالك منه و اللي يقولي أنت صعبان علي شكلك طيب و هكذا و زي ما بيقولوا الزن علي الودان أمر من السحر كرهت الواد ده أساسا و هو واد أليطة أصلا و متعنطظ مش فاهم ليه مع إنه مكبر دماغه في الشغل الإشرافي اللي أنا بأقوم به بس هو رهوان في التخطيط الحقيقة و عارف الناس كويس و عارف شغله تمام و زكي مقدرش أنكر بس للأسف هي عصابة كبيرة و أنا سهل جدا أخترقها بس لازم أكون قوي فنيا في الشغل طبعا محدش فاهم حاجة بس مش مشكلة المهم النهاردة حصل نقاش بيني و بين مدير المصنع و قالي هأعتبر الكلام اللي أنت بتقوله مسمعتوش و نكمل بكرة و ربنا يستر و علي العموم انا جهزت الإستقالة خلاص و ماشي بيها في ظرف محترم و عند أي لحظة مستعد لكي أضحي

:)

مدير الإنتاج بقة هو مش فاهم أي حاجة في أي حاجة هو بيسمع للناس و خلاص و أهطل كده و العيل سموه في الإنتاج أسامي كتير قوي عم شكشك و القرد أبو سديري المشكلة هو مش فاهم حاجة يسمع من مدير المصنع كلمتين ينزل يقولهم لي انا طبعا بأكون عارف هو بيقول أية لأن مدير المصنع اللي فاهم كان قالي كده قبله و هو طبعا بيحاول يفهمني إن ده كلامه هو و هو أساسا مش فاهم يعني أية معدلات إنتاج و حسابها و كي بي أي و لا أي كفتة و العيال الشياطين اللي في الإنتاج خلوه يبوظ شحنتين و أنا مش عاوز أكون زيه كده

في شوية عيال في الإنتاج نفسي أحي لكم عليهم بس أنا هأقول لكم علي أتنين بس واحد أسمه محمد و محمد ده تخين قوي العيال مسمينه طن تخيلوا بتنادي علي واحد أسمه طن و في كمان الأستاذ كريم بركة طبعا أي شحنة بيشتغل فيها نقول الحمد لله لو مشيت في أول يوم بعد معاناه لأنه هو كما واضح من الإسم بركة بيخرب أي شحنة يشتغل فيها ده مرة ساب خرطوم المياة مفتوح رجعنا تاني يوم الشغل لاقينا صالة الإنتاج بحر و كان يوم بركة فعلا

.

الغريب و العجيب و الخزعبلي في الحوارات دي كلها إني مش خايف و مش زعلان و مش قلقان مش عارف ليه و لا حتي ندمان علي إني سيبت الشغل اللي فات

و الحمد لله أتعلمت حاجات كتير هي أينعم في شهرين بس أهوة أحسن من مفيش

أنا يعني مكملتش شهرين أهوة و خلاص قربت أودع الشغل ده بس الحمد لله مش خايف و لا زعلان

هو بيني و بينكم ربنا يستر بس انا مش متكهرب و منفض و دماغي في الخلعون خالص

غريبة قوي الموضوع ده هو ده اللي قلقني

.

المهم أستأذنكم بقة علشان أرجع مرة تانية لحسابي اللي علي موقع إيجي ريك علشان أبدا في مرحلة جديدة من البحث عن عمل جديد

و إلي اللقاء في ظروف أحسن من كده

:))

اللهم أجعله خير

السلام عليكم و رحمة الله و بركاته

أرخم حاجة في البوست ده إن مفيد هيفتكر إني خفت منه و كتبت بوست

المهم من كم يوم نفسي أكتب قوي قوي أية مش عارف

بس أنا الكتابة هنا بقيت إدمان عندي و الحمد لله حاولت أقلل شوية علشان مش ناقصة هي نكد و كأبة و كان نفسي أكتب حاجة تفرح بس يعني البوست ده شغال شوية مش نكد قوي يعني

:)

لما طلبت معايا كتابة و مش لاقي حاجة أكتبها فكرت أطلع مذكراتي الخزعبلية اللي باكتب فيها من زمان قوي و أول تاريخ شفته فيها كان 31 أغسطس 1998 يا نهار أبيض القرن الماضي و كان في محاولات قبلها كتير و أتقطعت بس بعد أما طلعت الكرتونة السحرية اللي مخبيهم فيها لاقيت نفسي كنت رغاي قوي بس هي مذكرات لذيذة قوي و الله و تحس كده إنها متختلفش عن هنا كتير بس أية قعدت أضحك ضحك و الله رهيب ثانوي بقة و ستاشر سنة و الكلية و التنسيق و أيام الكلية الأولي يااااه تاريخ

المهم الغرض من كتابة المذكرات الخزعبلية دي إني كنت فاكر نفسي هأطلع حاجة مهمة فكنت بأكتب الأحداث المهمة في حياتي و بعد كده بشوية تحول الغرض و هو الإحتفاظ بالحاجات المهمة في حياتي للإنسانة اللي هأحبها و أتجوزها و أقدر أطلع لها المذكرات دي علشان تعرف كل حاجة عني من زمان و منساش أحكي لها عن أي حاجة طبعا المذكرات اليومية هذه الأيام تتمثل في المدونة بالإضافة لبعض الأحداث اليومية اللي بأكتبها في أجندة سنوية المشكلة إن الأجندات كترت و بقيت ظاهرة قوي و مش عارف لو وقعت في أيد حد شكلي هيكون أية

.

المهم بعد أما فشلت في إختيار أحد المذكرات علشان أكتبها قررت أتكلم عن حلم حلمت به أمبارح خير اللهم أجعله خير حلمت بمين بالريس بالرغم من إن اللي بأحلم بيه بيحصله حاجة كده بعد بعد فترة بس الغريب إن في الحلم ده حبيت الريس مش عارف ليه صعب علي و حسيت إننا ظلمناه غالبا ده اللي فاكره من الحلم مش فاكر تفاصيل الحلم بس اللي فاكره إني في أخر الحلم كنت بحبه مش عارف ليه

.

من كم يوم كنت رايح عند خالي علشان تعبان المهم قدري ساقني لركوب توك توك الله يخرب بيتهم المهم الواد كان سايق و معلق علي الأزاز بتاع التوك توك كله دباديب مغطي الإزاز خالص و هو واد عنده بتاع خمستاشر سنة كده و سايق و مطلع دماغه برة التوك علشان يشوف الطريق و مركب سماعات زي الهباب ورايا و مشغل أغنية الدنيا دي أحوال كلماتها جامدة جدا علشان كده نزلتها في المدونة المهجورة بصرف النظر عن اللي بيسمعها و علو الصوت اللي بيشغلوه بيها و المطرب اللي بيغنيها أساسا بس كلماتها جامدة

.

يوم الخميس مدير المصنع اللي إعجابي بيه هو اللي شجعني علي ترك الشغل القديم و الذهاب للشغل الجديد تحول و اتخنق مني و هو طالب مني تقارير معينة كده من ساعة أما أشتغلت بس أنا مش عارف أعملها و مش فاهم هو عايز أية المهم هو قالب وشه معايا من كم يوم و كمان علشان أنا لما باشوفه مش بأسلم عليه خنقة أنا مش بحب كده أنا بحبه أة بس مش لازم أتمحلس له يعني

المهم نفسي كده أقعد مع نفسي أخلص الحاجات المطلوبة

المهم هو قالي هتخلص أمتي قلته يوم الخميس اللي جاي قالي ماشي هأسألك يوم الأربع عملت أية

بيهددني بسلامته ماشي يا هندسة

هتشوف

.

في اليوم الأخير من فبراير عملت شئ رهيب مسحت ناس كتير قوي من عندي علي الفيس بووك و الهوتميل و المدونة

ربنا يقدم مافيه الخير

ناس كتير جدا و مهمين قوي

يارب

.

كفاية كده بقة هأقوم أنام و أصحي بدري علشان أخلص الشغل اللي ورايا و ربنا يستر و أخلصه

بالمناسبة أنا جهزت إستقالتي و حطيتها في الدرج علشان أي كلب يفتح بقة معايا بالجزمة بعد كده و أقدم إستقالتي

مفيش حد ممكن يصحيني بدري

عاااااااااااااااا