Thursday, July 03, 2008

السلام عليكم و رحمة الله
مش عارف ليه من فترة نفسي قوي أحكي لكم عن يوم من أيام زمان اللي كنت بأقضيها عند جدتي الله يرحمها
أنا كنت بأقضي معظم الأجازة هناك و خميس و جمعة في الدراسة هناك بردوا و أي أجازة هناك حتي الأسبوعين اللي أخدناهم أجازة علشان الزلزال قضيتهم هناك
.
اليوم كان بيبدا معايا تقريبا الساعة عشرة كانت جدتي الله يرحمها تصحيني أو أصحي لوحدي الساعة عشرة أغسل وشي و أنزل أشتري فطار و نفطر مع بعض و أعمل شاي و أعمل لها نعناع كل ده في ربع ساعة تقريبا كله بسرعة علشان ألحق أتفرج علي برامج الأطفال اللي كانت بتبدا الساعة عشرة و ربع و طبعا كنت عيل صغير كنت مش بحب القرأن اللي بيشتعغل الصبح و الدرس الديني اللي بيليه علشان كانوا بيبعدوني عن وقت الأطفال
.
من البرامج اللي طبعا مؤثرة معايا يوم الأثنين صباح الخير بتاع ماما نجوي و بقلظ و الأربعاء كان بابا ماجد و الجمعة سينما الأطفال لماما عفاف الهلاوي و من أشهر الحاجات اللي كانت بتيجي فيه الكلبة لاسي و كان في كارتون مازنجر و كابتن ماجد و بابار
كانت المسائل دي كلها تخلص علي الساعة إحدعشر تقريبا و كنت بعد كده أنزل أروح لهاني صاحبي و أنا نازل أعدي علي عمرو أقوله أنا رايح عند هاني علشان يحصلني و كان يجي بعد شوية صديقنا هشام
.
و من أشهر الألعاب اللي كنا بنلعبها كريزي أيت أو التمانية المجنونة و كونكان و نلعب بالبلي وو نلعب بنج علي ترابيوة السفرة عند هاني علي فكرة هاني ده مسيحي و لا كان بيفرق معانا خالص و كنا يوم الجمعة نعدي عليه قبل و بعد الصلاة و مفيش مشكلة و كنا بنقوله تريقة ماتيجي تصلي معانا
.
بعد كده أرجع عند جدتي علشان الغدا و طبعا أقعد شوية و بعد كده أنزل مرة تانية أروح عند هاني و نقعد نلعب و نكمل لعب و كنا بنلعب ولد بنت و جماد أو نكمل أي حاجة تاني
.
و الساعة خمسة بالدقيقة لما الشمس تكون خفت ننزل نلعب كورة في الشارع و طبعا كان في ناس كتير مش بتطيق أهلنا و كانت متخصصة في رش المياة علشان منلعبش بس كنا بنستني ساعة تكون المياة نشفت من حرارة الصيف و نكمل لعب لحد بالليل لحد الساعة حدشر أو أتناشر و بعد كده أطلع أخد دش تمام طبعا لأني مش عاوز أقولكم كمية الطينة اللي كنت بأشيلها كنت بأكون لابس كوتشي و شراب و تلاقي الطينة مخترقة ده كله
.
و بعد كده أتفرج علي التلفزيون لحد الساعة واحدة و نص و طبعا باتعشي كنت و لازلت من عشاق الجبنة الرومي و بردوا كان في سهرات مميزة جدا لكن أكتر حاجة كنت بأحبها أخترنالك كان يوم الأربعاء و كنت بأعشق ماكيفجر بس لحقته في الأواخر و طبعا المسلسل الرهيب العجيب الفظيع الشنيع إكس فيلز
.
يروح هاني منادي علي و أطلع في البلكونة و عمرو يبص لنا من تحت و هشام يكلمنا من فوق و كنا بنطير طيارات ورق أو كيس بلاستيك و خلاص و ساعات كنا بنبهدل الشارع بحوالي مليون قطعة ورق كنا بنسميها عصافير الجنة لدرجة في يوم خفت جدا من كمية الورق اللي رمينها في الشارع و قلت بس هأصحي الصبح علي زعيق من جدتي بس الحمد لله الهوار بالليل قام بالواجب و داري أثار الجريمة
.
و ساعة الليل دي بقي كنا بنتكلم في حاجات كتير و نحلم كتير و نتخيل و نفتي و نقرع علي بعض
.
أيااااااااااااااااااااااااااااااااام
طبعا مكنتش سعيد بيها و كنت بأتخنق من الروتين اللي فيها بس الواحد ما كنش فاهم اللي جاي أية بس الحمد لله علي الأيام الحلوة دي
.
و بعد كده أدخل أناااااااااااااااااااام للصبح
لو طلبت معايا زكريات تاني هأكمل لكم تفاصيل أيام تانية

7 comments:

Miss Qatar said...

السلام عليكم ورحمة الله وبركاته

رحم الله جدتك واسكنها فسيح جناته

الحقيقة كنت تقضي اياما جميلة مع جدتك

وللاسف هذه الايام تحولت الى ذكريات

واسأل الله العلي القدير ان يجمعك بها في جناته حيث لايوجد هناك موت او مرض

واتمنى ان تشرفنا بزيارتك لمدونتنا

http://missqtr.blogspot.com/

تحياتي لك

kochia said...

فكرتني بايام الطفولة لما كنت بسافر في الاجازة عند جديتي بالشهور
وكانت احلي ايام وتترك احلي الذكريات مرح الطفولة وبرائتها وشقاوتها ايضا

رحمهم الله جميعا ان شاء الله
تحياتي

يا مراكبي said...

ماما نجوى كانت بتيجي كمان يوم الخميس الصبح

وسينما الأطفال كان بييجي فيها السيرك

ذكريات بالذال على فكرة

:-D

esraa said...

في حاجات كتير مش بنعرف كانت جميله ازاي غير بعد ماتضيع وماينفعش انها ترجع

ربنا يرحمها يارب ويجمعنا بيها في الجنة

mulan said...

ازيك يا محمد يا رب تكون كويس
عندك حق احلي ايام هي ايام مكنا صغريرين في كل حاجه وفعلا مبنعرفش قيمتها غير لما نكبر انا عن نفسي كان نفسي افضل صعيره علي طول ومكبرش ابدا وعمري مكنت بتخنق من الايام دي غير من المزاكره يلا يا محمد تعيش
وتفتكر وتحكي الزكريات دي
سلام

Hu-man said...

ياااااه..ياراجل قلبت عليا المواجع
مازنجر وكابت ماجد وسينما الأطفال ..فين الأيام دي
..
أنا فاكر لحد دلوقتي عالم الحيوان بتاع الجمعه والموسيقى بتاعته ..وياسلام على سر الأرض...هههههههه..فكرتني بالذي مضى

حزيــــــــــــــــــن said...

هبقى اجى اعلق تانى
احمد مهنى