Saturday, May 24, 2008

أقدر أقول الجملة الإعتراضية الأشهر في مصر بصوت عالي
السبب إن أنا أقول الجملة دي
هي الأخ الظريف أو مجموعة الأخوة الظرفاء اللي في المحل اللي تحتنا تخيلوا عند بداية قدومهم من كم شهر تقريبا فتحنا لهم شقتنا علشان يجهزوا المحل و اليفطة الخاصة به و كان جزائنا و شكرنا يتمثل في تشغيل الساوندات طوال اليوم علي أعلي صوت و أعلي باز لدرجة مش بنعرف ننام خالص و لا نرتاح طول ما الأرض بالسرير بيتهزوا من كتر الدب
ده أولا
ثانيا بقة طلعت في دماغهم يركبوا تكييف طبعا هيركبوه فين عندنا إحنا في البلكونة بتاعتنا طبعا إحنا قلنا لهم لأ علشان طبعا الغسيل مش هنعرف ننشر ثانيا علشان حرارة التكييف ده هتخلي الأوضة اللي هيتحط قدمها التكييف حر غير إننا قافلين الشباك أساسا علشان الصوت العالي
المستفز بقة كمان إنهم بعتوا بغل من عندهم يستأذت تاني طبعا قلنا لا قالنا و هو مدينا ضهره كده كده التكييف هيتركب
تخيلوا حال البلد بقة كده فتونة و بلطجة
طبعا المحل ده من مجموعة محلات تبع بعض في بيع الموبيل
طبعا و حياة أمهم التكييف مش هيتركب و لو أتركب و أحنا مش في الشقة هيتكسر علي دماغ أهلهم و اللي يتشدد لهم سواء بقة ظابط و لا عضو مجلس اللي بيتحاموا به خلاص بقة طفح الكيل بهم
و الله المستعان
*
يوم الخميس كان حفل توقيع كتاب مدونات مصرية للجيب و طبعا رحت برفقة صديقي محمد مفيد أنا مكنتش ناوي الحقيقة أشتري الكتاب بس الغريب إني أكتشفت إن في ناس كتير قوي أعرفهم ليها بوستات في الكتاب أشتريت الكتاب و لفيت عليهم علشان أحصل علي توقيعهم
بس للأسف كان في ناس أعرفها و معرفش شكلها و معرفش كانت موجودة و لا لا
المستفز بقة كمان في الحفلة كان مجموعة جت علشان تهاجم أحمد مهني علي بوست كتبه أنا لحد دلوقتي مقريتش البوست و مش عارف أوصله
بس اللي نرفزيني الأخوة الحماسيين اللي جايين يهاجموا أحمد مهني و اين هذا اللي مش عارف أية و ما هو تعريف المدونة المحترمة من وجهة نظركم و هؤلاء الناس مخدوعين و لازم نفوقهم و علي الطلاق بالتلاتة مش عارف أية و هو لابس لي حتة جدلة في أيده بيفكرني باللي لامؤاخذه
يعني خلاص هو مش عارف يعمل حاجة مع حد غير أحمد مهني
ما يروح يتشطر علي اللي فاشخين أفكارنا من عشرين سنة و عمالين يفتحوا قنوات قليلة الأدب و لا خلاص هو مش قادر علي الحمار جاي يتشطر علي البردعة يا عم أحمد مهني غلطان فرضا يعني بلاش بقة تعملي عنتر شايل سيفه و لا إحنا مش بنتشطر علي بعض و جايب لي ناس معاه قال يعني هيخوفنا و صحفية باين و واحدة أجنبية هتلاقي مقال محترم نزل مش عارف فين هؤلاء مثقفين مصر هذه هي مصر التخلف طبعا كان في ناس عنترية بردوا في جانب احمد مهني أحلي حاجة إن أحمد مهني مكنش منفعل عادي جدا
و الله يا أحمد الرجل اللي عمل عنتر معاك ده لو عسكري أكله قفا مرة مش هتسمع له صوت تاني
أنا نفسي بقة أقرأ البوست دلوقتي لو حد يعرف اللينك بتاعه يبعته
طبعا أنا عارف إن الرجل اللي هاجم أحمد مهني مش هيدخل هنا علشان كده واخد راحتي
طبعا ظهرت في اللحظة المناسبة فرقة أبناء مصر و أحتوت الموقف بقيادة مها و محمد هانئ و واحد مش عارف هو مين و طبعا مفيد أختفي في الحاجات دي رجولة طول عمره
و أتفقوا يقعدوا مع بعض و يتناقشوا
هو كلام جميل بس علي أية
يعني أحمد مهني مش زعيم وراه ناس هيقولهم كده هيقولوا أمين يعني
و لا إحنا نيجي مش عارف فين و نشمها حاجة تقرف
الموقفين دول يؤكدوا لي قناعتي بإننا لازم نمر في مرحلة العنف الشامل في البلد يعني حاجة كده زي الثورة الفرنسية و لا الحرب اللبنانية و لا حرب العراق يموت نصفنا النصف الأخر علشان نقدر نعيش محدش يقول إن البلطجية قليلين لا هم كتير و في كل مكان و مجال و ممكن هم اللي يكسبوا في الصدام اللي أتوقع و أتمني إنه يحصل بسرعة بقة لأنه كده كده هيحصل
أنا كده أرتحت
****
بخصوص حفلة التوقيع
سعيد جدا بها علشان شفت ناس كتير و الصورة الوحيدة اللي أتصورتها أتصورتها مع يا مراكبي المهندس أحمد تخيلوا الرجل جه من السفر مخصوص علشان يحضر الحفلة و يرجع تاني
و سعيد قوي إني لاقيت ناس كتير أعرفها كويس منزلة بوستات في الكتاب و شفت ناس كتير
زي إنسانة و الأستاذ عصفور المدينة و الباشمهندس المراكبي و كمان لأول مرة أشوف مها من أبناء مصر بسمع عنها من زمان و لأول مرة بأشوفها و أنا مشردتيش لها أهوة علشان هي خافت من كده
و طبعا شفت ناس من فترة مشفتهمش
رشا مكان في القلب و سمرا النيل و طارق و محمد هانئ بالرغم إنه مش عارفيني و أحمد الهواري و أشرف توفيق و طبعا أحمد مهني و البوهي و المتألقة دايما مريم و ناس كتير عارف شكلها و مش عارف إسمها بس الواحد بيكون سعيد لما بيشوفهم
و كان في حد المفروض يجي و مجاش و الله يسامحه
.
مروة حمد لله علي السلامة و ربنا يتقبل و يستجيب لدعائك
.
أبليت بلاء حسنا في الأمتحانين اللي فاتوا و أمتحان بكرة لحد هذه اللحظة مقريتش فيه حاجة يعتبر ده عيب الإنسان
.
الزمالك دقيقة حداد
.
كفاية بقة كده علشان أقوم أتنيل أذاكر
سلام

9 comments:

AHMED SAMIR said...

طبعا مش هابقى ساذج ومش هافترض فيك الطيبة المفرطة وانك هتصدقني
لو قلت لك روح اعمل لهم محضر ازعاج في القسم
لأن دة طبعا حل نيويوركي بحت ولا يناسب مصرنا الغالية اللي ليها خصوصية
اما بخصوص الزمالك
اسمحلي ادعوك انك تقف 45 دقيقة حداد
تحياتي واحتراماتي

Unknown said...

لالالا بس ماتنساش ان الصورة الوحيدة اللى اتصورتها مع يا مراكبى انا اللى خدتهالكم هههههههههههههههههههههه

ايه الذل ده .. لا والله بس انبسطت اوى وانا بصوركوا

كان يوم تحفة بصراحة

mariam said...

انا بعلق اهو يا محمد
شايفنى بعلق اهو

اولا البلطجه هى الحل حاليا
اعمل محضر عدم تعرض و اوعى تسكت لهم علشان يعرفوا ان الموضوع مش سهل

مرحلة العنف الشامل بقى ربنا يستر الواحد مش عارف يتفائل

بالنسبه للناس اللى كانت بتهاجم احمد مهنى
يمكن الأسلوب كان اوفر شويه رغم انى مختلفه معاه جدا بس شفت ناس اتناقشوا معاه بأسلوب احسن من كده و هو كان بيرد بهدوء
بس مش معنى كده نقول هما حلوا كل حاجه و مش باقى غير الموضوع ده
احنا لو قلنا كده على كل حاجه يبقى مش هنحل حاجه
و بلاش تدور على البوست لأنه مسحه لو عايزه قولى انا اعرف مدونات تانيه نشرته
بس فعلا كان يوم جميل و سعيده انى شفتك و شفت ناس كتير كنت مفتقداهم

علقت اهو ماشى

مـحـمـد مـفـيـد said...

ليه مريم بتعاملك كده ؟
مش مهم
تصدق بقي انا عايزيهم يطلعوا يركبوا التكييف بالعافيه علشان اشوفك وانت بتتخانق
:)))))
ولا بلاش
اعمل لهم محضر عدم تعدي بجد
وانا كمان زعلان من اللي مجاش
وأكيد هو عارف نفسه
بس انا متأكد ان في حاجه مش خليته ييجي
أكيد عنده عذر

مـحـمـد مـفـيـد said...

وكمان أنسانه بتذلك علشان الصوره
لاحول ولا قوه الا بالله
الناس دي بتعملك ليه كده

No Fear said...

a.samir
السلام عليكم
منور حضرتك
الحمد لله شكلهم عقلوا و بيفكروا في حل أخر
تسعين دقيقة حداد ياعم علي الزمالك بس يارب يكون عند أهلهم دم و يفرحونا النهاردة
سعيد بزيارتك

No Fear said...

إنسانة
السلام عليكم
و الله فعلا أنا مش عارف أشكرك إزاي علي الصورة الجميلة دي
عندي صورة ليكي أنت و سمرا أفوق من الأمتحانات بس و أبعتهالكم
فعلا سعيد بمقابلتك و مقابلة جميع المدونين اللي أتشرفت بمعرفتهم
فعلا كان يوم رائع

No Fear said...

مريم
السلام عليكم
كويس كده إنك علقتي بس مش لازم كل مرة أكتشف إنك بتتدخلي و مش بتعلقي مش حلو كده هيكون لي تصرف تاني و أستقيل من اللي بالي بالك و أكتب إن ده السبب
بعون الله أفوق بس من الأمتحانات و أمسك اللي مضايقك في اللي بالي بالك و أجيب أتنين بلطجية من تحت و نكله علقة نخليه يطفي مينورش تاني
:))))))
الحمد لله الموضوع بتاع التكييف شكله بيتحل ودي يعني
هي دي مصر يا مريم
سعيد انا كمان إني بأشوفك بإستمرار بس نفسي نقعد نتكلم مع بعض دايما بيكون الجو زحمة و مكهرب
بس سعيد أكتر علي توقيعك و تعليقك ماشي ياريت نفضل كويسين كده علي طول
:)

No Fear said...

مفيد
السلام عليكم
مالكش دعوة الناس كلها تعاملني زي ما هي عاوزة أطلع بس أنت منها
هي تقولي كده علشان أنا أكتشفت إنها بتتدخل و مش بتعلق يافندم فهي هي علقت يعني
تموت في المصايب أنت
بس الحمد لله الموضع خلص وديا يا حريقة
سلام يا شهبندر
انا علقت علي الموضع ده للعلم عند محمد أبوزيد