Saturday, May 31, 2008

مش هي دي بلدي يا جدعان
بأشهدكم إني دي مش بلدي
مش هي دي بلدي اللي و أنا صغير كنت بأقعد أقرأ أدهم صبري و كنت بأتمني العمر يجري بيا علشان أكون زيه
مش هي دي بلدي اللي لما دخلت كلية العلوم أتمنيت إني أكون زي د زويل و أرفع أسم مصر
مش هي دي بلدي اللي مستعد أضحي بنفسي فداها
مش هي بلدي اللي نفسي ولادي يتولدوا فيها علشان مش هيلاقوا مكان ليهم فيها
مش هي دي بلدي اللي كنت بألعب فيها مع صاحبي هاني المسيحي و مش حاسس بحاجز بيني و بينه
أنا غريب في البلد دي
حاسس إني سافرت و سيبت بلدي أمتي و إزاي مش عارف
أمتي بقة هأرجع بلدي
و هو يعني أية كلمة بلدي

8 comments:

smraa alnil said...

ياااااااااااااااه يا محمد
وجعتني اوي

وخلتني افكر اني مش ليا بلد
هي البلد دي عبارة عن ايه

ارض ولا حكومة ولا شعب

لو علي الارض يبقي الارض دي مش بتاعتنا

لما الارض تبقي بملايين الملاين ومش لينا
مش تبقي بلدي

لما الارض يتزرع عليها السم والمبيدات
تبقي مش ارضي

لما الارض تتسرق من ادام عيني وعيني عينك كدة تبقي مش ارضي

لو علي حكومة يبقي هي والله ما بلدي

لو علي الشعب

مش هو دةالشعب اللي بقي يفرق بين مسلم ومسيحي

مش هو دة الشعب اللي بيقتل امه وابوه
مش هو دة الشعب اللي بياكل اكل اليتيم

ويوقولك الشعب غلبان وعلي اد نياته

وفي نفس الوقت يقولك العشب واعي وعارف اللي بيحصل

و مين الشعب في دول
انا وانت ولا ومين

هي مش الحكومة دي من الشعب

هي الارض دي مش عايش عليها الشعب والحكومة

هو ينفع الواحد يعيش علي ارض لوحده
لو ينفع هيبقي لينا بلد

بس اقولك

انا كمان مش ليا بلد
ونفسي الاقيها

صاحب المضيفة said...

رائعة بجد يا محمد

تسلم ايدك على ما كتبت

بجد تحفة ربنا يبارك فيك ويحفظك يارب



تحياتي

karakib said...

هي هي صدقني
لكن فيروس الصمت انتشر
و احد اهم اعراضه السلبيه
المرض هو الصمت
و العرض ... حاجات كتير زي اللي قلت عليها

رفقة عمر said...

برضه مهما تكون لازم نفضل نحبها لانها اسيره زى ما احنا اسرى على ارضها لازم نتتحملها لغايه ما تتحرر من اسرها

مالك الحزين said...

مهما يكون انا من البلد دى لو حتى بقت خرابة

مـحـمـد مـفـيـد said...

عارف يا محمد
لما ييجي عليك الوقت وتلاقي ان حب البلد ده بقي شئ صعب اوي
كلنا كده بنحبها وهنحبها رغم كل المراره والقسوه

زهرة الياسمين said...

فعلا كلام موجع يا محمد
بس بإيدينا نقدر نرجع بلدى و بلدك

kochia said...

هي بلدنا
واتمني انك تكون زي ادهم وزي زويل
وحاول
بمحاولتك هتبقي برده بلدك
لو بطلت تحاول هتبقي غريب اكتر من كدة وانت فيها
العيب مش في البلد
العيب فينا احنا
بطلنا نحاول واستسلمنا