Saturday, February 02, 2008

السلام عليكم و رحمة الله و بركاته
أزيكم يا شباب
صدق الذي قال إننا نتخلص من نصف همومنا عندما نتكلم عنها فعلا مقولة في الصميم أخت مدونة في الصميم بجد ياشباب قضيت يوم فضفضة جميل مع منذر و مفيد
أبدأ منين
.
اتصل بي مفيد و أتفقنا علي المقابلة و طبعا كنت في أمس الحاجة لها و قلتله ماشي علي طول علشان اللقاء مع الناس دي بجد بقي البنزين بتاعي في الأيام اللي فاتت دي و بجد ربنا يجازيهم خير علي اللي بيعملوه معاياو الحمد لله إن ربنا عرفني بهم في الفترة دي من حياتي
المهم شوية كده و أتصل تاني و قال مش هينفع نتقابل بجد زعلت جدا جدا جدا المهم رحت الشغل و أنا مروح لاقيت مفيد بيتصل بيا و يقولي تعالي إحنا في وسط البلد بجد كنت هأطير من الفرح كان نفسي أقابلهم قوي المهم طلعت بمعدات الشغل عليهم علي طول و أتقابلنا و الحسيني كلمني و قال لي إنه مسافر المهم قعدت أنا و مفيد و منذر علي القهوة شوية و بعدين طلعنا علي الكورنيش و كان الجو تلج و كنا علي النيل علي طول الموج بتاعه كان بيغرقنا بجد مش تهريج المهم كل واحد اتكلم عن نفسه مفيد أتكلم عن حياته شوية و بعدين أنا أتكلمت عن أكبر مشاكل حياتي و منذر كذلك
.
بالنسبة لي هم الأتنين صدموا من الكلام اللي قلته لهم و خصوصا منذر مش عارف ليه و بعد كده و حسيت أن زعل من نفسه حس إن مشكلتي تقريبا أكبر من مشكلته و هو حاله أحسن من حالي
.
و بعد كده أتجهنا للسينما و دخلنا فيلم الجزيرة هو فيلم درامي بس أنا و مفيد كنا قالبينه كوميدي لدرجة الرجل اللي جنبي و الرجل اللي قدام مفيد كانوا مش طيقنا من كتر الضحك اللي ضحكناه علي دور عبدالرحمن أبوزهرة واخد بالك يا مفيد
بس و بعد كده روحنا و من ساعتها باتصل بمفيد و منذر محدش بيرد مش عارف ليه ربنا يستر
.
مش عارف في حاجات كتير قوي نفسي أتكلم عنها تاني مش عارف إزاي
بأحلم تكون البلد دي كويسة و حلوة و نظيفة
بأحلم بالناس تبقي نظيفة كده
بأحلم بالناس تبقي مش شايلة هم
بأحلم بالأطفال تلعب و هي صغيرة
بأحلم بالأطفال تتربي كويس
بأحلم الأخلاق و الرجولة و الشهامة ترجع تاني
بأحلم يكون قلبنا علي بعض و بنحب بعض
بأحلم تختفي الطوابير من حياتنا أو علي الأقل متزيدش يعني
بأحلم نبقي منظمين
بأحلم لما نشوف لوحة ممنوع الدخول محدش يدخل مش لازم يوقفوا أمن
بأحلم نبقي ملتزمين
بأحلم أبقي دكتور و أعالج الناس ده مش هيتحقق طبعا مش مشكلة
بأحلم إن الدكاترة يكون قلبها حنين علي المرضي
بأحلم المرض نفسه يختفي أو يقل
بأحلم الجهل يختفي من حياتنا
بأحلم خلق العربجية تختفي من حياتنا
بأحلم بالبلطجة تختفي من حياتنا
بأحلم الفقر يختفي من حياتنا
بأحلم الشحاتين يختفوا من حياتنا
بأحلم اليأس يختفي من حياتنا
بأحلم الأمل يرجع تاني لحياتنا
بأحلم الدفء يرجع لحياتنا
بأحلم الأمن يرجع لحياتنا
بأحلم قلة الأدب تختفي من حياتنا
بأحلم الإنحلال يختفي من حياتنا
بأحلم أذاكر و أخد الماجستير و الدكتوراة
بأحلم بشغل أحس فيه بنفسي
بأحلم ربنا يرزقني فرصة حياة جديدة في مكان جديد
بأحلم أرجع أفرح تاني
بأحلم بيها ياريت الأقيها بقة
بأحلم إني أحس إني من أهل الزمن ده و أتأقلم علي العيشة فيه
و أديني عمال أحلم يعني مش حرام
و ربنا يحقق كل الأحلام دي مفيش حاجة صعبة عليك يارب
.
و لا تيجوا أحلم حلم تاني
لا بلاش نكد
.
مش بقدر أعدي بوست من غير نكد بحس أنه مش أنا
عندي شعور عجيب حاليا مش عارف سعيد و لا مش سعيد مش عارف عندي حالة من الرعشة كده مش عارف في أية بجد مش عارف أنا فرحان و لا زعلان و لا قلقان أيوة هي قلقان بس ليه و لا من أية مش عارف و حالة بجد عجيبة مش لاقي لها وصف بس مش مرتاح هو ده ملخصها
يارب تعدي الحالة دي و أخلص منها

20 comments:

رفقة عمر said...

انت تقريبا قلت كل الاحلام اللى معظم الناس اللى بتحلمها ربنا يحقق لك كل احلامك اللهم امين
طالما انه خطر فى بالك يبقى اكيد مسيره يتحقق ربنا يوفقك وياااااااارب تفضل سعيد وفرحان على طول
ربنا يكرمك يارب

mesh2dra said...

السلام عليكم

ربنا يحقق لك احلامك واحلام غيرك ياارب



عندي شعور عجيب حاليا مش عارف سعيد و لا مش سعيد مش عارف عندي حالة من الرعشة كده مش عارف في أية بجد مش عارف أنا فرحان و لا زعلان و لا قلقان أيوة هي قلقان بس ليه و لا من أية مش عارف و حالة بجد عجيبة مش لاقي لها وصف بس مش مرتاح

يعني نقدر نقول واقف في مرحلة الوسط
ممكن حالة ازبهلال؟
أو حالة اللي واقف يتفرج بس وهو سرحااان

طيب
مانستغل الحالة دي
بما انها لا نكد ولا فرح
ونجبرها على انها تتحول لفرح
تبقى شخصية سعيدة بمعنى اصح

عود نفسك على انك تضحك لكل حاجة
حتى المصايب
عشان يحصلك مناعة منها
وتقدر تفكر بشكل سليم يخرجك من المشكلة

صدقني محدش له غير ربنا

الله يعينك

سلاماتي

Monzer said...

بجد جمعة جدا مش ممكن

قعدته أصلا كلها ضحك

وبيضحك كتيييييييييييييير جدا

هو فى الحقيقة فعلا عنيه فيها لمسة حزن ماتغلطش فيها العين

لكن فيها قدر من البراءة الى ماشفتهوش فى عين حد قبل كده، عينه فيها حاجات كتير

علشان كده كنت مستغرب ان حد زيه يكون عنده الضيق أو الزعل ده كله

مش قادرة تيجيى معايا

بجد نفسى أي حد يضايقه أروح أغزه بحاجة كده

او اعمله محاكمه .. وأقوله انت قبل ما تقوله حاجة تضايقه مابصتش فى عينيه ولا انت البعيد اعمى العين والقلب كمان

جمعة فى زمن غير الزمن والله

بس أكبر ميزة عنده غير كل الميزات الى نفسى تبقى عند كل كل الناس
انه يملك ضمير حقيقى


فهمت يعنى ايه نفس لوامة او ضمير صاحى من تعاملى مع جمعة


يملك ضمير يخليه مايغلطش أو يخليه يندم على أقل أقل الأشياء

ضمير يخليه يفكر فى راحة كل الناس وسعداتهم ..

يخليه يفكر فى تصرفاته هل هاتزعل حد منه .. طب لو هاتخلى حد سعيد

يا بنى لو ليا اخت كنت بليتك بيها والله

كنت هاخطفك واجوزك غصب وبلطجة


ربنا يسعدك يا أبو حميد

وفعلا أحلى وأسعد الاوقات الى بقضيها معاك ومع مفيد


وبس ايه رأيك فى عبد الرحمن أبو زهرة

هههههههههههه

سلام يا جميل

sarah la tulipe rose said...

:))
احلامك يا ريت تتحقق فعلا ..مش عارفة احيانا الواحد بيحس انه في بلدنا حتي الحلم مش من حقك..الاكثر ايلاما اننا مكتفين بالحلم و بس..لا وكمان الخوف في اليوم الي كمان نخاف فيه نحلم
بالنسبة لان الواحد بيحس بحزن من غير داعي دة واقع عند الناس كلهم,,يعني ممكن نقول من كتر السعادة الي احنا فيها زهقنا و قلنا نغير بقي شوية!!

MerMaid said...

هممممممممممممممممممممممممممم

مبسوطة قوي انا من كلام منذر عنك
:)

ازيك؟
بوست طمنني عليك شوية يارب دايما

تحياتي

sherehan84 said...

عندي كلمه مش عارفه هي رخمة ولا هتتقبلها مني عادي
ابدأ بنفسك
لو كل واحد بدأ بنفسه هنبقى ناس غير الناس وهتبقى دنيا تانيه ..
يارب أعيش وأشوف كل أحلامك تتحقق وبخلم معاك ان الحروب تنتهي والدم ميترماش على الأرض بالسهوله

smraa alnil said...

انا مش هقولك غير اني زعلانة منك جدا جدا جدا

لاني كنت كلمتك واتفقت معاك انك تنزل وتقابلنا

وانت بتقول انك كنت محتاج تخرج

دة مش كان رايك لما كنت كلنا بنخرج

دلوقتي انت حطيت نفسك مع فئة هي طبعا لا غبار عليها وانت عارف وهما عرفين اني بحترمهم وبحبهم جدا

بس ايه اللي كان يمنع انك كنت تيجي

هي خروجتنا كانت وحشة قبل كدة يا محمد

عامة يا سيدي مش هتصل بيك اعزمك علي خروجة تاني بعد كدة

No Fear said...

أختي رفقة
السلام عليكم
يااااااااااااااااارب

No Fear said...

مش قادرة
السلام عليكم
ربنا يتقبل منك
ممكن أنا مزبهل
:)
ربنا يقدرني علي تحويلها للفرح
فعلا مفيش لينا غير ربنا بس سهل الكلام سعب الفعل محتاج مجاهدة كبيرة
ربنا يعينا عليها يارب
ربنا يكرمك

Anonymous said...

كلنا لنا نفس الحلم بس مش بنعمل بالقدر الكافى لتحقيقه

saso said...

وانا اقولك ايه بعد اللي قاله منذر في حقك
ده قال فيك شعر.. ربنا يكرمك بصداقته دايما وصداقة مفيد طبعا

الفيلم حلو؟
ربنا يحققلك ويحققلنا كل اللي نتمناه ف الخير

ahmed mefrh said...

السلام عليكم
اول نقطه تحدثت فيها انا معك على طول الخط فعلا الواحد لما يكون كاتم احزانه بداخل قلبه و يخرجها يحس ببعض الراحه حتى و لو المشاكل دى متحلتش

اما الاحلام فجميعنا نشاركك فيها و لكن نحب ان نكون اهلا له و ان نكون فعلا من صناعها على ارض الواقع
اتحياتى ابو مفراح

No Fear said...

منذر
السلام عليكم
الله يسامحك مش عارف رد عليك و مش عارف أرد علي بقية الناس كتبت تعليقات قبل كده بس حسيت إنها مش كويسة مسحتها تاني و مردتيش علي حد تاني
الله يسامحك
ربنا يكرمك

No Fear said...

sarah la tulipe rose
السلام عليكم
حظك حلو بأرد عليكي و أنا في حالة كويسة
إن شاء الله في أمل بس محتاج مننا تعب و جهد كبير مش قليل
انا شخصيا مش شايف حل لحالتي الشخصية غير السفر بس مادام ربنا مش موفق يبقي نجتهد لأقصي درجة علشان يكرمن
و ياريت نبقي كلنا أيدينا في أيد بعض
يارب

No Fear said...

mermaid
السلام عليكم
متصدقيش منذر قوي يعني هو طيب و جدع و مش يعرف الجانب السئ مني يعني

ربنا يسعدك و يكرمك يارب
شكرا لك قوييييييييي

No Fear said...

شيريهان
السلام عليكم
ازعل ليه أنت مش بتقولي حاجة غلط انا اللي مزعلني من نفسي إني مش قادر أغير نفسي مش عارف ليه
ربنا يحقق لنا كل احلامنا يارب و يجعل فيها الخير
علشان ساعات بنحلم و ندعي و إحنا مش عارفين الخير فين

No Fear said...

سمراء النيل
السلام عليكم
منورة المدونة
إن شاء الله متكونيش لسه زعلانة
علشان أنت زعلك وحش و مفترية شوية

No Fear said...

hend
السلام عليكم
يارب يحقق لنا كل أحلامنا و يساعدنا علي العمل علي تحقيقها و يجعل فيها الخير

No Fear said...

ساسو
السلام عليكم
منورة
و الله منذر هو اللي طيب و جميل قوي علشان كده بيشوف الناس كلها حلوة
انا أتمني أكون زي اللي بيقول عليه بس أنا مش كده يعني
في جوانب سيئة ميعرفهاش عني يعني
ربنا يكرمه
ربنا يحقق لنا كل أحلامنا يارب

No Fear said...

أبو مفراح
السلام عليكم
منور حضرتك
فعلا أنا حسيت بكده بجد
ربنا يحقق لنا كل أحلامنا و يوفقنا يارب