Saturday, December 01, 2007


السلام عليكم و رحمة الله و بركاته
الواحد مخنوق و زهقان اليومين دول بالرغم من إن الحياة الحمد لله حلوة بدرجة كبيرة بالنسبة للسابق بس زهقان و عندي حالة ملل غبية كان نفسي أقابل منذر و مفيد و الحسيني و ابن ناصر و مازن لكن للأسف المقابلة لم تتم و أتأجلت المهم مبدئيا نسمع أحلي سلام بمناسبة فلتان منذر من الجيش
المهم اللي أهم من منذر يعني
حاولت أذاكر كتير و كنت بأبدا بس مش بقدر أذاكرو بزهق علي طول مش عارف كبرت في دماغي أخرج و معرفش أية اللي فكرني بحديقة الأزهر أو الأزهر بارك علشان الناس الهاي اللي بتدخل المدونة المهم بعد معاناة و مجاهدة كبيرة كادت تودي بوجهي و أنا بحلق و مكسل إني أروح الحمد لله قدرت أروح بس قبل كده كان نفسي أروح مع حد أي حد حاولت أفكر في حد من صحابي مفيش مش محدش وافق أنا اللي مقلتيش لحد عارف هنتكلم في أية و هنقول أية ملل جم يعني كثير و كنت عاوز أعمل عملية ريفريش لنفسي و دماغي المهم و أنا رايح قلت أخد معايا كتاب اللي هو خير جليس أشتريت كتاب مذكرات أرنستو تشي جيفارا و أشتريت المصري اليوم و رحت الحمد لله و لفيت البارك كلها تقريبا و أخترت إني أقعد عن البحيرة و كان في مجموعة مش عارف هندسة فنون جميلة او تطبيقية بس عيال شكلها حلو كده زي بتوع الحزب الوطني عمالين يرسموا رسم هندسي و أنا قعدت جنب واحد منهم و أشتريت زجاجة مياه و كنز و شغلت الموبيل علي فيروز و قعدت أقرأ في المصري اليوم زهقت قفلت الموبيل و قفلت الجرنال و قعدت أتفرج علي البحيرة و اسمع صوت النافورة و الوقت عدي المشكلة أنه عدي من غير أما أفكر و لا أرتب و لا أعمل ريفريش لدماغي بس كنت مستمتع بصوت الميا و الخضرا و الهوا و الأطفال كبرت في دماغي في الأخر و قعدت أصور الحديقة بالموبيل و طبعا أحرجت إني أطلب من الناس أنها تصورني لوحدي يعني
أخيرا لا يسعني غير التوجهة بالشكر لساسو علي تشجعيها أياي للذهاب لحديقة الأزهر و أشكر أولاد أختي أنهم خنقوني الصبح و شجعوني علي الخروج من البيت
عناوين الأخبار
قدمت في اليانصيب الخاص بالجرين كارد يمكن ربنا يكرم و أسافر
.
مؤتمر أنابوليس محدش حس به زي الحقنة اللي سميرة أحمد أديتها لصالح سليم في فيلم الشموع السوداء
.
بدات مرحلة جديدة في الشغل
.
بدأت مرحلة جدية في حياتي كلها أو مش بدات حاسس بتغيير يارب يكون للأحسن
.
الخروجة القادمة أحتمال ادخل فيلم ماجيك او هي فوضي
.
نفسي يكون معايا بني أدمين في الخروجة اللي جاية
.
هو ليه مينفعش الواحد يعيش و يستقل بحياته
.
مشروع الجواز بدأ يخطر علي بالي و بفكر في واحدة يعني هي كده شكلها هتتخطب علي طول
.
مش عارف عاوز أدخل في مشروع تجاري أية هو مش عارف مع مين مش عارف بس عاوز أدخل و خلاص
.
الدفا اليومين دول روعة يسلام علي اللحاف مع البطانية
.
أدعو لي ربنا يكرمكم
الصور

في صور تاني بس تعبت من تنزيل دول

16 comments:

رفقة عمر said...

مش هاقول غير ربنا يحقق لك كل ما تتمناه اللهم امين يارب لعالمين
وتخرج من حاله الملل دى سريعا جدا
اللهم امين

رفقة عمر said...

على فكرة لينك الصور مش يفتح مش فعال

No Fear said...

السلام عليكم
رفقة العمر
أنا مكنتش لحقت خلصت البوست لما أنت كنتي بتعلقي
أنت عرفتي منين إني بنزل بوست مش عارف
أنت متتصوريش فرحتي أنك بتعلقي عندي
يارب أكون أستاهل صداقتك
علي فكرة البارك جميلة قوي ياريت تكوني روحتيها أو تروحيها قريب
ربنا يكرمك يارب
بجد أنا فرحان قوي

مـحـمـد مـفـيـد said...

حبيبي محمد
أعلم مدي تقصيري معك الفتره الماضيه ولكن بجد الدنيا كانت ملغبطه عندي شويه
بجد ببقي سعيد جدا وانا بقابلك والله بنسي اي حاجه
مكفايه يا عم شويه الضحك اللي معاك
طيب ايه رأيك نطلع كلنا حديقه الازهر
شوف وقولي

رفقة عمر said...

انا عرفت من جوجل رايدر موجود عندى على المدونه لو حبيت تعمل زيه الطريقه موجودة على مدونه استاذ مهند
واكيد حضرتك شخصيه طيبه جدا وانا باستمتع بفضفضك جدا ربنا يكرمك يارب
وفعلا الصور جميله قوى
وهاحاول اروح واشوفها ان شاء الله

MerMaid said...

الف مبروك علي المرحلة الجديدة الاول في الشغل

يارب ربنا يوفقك

ثانيا مبروك علي الريفريش

انا كمان محتاجة واحد زيه

بالنسبة للخطوبة بقي

انا مفهمتش انت قصدك ايه؟؟
يعني انت وهي هتتخطبوا قريب؟؟ولا هي هتتخطب لغيرك؟؟

لاني معفهمتش

علي العموم ربنا يوفقك للي فيه الخير


المهم بقي
الجرين كارد

ان شاء الله تكسب في القرعة دي

اهم حاجة لما تكسب و تعمل المقابلة
مع القنصل

اوعي تكذب عليه
و اوعي تتفزلك عليه
دول ناس دوغري

ايه تاني ؟؟؟

اه ممكن ابقي قابلك هناك

انا كمان مسافرة امريكا

احتمال انا اللي استقبلك
لاني مسافرة بعد العيد


ربنا يوفقك
و يوفقني
و يوفق كل اللي بيزوروك و يزوروني

mermaid

:))))))))))))))))

No Fear said...

حبيبي مفيد
وحشني جدا و هانت هنشوف بعض خلاص بعد بكرة
ياريت و الله كلنا نروح البارك مع بعض و نعيش بقة أنت فاهم
:)
بالمناسبة الله يخرب بيتهم أتعادلوا 2-2
حسبي الله و نعم و الوكيل

No Fear said...

رفقة العمر
السلام عليكم
مش عارف أنا الفكرة نفسها هتخلي الموضوع سهل زيادة عن اللزوم كويس كده أن الواحد يقعد يلف علي الناس اللي بيحبها علشان يقرا لها ساعات بتوصل عندي لدرجة حفظ بعض البوستات من كتر قرائتها
أنا مش طيب قوي يعني زي ما أنت متخيلة
ربنا يكرمك
ياريت تروحي و يكون معاكي ناس أياكي تروحي لوحدك هتتخنقي

No Fear said...

mermaid
السلام عليكم
الله يبارك فيكي
بالرغم من إني كنت أقصد مرحلة تانية من التعامل مع الناس مش مرحلة في الشغل نفسه
علي العموم أهيه بشرة خير ربنا يكرمك
لا هي تتخطب
حضرتك تلات أرباع جوازات البلد العبد لله اللي مشغلها كل أما يادوب أفكر بس في واحدة تتخطب علي طول
خير الحمد لله
:)
حضرتك واضح إني لم أوفق في الجرين كارد
يعني لحظك السئ مش هأقابلك هناك خسرتي كتيرررررر
:)
الخيرة فيما أختاره الله
الحمد لله
ربنا يوفقك أنت و يعني عادي لو عرفتي تبعتي لي أبعتي
و لو حتي كريسماس كارد مش لازم جرين كارد
ربنا يوفق الناس كلها للخير يارب

MerMaid said...

الحقيقة الله اعلم الخير فين

انا عارفة ان 3500 واحد اخدوها من مصر القرعة دي

مش عارفة اقولك ايه والله

بس علي العموم ربنا يباركلك في كل خطوة

علي فكرة انا اتضايقت جدا بجد

كان نفسي اقابلك

علي العموم انا لسة بفكر في موضوع سفري علي العيد ده

لان فيه مشاكل كتير الصراحة

اولها ان انا بنت لوحدي
و انت عارف النظرة مش لطيفة

بس برضه هنا انا مش لاقية حاجة خالص
و احتمال هناك تبقي الفرصة اكبر

ياررب يا موفق


نورتني بزيارتك

اتمني اشوفك تاني

:))))

محمد الوكيل said...

جزاك الله خير أولاً على بوستك الجميل ده..ثانياً ديتها بس ركعتين لله سبحانه وتعالى وتلاقي نفسك بإذن الله أحسن من الأول..وارمي حمولك على الله لأنه كبير وواسع الرحمة والمغفرة..
وجزاك الله خير على نشرة الأخبار الكفاءة دي^^ويا ريت تشرف مدونتي بزيارتك ^^
شكراً..
محمد المصري

No Fear said...

Mermaid
السلام عليكم
أزيك أخبارك أية؟
الحمد لله علي كل شئ خيرها في غيرها
مش فارقة يعني تتعوض
بالنسبة لك أنت حالتك تختلف ممكن تتحل لو تقوليلي أجي معاكي أخد بالي منك و أسافر معاكي
:)))
ربنا يوفقك و يهديكي للخير يارب

No Fear said...

رفقة عمر
السلام عليكم
جزاكي الله كل خير
مش عارف أعمل موضوع الريدر ده و لا لا
ربنا يسهل
أكيد لازم تروحيها جميلة جدا بجد

No Fear said...

محمد المصري
السلام عليكم
منور المدونة
جزاك الله كل خير
و ياريت تشرفني علي طول
أكيد هأدخل عندك بس ياريت تكون بتكتب حاجة سهلة يعني مش بحب العقد أنا خالص
:)))
ربنا يكرمك
أدعي لنا بالهداية جميعا

MerMaid said...

اوكي

انا موافقة

انك تيجي معايا و تاخد بالك مني

ايه رايك ؟؟؟

:))))

علي فكرة انا حاولت ابعتلك ايميل علي جوجل بتاعك

معرفش وصلك ولا لأ ؟؟؟

حاول تعرف و تقوللي

:)))))

mermaid

Unknown said...

انت حتقولي ع الازهر بارك وجمالها .. بجد لما روحت مكنتش عايزة امشى خاااااااالص روعة وفى مكان عالى كدة تشوف منه القاهرة كلها وتحس انك بقيت طير وليك جناحاتك وحاسس بالحياة والحرية

فظيعة بجد

ربنا يكرمك فكرتنى بأيام حلوة
وعلى فكرة الازهر بارك احلى لما يكون معاك حد .. إبقى شوفلك اى حد ولو حتى تأجر هههههههههه