السلام عليكم
بعد السلام و التحية
سؤال لم أكن أتخيل أن أسأله لنفسي
هل سيأتي يوم أخجل فيه من إشتراكي في ثورة مصر
كان في مواقف و أحداث كتيرة ممكن تخليني أسأل نفسي السؤال ده لكن عديتها و لم يخطر ببالي اللي خلاني أسأل نفسي السؤال ده هو موقف ابن عمتي النهاردة من الثورة معايا حسيت إنه فعلا مغلول من الثورة و ماصدق يخلي الكلام عن الثورة يجي علشان يشتم و يدعي علي اللي اشتركوا في الثورة فقلت له ليه بس بتهريج قالي ما أنا عارف إنك كنت منهم فتخيلت في الأول إنه بيهرج لكن من كلامه و إنفعاله معايا في الكلام لأول مرة تقريبا نتناقش في موضوع مع بعض لفرق السن بينا
حسيت إنه قاصد يدخل معايا في معركة مش مناقشة عنده غل كبير من الثورة و اللي اشتركوا فيها و تقريبا ميعرفش حد غيري أشترك فيها و كان قاصد يطلع الشحنة اللي جواه منها فيا أنا
من جمل المعركة
عاوز تفهمني إن جملين و حصانين رايحين يموتوا مليون
قلتله ساعتها مكنوش مليون و لا حاجة كانوا حوالي عشر الأف و بعدين هي الفكرة في العدد لا الفكرة في الموقف نفسه
بيقولي اللي نزلوا التحرير نزلوا غلط كانوا فاكرين إن اللي في عبدالمنعم رياض مؤيدين و اللي في التحرير المعارضين
أقوله إزاي يعني يقولي أنا شفت ناس في مصطفي محمود راجعين متبهدلين قلتله أية اللي وداهم التحرير
أقوله ياعم أنا صحابي كانوا بيجوا من المحافظات يوقفهم و يمنعوهم في المؤسسة و عبود
يقولي أنا كنت هناك يوم خطاب حسني مبارك بالليل اللي قبل موقعة الجمل أقوله أنا كنت بايت هناك يقولي يعني مسمتعتش اللي قعد يقول في الميكروفون بيضحك عليكم و مش هنمشي و هنقول أية لأمهات الشهداء
أقوله ياعم دول لو صبروا يوم كانت الناس مشيت لوحدها
يقولي يسلام أنا سامع الواد بيقول كده في الميكروفون الساعة 2باليل
يقولي أنتم شباب ضايعين حضرتوا العفريت و مش عارفين تصرفوه
.
أقوله أنت مستني اللي قعد يخرب تلاتين سنة إحنا نعدله في شهرين تلاتة
أقوله أقرب مثل إمبارح قريت خبر عن تعديل في خط في خط سير الخط التالت للمترو هيوفر أتنين و نص مليار جنيه يقولي و بعدين و أية اللي أنا أستفدته أقوله ياعم مش لازم تكسب بطريقة مباشرة مش في ناس مرتبتها زادت و اللي كانوا بعقود أتثبتوا يقولي أنا مفيش جنيه زدته
الرد بتاعه هو أة حسني مبارك كان حرامي هو اللي حواليه و كل حاجة بس كنا عايشين في أمان
الحكومة مكنش عندها كرامة بس كان ليها هيبة
تعالي عندنا كل يوم في ضرب نار و الدنيا كلها بقيت عصابات
ده الأول لو كان عيل ضرب طلقة كانت الدنيا بتتقلب و مبتقعدش و البوليس مش بيسكت
.
وبردوا في كلامه جاب سيرة الناس اللي ماتت في الهجوم علي الأقسام يقولي دول شهداء أقوله ياعم شهيد و لا مش شهيد مش بالأسم هي حسابه علي ربنا بس نسأل ليه حتي لو هو بلطجي ليه هاجم قسم الشرطة مش علشان كان بيتنفخ هناك سواء عمل حاجة و لا معملش يقولي إحنا شعب كده لو متعملوش كده الناس دول هيبقوا بلطجية يعني هيبقوا بلطجية أقوله ياعم ربنا بيخلقنا كلنا علي الفطرة السليمة و البيئة و التربية و التعليم هي اللي بتأثر و أقوله يعني لو هو أتعلم كويس و أتعالج كويس هيبقي بلطجي بردوا يقولي أة هو أنت لو جبت أسد و ربيته و نيمته علي ريش هيبقي كويس
أقوله المقارنة مش في محلها إحنا بني أدمين
يرجع يقولي جملين و حصانين هيموتوا مليون
أقوله ياعم و النعمة أنا كانت بايت هناك
و لا كأني بأتكلم
.
أيقولي دلوقتي لو في واحدة عاوزة تتطلق من جوزها بتنزل تعمل مظاهرة
البلد خراب
خربتوها
حسبي الله و نعم الوكيل
بجد مش تهريج
.
أنا كل المواقف اللي فاتت أتعرضت لها بالإضافة إلي حملات التهكم و التريقة علي كل حاجة و لزقها بالثورة من الكائنات العجيبة اللي بتركب معايا أتوبيس الشركة اللي لسه الثورة لم تصل لها بردوا هي كمان يعني مفيش عقود مفيش تأمينات مفيش تأمين صحي مفيش ظروف بيئية مناسبة للعاملين و لما يجوا بتوع البيئة بيعدوا مرور الكرام
الناس شبعت و تعودت علي الفساد
تخيلوا أتنين بعربيات علي المحور بيتخانقوا تخيل بيقولوا أدي الثورة ياسيدي قال يعني بروح أمهم الناس مكنتش بتتخانق مع دبان وشها قبل الثورة شوف سواقين الميكروباصات غلوا الأجرة و بيركبوا الناس أربعات قالي يعني قبل الثورة كان لو الواحد ركب مرتين بياخد التالتة مجانا و كانوا بيقعدوا أتنينات في الكنبية يعني
أنا خايف الثورة دي تفشل
اللي قلقني أوي إن في مؤشرات كتيرة بتقول إنها هتتجه للفشل أو الإلتفاف أو إستمرار الوضع السابق بوجوه جديدة فقط
و للعلم اللوم مش هيبقي علي الناس اللي هتعمل كده
اللوم هيبقي علينا إحنا لأننا مش عارفين نتفق مع بعض و مش عارفين نبقي ديموقراطين و لا ليبرالين مع بعض
و الأخطر من كده الناس اللي أنا بأتفق معهم في الفكر لغتهم وحشة و منفرة جدا للناس البسيطة دول لو تنازلوا و تواضعوا و أتكلموا معاهم بالرغم من الناس اللي أنا شايفهم فاسدين أو أصحاب منهج مش سليم من وجهة نظري كل يوم بيكسبوا أرض جديدة و بيثبتوا أقدامهم و أيديهم علي الثورة سواء بطريقة مباشرة أو بطريقة غير مباشرة من الهجوم و إظهار غلط الثوار و الثورة و قلة أدبهم
الثوار حاليا يا إما إخوان و إسلاميين مع المجلس العسكري و الخطوات اللي بياخدها يا إما ناس بتهاجم الإخوان و الإسلاميين و معاهم المجلس العسكري
و فلول الحزب الوطني و الفاسدين و المفسدين و المنافقين و الرقاصين عمالة تكسب أرض جديدة كل يوم و لو مكسبتش أرض بتنقص من قيمة الثورة كل يوم
المجلس العسكري
الإخوان
الأقباط المتشددين
السلفيين
المعتصمين
الثوريين اللي لسانهم طويل
توفيق عكاشه
شوبير
مرتضي
محمد حسان
حسين يعقوب
البرادعي
الغزالي حرب
بثينة كامل
نوارة
بلال
نجيب ساويرس
إئتلاف الثورة
إتحاد الثورة
صفوت حجازي
ابراهيم عيسي
عبود الزمر
وائل غنيم
عمرو موسي
البرادعي
شفيق
مني الشاذلي
ريم ماجد
زويل
فاروق الباز
عصام شرف
و أخرين كتير
من منكم خائن و منافق ومن منكم منقض علي الثورة و من منكم سألعنه و من منكم سأشكره و من منكم سيخذلني
و من منكم سيجعلني أخجل من إشتراكي في الثورة؟؟؟
6 comments:
كلامك عن الثورة يوجع ويخوف خصوصا انك تقريبا اكتر واحد من اللى اعرفهم كان موجود فى التحرير ومؤمن بالثوره من قبل ماتحصل اصلا ومستنيها بفارغ الصبر...
تفكير ابن عمتك موجود عند ناس كتير اصلا كانت مع الثوره وقت حدوثها بس نهج واسلوب الشرطه نجح فى انه يغير موقف كتير من الناس
الناس مش مقدره قيمه الميدان والاعتصام عمال على بطال كل اللى عنده مشكله يلم اهله وجيرانه متضامنين معاه ويلانعمل رحله على ميدان التحرير وبالتالى اعتصامات الثورة واحداثها بتفقد قيمتها لانها التصقت بحاجات ملهاش قيمه اصلا
الناس كان عندها امل انه هوب حسنى مشي هيصحوا الصبح يلاقوا الشوارع مزروعه ورد والهوا مرشوش فى معطر ومافيش عوادم سيارات وهيلاقوا الميكروباصات كلها يا إما بمبي يا إما روز وإن المدير الكشري أبو 111 هيجى الشغل يقول نكت !!!! مش فاهمه انا هو حد قاللهم ان حسنى دا كان بيجري فى دم كل مصري ؟؟؟؟؟
الناس لسه معندهاش ثقه كافيه تخلليهم يصدقوا اللى قدامهم بمعنى انى لو شفت لجنة انتخابات نزيهه 100% مش هيصدقوا نفسهم وهيقوللك دى ملعوب في عقول الناس اللى انتخبت او صوتت ..وممكن يكون دا حاصل فعلا بس بيغالطوا نفسهم ومضطرين يسكتوا عشان مايتقالش عليهم ديكتاتورين
الحاجه الوحيده اللى انا شايفاها سقطت من الثورة وكنت ديما اقوللك عليها من يوم 25 يناير "وبعد ما حسنى مبارك يمشي ايه اللى هيحصل ؟؟؟ ايه الترتيب او الجدول الزمنى اللى البلد هتمشي عليه ؟ " هو دا اللى عامل المشكله
ممكن حد يرد عليا ويقوللى احنا مكناش نازلين عشان حسنى يمشي بس تصرفات الحكومه رفعت مطالب الشعب للرحيل .. لاء فى ناس بالعبييييط كانت نازله ومش راجعه بيوتها الا لما يمشي
حقيقي يا محمد ماافتكرش هيجي عليك يوم تخجل انك اشتركت فى شئ نبيل وشريف حتى لو معاير الناس اختلفت عليه لمدة سنين او قرون.. انت بتعمل اللى عليك واللى انت مؤمن بيه وبصحته والنتيجه فى إيد ربنا لوحده
(شكلها كدا الناس فى مصر فسدت كتير اوى وربنا لسه هيسلط عليهم اللى يخلص منهم .. ربنا يسلم ومايكونش دا صح )
شكرا ياجمعه.. انك نزلت وشوفت الموت عشانى وعشان كل الناس
شكرا ..انك نزلت تقول لاء وفى الناس كانت خايفه تقول لاء فى سرها
شكرا.. انك ماخفتش على نفسك وخفت على الناس
شكرا ..انك رفعت راسنا فى العالم كله وبقيت مثل لكل شباب العالم فى الصمود
شكرا ياجمعه
معاك حق في كل ما قلته ... الا حكاية انك ممكن تندم علي اشتراكك في الثورة
دي احسن حاجة حصلت في مصر .. من .. مش عارف اقول من امتي ... يمكن من ساعى انتصار المصريين علي التتار والصليبيين ... لانها اول مرة تدينا الامل اننا نحكم نفسنا بنفسنا
اما بقي اللي هيخونوا وهيبيعوا الثورة سواء بسوء نية او حسن نية ... فده ذنبهم وفي رقبتهم الي يوم الدين
فاكر دموعنا يوم الخميس قبل خطاب التنحي
فاكر رقصنا انا وانت يوم التنحي
فاكر الفرحه
فاكر كل اللحظات دي
لحظات متضاربه في اقل من 24 ساعه
هي كده الثوره
احنا مش واخدين علي الحريه والديمقراطيه
هنقعد شويه كده
نقف ونقعد ونقع ونقوم
لحد ما نلاقي اللي احنا عايزينه
مش عايز نبره الحزن ترجع لك تاني
انت بجد من اهم مكاسب الثوره يا جمعه
واعمل زي مانا ما بعمل
كل ما اليأس يتسلل ليا
ابص للعبدين واقول
علشانكم
علشان الجيل اللي جاي يا جمعه
:)
وربناوحشتني
وتعرف ان بقالي أكتر من سنه مش علقت علي ولا تدوينه لاي حد
بس الله يسامحك طول عمرك تاعبني معاك
شكرا على تعليقك عندي وعلى مواساتك ليا..
بعد الثورة بفترة دخلت أدور على تدوينات للناس اللي كنت بتابعهم دايما ومنهم انت وكنت خايفة أوي لحسن يكون حد منهم جراله حاجه .. بس الحمد لله عرفت انك بخير لما رجعت وكتبت تاني..
بمناسبة انك خايف تندم؟؟ مظنش .. تى لو فشلت ورجعنا نتاني بالظبط زي ما كنا عمرك ما هتندم .. عارف ليه؟ لأنه مشاركتك مكانتش اختيار .. دا كان واجب.. وطنك ناداك وانت أجبت الندا.. مش هقولك اكتر من كده
السلام عليكم
مبسوطة لرجوعك للتدوين ..
مش عارفه ايه الاصعب ؟
خوفك ان تيجى لحظة تخجل من اشتراكك فى الثورة ؟؟
ولا احساسك فى كل يوم بيعدى ان الثورة بتتسرق من ايد الشعب وان هيجى يوم نلاقى الثورة كانت حلم وفوقنا منه على وضع اسوأ ؟؟
الاهم دلوقتى اننا نتمسك بالامل ونسيب الباقى للايام الجاية .
هى الثورة فى حد ذاتها معجزة
بس مشكلتنا اننا لا نملك حب النجاح الجماعى
الكل عاوز ينجح وحده وهو من يجنى الثمار وحده واكيد دة سبب عدم وصلنا لكاس العالم لغاية دلوقت
اللى يحب مصلحة البلد دى يرحب بأى شخص هايحقق له التقدم والاستقرار ويحسن من اوضاع الافراد
انا كمسلمة ممكن ارحب بشخص ليبرالى
لو هايحقق ما نتمناه لبلدنا
ولكن فى حدود هويتنا الاسلامية والشرقية غير كدة لا اقبل ابدا لا اريد ان نحصل على تقدم امريكا ومعها اباحية امريكا لا اريد هذا ابدا لبلدى المسلمة العربية الشرقية
ولكن الثورة رااااائعة ولكن تتدخل الاهواء والاطماع بيفسد اى شئ جميل
Post a Comment