ملحوظة : البوست ده بوست ملغبط شوية و طويل مع تقفيل السنة المالية
أول يوم مدرسة
عندي شعور غريب قوي الشعور ده مش جديد و لا غريب علي بس بقالي كتير محسيتش بيه الشعور الرخم ده كان بيجي لي أول يوم في الدراسة(ياريتني كنت زي نيمو و هو فرحان إنه رايح المدرسة ) خصوصا في إعدادي و ثانوي لأن الفصل مكنش ثابت يعني كل سنة في إعدادي و ثانوي تلاقي أغلبية الفصل ناس جديدة أول مرة تعرفهم عكس الإبتدائي نفس الناس معاك الخمس سنين و نفس المدرسين كمان
شعور بالبرد و الخوف في عز الحر بتقعد تتدور بعينك علي حد ترتاح له تحس جنبه بالأمان و الدفء و غالبا مكنش بيكون في بسهولة بس الحمد لله الواحد كان بيتأقلم و يعيش و الله الواحد شاف كتير في حياته صعوبات و تغلب عليها من غير ما يحس
المهم الشعور ده موجود عندي النهاردة علشان أنا نازل شغل جديد من بكرة إن شاء الله دعواتكم هو نفس مجال الصناعة اللي أنا فيها بس مجال جديد علي و هو المبيعات و الدعم الفني يعني صاحبكم هيتشحطط شحططة أية فل من السويس لأسكندرية للقطامية و الله أعلم فين تاني مبدئيا أنا نازل من أسبوعين لشهر تدريب في المصنع في العاشر من رمضان دعواتكم معايا ربنا يكرمكم و يخليني أتغلب علي الفترة الأولانية الصعبة دي اللي بتحدد بقية الحياة في الشغل هتمشي إزاي أنا نفسي أستقر في الشغل ده عكس الشغل السابق اللي كنت من أول يوم عارف إني مش هأستمر في الإنتاج بس قلت لزيادة الخبرة و توسيع المعرفة و التغيير اللي كنت محتاجة في الفترة دي و الحمد لله الواحد أكتسب خبرة معقولة في المجال و في التعامل مع الناس
.
أنتم ربنا بيحبكم علي فكرة
أكيد لأن صاحبكم لو مكنش نزل شغل كنت هأكتب لكم شوية بوستات سوداوية من بتاعتي اللي هتسود عيشتكم و حياتكم و أنا عارف إن أغلبكم مش ناقص يعني
بداية القصة زي ما كنت حكيت لكم قبل كده إني طلعت لبتاع الموارد و هجص علي شوية و عملي البحر طحينة المهم قفلت معايا يوم 18 مايو أقدم إستقالتي بدون وجود فرصة شغل متاحة خالص قدامي قلت يمكن تتضرب و ينقلوني زي ما وعدوني و لو حتي منقلونيش أنا كده كده مش قادر أكمل و مش هأكمل المهم الرجل مديري اللي كان مجنني في عيشتي وافق يمضي بعد معاناة علشان هو كمان كان عاوز يقدم إستقالتة و يمشي و الرجل للأمانة كتب في حقي كلمتين حلوين في الإستقالة و وديتها للموارد و بعدها بيوم لاقيت شركة تانية بتتصل بيا بتقولي تعالي في مقابلة و هات السي في بتاعك علشان عندهم السي في بتاعي من أيام الشركة اللي فاتت و رحت و عملت مقابلة و أتنين و الحمد لله ربنا وفق بس تشوفوني و أنا في المقابلة بأصيع عليهم يقولولي أنت عاوز تسيب الشركة ليه أقولهم مين قال أنا مستقر و مرتبي عال العال بيقولولي طيب جيت المفابلة ليه أقولهم أنتم شركة كبيرة و أنا لازم أجي أشوف أية طلباتكم و أنا أساسا مقدم إستقالتي ههههههه مسخرة
و الحمد لله المرتب أزيد بس اللي قالقني موضوع المبيعات ده أنا مبيعات يانهار ده المبيعات هتشوف أيام سوداء علي أيدي طيب دعم فني شغال إنما مبيعات اهوة هنجرب أنا كده كده كنت هأقعد في البيت
الحمد لله ناس كتير قبل أما أتوفق للشغل الجديد أتصلوا بيا لما عرفوا و قالولي لو عاوز ترجع الشركة القديمة مفيش مشاكل و اللي قالي هات لي السي في بتاعك من غير ما أتصل بيه حتي في مدير في الشركة اللي كنت فيها و أنا بأسلم عليه قالي أنت رايح فين قلتله قالي روح و لو الوضع معجبكش قولي و أنا عندي ليك شركة تانية و قالي أساسا أنا مكنتش عاوزك تمشي
كل الحاجات دي سندت الواحد معنويا كتير الحمد لله
دعواتكم
.
اللي مخوفني من الشغل الجديد ده أنه شغل جديد :) و كمان علشان في حاجات كتير هتترتب عليه يعني هأستقر فيه و لا هأحس إني مش هأكمل و الدنيا هتمشي إزاي يارب يجعله خير
.
في الشركة السابقة مدير الموارد البشرية قرفني قوي لحد ما خلصوا ورقي بعد معاناة و محايلة طيب أنتم مش عاوزين تسمعوا كلامي و تصلحوا الأخطاء سيبوني في حالي و أمشي لا أقعد شهر لما نشوف حد مكانك و مكنتش عارف التانين هيستنوا و لا لا و الحمد لله أستنوا
في الفترة دي بردوا حاولت أسجل للماجستير بس ملحقتش بس جهزت الورق و هأسجل إن شاء الله في شهر سبتمبر مش عارف حتي هأكمل و لا لا بالرغم من إني دفعت مبلغ محترم في المركز القومي للبحوث علشان يكون هو الجهة البحثية بتاعتي
الحمد لله الناس كلها بتتصل بيا و بتتطمن علي العمال و الموظفين حتي واحد من الموارد البشرية أتصل سأل علي النهاردة
الحمد لله علي كل شئ
.
الواحد كان و هو في الكلية متخيل إنه لما يخلص الكلية مشاكل الدنيا كلها هتتحل طبعا طلع هجص حتي الواحد أيام ما كانت بتزنق معه قوي أيام الإمتحانات و ليلة الإمتحان كنت بأعمل حاجة غريبة قوي كنت أنام و لو ورايا المادة كلها و مفتحتهاش و أصحي أصلي المغرب و العشا و أقعد أذاكر للساعة واحدة و أنام دي كانت أكبر المشاكل و الحلول بتاعتها و ربنا كان بيسترها إنما الأيام دي مصاعبها كبيرة قوي و همومها مش عاوزة تخلص و كركبه و لغبطة الحمد لله علي كل شئ
.
ساعات بيسيطر علي إحساس إن الموت هو الراحة و لقاء ربنا هو النهاية أو الحل الأمثل لكل المشاكل الموجودة و حتي الحوادث اللي الواحد بيقراها و خايف تزيد أكتر من كده زي الإنتحار و قتل الأبناء و الإغتصاب و الإختطاف و الزنا و القتل مع التمثيل بالجثث أية في أية الدنيا حصل فيها أية يابشر البني أدمين خلصت من العالم
.
أنا مش عارف البوست ده يفرح و لا يكئب الحقيقة كل واحد يقراه و يشوفه زي ما هو عاوز يشوفه
في حاجة كمان عاوز أتكلم عنها بما إن البوست كله ملغبط علي بعضه
الواد حازم صديقي النوبي السكندراني الفودافوني شخص جامد جدا و عزيز علي قوي و بحبه جدا يارب نفضل أصدقاء و أخوات طول العمر الواد ده أتعرفت عليه في أول تاني مرة في الكلية و ساعتها كان مبطوح كانت عارضة الجون وقعت علي دماغه فتحتها هههههه و عرفني عليه واحد صاحبي تاني في الكلية
حازم ده صديقي الوحيد اللي من الحقيقة و عرفته هذه المدونة مفيش حد خالص من صحابي يعرف طريق المدونة دي غيره هو ساعات تلاقوه بيعلق عندي حازم زومي زيمو كده ده التوقيع بتاعه
.
قناة كايرو سينما دي جميلة بصراحة بتجيب شوية أفلام حلوة هي اللي شفت عليها الكيت كات ياااااه قديم قوي الفيلم ده و كان عمل قلبان ساعة أما نزل في السينما
الواحد قديم قوي بردوا ياجدعان
وفاكرين الشيبسي الأحمر و فوازير شيريهان و نيللي و اللبان السحري و عمرو دياب و علي حميدة و لولاكي و
البوست ده بيفكرني بأغنية حسن الأسمر بنت الكئيبة كتاب حياتي ياعين أة ما شفت زيه كتاب الفرح فيه سطرين أة و الباقي كله عذاااااااااااااااااااااااااااااااااب عذااااااااااااااااااااااااااااب عذاااااااااااااااااااااااااااااااااااااااااااااااااااااب
:)
الحمد لله علي كل حال
دعواتكم ياشباب ربنا يوفقني في الشغل الجديد علشان يوفقني بعد كده في اللي وراه
