Saturday, April 24, 2010

دي بقة وجعها كوم تاني خالص

أزيكم ياشباب أخباركم أية؟
طبعا غبت عنكم فترة طويلة و كادت أن تتطول أكتر من كده و كاد البوست الأخير يكون أخر بوست بس محصلش
اللي حصل بقة واحد صاحبي عزمني علي كتب كتابة كان يوم سبت و كان عندي شغل و كنت هأطنش و مرحش علشان مش هألحق بس لاقيت ناس كتير من الكلية أتصلت بيا علشان نتقابل هناك قلت خلاص نروح و أمرنا لله كتب الكتاب كان في السيدة نفيسة
طبعا المنطقة دي و الطريق لها ليها ذكريات معايا المهم و بعد كده في يوم الأحد عيد القيامة اليوم اللي قبل شم النسيم كان أجازة بالنسبة لي من الرصيد في الشغل لاقيت اليوم طويل و كنت خلاص علي وشك عمل كارثة محققة الحمد لله بمساعدة بعض الناس لم تحدث و قلت طيب ما يلا أروح أصلي العشا في السيدة نفيسة جوها حلو و قلت يمكن أروح أرتاح هناك المهم و أنا داخل علي السيدة نفسية كده خطرت علي بالي فكرة إني أروح أعمل عمرة بعد ما صليت العشا و قعدت شوية نزلت علي وسط البلد أتصلت بواحد صاحبي قلتله يسألي علي أي عمرة طالعة قريب و لما روحت قلت لماما تسألي هي كمان يوم الأربعاء قالت أة في واحدة طالعة يوم تلاتة و عشرين أبريل و كانت المفروض تتطلع أول الشهر بس العدد لم يكتمل فأتأجلت قلت بس دي كده ربنا كاتبهالي أنا مخصوص
وديت جواز السفر و الفلوس و بعد أسبوع كله تمام خلاص بس الموضوع بقة يوم خمسة و عشرين مفيش أي مشاكل
هم كده كده أسبوعين أجازة في الشغل و اللي يحصل يحصل
و بقيت مستني اليوم ده بفارغ الصبر و كل حاجة أصبحت هينة جدا جدا جدا ما خلاص بقة رايح أرمي كل حاجة علي ربنا و كتبت الأجازة يوم الأربعاء و قلت للناس في الشغل و أتصلت بصحابي بلغتهم و أحلي حاجة لما كانت أي أفكار و لا أي مواقف تتطلب الإكتئاب كنت بتاجهلها و كأنها مش موجودة ما خلاص بقة هانت فاضل كم يوم و كله يتفك إن شاء الله
يوم الخميس سلمت علي الناس في الشغل و ودعتهم و الساعة خمسة بالظبط ميعاد خروجي من الشغل و أنا خلاص هأسجل إنصرافي لأخر مرة بالحالة المقرفة دي علشان الختم الجاي هيكون يوم تسعة مايو في ظروف و حالة تانية مختلفة تماما تماما لاقيت أختي بتتصل بيا و بتقولي الجواز أترفض و مفيش عمرة و مفيش سفر و مفيش فضفضة و مفيش أي حاجة
يرضيكم كده
تفتكروا أية الحل؟
ربنا ما يكتب عليكم الإحساس ده أبدا و لا تفسيري للموضوع ده خالص
ربنا يتوب علينا جميعا و يغفر لنا و يرحمنا برحمته
.
حاولت أتجنب ذكر الموضوع ده في المدونة و الفيس بوك و كل حاجة بس بردوا مكملش تفتكروا بقة العيب في مين
أكيد فيا أنا مش في المدونة و لا الفيس بوك
بجد مش عارف أعمل أية؟
و لا عارف الأيام الجاية دي هتعدي إزاي

10 comments:

يا مراكبي said...

أكيد فيه حكمة ورا رفض تأشيرة العمرة .. لعله يكون خير ومتأجل ليك في حاجة تانية أكبر ان شاء الله .. ربنا هو المطلع وهو بسحانه اللي بيرتب حياتنا للأفضل دايما حتى لو ظاهر الأمور عكس كده

المهندس said...

اولا : مرحبا بعودتك بعد الغيبة الطويلة ... وانا ايضا كنت في غياب طويل اخر .. إلا انك لم تسأل عني خلاله ... لذلك غاضب منك

ثانيا : مبروك عليك ثواب العمرة مقدما .. فانت نلت الثواب - بأذن الله - بمجرد عزمك علي ادائها

ثالثا : لا تجعل الحزن يتسلل الي قلبك .. واذكرك بقول الله سبحانه وتعالي " وكل شئ عنده بمقدار " ..لذا فاكيد ان ربنا - سبحانه وتعالي - مدخر لك ما هو احسن واجمل

رابعا : عندما تهم بالعمرة - ان شاء الله - ابقي بلغني .. حتي انال شرف مقابلتك هنا .. واكرم به مكان للمقابلة .. والتعرف عليك

خامسا : لماذا كان البوست الماضي سيصبح البوست الاخير في حالة آدائك للعمرة ؟؟؟ هل هناك علاقة بين العمرة ... وبين الامتناع عن التدوين ؟؟ .. اتمني ان اكون اسيأت الفهم ... وانك لم تقصد ذلك

السلام عليكم ورحمة الله وبركاته

مـحـمـد مـفـيـد said...

صدقني تأجيل السفر ده لحكمه
أكيد هتعرف معناها
يمكن رنا عايز يسمع صوتك أكتر من كده

عتاب بقي بجد
يعني هي خلاص بقت الاخوه كده
تقطع كده ومش تسأل
وكمان كنت هتسافر من غير ما اعرف ولا حتي تجيب لي سيره
ليه كده يا جمعه

رفقة عمر said...

على فكرة اخويا كان المفروض يسافر الحج الماضى هو وزوجته وللاسف جات له هو التاشيرة وزوجته اللى كانت هاتموت علشان تحج وهى اللى اقنعته بالحج تاشيرتها لم تأتى
اخى اجل حجه من اجلها وان شاء الله هايحجوا السنه دى اذا ربنا اذن
تعرف انك اخدت ثواب العمرة بالنيه
انت اخلصت النيه وسعيت تعتبر انك عملت العمرة واخذت ثوابها دون عناء او مصاريف
ادعو ربنا ان يتقبلها منك
علا وعسى تعمل العمرة مع زوجتك قريبا

لا تحزن قضاء الله كله خيرا

أسما عواد said...

يمكن ربنا كاتبلك حج بدالها
مين عارف
انا اتعلمت استقبل اللي بتديهولي الحياة باستسلام تام
لما هتتكتبلك هتنولها رغما عن انف الجوازات والتأشيرات
تحياتي
وعودا حميدا

زهرة الجنة said...

نصيبك لسه شوية عليه
لكل شيء قدر معلوم
وان شاء الله ربنا يرزقك بالحج
لان لكل شيء بيحصلنا حكمه ورسالة ربنا بيوجها لينا

ربنا يرزقك بكل خير

Monzer said...

تستاهل

روح said...

بعدين معاك ياعم المتشائم انت
انا عند ظن عبدي بي مش ممكن كنت روحت
وتعبت ومعرفتش تادي الغرض منها
وما كنتش هتستمتع بيها نظن بالله
الخير رغم اننا وحشين بس دايما نكون علي يقين ان اللي كاتبه ربنا لينا
في اللحظة اللي احنا عايشينها حاليا
دة افضل وضع لينا لان دة اختيار ربنا

إنـســـانـة said...

ما أخطأك لم يكن ليصيبك وما أصابك لم يكن ليخطئك

مسلم said...

السلام عليكم و رحمة الله و بركاته

دي أول مره أزور مدونة حضرتك؛ و طبعاً أتمني متكونش الأخيره؛ موضوع العمره ده فعلاً من الحاجات الغريبه؛ الموقف اللي بتتكلم عنه حصل معايا؛ بس بشكل مختلف شويه لأن العمره كان المفروض تطلع يوم 27 شعبان و فضلت تتأجل لحد م ربنا إمتن علينا و طلعت يوم واحد و عشرين رمضان المهم؛ المعني اللي الواحد إستشعره إن العمره مع كونها زياره لبيت الله؛ فهي تحتاج أن تظهر اللجئ للمولي سبحانه تعالي حتي يقبل طلبك للزياره و يوفقك إليه
أقصد لعل الله أحب أن يسمع صوت مناجاتك له و أنت تطلب الزياره
في حاجتين بس حابب إني ألفت إنتباه حضرتك ليهم؛ أولاً حضرتك قلت "عيد القيامه" و هو ليس بعيد
ثانياً علي القول الراجح للعلماء أن الصلاه في المساجد التي بها أضرحه و قبور لا تجوز و الله أعلم