Sunday, May 17, 2009

بسرعة

بالرغم من نجاح البوست السابق الشديد و اللي هو واضح في عدد التعليقات 
أستفذني خبر سمعته النهاردة الصبح و أنا رايح الشغل لدرجة إني لو كان عندي رصيد أجازات كنت نزلت من عربية الشغل و جيت علي البيت كتبت البوست ده
الخبر هو زيادة العلاوة الإجتماعية من خمسة في المية لعشرة في المية بتعليمات من السيد الرئيس
بالرغم من إن السيد الرئيس في خطابه في عيد العمال ترك تحديدها لمجلس الشعب و الدنيا هاصت قالت السيد الرئيس بيسمع كلام وزير المالية علشان مفيش موارد و لازم العلاوة تقل فحفاظا علي هيبة السيد الرئيس ترك تحديدها لمجلس الشعب اللي بدوره قام بتحديدها بسرعة لخمسة في المية
مما أثار حفيظة الناس فقرر السيد الرئيس رفع العلاوة لعشرة في المية
مبدئيا الناس بقيت بتكرهه العلاوة لأنها لو كانت عشرة في المية الأسعار بتزيد تسعين في المية 
و كمان معظم العاملين في مصر حاليا بيشتغلوا في القطاع الخاص أو بعقود فموضوع العلاوة ده مش بيوصل لهم
ليه 
لأن الزيادة في القطاع الخاص حسب ما يترأي للصاحب المنشأة في ضوء الأرباح و السوق و هكذا
ده مبدئيا
بعد كده
ليه السيد الرئيس محددهاش من الأول عشرة في المية كما هو متبع و خلصنا
ليه مجلس الشعب قرر إنها خمسة في المية
ليه الحكومة وافقت في الحالتين
السؤال المحيرني ليه السيد الرئيس غاوي يظهر حكومته و مجلس شعبه بأنهم شبه الهدوم الداخيلة اللي من تحت
.
يا جدعان نشرة أخبار الخامسة و العشرون دي فظيعة
أورررررررررطو السخنة
جامدة جدا

14 comments:

catroz said...

اول كومينت اول كومينت .

من الواضح انك واخد اجازاتك كلهااا..

فوق شويه و غير جو و بطل نوم و ابتدى ذاكر الله يكرمك ..

و تعالى بعد الامتحانات نفكر فى خطه لاغتيال الريس ..:D

Ola said...

ده سؤال برده يا بشمهندس!!! علشان هوه اللي يحل للناس المشاكل اللي عاملها مجلس الشعب و الحكومة

روح said...

بص انا ما انساش ابدا
نظرة القرف والاشمئزازر
اللي بصها وزير المالية لوزير الحربية
لما الريس قال علي العلاوة
في عيد العمال حسيت ان وزير المالية
ماسك زلة علي الريس
فعلا كانت بصة قرف
كان عايز يدية بطلقة
انا قولت مين الريس ومين الويز
بصراحة اضايق وقتها

مـحـمـد مـفـيـد said...

الله عليك يا ريس وانت بتكتب في السياسه
مقدرش علي الجمال ده
:)

يا مراكبي said...

ما هو ده النظام من زمان .. حد يقرر حاجة وبعدين ييجي الرئيس يحسنها عشان يظهر ان هو الوجه الحسن .. دي حاجة مكررة ومعروفة

No Fear said...

السلام عليكم
أتشرف إنك أول كومينت
:)
أخبار الإمتحانات أية؟
أنا مش واخد الأجازات أنا لسه رايح شركة جديدة بيكون في ست شهور من غير أجازات
بس ربنا سترها من عنده و إن شاء الله هأطلع دورة الأسبوع اللي جاي
أهو تغيير
.
خلصي إمتحاناتك و أنا مستني
:)

No Fear said...

OLA
السلام عليكم
الحمد لله بوست مخلاكيش تزعقي فيا
:)
ماشي بس مش للدرجة دي يعني يظهرهم كلهم مالهمش لازمة
.
أنا مش مهندس علي فكرة
أنا كيميائي و لا فخر
:)

No Fear said...

روح
السلام عليكم
هم شكلهم ماسكين ذلة علي الشعب مش علي بعض علشان كده الشعب ساكت و مش بيتكلم

No Fear said...

مفيد
السلام عليكم
أزيك يا كبير؟
أي خدمة ياعم
دي حاجة بسيطة خالص
:)

No Fear said...

يامراكبي
السلام عليكم
هو النظام ماشي
بس مش للدرجة دي
ده أنا نفسي كنت تقرأ الخبر في المصري اليوم لما قعدوا يقولوا دي ثقة من الرئيس مبارك في وزير المالية
حسيت إن وزير المالية ده مفيش أتنين زيه في العالم

Ola said...

أنا عارفة انك كيميائي بس الكيميائيين في المصانع بيتقلهم يا بشمهندس!! على فكرة، ليك تاج على البلوج بتاعي:)

زهرة الجنة said...

بيحسسوني انهم بيلعبوا لعبة القط والفار مع الشعب
:D

ربنا يكرمك ويوفقك في امتحاناتك

kochia said...

والله انا عرفت لما قالوا انها 5% انها هتزيد
بس طموحي وصل لحد 7.5& بس
مش 10%بحالها
وده ان دل علي شئ فهو يدل علي ان طقس يوم غد حار رطب !!!!!!

mesh2dra said...

السلام عليكم

ياااه بقالي كتير مجتش هنا .. ولا ف اى حتة تانية .. وحشنى جو المدونات فعلا


المهم
اخبار الامتحانات ايه وجبت الجدول ولا لسه

بالتوفيق يارب