Sunday, January 18, 2009

محادثة لن تتم

بعد البوست الجميل اللي فات كان لازم بعد أما أصحي من النوم أكتب حاجة تعتبر تفاصيل لهذا البوست
البوست ده بوست مش صح أنا عارف و متأكد لو تقدري متقريهوش يبقي أحسن
طبعا هتسألو مادام هو مش صح باكتبه ليه
هأقولكم أنا فكرت أتصل بها كتير قوي نفسي بس أسمع صوتها بس الحمد لله سيطرت علي نفسي و متصلتش لكن بعد أما وصلت لقرار في الطريقة اللي هأعيش بيها حياتي كلها إن شاء الله الشيطان بردوا مرضيش يسيبني في حالي و قعد يقولي أتصل بها أسألها قولها هي هتعمل أية
بس أنا وصلت لحل وسط انا هأكتب و أخرج اللي جوايا هنا و هي لو قريتوه هيتقسم الخطأ و ذنبه علينا إحنا الأتنين و لو هي طلعت شاطرة و مقريتوش هيكون أنا أرتحت و في نفس الوقت متصلتش بها
نص المكالمة
أنا:أزيك؟
هي:الحمد لله انت عامل أية و أخبار الشغل الجديد أية و ليه سيبت القديم مش قلنا أستني و أصبر شوية
أنا:الحمد لله علي كل شئ اللي حصل حصل خلاص و ربنا يسهل
هي:ربنا معاك و حاول تستمتع شوية و تنسي
انا:سيبك من موضوع الشغل ده أنا هأسألك سؤال و أحلفك بالله تردي علي و و الله العظيم مهما كان ردك مش هيأثر في القرار اللي أخدته و إن شاء الله هانفذه بالعكس ممكن لو قلتي اللي هتعمليه هتسهلي علي شوية
انا هأقولك أنا قررت أية و مهما حاولتي مش هيتغير لأني حاولت أشغل نفسي و أنسي الفترة اللي فاتت بس بمجرد ما باقعد مش نفسي مش باقدر مفكرش فيكي ويمكن أكون بأنسي في الزحمة بس بمجرد ما الدنيا تروق بارجع تاني و مش عاوز أقولك حالتي بتكون إزاي و مش هينفع و مش هأقدر أحط نفسي في الساقية دي علي طول لازم وقت أرتاح فيه علشان متعبش و طبعا بافتكرك و أفتقدك علي طول
انا قررت إني مش هأرتبط بحد خالص لأني الفترة اللي فاتت دي حاولت بس منفعش خالص حتي لو مش إرتباط انا فكرت أتجوز بس لاقيت إنه مش هينفع أكون مع واحدة و دماغي مع واحدة تانية و في نفس الوقت هاكون عاوز منها تكون زيك و مش هيكون في حد زيك في الدنيا كلها و قررت كمان أعيش حياتي و أقضيها و خلاص و لو ربنا يكرم و يقضي لي بمرض و لا حاجة ترحيني من الحياة كلها يكون أحسن كتير
المهم أنت بقة بعد الفترة دي قررتي أية و هتعملي أية هو ده السؤال اللي نفسي أسأله لك من الأخر هتكملي و لا هتقضي فترة و بعد تعملي حاجة تاني
انا مش عاوز رد من ردودك الجميلة اللي وحشتني مالكش دعوة بيا أنا خلاص واحدة عرفتها و حصل لها موقف سخيف بالله عليكي قوليلي هتعملي أية و قررتي أية و متقلقيش مهما حصل أنا مش هأغير قراري
أنا متأكد بنسبة كبيرة إنك إن شاء الله هتستمري في حياتك الجديدة بنجاح لأسباب كتير قوي
بس نفسي تردي علي بوضوح مرة متخلنيش استنتج حاجة علشان أنا عقلي مش معايا من ساعة أما مبقيتش قادر أتصل بيكي
إجابتك بس هتخليني أعمل اللي قررته فرحان أو مش فارق معايا الحياة بس انا كده كده هأعمله
مستني ردك
.
كان نفسي تتصلي بيا بكرة و تساليني عملت أية في الشغل الجديد و أخبار الناس اية
.
ردي عليكم ده لو حد لسه هيعلق و مش هيشتمني علي كلامي
انا مش هأقدر أنساها عمري لأني معني إني أنساها أنسي كل حاجة حلوة في حياتي و أنا مش مستعد أنسي الحاجات الحلوة دي
.
كان نفسي من كم يوم أفتح الفولدر اللي عندي بتاعك اللي شايل فيه صورك و رسايلك و السلايد اللي أتفرجنا عليه سوا بس قلت لا الغريب إني جيت أشيل أجندة السنة اللي فاتت لاقيت جواها ورقة شيكولاتة مارس أخر واحدة أشترينها مع بعض و كمان كنت بيني و بينك طبعت صورتك و شيلتها في الأجندة شفتك اخيرا مرة تانية
وحشتيني قوي

7 comments:

انا حره said...

هوا ايه اصله دا

fatima said...

من خبرتى الخاصة أفهم جيدا كل ما تمر به ، الا انه وضع مؤقت ولن يستمر على الاطلاق علمتنى الحياه ان الدوام محال ان الحياه لا تتوقف على شخص واحد وان الحياة مليئة بأناس يمكنهم ملء الفراغ فى حياتنا وتعويض آلامنا الشخصية. اعتبر فرصة العمل الجديد بداية جديدة وأقبل عليه بكامل عقلك وقلبك واخلص له ، وفقك الله

catroz said...

مش عارفه ارد اقول حاجه ..:)

catroz said...

انت على بالى من الصبح مش عارفه ليه

يارب تكون كويس..:)

No Fear said...

انا حرة
السلام عليكم
أول تعليق يجي لي أشوف تعبيرات وش اللي بيقوله
:))
ربنا يهدينا

No Fear said...

فاتيما
السلام عليكم
أنا عارف
بس هي كانت شخص مش عادي
الحمد لله علي كل شئ
ربنا يهدينا و يرحمنا

No Fear said...

catroz
السلام عليكم
مش لازم تردي كفاية إنك قريتي
و أدعي لي
.
أنا هأموت و لا أية
:))