Wednesday, October 15, 2008

مش عارف العنوان ممكن يكون أية غير-خلص الكلام

السلام عليكم و رحمة الله و بركاته
البوست ده ممكن يكون طويل شوية و ملخبط كالعادة و غالبا هتوهوا مني بس مش مشكلة معلش
.
صدق اللي قال المصائب لا تأتي فرادي
أمبارح كان أخر يوم لسه متعلق بالأمل فيه يعني من الأخر علشان مطولش عليكم كان فرحها و ربنا يكرمها بحياة سعيدة و مليانة خير و سعادة
غالبا القدر كان مصمم إني أكره شهر أكتوبر اللي بحبه قوي علشان فيه عيد ميلادي بس مش عارف غالبا هأكرهه
أمبارح بردوا تأكد الخبر الرسمي إن في واحد جاي بعد مني في الشغل و هيسافر تدريب برة قبلي يلا الحمد لله تعرفوا عرفت من زمان قوي الموضوع ده و سبحان الله كان اليوم ده هأقابلها للمرة التالتة حكيت لها عن الموضوع ده قعدت تقولي و لا يهمك الرزق بتاع ربنا أنت تجتهد بس و قالت لي في ناس تانية تعبانة قوي و مش عارفة تعمل أية في حياتها كانت بتتكلم عن جوزها اللي كان لسه متقدم و هي رافضة و أهلها مصممين و إن شاء الله يكون فيه الخير و يطلع ابن حلال و تحبه
علشان كده أمبارح كنت فاكرها قوي فرحها علي موضوع الغم في الشغل اللي هي وقفت جنبي فيه
و تم النهاردة كمان الرجل اللي ظلمني أنا و واحد تاني في الشغل دخل علينا النهاردة و قعد يهزق فينا علشان يقنعنا إننا إحنا اللي مقصرين و هو عادل علشان كده اللي جاي بعدنا إحنا الأتنين هو اللي مجتهد و علشان كده أختاره يسافر
يعني ظالم و عاوز يحسسنا إننا المقصرين يعني هنفرض أنا قصرت معه قبل كده زميلي التاني ذنبه أية و هو مقصرش
يلا الحمد لله بس أنا مفرقش معايا الموضوع ده كتير لأني أفتكرت كلامها و نصيحتها لي و قلت الحمد لله و اللي خلاني متقصرش أكتر زعلي عليها أكبر من زعلي علي أي حاجة تانية
الحمد لله
.
أمبارح بقة كمان أخويا محمد مفيد كان عازمني علي الفطار علشان كنا صايمين و اليوم كان جميل قوي و أحلي حاجة فيه إن منذر كمان كان موجود و قعدنا نتكلم و نفضفض و نحكي
معرفش محمد كان قاصد يعزمنا في اليوم ده بالذات و لا هي جت صدفة
شكرا يا محمد و شكرا يا منذر إنك جيت و يارب تتدوم صداقتنا علي طول
و ربنا يخليكم لي
.
و الشكر واجب كمان لإنسانة محترمة وقفت جنبي الفترة اللي فاتت و هونت علي كتير و ربنا يجازيها خير هي للأسف مش بتتدخل علي المدونة بس الشكر واجب بردوا
.
و شكرا لكل الناس اللي وقفت جنبي و أتكلمت معايا سواء علي المدونة و لا علي المسنجر و ربنا يكرمكم يارب و يخليكم لي و نفضل أصدقاء علي طول
.
خلص الكلام
الفترة اللي فاتت حاسس إن أنا أتكلمت كتير قوي و زمان كنت بأسمع كلمة خلص الكلام دي و باقول لنفسي هو الكلام ممكن يخلص أمبارح بس حسيت و فهمت معني الكلمة دي خلص الكلام
و كمان حسيت إن معظم كلامي هنا ممكن يكون إعتراض علي تدبير ربنا
أنا زمان كنت بأقعد أتكلم مع ربنا كتير و من ساعة أما عملت المدونة حاسس إن الموضوع ده قل قوي
و كمان لو أتكلمت الفترة اللي جاية دي كلامي مش هيكون غير عنها و مش هينفع أتكلم عنها
علشان كده قلت أقعد ساكت شوية
دعواتكم لي إن أطلع رجل و متكلمش فترة طويلة علشان أعيد الحسابات و التفكير و كل أما الفترة اللي هأقعد فيها ساكت تتطول يكون حالي أحسن لحد أما أقدر أرجع أفيد و أستفيد
أنا كده كده طبعا هأتابع المدونات أكيد طبعا علشان هي بقيت إدمان و أساسا شاكك في نفسي إني أقدر أقعد ساكت أنتم متعرفوش مدونتي دي حاليا بتمثل لي أية و أنت كلكم بتمثلوا لي أية بس بجد يارب أقدر و اقعد ساكت شوية
أنا أكيد مش عاوز أشكر حد بالأسم لأنكم كلكم و الله العظيم غاليين عندي قوي فوق ما تتصورا حتي اللي بيقرا و مش بيعلق و معرفوش
.
لها لو دخلت ياريت تتطمنيني عليكي و علي حياتك إن شاء الله تكون مليانة خير و حب و سعادة
.
جزاكم الله جميعا كل خير
و متنسونيش في دعائكم

13 comments:

مـحـمـد مـفـيـد said...

فعلا خلص الكلام يا محمدونقطه ومن اول السطر
كفايه انك تقول ربنا يسعدها ويباركلها في حياتها الجايه لانها أكيد طالما قلت كده يبقي هي تستحق
انت بقي لازم تبص لحياتك وأكيد هتقف مع نفسك وترجع لحياتك وربنا هيعوضك خير
حكايه انك تتكلم عنها دي اعتقد انت مش هترضها لانها دلوقتي مش من حقك
وهتفضل تحتفظ باسرار معاها لان ده طبعك

أخر حاجه
عيب لما تشكرني علي الواجب
دي اقل اقل حاجه ممكن اعملهالك يا محمد
انت تستحق اكثر من كده
وبعدين هي كانت مقصوده طبعاً لاني عارف اليوم ده كان بالنسبه لك ايه وهيكون فرحها فأكيد كان لازم أكون جنبك
عارف انت قدهاوقدود وهتتجاوز المرحله دي وهترجع اقوي من الاول

انا حره said...

احمد ربنا على كل اللى كان واستعد عشان تبتدى صفحه جديده فحياتك من غير المشاكل القديمه اللى خلص الكلام فيها

mohamed ghalia said...

خلص الكلام
فعلا محتاج واقفة مع نفسك الواقفة دى هتساعدك كتير ومن قبلها تكون مع ربنا واكيد ربنا هينصرك
وربنا يسعدك دايما وأكيد هتلاقى الإنسانة إلى تستهلك
تقبل تحياتى
دمت بود

Unknown said...

ربنا يسعدها

بس انت كمان ربنا هيسعدك وهيعوضك عليك بخير كبير اوييييييي

وان شاء الله هتقدر انك تنسي وربنا هيوفقك في حياتك

فى القلب said...

و أنت كمان يا محمد مش أنتى غالى أدأيه

وخلاص أنا موافقه تسكت شويه عشان تقدر ترتاح بس لازم تزورنا

ربنا يخليك يا محمد ويخليلك كل أصدقائك الأوفياء

zahra said...

و عسى ان تكرهوا شيئا و هو خير لكم
محدش عارف الخير فين يا محمد
و فى كل وقت لازم نقول الحمد لله
عشان نحقق معنى مهم جدا و هو الرضا بقضاء و اللى مش هيكون له غير نتيجه واحده
ان ربنا يرضينا بقضاؤه و يخفف عنا آلامنا
توجه بالحديث لله
و لا تشكو لسواه
فهو وحده القادر على ان يخرجك من عسرتك و ان ينزل السكينة على قلبك

يا مراكبي said...

وعمر ما الحياة بتقف عند شخص أو حدث أة تاريخ .. ومهما إتغمينا وزعلنا لازم الحياة تستمر غصب عننا كلنا وهي دي سنة الحياة ولا شيء دايم غير ربنا سبحانه وتعالى

خلاص كده .. خلص الكلام اللي فات ونبدأ الكلام الجديد .. إن شاء الله ربنا هيعوضك خير

رفقة عمر said...

ربنا يعوضك خيرا اللهم امين
قل هذا الدعاء
اللهم اجرنى فى مصيبتى واخلفنى خيرا منها
قالتها السيده ام سلمه عند وفاه زوجها وتفتكر اتجوزت مين بعد زوجها تزوجت الرسول صلى الله عليه وسلم
ربنا يخلفك عليك بخيرا مننها اللهم امين

صَاحبْ البَوَابْه ... الحٌريةْ بالمَجَــانْ said...

المحترم مصطفى الحسينى

---
اخى ماذا فعلت لك لتصفنى بالنصاب
سامحك الله فأنا لم انتحل شخصيتك ولم اذهب اقول للناس اننى مصطفى الحسينى صاحب البوابة وعندما أنشأت مدونة اسميتها البوابة الجديدة واشرت فيها الى مدونتك وكتبت ان مدونتك هى البوابة الاصلية
وما المانع اذا كنت معجب بمدونة قام صاحبها بالتخلى عن التدوين وترك قضيته الذى ظل يقنع الناس انه يعيش من اجلها وترك الميدان ورحل .. رحل بعيدا الى مكان حتى لا نعرفه
ما المانع اذا ان اجدد انا حمل القضيه وان اعبر فى البوابه مع الاخرين
ولماذا تبخل على قضية ما بأسم مشابه لأسم مدونتك
الم تذكر انت فى اول تدوينه لك بأن البوابه وسيلة وليست غاية واننا جميعا يجب ان نعبر منها
لماذا عدت الان وجعلتها غاية لك وحدك
----
ثم اعود واكرر لماذا تنعتنى بالنصاب
اى نصب ارتكبته فى حقك او حق اى شخص
المدونة عندى واضحه تماما بداية من اسمها البوابه الجديده
وصورتك التى اشير فيها ان مدونتى ليست مدونة صاحب البوابه واسمى الذى اعرق به عند المدونين يختلف عن اسمك
فأين النصب هنا
انا فقط اردت ان يكون شكل المدونة متقارب لكى اعيد الى بعض من كانوا يتابعونك نفس الحالة والمشاعر
---
النقطه الثانيه وهى اننى علقت عند اصدقائك المدونين بتعليقات وسباب واسلوب غير مهذب
فأذكرك بقول الرسول صلى الله عليه وسلم
اعلم انه ان كان فيه فقد اغتبته وان لم يكن فقد بهته
وانت بهتنى
لأن الله وحده يشهد اننى لم افعل ذلك
وتعليقى فى مدونة انكسارات كان كلمة واحده هى كلمة جميل
فاذا كنت تعتبر هذه الكلمة سباباً فهذا امر يثير الضحك
اما تعليقى عند محمد جمعه فكان تأمين على دعاؤه بالبوست وقلتله ربنا يوفقك
فهل هذا تعليق سئ وهكذا باقى التعليقات كلها

====
كما انى لى الحق ان اقول ما اشاء ما دمت لم انتحل شخصيتك

===
اشكرك على ذوقك
واعلم انى ساحاجك امام الله يوم القيامه على انك سوأت سمعتى علناً دون ان افعل لك الا الخير
وسوف استمر فى التدوين فى نفس المدونة والبوست الجاى هيكون عنك رد على تدوينتك

وشكرا

maioya said...

الحمدلله علي اي حاجه
وعسي ان تكرهوا شيئا ولكم فيه خيرا كثيرا :))

mulan said...

مش عارفه اقولك ايه يا محمد غير ان خد وقتك وسامحها وحاول تخلي ظروفك تكون حافز ليك عالشان تكون احسن عايز يعني يجرالك ايه اكتر من كده علشان تكون احسن واحد انت عايز تكونه وهي انشاء الله ربنا يوفقها ويوفقك

سكة سفر said...

وجعت قلبى الله يسامحك
عماله تزن ف دماغى اغنية زمان و انا صغير
عايزة اقولك اروع و اجمل حاجه ربنا خلقها هى الحب
دقة القلب و طهارته حتى احتياجه و شوقه
و اصعب حاجه انك ما تلاقيش او لسه ماجاش
ربنا يسعدها و يسعدك
مدونتك حلوة و هدخلها ع طول طالما كلامك من القلب
بس عايزة اقولك ان الكلام عمره ما بيخلص لانه لو خلص هنموت

saso said...

بقالك اسبوعين مخلص كلام

مش قلنا لما تكون متضايق ارغي

الكلام بينسي وبيفوق، ماشي مش عاوز تجيب السيرة اتكلم عن اي حاجة تاني
:)
بس بلاش الماتشات والشغل والسياسة
يارب تكون بخير دلوقت