Friday, October 10, 2008

كان نفسي تكوني معايا إمبارح أنا طبعا عمال أخرج مع اي حد يقولي يلا نخرج علشان مش عاوز أقعد في البيت و مش قادر أقعد في البيت
المهم نزلت مع صحابي قعدنا شوية علي القهوة و قلنا نروح ناكل عند واحد معرفش فين
المهم لاقينا سورضخم قوي و بوابة عليها حراسة سألت صاحبي قالي باب الفتوح و بعد أما أكلنا قلنا ندخل نشوف في أية جوة بمجرد ما دخلت تخيلت يوم نخرج فيه مع بعض نروح هناك و نتصور
المكان جميل و روحه زيك جميلة و مشينا في شارع المعز لحد شارع الأزهر من الناحية التانية و رجعنا و عدينا علي بيت السحيمي اللي أول مرة أعرف مكانه و تخيلت إحنا مع بعض و نتصور هناك و أصورك هناك و كان نفسي نكون لسه علي إتصال علشان أقولك أنا هناك دلوقتي
و نتفق علي ميعاد نتقابل فيه نروح هناك و طبعا لازم يكون بدري علشان نلحق نروح و كمان المكان بيكون الناس فيه قليلة بالليل
و أكيد هترجعي البيت مبسوطة و فرحانة و أنا كمان
من كم يوم مشيت في الطريق اللي كنا بنمشي فيه و مش عاوز أقولك إن أنا شفت حاجات كتير مشفتهاش قبل كده بالرغم من إننا مشينا في الشارع ده كتير مش عارف كنت باكون فين و أنا ماشي معاكي
هأقولك أخيرا بيت شعر لاقيته عندي صدفة في وقت تمنيت أكون فيه باكتب شعر علشان أكتب لك
الأبيات لإبن حزم
وددت بأن القلب شق بمدية
وأدخلت فيه ثم أطبق في صدري
تعيشين فيه ما حييت فإن أمت
سكنت شفاف القلب في ظلم القبر

أخيرا أتمني منك تسامحيني علي أي حاجة عملتها سببت لك أي ألم او حزن زمان أو دلوقتي أو مستقبلا
أنا أسف
.
طبعا يا أصدقائي غلط الكلام اللي أنا باكتبه ده بس هي مش هتقرأ الكلام ده علشان هي مش هتتدخل علي النت لفترة طويلة و إن شاء الله لما هتتدخل هتكون فرحانة و نسيتني و مش هتتأثر بالكلام ده بس بجد أنا مش قادر أشيل الكلام جوايا
مش عارف زمان كنت سهل قوي متكلمش و مكتبش و أشيل جوايا و خلاص بس سبحان الله بعد المدونات و بعد أما وصلت لسن الواحد فيه بيكون أقوي في الكتمان أنا سبحان الله العكس و أنا صغير كنت ممكن أكتم و أخبي جوايا بس حاليا مش بأقدر لازم أطلع أي كلام جوايا حتي لو أنا عارف إن مجرد خروج الكلام ده غلط و حرام بس فعلا مش قادر دعواتكم معايا إن ربنا يعدي الفترة دي علي و عليها بسرعة و يكون ربنا شايل لنا الخير قدام
تعرفوا أنا طلبت منها إن أنا أكتب عن كلامنا مع بعض و هي رفضت طبعا مش هأقدر أكتب ما دام هي قالت لا بس بجد أحلي فرحة في حياتي كلها عيشتها يارب ترجع لي تاني أو أفرح نفس الفرحة تاني بس معتقدش هأفرح الفرحة دي مع حد غيرها
تعرفوا أنا مش بأبعد عن التليفون خالص و كل شوية أبص عليه لو بعدت عنه شوية مستني إنها تتصل و تقولي خلاص المشكلة أتحلت
.
يارب أنا مش عاوز أرجع للحالة اللي كنت عليها اللي بدات فعلا ترجع لي و أعمل حاجات حرام و غلط و أكرهه نفسي
يارب أنت اللي أديتني الأمل وأخدته مني و أنت اللي قادر ترجع لي الأمل مرة تانية
إزاي و لا بأية أنا مش عارف و أي حاجة أنا هأرضي
أنا حتي مش عارف أدعي بأية يارب
حيران حتي في الدعاء
يارب هدايتك يارب
و يارب أجعل لي الخير معها يارب و قدر لنا الخير
أنا حتي مش عارف أتخيل إزاي ده ممكن يحصل في الوقت القليل ده بس أنت يارب مسير الدنيا كلها و مش هيكون صعب عليك و لا بعيد عنك حل الموضوع ده
يارب
يارب
يارب
يارب أنا عصيتك أكيد كتير و لما هتكرمني إن شئت هأفرح و هأنسي ذلتي ليك دلوقتي بس دي حكمتك و مش هأكون العبد الصالح بردوا بس أنت يارب غفور رحيم و أنا إنسان ضعيف و ما بي من ضعف أنت أعلم به مني و قادر تقويني
يارب أنا مش عاوز أرجع للقرف تاني يارب

10 comments:

المستنصر بالله said...

ربنا يرجعلك فرحتك تانى
ويتم نعمته عليك

تحياتى

مـحـمـد مـفـيـد said...

عارف يا محمد
ده من اجمل المواضيع اللي كتبتها انت
طيب ليه متقولش
ان ربنا له حكمه في ده
هي لو نصيبك وربنا كاتبهالك
هترجعلك تاني لو الدنيا كلها وقفت قدامكم
وليه ترجع تاني وحش
الانسان بيتغير علشان ربنا بمساعده العوامل
العوامل ممكن في يوم من الايام تتغير زي كده
بس ربنا مش بيتغير
زي ماربنا كرمك بحها ليك وحبك ليها ومجمعش بينكم لاي سبب
قادر علي تعويضك
لان ربنا مش بيريد حاجه وحشه للانسان
معلش انا طولت ومش عادتي اتكلم كتير
بس صدقني
خليك علي الطاعه وابعد عن المعصيه
وامسك في صحبه الخير
وربنا هيعوضك

Unknown said...

ادعي باللي انت عايزه وألح في الدعاء

ده انت لو واقف علي باب بيت واحد كريم هيفتح الباب ويديك كل اللي انت عايزه

مابالك وانت واقف علي بابا ربنا بقي؟

مش مهم هيحصل ازاي , لأن ربنا هو الوحيد اللي يقدر يغير الحال في ثانيه

كتير ربنا بيأخر طللبنا بس عشان يسمع صوتنا

ادعيه وان شاء الله هيحققلك كل اللي انت عايزه

zahra said...

أخى الكريم
و عسى أن تكرهوا شيئا و هو خير لكم و عسى ان تحبوا شيئا و هو شر لكم و الله يعلم و انتم لا تعلمون
ثق فى الله
و ألح عليه بالدعاء
و ثق بأن كل ما يحدث هو خير لك فالله لا يكتب شرا على أحد و سوف تدرك الحكمة الإلهية مما حدث لاحقا
دمت فى خير

Monzer said...

بص من الآخر

انت هاتعيش وبتعيش
وبتاكل وبتشرب وهتاكل وهاتشرب
وهاتجوز وتخلف
وتشتغل وتكسب وتفرح وتحزن وتعمل كل حاجة وأي حاجة
علشان ايه
علشان الدنيا مش بتقف على حد

وعارف كمان فيه آية وخلقنا الانسان فى كبد

هي دى عيشتك الى لازم تخليها سعيدة بيك انت شخصيا مش بأي حد تاني ومش بمساعدة أي حد تاني وبعيد عن أي حد تاني

ماتحطش فى عقلك ان الساعدة والخير والطاعة والحب والجمال والفرحة موجودة فيها هي بس

وكمان من الآخر باه ماحدش يستاهلك

أيوة مافيش حد يستاهل محمد جمعة علشان مافيش غير محمد جمعة واحد

ومادام هي سببتلك الآلام دى كلها هي مش عارفة قيمتك

انت شخص تستاهل أي حد انها تصبر علشان علشان مش هاتلاقي ضفره

اعرف قيمة نفسك كويس، فكك من المثالية، ركز فى حياتك العملية، جمد قلبك شوية، خليك أقوى من كده

وخلي بالك زيها زي غيرها فى الأول الفراق بيبقى صعب وهاتقد تتخليها لما تجوز وتخلف وتعيش حياتها وانت هاتبقى مرمي لوحدك ماحدش هايحس بألمك وماحدش هايمسح دمعتك
يا ابن الحلال طيع ربنا لربنا ولنفسك واشتغل واكسب بالحلال لنفسك واتجوز علشان تعفد نفسك وترضي ربنا، انسي ألمك بالشغل، صبح وليل ونهار، اقرا كتاب ربنا وصلي بالأسحار

وحاول تؤمن بمقولة سيدنا علي تقريبا

احبب حبيبك هونا ما عسي ان ينقلب عدوك يوما ما وأبغض بغيضك هونا ما عسي ان ينقلب حبيبك يوما ما

وربنا يكرمك يا جمعة وييسرلك كل حاجة خير

انا حره said...

استشعر جيدا مابك فهو نفسه ا بى ولكن مع اختلاف الاسباب

منى said...

ربنا لايعينك ويهديك لما يحب ويرضى
ويمنحك الصبر والسكينه
تحياتى

رينـــــــــــا said...

:( :( :(

فى القلب said...

كله حاجه بتتولد صغيره وتكبر ماعدا الالم


يتولدكبير ويصغر

صدقنى يا محمد أستحمل بس شهر أو أتنين على طاعه الله
ومتبصش تانى خالص فى الموبايل كل شويه عشانتستنى نمرتها وياريت تمسح النمره من على الموبايل

متسمعش أغانى عاطفيه فى الفتره دى نهائى


كل ما تيجى فى بالك أفتكر نعم الله عليك وحبه ليك أنه وهبك الحب فى وقت هو أعلم أنك محتاجه وخده لأنه يعلم أنه سوف يضرك بس أحنا بصريتنا محدوده

متمشيش فى نفس الشوارع ألى فيها ذكرياتك أمش من شوارع تانيه

أمشى على السابق لمده شهرين بس ماعدا طبعاً طاعه الله بقدر الأمكان حولها لعاده وتعود

صاحب المضيفة said...

ربنا يسعدك يا محمد ويخلف عليك يا عم

ولا يهمك كلنا بنعدي بنفس المواقف دي


ولا يهمك يابطل


تحياتي يا جميل وربنا يستجيب دعاك يارب