Saturday, September 20, 2008

البقاء لله
أنا عاوز أقولكم خبر مؤلم وتعبني قوي ومش مصدقه لحد دلوقتي و بأتمني أكون بأحلم توفي إلي رحمة الله أخويا و حبيبي محمد صاحب مدونة نوفير
دعواتكم له بالرحمة وأن الله ينير قبره بالقرأن و يدخله فسيح جناته

متقلقوش أنا لسه حي أرزق
بس الكلمات دي تصوري علي لسان محمد مفيد خصوصا إنه هيكتب كده في مدونته لو أتصل بيا في البيت يتطمن عليا علشان بقالي كتير متصلتش بيه و لا رنيت له فأتصل بالبيت قالوله محمد تعيش أنت

طبعا هيتصدم أو المفروض يتصدم و يخلي عنده دم يعني و ميكتبش فترة طويلة و يكتئب و يقعد في البيت شوية بس هو مش هيربي دقنه علشان هو عنده دقن أساسا اللي ممكن يربي دقنه يومين تلاتة هو الواد منذر

بصرف النظر عن سبب موتي تعددت الأسباب و الموت واحدا هيكون شعوركم أية تعليقاتكم عن البوست ده هتفيدني قوي و حابب أشوفها و أنا عايش مش زي ما الدولة بتكرم الناس دايما بعد أما تموت و تلاقيها و لا مهتمة بيها في حياتها

من ساعة أما دخلت التدوين الفكرة دي علي دماغي إني أموت و اللي كان مجنني أنتم هتعرفوا إزاي
بس الحمد لله الطريقة وجدت بتوطيد علاقتي بمحمد مفيد و مدونين كتير و معهم تليفون البيتو الموبيل و بنتصل ببعض بإستمرار

عاوز كل واحد يكتب نعي محترم
و ميكترش في الكلام علشان النعي تكلفته كبيرة

10 comments:

Bella said...

الله يسامحك

كده برضه تخضني على الصبح

الله يسامحك كمان مرة

ربنا يديك عمر كويل ويبارك لك فيه وتحقق كل احلامك يارب

وكل سنة وانت طيب

Monzer said...

على فكرة انت شخص مخنق وخنيق وخنقة

ومقرف وتقرف وتبعث على القرف

بلاوي صحيح بنعرفها

الله ينكد عليك يا شيخ

هي نقصاك انت كمان

سمر الشافعى said...

ايه ياعم دا

حرام عليك خضيتنا ربنا يديك الصحه وطوله العمر

وبعدين شاغل نفسك ليه ماللى يتقال يتقال يعنى هوا انت هتعرفه ماخلاص هتكون لاقدر الله بخ خلاص مش هنا ههههههه

وقتها هتبقى مشغول بحسابك اعمل ليه بدل ماتنشغل باللى بيحصل فالدنيا

No Fear said...

bella
السلام عليكم
أنا أسف معلش
ربنا يسامحنا جميعا بس بجد الموضوع ده كان يشغل بالي جدا لأن عالم التدوين ده بقة أحلي شئ في حياتي و مكنتش حابب الناس تفتكر إني سيبته لما الدنيا أحلوت معايا كنت خايف يجرالي حاجة و متدعوش ليا بس لو لا قدر الله حصل حاجة الحمد لله بقي في ناس تبلغكم علشان تدعولي و كده كده ربنا يكرمك أدعي علشان الواحد خلاص
.
و ياريت تعلقي علي طول كده مش لازم أخضك علشان تعلقي
:))

No Fear said...

منذر
السلام عليكم
الله يسامحك
اومال لو أنا مكنتش قلتلك أنا كاتب بوست و متتخضش لما تقراه كان حصلك أية و كتبت أية
بس و الله بوست جامد صح
:)

No Fear said...

سمر الشافعي
السلام عليكم
واضح إنك أنت كمان بتقري و مش بتعلقي هو أنا لازم أفزعكم كده علشان تعلقوا ماشي
:)
علي رأيك بس الواحد كان عاوز يتطمن إنكم هتعرفوا علشان تدعوا لي و كفاية بقة كلام في البوست ده الواحد بدأ يقلق
:)

Bella said...

ازيك يامحمد

والله يامحمد انا بقالي فترة باعاني من كسل تدويني فظيع

حتى لو متابع مدونتي ح تلاقيني بقالي فترة ماكتبتش جديد

لكن متابعة المدونات التانية عللى الريدي

ومش مانعني من التعليق الا ضيق الوقت

بس عينية الاتنين

ح تلاقيني باعلق

بس بدون خضايض الله يخليك

هههههههههههههههه

حزيــــــــــــــــــن said...

البوست دا عبقرى انا بقالى فتره بفكر اكتب بوست زيه بس مكنتش لاقى صياغه
انا هسرقه منك
روح انت موت شويه كده ولما ترجع ابقى تعالى علق عندى على البوست اللى هعمله زيه

No Fear said...

bella
السلام عليكم
هي غالبا كانت حالة الناس كلها بتمر بيها أو علي الأقل الناس اللي عرفت بعض في فترة معينة.
التدوين ده اصله عصور
.
كل عصر له ناسه العصر بتاعنا جت له حالة من الزهق كده مرة واحدة
.
بس بدأنا نفوق و نرجع تاني
إن شاء الله

No Fear said...

حزين
السلام عليكم
يابني البوست ده أقل حاجة عندي بس انت اللي مش واخد بالك:)
.
الله يسامحك أروح أموت
انت تقدر تعيش من غيري
.
جرب كده أسرق حاجة و أنا أفضحك