Tuesday, April 22, 2008

السلام عليكم و رحمة الله و بركاته
أزيكم يا شباب أخباركم أية
وحشني جدا جدا جدا جدا جدا جدا جدا جدا جدا
مش عارف إزاي قدرت أبعد عنكم كل ده
بس الحمد لله كانت فترة متوترة نوعا ما مش كئيبة بس مش مريحة
و كنت عاوز أبص علي نفسي من بعيد و طبعا أنا مش بحب نظام بقة عذرا المدونة مقفولة و الحاجات دي
زي سلام ورايا جيش كده و الأفلام الهابطة دي
الغريب إن أنا اليومين دول متفائل و فرحان ليه بجد هو ده اللي هيجنني
أمبارح كان عندي أمتحان في التمهيدي العجيب اللي أنا فيه ده
كنت خايف جدا و محرج لأحسن أكتب أسمي في الورقة بس بس الحمد لله ربنا قدرني و كتبت أة مش كله أتجاوب و اللي أتجاوب مش كله صح بس كتبت ده في حد ذاته معجزة
انا زمان في الكلية بدأ من سنة تانية كان عندي منهج عجيب في أمتحانات أعمال السنة كنت معظم الأمتحانات مش بأكتب غير أسمي علشان مش بحب أغش بس و الله ربنا كان بيكرم كرم مش غريب علي ربنا للي بيحترم نفسه و كنت بأنجح في أخر السنة
الحمد لله
.
المقرف بقة في التمهيدي إن كل الدكاترة بقة عندها كيف تهزقنا ليه مش عارف يعني إحنا أولا ناس كبيرة ثانيا بنشتغل مش صيع ثالثا بنجتهد و دافعين فلوس علشان التمهيدي ده و بنتبهدل في الأجازات في الشغل أة إجتهادنا مش كامل بس الظروف صعبة يعني
هم فاكرينا زيهم بنشتغل ساعتين في اليوم في محل بقالة زي ما هم كانوا بيشتغلوا و بياخدوا تفرغ من الشغل و أجازات و حاجات كده
الغريب إنهم عاوزينا نكون بنشتغل و في نفس الوقت نروح حضور يومين أو تلاتة في الأسبوع إزاي يعني
بس الغريب زي ما بقولكم إن أنا أمتحاناتي يوم الثامن عشر من مايو و لسه مذاكرتيش مواد كتييييييير بس متفائل ليه مش عارف هو ده يعتبرمرحلة من مراحل العتة المبكر بس أهوة متفائل الحمد لله
خايف قوي من التمهيدي نفسي أنجح
يااااااااااااااااااااااااااااااااااااااااااااااااااارب
.
الفترة اللي فاتت دي كانت مرحلة تفكير في علاقاتي بناس كتير حسيت إن أنا فرضت نفسي عليهم أو مش زيهم و مش المفروض أنتظر منهم اللي أنا منتظرة و كان بيزعلني منهم بس الواحد كعادته بيحلم بحاجات من ناس كتير و بيوهم نفسه أنه هو اللي صح و الناس اللي بتظلمه بس الحمد لله قدرت أحط أيدي علي أول سلمة في طريق العلاج و تصحيح النفس
أدعو لي أستمر
.
المهم حسن راح واخد أخوة علي و ركبوا العجلة و مشيوا
.
أخبار رياضية
جو جو حضري
هههههههههههه
مبروووووووك الدوري للأهلي هو كان لسه ماخدوش أصلي
الزمالك يعني حرقة دم
.
تاج أخويا مفيد
بالرغم من إن أنا مش بحب التاجات و كنت مش هأجاوب عليه بس لاقيت إجابات كتيرة هي اللي جت لي لوحدها
ليه مبقيناش نخاف من ربنا
ليه الظلم أنتشر بين الناس
ليه العدل إنتهي بين الناس
ليه الحب أختفي بين الناس
ليه الكذب أنتشر بين الناس
ليه لما بقيت أمشي في الشارع بقيت أحس إن مفيش حد بيضحك و فرحان و مرتاح
ليه النهاردة واحد معايا في العربية متعود يقرا الجرنال قال يا نهار أسود و وشه أحمر لما عرف إن أحمد فتحي أصيب و كل يوم بيقرا الجرنال خمسين أتحرقوا في غزة و لا البصرة و مش بيتأثر
ليه هدوم البنات أختفت من عليهم
ليه كل يوم في الجرنال أقرا حادثة إغتصاب
و أخيرا ليه حسن شحاته حول لإتصالات
معلش نكدت عليكم شوية بس هو التاج كده
.
يوم الأربعاء واحد صاحبي أتصل بي قال لي إن أبوه توفي إلي رحمة الله من أسبوع و هم كانوا في البلد المهم قالي إن باقي صحابنا هتروح ليه يوم الجمعة أنا تاني يوم يعني الخميس بعد الشغل رحت عليه حاجات كتير حسيتها
أولا أول مرة أعرف إن حالتهم المادية قليلة شوية حسيت بقد أية أنا في نعمة من ربنا الحمد لله و تاني حاجة حسيت بمدي حب الأب بالرغم طبعا من علاقتي الفاترة مع أبويا بس حسيت بخوف إنه يجري له حاجة بس مش قادر أحسن علاقتي به صعب قوي بس انا بجد مش بزعله بس مش قادر أكون الإبن زي ما هو مش الأب معايا
بس بردوا خفت
أخر حاجة كنت سعيد إن أنا رحت لصحابي تاني يوم علي طول علشان هو كان لوحده و مكنش في حد من أهله معه كانوا في البلد و كان محتاج حد يكون معه
.
قبل أما أخلص رغي لازم أشكر مريم و رفقة عمر لسؤالهم عني و بجد متعرفوش سؤالهم عني فرحني قد أية
شكرااااااااااااااااااااااااااااااااااااااااااااااااااااااا
.
مقتطفات
أخدت من مفيد كتاب الدنيا أجمل من الجنة سيرة أصولي مصري لخالد البري
و حقيقي اول مرة أعرف يعني أية حد يمسك كتاب و ميقدرش ينام غير لما يخلصه
أنا بقيت كسلان جدا في الشغل و خايف أخد علي كده
أنا موبينيل أغير لإتصالات و لا فوادفون و لا أستمر مع موبينيل أية إقتراحتكم
نفسي أذاكر بقة
بجد ياريت ميكنش في حد في الدنيا كلها زعلان مني علشان فعلا الدنيا دي مش مستاهلة
ياااااااااااارب أحافظ علي الصلاة
.
بس و راح ضاربها قلمين و سابها و مشي
سلام

11 comments:

رفقة عمر said...

حمدا لله على سلامتك
لحمد لله انك بخيير
قلقتنا عليك جدا
ربنا يينجحك اللهم امين
سعييدة بعودتك جدا
ربنا يكرمك اللهم اميين

مـحـمـد مـفـيـد said...

المدونة مقفولة و الحاجات دي
زي سلام ورايا جيش كده و الأفلام الهابطة دي

:))
هو لسه حد بيقول الحاجات الفاشله دي

المهم الكتاب يا محمد علشان روايه تشالز ديكنز مع صاحبك من سنين
وشكرا يا نجم علي اجابتك التاج

marmoura said...

كنت حقول لما قريت اول البوست انك جاوبت عشان دعاء الوالدين بس لما قريت الأخر واضح ان طنط هى اللى بتدعيلك. حقيقى بجد حاول تتغير مع باباك محدش بيحس بقيمة اللى فى ايده واللى موجود غير لما بيروح منه ربنا يباركلك فيه ويديله الصحة وطول العمر بس صدقنى عن تجربة مميتة مش بقدر اوقف من حساب نفسى فى موقف زعلت فى دادى فى يوم من الأيام مع انى والحمد الله كنت ابنة بارة بابى وامى ومات وهو ماسك ايدى وبيدعيلى بس برضه كنت بحس انى كنت ممكن ابقى اكثر وليه مش عملت كده. صدقنى حتى لو كنتم مختلفين فى اوجه النظر والفكر لا شئ يستحق فى الحياة بعد الوالدين.

اما عن حقيقة التعليم الفاشل اللى مصر ده والتهذئ انا اعتقد ان التعليم فى مصر من ساعة ما رجعت من بره بيعتمد على الشتيمة والضرب والتهذئ ولا اكن الطلبة دول بهائم فى حذيرة اسفة لفظا وانا زييك فى ماجستير بس للأسف من ساعة ما جيت مصر وانا شايفة ان هو ده نظام التعليم فى مصر واحنا والأهالى كلها مستسلمة
واكننا مؤمكنين اننا مش بنمشى غير كده
احنا اللى جبنا من جوانا وخايفين نتكلم ونقول لا مش من حقكم تغلطو امحدش عارف ظروف الخر
للأسف هى تربية وبقت هى دى تربية الشعب المصر ى اللى واقف يتفرج على كل حقوقه اللى بتؤخذ منه يوم وراء التانى وخايف ينطق يقول لا احسن يعاقب عشان مشتتين وعمرنا ما بتوحد للأسف

ربنا يكرمك والله يا محمد انت طيب اوى بس خلى بالك من صلاتك اول ما حنتحاسب عليه ربنا يهديك ويهدينا جميعا ويجمعنا فى كل ماهو خيرانشا ءاالله

saso said...

وعليكم السلام ورحمة الله وبركاته يا سيدنا

مبروك البلاير
;)
وحمد لله علي السلامة ويديم عليك التفاؤل

ربنا يوفقك في الامتحانات، حد يجيب لنفسه وجع القلب بعد ماخلص كلية
:P
استحمل بقي

اتصالات يعني الموبايل نص اليوم عطلان عشان العروض الظريفة اللي بيعملوها بتزود الضغط، موبينيل لا حول ولا قوة الا بالله بتقع كل عيد باين يعني مفيش غير فودا

قبل حسن وعلي مايمشوا تعالي هنا
اللي تتصاحب عليه وتكلمه يبقي شرف ليه اصلا ويقعد ساكت خالص

هيا كده .. تقريبا بلطجة ..مفيش حاجة اسمها فرضت نفسك مش عارف ايه

حد لاقي صحاب كويسين الايام دي يا محمد
انت لاقي؟
امسك فيهم وتبت
:)

يلا ربنا يسعدك دايما..شغالة دعوات انا النهاردة

Unknown said...

السلام عليكم

انا جيت هنا بالصدفه البحته
والسبب الصوره بتاعت حضرتك
ليها مكانه خاصه عندي

وان شاء الله اكون متابعه

وربنا معاك في التمهيدي ويهدي الدكاتره
:))

No Fear said...

رفقة عمر
السلام عليكم
الله يسلمك
إن شاء الله مفيش قلق
و الله أنا سعيد بسؤالك و إهتمامك
جزاكي الله كل خير
ربنا يكرمك يارب

No Fear said...

مفيد باشا
السلام عليكم
ياعم الكلام الهابط إنت عارف مصدره أية و هو مطحون دلوقتي ربنا معاه
أنا الرواية معايا يابني أخدتها مع الكتاب
أنت شوف لي كتاب جديد حلو زي اللي أخدته منك ده ده لو هتوافق تشوفني تاني
:))

No Fear said...

الأخت مرمورة
السلام عليكم
و الله الموضوع مش زي ما أنت متصورة خالص
بس مش هينفع أعمل اللي بتقولي عليه بالنسبة ليهم هنا في البيت
بالنسبة للصلاة غن شاء الله ربنا يكرم و أواظب عليها
بالنسبة للتعليم هو فاشل فاشل بس إحنا الحقيقة مستهترين شوية
ربنا يهدينا علشان خلاص مفيش وقت
منورة
انت مش هتكتبي بقة حاجة في مدونتك

No Fear said...

ساسووووووو
السلام عليكم
ربنا يكرمك زي ما بتدعي لي
معلش أنا اللي جبته لنفسي بس هو مهم قوي للشغل و الحياة العملية و الإشباع النفسي حلوة الإشباع دي
بس مش عارف ليه بكسل عن المذاكرة مرض بعيد عنك
بتحرجيني بذوقك و كلامك الجامد ده يا رافعة معنوياتي
ربنا يخليكي
و شرب كوباية الميه و نام

No Fear said...

نسرين
السلام عليكم
منورة المدونة
و يارب الصورة يكون لها ذكري حلوة
أنا سعيد بزيارتك و أتشرف لو تدخلي هنا علي طول

Tamer Nabil Moussa said...

حمدا لله على سلامتك

ويارب تكون متفائل ومبسوط على طول

ربنا يكرمك

تحياتى