Saturday, March 29, 2008

السلام عليكم و رحمة الله و بركاته
أزيكم يا شباب
مش عارف أبدأ منين و لا منين
حاجة حاجة كده و ربنا يكرم
.
إنتخابات حزب الجبهة
الحمد لله الناس اللي كنت هأنتخبها هي اللي نجحت في الإنتخابات و كان درس لي
الدرس فين
إن أنا كنت فاقد الأمل إن الأستاذة مارجريت عازر تكسب السيد السادات و ذلك بسبب الناس الكتير اللي حسيت إنها هتنتخبه
طبعا الرئاسة كان مفروغ أمرها للدكتور أسامة اللي أنا شخصيا داخل الحزب علشانه
حسيت إنه نفسه فعلا يغير بالدليل إنه أستقال من الحزب الوطني و أسس حزب الجبهة مع المؤسسين الأوائل بالرغم من إحباطي من الحزب كل مرة أروح إجتماع هناك هم مش كتير أتنين بس كنت بحس إني قاعد في برنامج العاشرة مساءا بس بردوا رحت أمبارح الإنتخابات بس كان لازم أمشي و كانت هتبدا بعد الميعاد المقرر بساعتين و كنت متخيل النتيجة و مشيت بدون ما أنتخب محدش يقول للحزب بس الحمد لله النتايج جت مشجعة لي شخصيا الناس اللي كنت أعرفها و نفسي تكسب هي اللي كسبت فلذلك هيطول إنضمامي للحزب و يارب يقوم بأي دور فعال و أقدر أشارك فيه و ميكنش كلام في كلام بس
بس كان في سلبيات كتير في الناس اللي موجودة و المرشحين و المنتخبين بس الحمد لله
سأطوي هذه الصفحة و سأبدا مع الحزب بداية جديدة و ربنا يكرم
هارد لك يا مريم
.
أمر الحمد لله هذه الأيام بحالة نفسية عالية جدا جدا جدا تقريبا أعلي حالة نفسية بأمر بها من ساعة أما دخلت التدوين أو تقريبا من ساعة أما تخرجت سنة ألفين و أربعة
الحمد لله يارب تتدوم
طبعا كله بأمر الله بس ربنا سبب لي أسباب كتير هي اللي صنعت هذه الحالة طبعا منها صداقتي بمفيد و منذر و خروجي معهم و طبعا ناس تانية كتير زي رفقة عمر و ساسو و مريم و عالم التدوين ككل
في ناس كتير مكنتش أتخيل إن أنا أكلمهم علي الميل فجاة لاقيت نمر تليفوناتهم معايا و بأقابلهم و بكلمهم علي المسنجر شبه يوميا
طبعا أنت مش منهم يا منذر أنا مكنتش أعرفك أصلا قبل كده
.
بالمناسبة الواد منذر تقريبا خاف لأحسن فضيحته السابقة مع الكرنب تنتشر و ميعرفش يتجوز قام جري خطب علي طول و بهذه المناسبة السعيدة نوجه للسيد منذر تحية ملعلعة بمناسبة خطوبته السعيدة و ربنا يتمم له علي خير و ربنا يكون في عون خطيبته
.
و كمان سبب الحالة العالية دي هي الحمد لله عودتي للصلاة بإنتظام كبير الحمد لله و رجوعي نوعا ما للصلاة في الجامع كنت الفترة اللي فاتت يادوب بأدخل الجامع في الجمعة بس
الحمد لله يارب كل ده يدوم و يزيد
.
و كمان اللي سبب لي الحالة دي إحساسي بثقة الناس و حبهم لي الحمد لله في الشغل و ربنا يزيد
يوم الخميس تعرضت لموقف ربنا يسلم من عواقبه
و هو إن في إتنين عندنا في الشغل اللي يحبه واحد منهم لازم التاني يكرهه و العكس للأسف مديري المباشر أظهر تعاطفه معي يوم الخميس فربنا يستر من رد فعل الرجل التاني الأقوي
هي كده كده مش فارقة معايا بس مش ناقصة قرف يعني
.
و كمان المذاكرة مش عارف لسه مذاكرتش أي حاجة بس حاسس بثقة مش عارف ليه و أية سببها بالرغم من إني أبيض يعني في المذاكرة بس حاسس إني هأنجح إن شاء الله
و سبب تاني كمان ممكن سياسة المقاطعة و تكبير الدماغ بالنسبة للبيت هنا بردوا ده سبب مهم
.
و كمان شجاعتي في عمل حاجات كتير قوي مكنتش أتصور نفسي باعملها قبل كده و ربنا يزيد
يارب الحالة دي تستمر و تزيد و بلاش أي إحباطات و خنقة و تراجع
.
في نقطة بس مستفزة هتكلم فيها و هو إن النهاردة كان إجتماع القمة العربية مش عارف ليه المذيعة علي التلفزيون الأرضي كانت بتقول وسط غياب نصف القادة العرب كنت بحس إنها ناقص ترقع زغروطة بعد الجملة دي هي سعيدة ليه كده مش عارف
.
الإخوة الأعزاء اللي بيدخلوا يقروا و ميعلقوش ياريت يخلوا عندهم دم و يعلقوا مش هينفع كده شكلي أية و سط المدونين يعني
.
أكتشفت إن ناس كتير قوي من شبرا زي الدكتور أسامة الغزالي حرب و تقريبا بردوا الأستاذة مارجريت و كمان تقريبا المرحوم مجدي مهني كان ساكن قريب قوي مني علي حسب كلام أمي يعني و الله أعلم ده غير بقة داليدا و علي الكسار و طاهر أبوزيد و مختارمختار و عباقرة كتير قوي قوي قوي فوق ما تتصورا يعني و في كل المجالات
لذلك عندا في الناس اللي بتروح تولد برة علشان ولادها تاخد الجنسية التانية لما ربنا يكرمني و أتجوز يحينا و يحييكم ربنا إن شاء الله سوف أحضر مراتي تولد هنا في شبرا عده لو أنا مشيت من هنا أساسا علشان ولادي يكونوا شبراوية
.
أنا مش عاجبني البوست ده الحقيقة مش عارف ليه بس هأنزله بردوا
سلام

28 comments:

مـحـمـد مـفـيـد said...

والله يا محمد موضوع حزب الجبهه رغم عدم اقتناعي بكل الاحزاب الا اني اتمني ان يكون حاجه غير الباقي
واتمني انها تكون مبشرات
بالنسبه للصداقه بيننا وكما قلت لك بجد انا ببقي سعيد لما بقابلك واكلمك ومش هقعد اشغل الاسطوانه علشان الناس القليله اللي بتعلق مش تزهق
:D
يكفي ان اقولك انك من احسن الناس اللي قابلتهم في حياتي
حكايه الصلاه دي بقي مش هقولك عليها حاجه
بس لما اكلمك في الفجر تبقي تصحي وتعبرني لاني بتخنق بسرعه
:)
جمعه لازم تصحي

بالنسبه بقي لشبرا انت نسيت تقول ان جدتي كانت ساكنه في ابو وافيه
يعني شرف لي انك تكون ساكن جنبها اساسا
الله يرحمها
عقبالك انت كمان
كفايه كده سلاااااااااااااااام
شايفني يا جمعه

mariam said...

مبرووك يا محمد
طبعا شايف الديمقراطيه
مع ان النتيجه مش هى اللى انا عايزاها
بس طبعا لازم نقبل رأى الناخبين
اللى هما انا و انت مش منهم لأننا مشينا من غير ما ننتخب
ههههههههههه
بعدين نتكلم فى الموضوع ده بلاش نتكلم فى الشارع كده
بس على الأقل هتنفذ وعدك اللى انت فاكره طبعا

ملحوظه
مجدى مهنا كان ساكن فى المقطم
D:

رفقة عمر said...

ازاى مش عجبك البوست
دة اكثر من رائع
لا تتخيل انت قدرت توصلى احساس فرحك وسعادتك ماشاء الله لاقوة الا بالله
ربنا يديمها اللهم امين
انا فرحانه جدا لانك مبسوط وكمان انك انتظمت فى الصلاه فى الجامع
ربنا يديم عليك فضله ومنته
ويثبتك ويرزقك السكينه وراحه البال الهم امين يارب العالمين

صاحب المضيفة said...

سلام يا عم محمد

كيف الحال


ربنا يزيد فرح وسرور يا عمنا

علشان ترعف حلاوة الطاعة ودخول المسجد


ربنا يزيدك كمان وكمان


سلامي لمنذر وقوله صاحب المضيفة بيقولك كده تعملها من غير ما تعزمه


امانة السلام



تحياتي

mulan said...

مبروك يا محمد ان حالتك النفسيه اتحسنت دي اول حاجه وتاني حاجه علشان الانتخبات وانشاء لله تكون من ضمن الناس الكويسين الي في شبرازي ما انت عايز كده وووبس
سلام

marmoura said...

احساس جميل ان الانسان يرجع لطاعة ربنا يرجع يصلى ويحمد ربنا على نعمه عليه مافيش حد معندهوش ابتلاء فى حياته بس مازالت نعم ربنا على كل انسان اكثر بمراحلا صعب حصرها من حجم الابتلاءات اللى عنده عشان كده الواحد دائما ان ربنا ما يحعلش ابتلائه لينا فى ديننا بعد الدين اى حاجة ممكن تهون ربنا يسلمك من كل سوء
رجوعك لصلاتك اعظم حاجة عملتها ودخولك المسجد واحساساك بيه فى راييى اكثر حاجة مفرحاك ومخلياك مبسوط ومنتعش ربنا يديم عليك ايمانه ويوفقك ان شاءالله
اما من حيث اللى بيولدوا بره مالهم بقى اللى معاهم جنسيتين
شكلنا كده حنتخانق قريب
ربنا يسطر

No Fear said...

مفيد
السلام عليكم
شكلها كانت طالبة معاك رغي
المهم
حزب الجبهة ربنا يكرم علشان الواحد أتخنق الحقيقة نفسه في حاجة فعالة بقة

صداقتنا
أنت عارف
بس حقيقي يا مفيد ساعات كتير بيبقي نقسي أقابلكم قوي قوي و لما باقابلكم مش بقولكم حاجة و بتخنق مش عارف ليه

أنت مش بترن اليومين دول ليه
ماشي
أنا رنتلك النهاردة
و الله العظيم كنت هأقول كده بس قلت لتزعل و لا حاجة

شايفيني يا مفيد
قول يااااااااااااارب
سلام

No Fear said...

مريم
السلام عليكم
بعد النتائج الكبيرة و الجميلة دي مش قدامك تقولي غير مبروووك
بلاش لأحسن نقال من الحزب
و أنت شكلك ليكي مستقبل باهر فيه بجد بس أنت كنتي عاوزة تعمليلي غسيل مخ بس الحمد لله
:)
تقريبا مجدي مهنا كان ساكن في شبرا و هو صغير
يعني أيام المدارس و كده زي واحد صاحبنا كانت مدرسته في شبرا

No Fear said...

رفقة عمر
السلام عليكم
جزاكي الله كل خير علي كلامك المشجع ده
تقريبا أنا مش عاجبني البوست علشان مش نكد
:)
أنا تقريبا من ساعة أما عملت المدونة شغال في النكد بس
ربنا يبعده عننا جميعا
ربنا يقربنا كلنا من طاعة الله بجد علشان اللي بعيد عنها فايته حاجات كتير
ربنا يكرمك يارب

No Fear said...

صاحب المضيقة
السلام عليكم
ربنا يقربنا كلنا من طاعته و يبعدنا عن معصيته

معلش منذر عاملها علي الضيق و مش عازم حد إنما إن شاء الله في الفرح هيعزم كل المدونين
ربنا يبارك لك

No Fear said...

mulan
السلام عليكم
ربنا يكرمك يارب
أنت خريجة حقوق و لا علوم
جزاكي الله كل خير

No Fear said...

marmoura
السلام عليكم
لسه عارف حالا قدرا أنت مين
و الله منورة
الحمد لله الواحد مش معترض علي الإبتلاءات بس المشكلة لما الإبتلاء بيكون في الطاعة و العبادة بيكون مشكلة و خطر
بس الحمد لله ربنا ما يرجعنيش للمرحلة دي تاني
بالنسبة لموضوع الجنسيتين مش معترض عليه بس متوصلش إننا نتعمد نسافر علشان نولد برة زي الناس ما بتعمل حاليا
قدرا ماشي إنما تعمد هي مصر جربة لو جربة يبقي متتطلبش جنسيتها من أساسه
بالمناسبة هي ربنا يستر مش يسطر شفتي بقة غلط كده و لا لا

rony said...

السلام عليكم ورحمه الله وبركاته
ازيك يامحمد اخبارك ايه
شفت يابنى الحظ
الجهاز خرب خالص ودى بقاياه وموبيلي اتسرق
رن عليا علشان احظ الرقم
يارب تكون كويس
معلش مش قادره اعلق علي البوست

mulan said...

اشمعنا افتكرتني في علوم يعني لا انا في تانيه حقوق

فى القلب said...

أزيك يا جميل

مش عارفه أنا حبيت البوست ده جدا لأنه فيه روح تفأل جميله يا رب تفضل تكتب فيها يا محمد
لأنك أنسان طيب جدا وعذيذ علينا أوى ويا رب كا أخبارك جميله زى روحك

sherehan84 said...

ماكنتش ناوية أعلق بس لقيت في شتيمة للناس اللي مش بتعل قلت ألم نفسي و أعلق :) بس على فكرة البوست حلو وكويس انك نزلته.. حلوة الطاقة الايجيبيه اللي ماشية اليومين دول لسه كنت قاريه حالا بوست لمنذر مش منذر صاحبك منذر تاني
nashwah.blogspot.com
وكان فيه بردو طاقة ايجابية كده جميلة .. ربنا يفرح كل المدونين يارب

raspoutine said...

انا برضو كنت شايف انك متنزلش البوست ده لانى مع مفيد ان مفيش فايدة من الاحزاب وانا كمان مش مقتنع بيها

أنا وصاحبى said...

فى حد فى الدنيا يقول
السلام عليكم يا شباب
ايه الكلام دا
ونو فير ال
يعنى ايه بقى نو فير امال لما قعدت معاك محستش انك نو فير ولا حاجه
نتكلم بقى عن البوست
بعد ما غلست عليك شويه كعادتى معاك
فى كل الاحوال انا محصلش انى اختلطت اوى بحد من الحزب دا
لكن سمعت كتير انه محترم
اتمنى يفضل كده

mariam said...

انت فين يا محمد
من ساعة الأنتخابات مش بكتب
و لا اعرف عنك حاجه

رفقة عمر said...

اخبارك ايه انت فين
يارب تكون بخير
ياريت تتطمنا

مـحـمـد مـفـيـد said...

ليك تاج عندي والاجابه أجباري
:)
مفهوم والا

No Fear said...

روني
السلام عليكم
تمام كده
أوك
ليكي وحشة هنا الحقيقة

No Fear said...

mulan
السلام عليكم
مش عارف ليه شكلك علوم بس حقوق مش بعيدة بردوا

No Fear said...

في القلب
السلام عليكم
جزاكي الله كل خير
هي روح التفائل موجودة الحمد لله نوعا ما لحد دلوقتي ربنا يستر

No Fear said...

شيريهان
السلام عليكم
كويس إنك علقتي
:)
منورة أولا
يارب الروح دي تستمر علشان لما بتقلب الواحد بيكون في الضياع

No Fear said...

راسبوتين
السلام عليكم
لا بس الأحزاب زي الفل بردوا

No Fear said...

أنت وصاحبك و اللي يتشددلك
السلام عليكم
أقولك أية
ربنا يسامحك مسكت نفسي علي أخر لحظة
منورني ياباشا أنت و صاحبك بس خف عني علشان مترجعش تزعل
بالنسبة لحزب الجبهة بعد الإنتخابات محدش عبرني تاني بالرغم من إن أيام الإنتخابات كانت أكتر فترة في حياتي جالي رسايل موبايل
فعلا شكله حزب زي الفل
بس مش هيأس بردوا
بالمناسبة أنت قلتلي أنت منين
و أخبار الإحصاء أية
هيصة هي
أي حد يعمل إحصاء
بطيييييييييييييييخ يا بلد

No Fear said...

الأختان العزيزتان
مريم و رفقة عمر
السلام عليكم
بجد متعرفوش سؤالكم عني فرحني قد أية
ربنا يكرمكم و يجازيكم عني خير