Monday, March 24, 2008

السلام عليكم و رحمة الله و بركاته
أزيكم يا شباب أخباركم أية
البوست ده محبط شوية و مش عن نفسي قوي يعني
اللي أستفزني إني أكتب البوست ده هو الدوشة اللي موجودة بسبب الإختراع اللي ربنا يحرقه اللي مسمي دي جي دماغي وديتني كمان إزاي ممكن الناس تتغير و بما إننا عارفين إن الله لا يغير ما بقوما حتي يغيروا ما بانفسهم أصبت بحالة من الإحباط بسبب الحالة الأخلاقية السيئة اللي وصلنا لها يعني مش كفاية مشغل أغاني بصوت يجيب الجنان لا مستوي الكلام حاجة مقرفة الأصوات حاجة مقززة أصلا مش عارف حالنا هيودينا لفين و الله و الأغاني دي كمان بتطلع ناس ضايعة أساسا يعني بصرف النظر عن كون الأغاني حلال و لا حرام تخيلوا الناس كانت بتسمع أم كلثوم و عبدالحليم و موسيقي كلاسيكة طلع الناس العباقرة في كل المجالات تخيلوا بقة ناس عمالة تسمع يا لهوي يا لهوي و يا دلع يادلع من صوت أقرب ما يكون يعني لصوت الحمار و معاه موسيقي خزعبلية كمان فعلا يعني تخيلوا الجيل اللي هيطلع هيكون شكله أية أكيد مجرمين و مشردين و بلطجيةو مدمنين
.
أنا بعد أما خلصت البوست كتبت الجزء ده تخيلوا في أغنية بتشجع علي شرب الكونياك و بتقول العبد قال للشيطان
يا نهار أسود
و الله ده إحنا هنشوف أيام سودة
.
أخدني الموضوع لفكرة التغيير و هل ممكن يحصل و يتحقق
إزاي طيب يعني مين اللي هيساعدك علشان تغير أنت هتحارب كل الناس و لا هتعمل أية و معتقدش الناس بمجرد ما هتشوف حد كويس هتمشي وراه علشان خلاص الناس أدمنت الفساد في كل حاجة و بقينا فعلا نكرهه حتي الشئ الكويس الطيب يعني زي ما في فيلم الكيف عمل لما جميل راتب كان بيحط نشارة الخشب في الشاي و لما النجارين أتنمردوا و غلوا النشارة حط شاي طبيعي النس كرهت الشاي النظيف
إحنا فعلا وصلنا للمرحلة دي للأسف من الفساد و الأكثر خطورة هو الإستمتاع بالفساد
بجد مش عارف ممكن نخرج منها إزاي و هو فعلا ممكن أصلا نخرج منها بسهولة يعني مش بكارثة مدمرة يعني
يارب أرحمنا برحمتك

8 comments:

jessy88 said...

اولا انا اؤيدك فى مخاوفك دى اوى بس انا عن نفسي شايفة الحل فى اننا منسيبش الساحة للى يوسخها بمعنى ؛ ننظفها احنا يعنى مثلا لما سامى يوسف طلع عمل اغنية بجودة عالية وبتحمل معنى محدش عزف عن سماعه حتى فى الديجى كانوا بيشغلوا ...فين بقى الاغنية والفيلم المحترم اللى معمول بجودة عالية عشان يحرقها على الهابطين؟؟؟؟؟ احنا اللى سيبناهلهم احنا حقيقى لازم نشتغل بقى شوية فى الحقل دة كفاية سبناه للى خربوها...

رفقة عمر said...

للاسف اشئ القبيح بقى كتير قوى وهو اللى ظاهر
بجد الجمال والذوق بقى قليل جدا
شوف زمان كل حاجه كانت جميله حتى الاغانى حتى كان فيه ناس قدوة
انا دلوقتى بادور على قدوة مش لاقيه حتى اكون مبهورة بيه ونفسى اكون زيه
للاسف كلهم منافقين وعايزين الشهرة وبس من غير افعال مؤثرة
ربنا يرحمنا من عنده

مدحت محمد said...

ده فى اغانى كمان اباحية
اباحية اباحية يعنى
وللاسف مفيش حاجة اسمها رقابة دلوقتى
تحياتى ليك

البنت الشلبية said...

ازيك يا محمد
على فكرة الاغنية دى مبتشجعش على الفساد
الناس الى بيغنو دول ناس بسيطة فى فكرها
فاكرة انها بتنصح الناس بالشكل ده
الاغنية بتتكلم عن ان العبد هيدخل النار بغواية الشيطان ويدور بينهم حوار بيحكى عن انكار الشيطان غواية الانسان واتهام الانسان للشيطان بالغواية

سلام

No Fear said...

jessy88
السلام عليكم
منورة
المشكلة بردوا لما حد يجي يسمع مثلا سامي يوسف و لا حتي قرأن لازم يعلي
هي الناس خلاص أخدت علي الدوشة و خلاص و مفيش مراعة للناس التانية
أنا و بعدي الطوفان
بس ربنا يكرم و كله يتظبط إن شاء الله

No Fear said...

رفقة عمر
السلام عليكم
إن شاء الله ربنا هيكرمنا و البلاوي دي كلها تختفي إن شاء الله

No Fear said...

مدحت محمد
السلام عليكم
مش لازم يكون في رقابة إحنا لو نهمل الشئ القبيح هو هيخلص لوحده يعني من أول قناة أغاني عرضت أغاني زبالة محدش أهتم بيها كان الباقي مطلعش أصلا

No Fear said...

البنت الشلبية
السلام عليكم
حمد لله علي السلامة
كويس الفترة دي الزمالك ماشي كويس ربنا يكرم
:)
مش مشكلة كلام مش صوت و لحن و جو و كل ده كوم و إنه يجبرني إني أسمعها غصب عني ده كوم تاني
أسمعها لوحدك يا عم مش لازم تخنقني بيها
صح و لا أية؟