Friday, March 21, 2008

السلام عليكم و رحمة الله و بركاته
أزيكم يا شباب أخباركم أية يارب تكونوا دايما بخير و سعادة
أكيد طبعا في حالة من الزهق و الملل بما إننا في أجازة مش عارف ليه الحالة دي بتيجي لي مش بأكون عارف أعمل حاجة كالعادة و لا نوم و لا مذاكرة و لا راحة كمان النهاردة الجو جمييييل و حرررررررررو ترررررراب حاجة بقة خمس نجوم

يارب الحالة دي تنتهي من عندي النهاردة قبل بكرة علشان خلاص مفيش وقت يضيع كفاية اللي ضاع
الحمد لله علي كل شئ
بس إن شاء الله هأكتب البوست ده و هأقوم أذاكر
هتكلم في ثلاثة نقاط النهاردة
.
النقطة الأولي
هي عدم حبي للإشتراك في معالجة أي قضية تخص البلد ولأنني مقتنع إنه مش هو ده الحل ربنا هداني لتصوير أصور بيه اللي نفسي أشترك فيه و أعمله
نفرض إن عند باب شقتك مسمار طالع منه و أنت خارج كل يوم المسمار ده يقطع كم قميصك و أنت كل يوم تاخد قميصك ده و تروح بيه عند الترزي تصلحه و الغريب إنك بتسيب المسمار زي ما هو الحل الطبيعي أية إن تجيب شاكوش تدق بيه علي دماغ المسمار ده أو تجيب كماشة تخلع بيها المسمار ده من راسه علشان ميقطعش لك القميص تاني
فاهمين اللي أنا نفسي أشترك فيه اية
قولوا يارب
.
النقطة التانية
بصراحة أنا كنت زمان بحب البلد دي قوي قوي قوي و كنت بحلم إن أعدلها و أنميها و أكبرها بس طبعا لما كبرت شفت حالة الحقيقية اللي إحنا فيها و وحالنا وصل لأية من تعامل مع بعض و إستغلال و نفاق و كذب و غش
بس بجد رجعت أحب البلد دي تاني علشان خاطر الواد منذر الواد ده بيحب البلد قوي و بيحب الخير جدا جدا جدا بالرغم من إنه ممكن يعاني في سبيل ده بس بيحاول و يحاول و مش يأس زيي منذر رجع فيا الحب للبلد دي تاني ممكن حد يعترض علي و يقول إنت إزاي تقول كده مينفعش انت لازم تحب البلد دي لأنها كبرتك و شربتك و أكلتلك و علمتك و كلام القناة الأولي ده بس أنا مش هأرجع في كلامي اللي خلاني أرجع أحب البلد دي تاني قوي قوي قوي هو منذر بس بجد أنا خايف علي منذر جدا أنه يتصدم في الناس اللي مش حاسة و عايشة في البطيخ دي بس ربنا أكيد مش هيتخلي عنه و هيوفقه و مش هيخليه ييأس علشان اللي زي منذر ده لو يأس ربنا يستر عليه
شكرا لك يا منذر
.
النقطة الثالثة
منذر في ثوب مختلف

أمبارح كان ذكري المولد النبوي و قدرا كنت أمبارح مع منذر في مشوار كده المهم صديقي و حبيبي منذر قمت بتصويره متلبسا في مواضع مخلة و هذه المواضع سوف أقوم بنشرها الأن مع حذف صورة منذر و لو هو قال مفيش مشكلة هأبقي أنزلها بصورته
المواضع دي تمثل منذر و هو يقوم بشراء كرنب من الفلاح مباشرة و يقوم بعد ذلك بتهذيب الكرنب علشان ياخده لماماته في البيت متقلقش يا مفيد أنت هتأخد الصور و هأحول لك الفيديو بس أمانة عليك توصله لأبناء مصر علشان يشوفوا منذر اللي فاكرينه حاجة جامدة طلع اية
أة نسيت أقول أنه بعد أما هذب الكرنب قام بفعل مشين و هو إلقاء الورق الزيادة من الميكروباص و إحنا ماشيين و كمان ضحك علي واحد تاني معانا و خلاه يشتري كرنب المسكين
معلش أضطريت أشيل الصور علشان منذر زعل

10 comments:

مـحـمـد مـفـيـد said...

ايه ده يا عم
انا دخلت امبارح ولقيت صور
النهارده اتشالت
ليه كده
:(
انا مش بحب كده
علي العموم الصور عندي لو عايزها هتلاقيها علي الفيس بووك هعملها البوم جديد
ايه رأيك؟

صاحب المضيفة said...

الفكرة مش وصلت يا عم محمد


بالراحة علينا شوية يا عم

وبعدين قول لمنذر لو اشترى الكرنب تاني صاحب المضيفة هايتخانق معاك




قوله وسلم لي عليه جدا نفسي اشوفه والله
سلام يا بطل

Monzer said...

مـحـمـد مـفـيـد said...
ايه ده يا عم
انا دخلت امبارح ولقيت صور
النهارده اتشالت
ليه كده
:(
انا مش بحب كده
علي العموم الصور عندي لو عايزها هتلاقيها علي الفيس بووك هعملها البوم جديد
ايه رأيك؟



الله يخرب بيت دى معرفة .. مش جاي من وراها غير التشريد


وطالما كده أنا هالجأ للتهديد انا برده عندى صور ليكو تودى فى داهية

وانا منذر ولقد أعذ من انذر

ولصاحب المضيفة كلمة ماتبقاش تيجى هنا تانى
الى بيعرف العالم دى بيتشرد

وحسبى الله ونعم الوكيل

ومش هاخدك معايا فى حته تانى يا جمعة

ولما اشوفك يا مفيد

وليك يوم تنزل مع جمعة لوحدك وأشوفك متشرد صوت وصورة وفيديو

قوحسبى اله ونعم الوكيل

موناليزا said...

ربنا يديم حبكم لبعض فى الله

يا مراكبي said...

خلاص كلهم مشيوا من هنا .. إلحق نزل الصور تاني بسرعة

No Fear said...

الأستاذ محمد مفيد
السلام عليكم
معلش أنت عارف قلبي رهيف من ناحية منذر زي قلب الأم كده لاقيته بيعيط زي ماشفت مسحت الصور بس لو عاوز عندي منها تاني
:))))

No Fear said...

صاحب المضيفة
السلام عليكم
هو كده كده مش هيشتري تاني أتعقد خلاص بس أنت زعلان ليه بقة
أنت بتبيع كرنب
:))
الله يسلمك

No Fear said...

منذر
السلام عليكم
أولا مالكش دعوة مفيد حبيبي و مش هشرده و بعدين أنت هتشوف أيام ماشي
أنت وقعاتك كتير بلاش
فاكر الظرف الأصفر
و أنت شايفيني يا مفيد و حاجات كتير خليني ساكن علشان متزعلش
واحشني و الله أنت و مفيد نفسي أشوفكم بقة

No Fear said...

موناليزا
السلام عليكم
أمين يارب

No Fear said...

يا مراكبي
السلام عليكم
الواد منذر مش سهل ممكن يكون مشغل معاه مخبرين
منور و الله بتوحشني لما بتختفي كده يا باشمهندس