Sunday, March 16, 2008

السلام عليكم و رحمة الله و بركاته
أزيكم ياشباب دي مرحلة جديدة من مرحلة الإنطلاق البوستري اللي بتيجي لي كل فترة
كان في حاجات كتير نفسي أقولها البوست اللي فات بس منفعش لأنه كان بوست قوي قوي بدليل عدد التعليقات المهول اللي عليه منور يا منذر يعني مينفعش اللي هاقوله دلوقتي كان يتقال هناك
.
المهم هتكلم النهاردة عن حالتين عجز بأمر بيهم
.
الحالة الأولي اللي طبعا كلكم خلاص حفظتوها و عرفتوها عني من إنني مش عارف الأقي نفسي و لا عارف الأقي هدف في الحياة يعينني عليها و علي هموها و حالة ضياع عايش فيها من فترة مش قصيرة و مش قادر أخرج منها مثلا أتخيل نفسي أغير مجالي تماما مش الكيمياء خالص يعني و أشوف حاجة تانية أو أعمل أي إختبارات لنفسي بحيث أكتشف أنا ممكن أبدع في أية أصل أكيد أنا في حاجة ممكن أبدع فيها يعني مش بطيخة كده خالص بس مش قادر هي دي حالة العجز الأولي
.
أما عن الحالة التانية فتقريبا مش ممكن كلكم تفهموا اللي هأقوله بس هأحاول أشرح علي المستخبي كده شوية إحساس صعب قوي إنك تحس إنك عاوز تنصح حد قريب منك قوي بصرف النظر عن كونه يستحق النصح و لا مين اللي المفروض ينصح مين بس تحس إنك نفسك تنصحه بس حاسس إن تجاربك في الحياة و خبرتك البسيطة مقارنة بخبرته و تجاربه مينفعش و مش هتقدر علي نصحه أو إقناعه بسبب ضعف قوة كلامك و ليس ضعف حجتك أو حتي إكتساب ثقته إنه يتكلم معك و يفضفض لك اللي جواه بالرغم من إنه نفسه يتكلم مثلا بس مش حاسس إنك هتفيده و تحاول تدور علي طريقة تعمل بها كده و متعرفش و تفكر و تفكر و تلاقي نفسك مش عارف إحساس عجز كبير و مؤلم للعلم
بس كده كفاية قرف بقة
.
معلش ربنا يكرمكم في حاجة تاني قارفاني معلش ربنا يكرمكم حاجة أخيرة بس مش عارف ليه بيكون عندي عشم كبير قوي في الناس يعني لو أتعرفت علي حد جديد بأكون منتظر منه أنه يعاملني زي أبنه أخوة صاحبة من تسعين سنة مثلا مش عارف ليه و باتضايق قوي لما مش بحس منه بكده هو أنا مقتنع إن أنا غلط في الموضوع ده بس مش عارف أعمل أية و كمان بيني و بينكم يعني أنا مش أمله قوي يعني إني حد يعرفني و يهتم بمعرفة أخباري و حالتي يعني مش عاوز ربنا يخليكم الكلام اللي هأتقوله أنا بأقر حقائق غير قابله للنقاش
فعلا فعلا كفاية كده
.
خمسة فرفشة عناوين الأخبار سابقا
.
أدعي عليهم أقول أية بس طبعا عارفين لاعيبة الزمالك بجد الله يسامحهم كفاية عليهم كده
.
أشتريت برنتر خزعبلية جميلة الحمد لله إتش بي إف واحد و عشريت تمانين طباعة و سكانر و تصوير حاجة كده خمس نجوم يعني و لا الحوجة يا منذر و من ساعة أما جبتها عمال أطبع حاجات كان نفسي أطبعها من زماااااان
.
أشتريت البرنتر دي يوم الجمعة يوم الماتش المنحوس كان ساعتها الجو جميل قوي و نزلت أشتري الكابل لها الساعة خمسة تقريبا و كنت في التحرير علي خمسة و عشرة شفت الشمس بقالي كتير قوي مشفتش الشمس علي الكورنيش حسيت إني كنت في الأدغال مثلا أو منفي نفسي أخرج يوم كده بالنهار الواحد نسي شكل الدنيا بالنهار أية في وسط البلد و أماكن الخروج بقة واخد علي الشمس في المصنع بس قدام المخازن الزرقا و الإنتاج اللي ماليان بودرة و معفر
.
أنا أخدت أجازة بكرة من الشغل بدون أجر علشان رصيدي خلص و المفروض أروح الكلية و طبعا مجهزتش التقارير اللي علي مش بقولكم عاجز و مش عارف أروح الشغل و أرجع في الأجازة و لا أروح الكلية و لا أقعد في البيت زي البيضة بكرة
.
أخر خروجة مع مفيد و منذر أشتريت بدلة جامدة ربنا يخليك ليا يا مفيد مظبطني
.
كان في خبر ظريف متابعة النهاردة طول اليوم الخبر بيقول أنباء عن فوز المحافظين في الإنتخابات الإيرانية إذا كان أساسا ثلاثة أرباع اللي داخلين الإنتاخبات محافظين مهو لازم يكسبوا
.
أنا أسف و الله يا أصدقائي عارف مقصر في حقكم كلكم و مش بأعلق عندكم بس و الله في ناس كتير بأدخل و مش بعرف أعلق علي اللي بتقوله و في ناس بيكون نفسي أعلق عندها بمزاج بس بأكون مش قادر من كتر النظر في الكمبيوتر علشان تجهيز الريبورتات اللي مطلوبة مني في الكلية و بردوا مش بأقدمها
.
تصبحوا علي خير

12 comments:

صاحب المضيفة said...

صباحو عسل يا عم محمد

أول تعليق ياباشا

وبعدين الحياة اللي انت مش حاسس لها بطعم دي بتكون احلى وملونة بطاعة ربنا

حتى اسال مفيد ومنذر كده

على فكرة

بلغ سلامي ليهم قوي وقلهم صاحب المضيفة بيسلم ويمسي


سلام يا كبير

mulan said...

شكل حلتك النفسيه بدات تتحسن شويه يا محمد عموما انا بس حبيت اعلق ومبروك علي البدله

Monzer said...

هي بقت كده

طب اخرك معايا تعليقين بس

انا بعلق من الشغل فى السريع

لما هاروح خاظبطك
هاحبسك يا جمعة

sarah la tulipe rose said...

بالنسبة لاحساسك انك تبقي عاوز لنا تتعرف علي د جديد يبقي يشعرك انه صديقك من الف سنة دة شعور عندنا جميعا بس ممكن ميقابلش صح من الاخر لاننا احيان كتير بنبني توقعات زيادة و مش بالضرورة الي قدامي يكون شايف نفس التوقعات دي
اما بالنسبة لفوز المحافظين في ايران..دول احسن من عندنا علي الاقل هما بيكونوا تلات اربع بس انما احنا الكل في الكل بيكون وطني و يتاضعوا و 99و99% بس الي بيفوزوا بيكونوا وطني! تواضع!

mariam said...

ازيك يا محمد

للدرجه دى متضايق فى الشغل

طيب اخبار المذاكره ايه؟
الأمتحانات قربت مش هى فى شهر 5

مبروك البدله

انا كمان بقيت مش بعلق و لا بكتب غير كل فتره
مش عارفه ملل جامد جدا

رفقة عمر said...

مش عارف ليه بيكون عندي عشم كبير قوي في الناس يعني لو أتعرفت علي حد جديد بأكون منتظر منه أنه يعاملني زي أبنه أخوة صاحبة من تسعين سنة مثلا مش عارف ليه و باتضايق قوي لما مش بحس منه
تخيل انا كدة برضه
باتعشم فى الناس جدا ودايما بيتكرر معى انى اتصدم فيهم
انا باشكرك قوى على سؤالك عنى جزاك الله كل خير

No Fear said...

صاحب المضيفة
السلام عليكم
صباح الفل يا باشا منور
ربنا يرزقنا طاعته و حسن عبادته
إن شاء الله السلام هيوصل

No Fear said...

mulan
السلام عليكم
الحمد لله ربنا يكرم
مفيش حاجة في الدنيا ستساهل
صح و لا أية؟
الله يبارك فيكي

No Fear said...

منذر
السلام عليكم
يعني مشفتش تعليق تاني
علي العموم منور ياباشا
و ياريت تخف من التعليق شوية يا نحس

No Fear said...

sarah
السلام عليكم
بس بيني و بينك الغلط عندنا إننا بنطلب حاجات كتير من الناس و الحقيقة المؤكدة إننا علشان ناخد لازم ندي
ربنا يكرم و مناخدش مقالب تاني من الناس اللي نتعشم فيها خير
و يرزقنا الأصدقاء الحقيقيين
أنا كنت بستغرب بس من الأخبار ده بالنسبة لفوز المحافظين الإيرانين

No Fear said...

مريم
السلام عليكم
الحمد لله علي كل شئ
بس نفسي في شغل تاني الواحد يحبه و يقدر يشتغل فيه بنفس
ربنا يكرم
ربنا يسهل علشان خلاص مفيش وقت الأمتحانات تدق الأبواب بعنف
ربنا يستر
الله يبارك فيكي

No Fear said...

رفقة عمر
السلام عليكم
حمد لله علي السلامة
إن شاء الله ميكنش في صدمة تاني و أي حد تتعشمي فيه خير يكون علي حق إن شاء الله
جزاكي الله كل خير