Wednesday, March 05, 2008

السلام عليكم و رحمة الله و بركاته
أنا زعلان قوي علشان البوست اللي فات و حاسس إني هأكون واطي قوي لو أتكلمت عن أي حاجة تانية بعد البوست اللي فات من مشاكل شخصية و صعاب في الحياة و كمان للأسف الموضوع التافهة اللي هتكلم فيه بس بجد مش قادر و نفسي أخرج كلام كتير قوي هنا احسن ما أخرجه مع ناس باعتز بها و أخاف تزعل مني لو أتكلمت معهم عنه
نفسي أحب قوي نفسي أمسك أيد بنت و أحس بحنيتها و دفئها و نفسي أعيط و هي تطبطب علي أكيد ناس كتير هتقول ده تافهة بس بجد شعور الوحدة صعب قوي خصوصا لما تكون وحدة تامة و لا أهل و لا صديق تعري نفسك قدامه من غير خوف و لا حبيبة و لا زوجة نفسي أحضن بنت
تعرفوا وصل بيا الحال إني قلت لواحد صاحبي صايع يعني يظبط لنا بنتين تمام ندخل معهم فيلم حين ميسرة و الله اعلم الموضوع كان هيوصل لحد فين و الحمد لله لحد دلوقتي هو متصلش
مش عارف لو أتصل هيكون عندي الشجاعة و الرغبة في الذهاب و لا لا
بس مش ده الشعور اللي نفسي فيه نفسي في إحساس بجد صادق يتحس
أةةةةة
شعور بشع قوي حاسس إني عندي قوة كبيرة نفسها تخرج مني و مش قادرة و عمالة تلف جوا جسمي زي القطة المحبوسة في أوضة مقفولة مش قادر أقعد مش قادر انام مش قادر أتفرج علي تلفزيون مش عارف أعمل حاجة مش عارف أستمتع بحاجة
إحساس بعدم الراحة و خلاص مش عارف أعمل أية
نفسي بنت تحط أيديها علي وشي و أحس بإنتعاش من كده نفسي تنام علي أيدي نفسي أتجوز و نفسي أعيش عيشة معينة و حبيبتي مقدرش أبعد عنها يوم و أرجع جري من الشغل علشان أشوفها و أحضنها و اقعد أحكي لها علي كل حاجة و أقعد أحكي لها البلاوي اللي بعملها دلوقتي و مش عارف أتخلص منها
زهقت بقة
زهقت
زهقت
زهقت
زهقت
زهقت

20 comments:

رفقة عمر said...

اولا مشاعرك دى من حقك دى فطره ربنا فطر الانسان عليها
بجد مش عارفه ليه مش بتحاول تتدور وتخلى كل اللى تعرفه يبحثلك عن عروسه
بجد الرسول صلى الله عليه وسلم قال ابتغوا الغنى فى الحج والنكاح
او كما قال الرسول الكريم
لانك هاضيف لرزقك رزق زوجتك ورزق اولادك ان شاء االله
بجد السعى بيجيب الخير تذكر سعى السيدة هاجر بين الصفا والمروة
وهى فى صحراء قاحله ورزقها الله الماء من تحت اقدام ابنها الرضيع
لو سعيت بجد هاتشعر بسعادة انك بتعمل اللى عليك
وادعو الله ان ييسر لك الحلال ويرزقك من حيث لا تحتسب ويفرج كربك ويزيل همك الهم امين يارب العالمين

jessy88 said...

اولا مين قال ان دى هيافة دى فطرة ومشاعر بس اهم حاجة تقدر تتحكم فيها ومتعملش حاجة غلط يعنى متخليش حاجتك للعاطفة تجرك للمعصية اصمد ورنبا هيرزقك ان شاء الله امال لو كنت بنت كنت هتعمل ايه ..البنت اشد احتياجا للعاطفة ومتقدرش تروح تخطب واحد ومع ذلك بتصبر وتحط جزمة فى بقها وقلبها وان بس لمحت انها نفسها تحب وتعيش مع انسان يحنو عليها يقولولها اخرسي يا قليلة الادبببب....يللا ربنا يصبرك ويصبرنا جمييييييييعا

صاحب المضيفة said...

عزيزي محمد


كل اللي نفسك فيه ده من حقك وهايجي اليوم اللي تحس فيه بكل ده واكتر كمان

لكن في الحلال يا حبي

لان

ده كله وساوس شيطان


عاوز يغويك ويطلعك برة الطريق


تخيل لو انت رحت الفيلم وعصيت ربنا بالمنظر ده وربنا قبض روحك على الحال ده


ده من حبه ليك ان صاحبك مش اتصل لحد النهادرة


نصيحة أخوية


حاول تصاحب اللي ياخد بايدك للخير مش للشر


وساعتها بحلاوة الدنيا كلها بين ايديك



ربنا يسعدك ويهنيك ويرزقك الخير حيث كان


تحياتي

Anonymous said...

خلاص كفاية زهق باه الواحد مش ناقص

الدنيا ريشة في هوا said...

حقيقة عندما تري جزء من مصائب البشر يتم التهونة عليم في مصيبتك الخاصة
لا يمكن ولا يجب عليك يا سيدي العزيز ان تترك نفسك و احساساتك لمثل هذه المشاعر بل ابدأ في التفكير جديا في البحث عن فتاة تشاركك حياتك الخاصة وتهون عليك وحدتك والامك
من اوائل المرات الاتي ابدأ بها في التعليق علي مدونة رغم متابعتي الشديدة لعالم المدونات والمدونين ولكنني لا ارغب ان اكون ضيفا ثقيلا علي عالمكم الخاص الذي فيه تقومون بالتعبير عن ما تشعرون به من احاسيس
حاول ان تكون اكثر واقعية و ابدا في البحث جديا عن زوجة تشاركك حياتك
ارجو و اطلب لك التوفيق

بداية تعارف جيدة بيني و بين مدونتك

Unknown said...

الزهق بقا الطبيعى بتاعنا خلاص .. طب بذمتك يا شيخ لو مزهقناش حنعمل ايه؟؟ .. لازم نزهق عشان نثبت اننا هنا .. فى مصر

ربنا يصلح حالك ويريح بالك يااااارب

mulan said...

مش عارفه انت عايزنا نقولك ايه بالظبط لا يا محمد الي انت فيه دا شئ طبيعي واوعي تروح مع صاحبك الوحش دا واستحمل والنبي لحد ما ربنا يكرمك وتتجوز ماشي يا سيدي اديني قلتك كده اكيد انت مش غالطان انك كتبت الي جواك بس انا مستغربه ان يكون في شعور مخليك لا عارف تنام ولاتعمل حاجه في حياتك وانت واقف مستسلمله كده اصل مافيش غير حلين ياتشيل الحساس ده من جواك وتركز في مستقبلك ودي سهله تعملها لو انت عايز انشاله تلبس استك في ايدك وكل ماتفكر السع نفسك وركز في الي بتعمله من تاني او صوم لائما تروح مع صحبك واستحمل بقي ان ده يتردلك في اختك او بنتك او مراتك انت اكتر واحد تقدر تريح نفسك بس لو عايز فعلا وقلل بقي من دور المكتئب والزهقان علي ايه ياعني مش مستهله

No Fear said...

رفقة عمر
السلام عليكم
مينفعش لأسباب كتيرة
بس أنا ناوي بيني و بين نفسي يمكن ربنا يكرم من عنده علشان النية الخير
قولي يارب
شكرا لإهتماك قوي
ربنا يكرمك يارب

No Fear said...

jessy 88
السلام عليكم
هي بيني و بينك هيافة بس مشكلتي إنها تعتبر بالنسبة لي القشة اللي قسمت ظهر البعير علشان كده تعباني قوي
ربنا يصبرنا جميعا
انت شكلك صغيرة خالص
ربنا يكرمك و يوفقك يارب

No Fear said...

صاحب المضيفة
السلام عليكم
ربنا يكرمك
ربنا يكرمنا بالزوجة الصاحة و الله عارف كل الكلام اللي أنت بتقوله و يمكن بأتعب قوي بسبب معرفتي بالكلام ده بس أحيانا كتيرة الواحد بيضعف و مش بيلاقي حد يدفعه بعيد عن المعصية أنت شايف حال الناس كلها واقع دينيا و أخلاقيا ربنا يعافينا
الحمد لله أنا معنديش الشجاعة أصلا علي المعصية دي بس ساعات الشيطان بيسيطر علي الواحد الحمد لله ربنا بيكرم و مفيش حاجة بتحصل
يارب يديمها علي نعمة من فضله
جزاك الله كل خير

No Fear said...

هند
السلام عليكم
ليه العصبية بس
دي فضفضة يعني مفيش حاجة
:)

No Fear said...

الدنيا ريشة في هوا
السلام عليكم
تشرفت بزيارتك و تعليقك بس هو عالمنا كلنا مش علي ناس معينة ياريت قريبا نشاركك عالمك الخاص أنت كمان
باحاول و الله أدور علي شريكة اليحة بس مش لاقيها ربنا يكرم و أوفق إني الأقيها قريب و بسرعة علشان محتاج لها قوي
ربنا يكرم
و يارب تكون خير متاع الدنيا لي

No Fear said...

إنسانة
السلام عليكم
منورة فينك من زمان
ربنا يصلح لنا الحال كلنا
امين يارب

No Fear said...

mulan
السلام عليكم
بالرغم من غموضك يعن بس هأرد عليكي
ربنا يكرم و معملش حاجة غلط
الكلام اللي أنت بتقوليه حلو قوي بس ساعات بيكون صعب التنفيذ في ظل الظروف اللي إحنا عايشينها ربنا يكرمنا يارب و يبعدنا عن المعصية
ياريت غموضك ميطولش

الدنيا ريشة في هوا said...

ايش اخبارك؟؟
بتمني يكونوا الاخبرات حلوةعندك وانك خرجت من ها المود

موناليزا said...

جميل انك طلعت اللى جواك والاجمل انك هتلاقى اللى يشاركك مشاعرك دى
بس اللى لفت نظرى انك مش بتفكر فى الجواز واكيد ليك اسبابك ياظروف مش سامحة ياجوابات مش نافعة
ليه متشغلش نفسك بحاجة تانية يعنى لغاية لما ربنا يزقك بالزوجة الصالحة ان شاء الله
بس نصيحة اياك تفرح الشيطان فيك خليك اقوى منه ومش يمكن ده يكون اختبار من ربنا عشان يشوف قوة صبرك
ربنا ييسرك الامور ويهيئلك الخير

No Fear said...

الدنيا ريشة في هوا
السلام عليكم
الحمد لله الدنيا زي الفل
ربنا يديمها
أنت أخبارك أية؟

No Fear said...

monaliza
السلام عليكم
جزاكي الله كل خير
بالنسبة للموضوع عدم القدرة علي الزواج هو أة مش هينفع دلوقتي لأسباب كتيرة
الحمد لله علي كل شئ
ربنا يهدينا و يرزقنا الصبر
أدعي لي معاكي

mulan said...

غموض ايه الي بتتكلم عنه انا مفيش في كلامي غموض علي فكره

No Fear said...

mulan
السلام عليكم
غموض في شخصيتك يعني مالكيش مدونة و مفيش بيانات كده يعني