Thursday, February 14, 2008

السلام عليكم و رحمة الله
بوست جديد و أمركم لله
أنا البوست ده عمال أؤجل فيه و ساعات كبرت في دماغي أبطل تدوين و حسيت إن التدوين ده أثر علي علاقتي بربنا محدش يسألني إزاي انا كنت بأدعي ربنا و بحكي له كل اللي بكتبه هنا في المدونة حسيت إني غلط لما كلمتكم بالتفاصيل الكتيرة عن حياتي و أشتكيت كتير من نفسي و من الظروف
.
و كمان جت أحداث كتير مريت اليومين دول و كمان خطرت علي بالي حاجات كتير قوي أكتبها أنا كنت بعمل كده زمان هأكتب حاجات كتير قوي هي منفصلة عن بعضها و كمان حصلت لي مواقف كتير قوي المهم أنا هاكتب لحد اما أتعب بس ياريت لما تيجوا تقروا تقروا كل فقرة لوحدها في يوم منفصل ساعات بتكون ساعات سعيدة و ساعات كأبة و ساعات أنتم فاهمين بقة
.
أبدأ منين أنا مش هأبدا بالحاجات الشخصية علشان انتم قرفتم مني و هأسيبها للأخر بحيث اللي هيقرأ و هيتعب مش هيوصلها و هي طبعا نكد في نكد
.
أنا اصفراوي و حقود
طبعا الكلام اللي هأقوله ده مش هيعجب ناس كتير منكم و ممكن ميعجيش حبيبي مفيد بس ده رأئي طبعا كلكم أخدتم بالكم بالمنتخب الوطني بتاعنا اللي عمل إنجاز تاريخي سيحسب لهذا الجيل من اللاعبين و هذا المدرب المعلم حسن شحاته انا مش بقول إننا منفرحش بس مش كده فرحة زيادة عن اللزوم و فلوس زيادة عن اللزوم في ناس بتقول الشعب لازم يفرح بصراحة أنا مكنتش عاوز الشعب يفرح كنت عاوزة يفضل غاضب غاضب لعل و عسي ينفجر في يوم من الأيام القريبة لكن الفرحة دي هديت الناس و شغلت الناس عن كل حاجة حظي العاثر أشتريت المصري اليوم يوم الأحد يوم الماتش أجد الحكومة الرشيدة بتاعتنا عملت أية رفعت اسعار الزيت و السمن و الدقيق و الفول و العدس حتي العدس يوم الماتش و بحسب المصري اليوم هذا هو الإرتفاع الثالث في أقل من شهر أنا علي ما أعتقد الحكومة رفعت الأسعار بصرف النظر عن حقيقتها ليه بقة علشان هي عارفة إننا شعب أهبل لا مؤاخذه يعني سواء طسبنا ماتش النهائي ولا لأ هننشغل بالنتيجة سواء بالأفراح أو الشتايم في حسن شحاته و تقريبا الناس لسه مأخدتيش بالها من إرتفاع الأسعار علشان المنتخب كان إمبارح في دبي و عملوله حفلة كبيرة الحمد لله مشفتهاش و كمان اللعيبة و عائلتهم هيحجوا مجاننا هو اللي هيدفع الفلوس معروف بس علي حساب مين من الشعب اللي هيتحرم من الحج لأننا لنا عدد معين من التأشيرات و ده موضوع كبير
و كمان الملايين اللي نزلت ترف علي اللعيبة مش بقولكم أنا أصفراوي و حقود و طبعا لا ننسي تكرم السيد الرئيس بتأخير سفره لأبوظبي للمشاركة في إستقبال الأبطال
.
المحزن فعلا إننا نقدر الذين يستحقون التقدير البسيط تقدير الأنبياء و الملائكة و الذين يحتاجون التقدير الكبير لا ينالوا أي تقدير مثل الدكتور زويل و الدكتور فاروق الباز و غيرهم كتير
.
ما الذي فعله هذا الشعب الذي أنتمي له عند معرفته بوفاة الصحفي المحترم الوطني الشجاع مجدي مهنا كم واحد علم بخبر وفاته كم واحد عرف قيمته كم واحد أتأثر بيه أنا بأحزن قوي لما بسمع ناس كتير قوي حاليا بتقول أنا بأدعي ربنا عيالي تفضل في الدراسة و تتطلع لعيبة كورة أنا مش بقول إن لاعيبه الكورة وحشين لا بس مش نوصل للدرجة دي فين تقدير العلماء الوطنين المثقفين المعلمين يارجل مش هأقولك حاجة كبيرة المعلمين مين بيقدرهم
يا نهار ابيض البوست ده شكله طوييييييل قوي و كده كده أصلا الزائرين في تناقص بس هأكمل بردوا أنا سخنت خلاص
.
رحم الله مجدي مهنا و أسكنه فسيح جناته و رزقنا أخر مثله إن شاء الله يساعد علي إفاقة هذا الشعب المتبلد
كان نفسي قوي أحضر جنازته لكن للأسف مقدرتيش ربنا يرحمه
أنا زعلان قوي إن أنا معرفتيش الرجل ده من زمان لسه متابعه تقريبا من سنه
بس الحمد لله سمعت أنهم هيعملوا كتاب مجمع لكل مقالاته التي حاول بها إصلاح و تفويق هذا المجتمع
.
أسقف كانتبري
في موضوع تاني حصل و محدش من الأخوة الحنجورية أتكلم عنه و هو إن في أنجلترا أسقف كانتربري روان ويليامز نادي بتطبيق الشريعة الإسلامية بين المسلمين في الأمور الشخصية زي الجواز و الحاجات دي و هناك قامت الدنيا و لسه مقعدتيش لحد دلوقتي مش عارف ليه محدش هنا أثار الموضوع ده و وقف جنب الرجل ده و لا إحنا فالحين في المصايب بس علي العموم أبشركم المصايب جت الصحيفة الدنماركية التي نشرت الرسوم المسيئة أعادت نشرها مرة تانية ردا علي محاولة إغتيال أحد رسامي الكاركتير الذين رسموا الرسوم المسيئة هنشوف يقة الثورة الشعبية و حهود الإستنكار أية شكلها المرة دي و هل شركات الألبان هتسكت و لا هتقوم بدورها بتسخين الناس و إعادة نشر الرسوم يدل علي النجاح الكبير الذي قام به الأستاذ عمرو خالد و الدكتور طارق السويدان و الحبيب علي الجفري و الزيارة اللي مش فاهم لها معني لحد دلوقتي
.
في حاجات غريبة سمعتها كمان اليومين اللي فاتوا دول
يعني تصريح السيد أبو الغيط أنه هيكسر رجل أي فلسطيني يدخل مصر ياعم عاوز تهدد ماشي بس اختار حتي الألفاظ شكلك كده طالع من المدبح مثلا مش من وزارة الخارجية
بردوا الهوجة اللي قامت للوقوف جنب اللاعب المحترم أبوتريكة في رأئي بردوا كانت كبيرة قوي يعني في ناس و حاجات و مواقف كتير إحنا تجاهلنها يعني جت علي الحتة دي خلاص دمنا غلي في عروقنا ده لو لسه عندنا دم
أحكي أية تاني أنا رحت مع مفيد و منذر معرض الكتاب و قضينا هناك كم ساعة عجب شايفيني يا مفيد
:)
:)و كمان مفيد فاصل جامد في المراجع اللي أشتريتها من سوق الأزبكية و منذر عرفنا علي مكتبة الحرافيش و إن شاء الله هنروحها تاني في مقرها الرئيسي و مفيد قرفنا بركن دار ميريت عاوز أروح عاوز أروح و رحنا الحمد لله قبل أما يقفلوا و كمانو إحنا مروحين مفيد ربنا يكرمه فاصل لي تاني في أربع شربات أشترتهم من رمسيس جامدين قوي وفر لي كتير مفيد اليوم ده بس أنت شايفيني يا مفيد
:)
:)و انا معهم حزب الجبهة أتصل بي و قالي إن أجتماع بكرة أتأجل لأجل غير مسمي بيني و بينكم مكنتش فاكر أصلا إني هأروح بس كويس إنه أتأجل و في أنتخابات يوم تسعة و عشرين فبراير ربنا يكرم ويستر
نخش علي الشخصي و النكد يا معلم
كان في أمتحانات في الكلية محضرتهاش بالرغم من إني كنت واخد أجازة بس مقدرتيش أذاكر هتقوليلي ليه هأقولكم علشان أنا بفكر بدماغي كلها في موضوع واحد إني أسيب الشركة اللي أنا فيها و مش عارف أعمل أية و طبعا مش قادر أفاتح حد من البيت في الموضوع ده علشان علاقتي اللي زي الفل معهم سياسة المقاطعة اللي متبعها
تعبان قوي
أنا صحيت النهاردة حسيت إن دماغي كانت بتفكر لوحدها و أنا نايم تعبان قوي و خايف و قلقان و خايف أدمر حياتي زي نماذج كتير قابلتها في حياتي و وصلت معايا إني قلت لواحد صاحبي يكلم الرجل اللي شغال معه في مصنع إني أشتغل معه ساعات شغل أكتر و مرتب أقلل من اللي أنا فيه و أستقرار أقلل بس أنا تعبان قوي و محتار و عمال أخد مشورة ناس كتير بالرغم من انهم ممكن يبيعوني بالرخيص في الشركة ربنا يستر و يقدم مافيه الخير
بمناسبة سياسة المقاطعة اللي متبعها أبويا أمبارح نادي علي و قالي عاوزك في موضوع قلتله ماشي قلت حلو هيتكلم معايا و يا إما أنفجر و يا إما يصالحني بس للأسف كالعادة كلمني في موضوع تافهة مرة أخري
يعني الخلاصة قرف في البيت و الشغل و الدراسة و مع نفسي و كل ده في رأيئ بسبب علاقتي الغير ملتزمة مع ربنا للأسف
ربنا يهدينا و يصلح لنا الحال
معرفش المقطعين دول حبيت أكتبهم هنا علشان مضطريش أكتب الأغنية كلها في المدونة المهجورة
يارب تفضل حلاوة سلام أول لقا في أيدينا
و فرح أول ميعاد منقاد شموع حوالينا

رائعة أم كلثوم ألف ليلة و ليلة
الكتابة من أول هنا النهاردة اللي فات كتبته أمبارح بالليل علشان النت فصل عندي
و أنا راجع النهاردة من الشغل سواق العربية اللي راجع فيها شغل شريط عجب اللي فاكرة منه شوية كلام زي
نانسي هتخش النار روبي هتخش النار نجلا هتخش النا
و في أخر الأغنية اللي هتلبس هتخش الجنة و اللي هتقلع هتخش النار
يعني خلاص مش ناقص غير أمثالكم اللي يتكلم مين هيدخل الجنة و النار بصرف النظر عن الهدف و معني الكلام معتقدش يعني المغني ده هيغني الأغنية المقرفة دي في حفلة للتضامن مع فلسطين و لا مناهضة للرسوم المسيئة بس بيني و بينكم كنت بسمع و أموت علي نفسي من الضحك و في أغنية تانية تقريبا واحد بيغنيها و هو في السجن بيقول لمراته لو أبني سأل علي قوليله مات و لو أخويا سأل علي قوليله مالكش أخوات شريط عبقري هأحاول أجيبة و أنزله علي المدونة المهجورة
.
الجو النهاردة كان جميل الحمد لله و الدنيا مطرت و أنا بحب المطرة قوي و كمان النهاردة الفالنتين بصرف النظر عن إني مش بأقضيه مع حد بس كويس إني مش خارج النهاردة علشان الحقد اللي عندي تجاه الأحبة ميظهرش
كان نفسي بجد أدي هدية الفالنتين لحد بس للأسف لم يحدث مش مشكلة مجتيش علي السنة دي
.
قبل اما السواق يرخم و يشغل الشريط الخزعبلي اللي حكيت لكم عليه كنت بسمع الموبيل من كم يوم كده مكنتش بحب أسمع حاجة بحس بدوشة و أي حاجة شغالة جنبي كنت حسيت إن ربنا هداني و مش هأسمع أغاني تاني بس رجعت سمعت سمعت أية بقة
نانسي عجرم
و أحلم تكبر تبقي بيكاسو
كان يوم طفل و كان من نفسه
لكن و لا شخبط علي الحيط

معرفش حسيت إن الكلام موجهة ليا و إنه في أمل مش عارف ليه هو النهاردة الحمد لله متفائل علي أية و بسبب أية و الله العظيم مش عارف و مفيش سبب مادي حصل علشان أتفائل بس هو كده فلذلك ربنا يستر علشان أنا باكتئب دايما في أيام الأجازة خير إن شاء الله
.
أنا مصدع جدا ياشباب بأفكر بغباء الأيام دي في الشغل مش عارف اعمل أية أسيبه أستمر و التعارض مع الدراسة و هم الدكاترة اللي فاكرنيا عواطليه بالرغم من أنهم أشترطوا اللي يتقبل في الدراسة يكون شغال مش فاهم أنا
حسبنا الله و نعم الوكيل بس لن أستسلم و سنقاتل
.
في واحدة كانت معايا في الكلية و هي في الكلية حاليا شافتني و انا بأحضر قبل كده و أتكلمنا مع بعض أنا نسيت أقولكم إني كنت بعبع البنات في الكلية معرفش أشوف اي بنت أركب لها وش خشب لله في لله مع إني كنت بأهرج و اضحك مع الولاد اللي أعرفهم و اللي معرفهمش بس عن البنات وش خشب
هي كلمتني مرة في الشهر الأجازة و بعدين قعدنا أتكلمنا مع بعض في الكلية الأحد اللي فات و حكيت لي عن حياتها في الكلية العجيب بقة إنها في الأخر قالتلي أنا حبيت أتكلم معك علشان أنت نقي كنت هأقولها أنت تعرفي منذر و لا مفيد أنا أتخنقت من الكلمة دي يا جدعان بحس إنها زي أنت عبيط مثلا في الزمن ابن الحلال ده
.
مش عارف كان نفسي أعمل بوست لهم مخصوص بس في ناس نفسي قوي يعرفوا أنهم غاليين علي جدا بجد هم مفيد و منذر و الحسيني و رفقة و ساسو و إنسانة و سمراء و مانو
.
مش عارف اللي هأقوله ده صح و لا غلط و لا تفاهة بس بجد بحمد ربنا قوي أنه عرفني بالتدوين لأنكم بجد مش ممكن تتخيلوا حياتي من غير التدوين كان ممكن يكون شكلها أية
.
كفاية كده و أدعولي ربنا يكرمكم و أنا هأدعي لكم إن شاء الله

23 comments:

MerMaid said...

Well Well Well

بجد انا كمان زيك كدة اصفراوية و حقودة
و متضايقة جدا من اللي حصل و زي ما قلت عند عصفور المدينة اللي يزيد عن حده ينقلب ضده


مجدي مهنا
انسان لم اعرفه في حياته جيدا ولكنني اقدر له الان كل تقديم و احترام وحب ومودة
و فخورة انه مصري
فعلا اول شخص افخر بيه كمصري

الاسقف ويليامز و صحائف الدنمارك

الغريب فعلا انك تجد الجميع يقف مستنكرا لما يحدث في في الدنمارك ولا تجد احد يقف مدعما لموقف جيد تجاههم مثل موقف الاسقف ويليامز
وده اللي بيخليني لا اتعاطف مع ما يسمي المقاطعة
لانه بصراحة احنا معندناش حق نقاطع الا لما نكون عاملين اللي علينا كويس

بالنسبة بقي للفلانتين
كبر دماغك
ولا يهمك
بكرة تجيلك اللي تعكنن عليك
:))))

تحياتي ليك يا محمد وربنا يكرمك يااااارب و يوفقك للي فيه الخير ليك

ميرميد
:)

saso said...

السلام عليكم ورحمة الله وبركاته
(اكتر حاجة بحبها ف كومينتاتك لما بتبدأ بالسلام( يلا
واحدة واحدة
طويل البوست
اه طويل بس حلو

اممممم
التدوين أثر علي علاقتك بربنا ماهي فضفضة برضه معانا يعني انت بتحكيلنا بس بتطلب العون من ربنا برضه
احنا يادوب بنسمع
وبعدين ربنا أمر بالمشورة مش جايز ربنا يسخرلك اللي اقدر منك علي الحكم ويقولك تعمل ايه

دايما احنا
نهون الكبائر ونهول الصغائر
ماتش كورة ب 300 الف جنية وانتريه هدية من إيمدج ومليون يتقسم من الشيخ صالح
يطلعوا كام كيلو سكر تموين دول يا محمد

نفس الكلام مع ابو تريكة
علي عيني وراسي بس التلميع الزايد من انه اللاعب المصلي الشاكر لله كل جول
ربنا يكرمه ويكرمنا.. خلاص مش انتخابات هيا
واخيرا كملت بالتعاطف مع غزة
من حقه يعبر.. وغلط انه يتمنع الفيديو ولا تتفرض عقوبه
بس مش هنهد الدنيا
ده احنا مهديناهاش لما اتمنعت الصلاة ف الاقصي لسن قبل 45 ايام الانتفاضة
هنهدها دلوقت
--
والله ورحت الأزبكية يا محمد
حبه بس اصبر لما تخلص التمهيدي هتلقي نفسك رايح تتفرج بمزاااااج بقي علي الكتب

بجد أبو الريش والأزبكية دول متعه وإدمان كده
ريحة الكتب القديمة يا اخي عمرها ماكانت زي الجديدة

كل فالانتين وانت طيب
كويس انك مقلتش انا لا اعتقد في مثل هذه الأشياء وانها لتفاهه وبتاع علشان اعصابي بتتعب

تفاهه وماله محدش قال تلبس احمر وتحط ورده ف شعرها بس لو ليك حبيب ميضرش تقوله كلمتين يا ساتر
ده موسم حتي
lol

نقي مش شتيمة يا عاقل
حط يطول.. مبقاش في حد نقي اساسا كونك كده تفرح اوي وتخبي حبه النقاوة ليروحوا

واخيرا شخبط شخابيط زي مانت عاوز واحلم
امم الصداع متضلمش الاوضه لو صاحي وضلمها اوي لو نايم ومترهقش عنيك
:)
ومتفكرش طول اليوم الصحة مش بعزقه

ربنا يكرمك دايما يارب ويكرمنا كلنا

رفقة عمر said...

وعليكم السلام ورحمه الله وبركاته
انا كنت خلاص بجد هاجيب عربيه وندور عليك علشان نشوفك انت فين وليه الغيبه الطويله دى
المهم حمدا لله على سلامتك
تخيل كلامك بخصوص علاقتك بربنا وانك مقصر بتكسفنى بينى وبين نفسى لانى مش بحاسب نفسى زيك كدة
والرسول قال حاسبوا انفسكم قبل ان تحاسبوا رزقك الله التقوى والنفس المطمئنه وجعلك من عبادة المقربين اللهم امين يارب العالمين
انا كمان حقودة وصفراويه زيك وزى ميرمايد
بجد حاجه تغيظ وتفرس كمان
ربنا يهدينا ويهديهم اللهم امين

بخصوص موضوع الاساءة الدنماركيه تفتكر الكلام بقى مفيد خلاص مش ينفع الكلام هما اصلا عارفين ان اقصى شئ نعمله الكلام وشويه اغانى تتطلع ومقاطعه تافهه لاستخدامات تافهه زى نوع صابون ولا نوع شيبسى مع انهم داخلين ى صناعات استراتيجيه مش ينفع معها المقاطعه
بصراحه احنا محتاجين استخدام القوة للدفاع عن حقوقنا مش بقى ينفع اى حوارات خلاص
وربنا يرزقك بالانسانه اللى تكون كل ايامكم مع بعض فلانتين
وانا كمان سعيدة ان التدوين عرفنى بانسان نقى مثلك
:)
حتى لو مجرد معرفه من كلماته على مدونته
ربنا يكرم يارب وييسر لك كل خير اللهم امين يارب العالمين

مـحـمـد مـفـيـد said...

حبيبي محمد
يمكن انت عارف اللي انا فيه
لك بجد غلط انك تخلط بين علاقتك بربنا وعلاقتك بالناس
انا شايف ان التدوين خطوه للمشاركه بين الناس بالحلو والوحش
وكلام ميرميد وصفاء ورفقه
لا تعليق بعده
وحشتني جدا ونفسي اقعد القعده اللي انت عارفها وانا اللي اتكلم لوحدي ومحدش يتكلم غيري

barbie girl said...

انا بقى مش اصفراوية ولا حقودة
وزهقت من كتر النكد اللى قرب يجبلى الضغط
لا لا لا بعد الشر عليا

حضرتك بتقول الناس كانت قربت تثور وتنفجر بس الفرحة بتاعة المنتخب نسيتهم احزانهم
الحمد لله انهملاقوا حاجة تخفف عنهم
وعموما الاحتجاجات والاعتصامات كانت كتير وهتفضل زى ما هى

Unknown said...

حلوين شويه الفضفضه دول
ياريتني اعمل زيك
ان شاء الله احاول

صاحب المضيفة said...

خواطر جميلة ومنوعة ورايقة


وسلامي لمفيد بيه وقوله صاحب المضيفة بيسلم عليك


سلام يا كبير

No Fear said...

mermaid
السلام عليكم
يعني الحقد عندي و عندك كويس

ربنا يرحم الأستاذ مجدي مهنا إحنا كده دايما مش بنعرف قيمة الحاجة غير متأخر أو بعد أما تتضيع منا

ياستي إحنا كده بنيجي في الهيافة و نتصدر

أنا مكبر دماغي من ناحية الفلانتين بس مش هأقدر اكبرها علي طول علشان كده مش هأعرف أقلع التي شيرت

ربنا يكرمنا جميعا
مين well well well اللي أنت بتنادي عليه ده

No Fear said...

saso
السلام عليكم
كتر السلام يزيد و يقوي المعرفة و كمان ثواب يعني
طويل بس حلو ربنا يكرمك يا رافعة معنوياتي
الحمد لله بدأت أظبط بين الأتنين قولي يارب

كل ده رد
:)
ربنا يكرمك يارب أنا سعيد علي تعليقك و ياريت بجد البوست يكون مش ممل
السلام عليكم
:)

No Fear said...

رفقة عمر
السلام عليكم
كان نفسي بجد تنزلي تتدوري علي
:)
بس كويس علشان الفضايح
الله يسلمك
و الله أنا مش زي ما أنت متخيلة كده أنا أتمني و الله بس بجد مش كده تمام عن ثقة يعني
ربنا يهدينا جميعا يارب
ربنا يكرمك يارب علي كلامك الجميل ده
و يارب يحقق لينا كل أمانينا و نفضل إخوات علي طول
سلام

No Fear said...

مفيد
السلام عليكم
ربنا يقويك و يعدي الفترة دي بسرعة إن شاء الله

أنت كده كده يامحمد بتقعد تتكلم طول القعدة أنا أنا كده كده مش بتكلم و منذر كل أما يجي يتكلم أستني يا منذر علي العموم أنا كمان نفسي أقعد معكم قويييييييييييييييييييي
سلام

No Fear said...

barbi girl
السلام عليكم
يعني أول مرة تتدخلي المدونة تهاجميني كده
علي العموم أنا المدونة بتاعتي ديموقراطية براحتك بس بردوا مش مقتنع بكلامك
إحنا حتي طريقة إحتفالنا تتدل علي كبت يعني البطولة اللي فاتت الإحتفال كان عن طريق التحرش بالبنات مش عارف السنة دي مسمعتش لسه بس بردوا وقفنا الشوارع و لحد دلوقتي في إحتفالات
شوفي إحتفلنا بزويل قد أية
تعرفي إن زويل كان فس مصر و أفتتح صالون الأسكندرية الثقافي يعني الرجل مش مقصر في حق مصر لحد دلوقتي إحنا اللي مقصرين في حقة تتخيلي شعورة أية و هو شايل هم البلد و عمال يدور علي حلول لكل حاجة و بيقولها و لا حياة لمن تنادي و شوية لعيبة مش هأقولك متعبتش بس أسمها بتلعب بتتكرم التكريم ده
أتمني تكوني فاهمة وجهة نظري
و لك حق الرد ده لو دخلتي تاني
:)

No Fear said...

أنا إنسان
السلام عليكم
الغريبة إن أنا كمان إنسان شفت الدنيا ضيقة إزاي
ياسيدي أمسك الكيبورد و اطلق أصابعك عليها هتلاقي نفسك أرتحت خالص
ربنا يوفقك

No Fear said...

صاحب المضيفة
السلام عليكم
منورني دايما بجد
إنشاء الله هأوصل السلام بس أول أما أشوف مفيد باشا هو أخد الباشوية خلاص أنت معرفتش
سلام

mariam said...

ايه ده اسمى مكتوب
ده شرف ليا بجد يا محمد

و اللهى يا محمد انت شخص نقى فعلا
و بجد دى حاجه حلوه قوى لازم تتمسك بيها فى الزمن البشع ده

انا كمان بستنكر جدا الفرحه الشديده بتاعة كاس افريقيا
يمكن اكون غلط بس ده شعورى

مجدى مهنا
صدقنى لحد دلوقتى ببكى على رحيله
كنت متعلقه بيه جدا ككاتب
3 سنين اصحى على عموده
ومش ممكن انزل من بيتى قبل ما اقراه
حقيقى رحيله صدمه عنيفه جدا بالنسبه لى لحد دلوقتى

حزب الجبهه
انا اتمنى انك تيجى بس علشان اتعاون معاك
لكن كحزب بصراحه لغاية دلوقتى زيه زى غيره
ده احنا عندنا كمية مشاكل

اسقف كانتبرى
مش عارفه هما ليه مش بيركزوا غير على الحاجات السيئه و بيسيبوا الحاجات المفرحه دى بجد ده مثال رائع للتسامح و تقبل الآخر

ان شاء الله تتوفق فى الدراسه و الشغل بس شد حيلك الأمتحانات شهر 5 زى ما قلت لى صح؟
يعنى ابدأ ذاكر بقى

MerMaid said...

:)

هههههههههههههههه
لا ده مش ويل يا ويل

ده ويل ويل ويل

يعني همممممممممممممم
:)

تحياتي ليك
منور

No Fear said...

مريم
السلام عليكم
و الله أنا اتشرف بمعرفتي بيكي

كويس أنك متفقة معايا الحمد لله في كل حاجة

أنا فقدت المل الحقيقة في الحزب و ربنا يستر و مفقدش المل في التغيير أساسا

ربنا يوفقنا جميعا
ياااااااااارب
متحرميناش من زياراتك
سلام

No Fear said...

ميرميد
السلام عليكم
مش مصدق انت لسه عايشة و كمان بتعلقي عندي
كويس والله

ويل ويل ويل

Unknown said...

انا هقرأ جزء جزء زي مانت قلت

موضوع المنتخب أنا شايفه ان الناس كان نفسها تفرح من اللي هي شايفاه بجد

وعشان كده اللي حصل مكنش في مصر وبس

كان في كل البلاد العربيه عشان كلهم عايشين في هم واحد ونفسهم في نفس الفرحه

MerMaid said...

والله عايشة الحمد لله
:)
طمنني عليك
اوك؟
تحياتي

No Fear said...

إسراء
السلام عليكم
يعني خلاص كده فرحنا و مشاكلنا أتحلت
لا ده تخدير ليس إلا و الله أعلم
شكلك مقريتش الباقي و نسيتيه
:)

No Fear said...

ميرميد
السلام عليكم
يارب تكوني دايما بخير
أنا الحمد لله

Unknown said...

لأ أنا قريت وعلقت علي الجزء بتاع أستاذ مجدي الله يرحمه

بس مش عارفه التعليق راح فين

(:

بجد ربنا معاك ويكرمك ويخفف عنك ويوفقك