Saturday, December 08, 2007

السلام عليكم و رحمة الله و بركاته
فاكر لما كانت بتصحيك الساعة عشرة تقريبا كل يوم و تفطرك و تتفرج علي التلفزيون الساعة عشرة و ربع علي برامج الأطفال
فاكر لما كنت بتعمل لها كوباية نعناع و أنا بعمل لنفسي كوباية شاي الصبح
فاكر لما كنت بتخليها تلعب معاك كوتشينة و دومينو و هي مش بتعرف أصلا
فاكر لما كنت بتتفرج معها علي المسلسل بتاع الظهر
فاكر لما كنت بتخاف منها قوي
فاكر لما كانت بتبعتك تشتري فطار و الفول من عند عم يعقوب
فاكر قعدتها جنب الشباك الساعة 2 تنتظر خالتي و هي راجعة من الشغل عشلان نتغدي
فاكر لماكنا نتلم عندها كل جمعة و كل عيد
فاكر لما كنا بنعمل عندها كحك العيد
فاكر شهر الزلزال اللي أخدناه أجازة و قعدته طبعا عندها
فاكر يوم الجمعة لما كنت بتتغدي عندها و تتفرج علي الشيخ الشعرواي و أنت مش عاوز تتفرج عليه
فاكر أجازات الصيف و نص السنة و الخميس و الجمعة لما كنت بتقعد عندها علي طول
فاكر لكا كنت بتحب تقعد عندها و مترحش الحضانة
فاكر لما كنت بترجع من المدرسة تقعد عندها للساعة أربعة لحد ما تروح
فاكر لماكبرت شوية و بقيت تعرف تروح لوحدك و كانت هي بتقف تستناك في البلكونة تتأكد أنك عديت شارع شبرا في أمان و أنك في طريقك للبيت لوحدك
أفتكرت ده كله و كتير تاني لما كنت في طريقي بجوارها و هي في طريقها لمثواها الأخير أمبارح
ربنا يرحمها
كلنا كنا بنتمني إن ربنا يرحمها من الحالة اللي وصلت لها و كلنا كنا حاسين أنه خلاص أيامها قليلة بس بردوا كلنا بكينا عليها كأنها أتاخدت مننا فجأة
ربنا يرحمها
و يرحم جميع أمواتنا يارب
أدعوا لها بالرحمة
إحنا مكناش بنقولها غير يا جدة أنا شخصيا معرفتش أسمها غير مثلا علي تالتة أبتدائي
الناس كلها كبير و صغير بيقولها يا جدة أحفاد مش أحفاد هي جدة
كانت شديدة قوي معانا و طبعا كنا بنخاف منها قوي
بس هي كانت بتقف جنبنا لو حد زعلنا من خلانا أو بابا و ماما و أة يومه أسود لو حد أتخانق معنا في الشارع
أنا أكتر واحد من أحفادها قعد معها لوحدها بحكم سني المختلف عن باقي أحفادها و أحفادها اللي في سني ماكنوش بيجوا كتير
و طبعا كلنا كنا لازم نقضي أول خمسة عشر سنة مثلا عندها مش كل يوم بس تقريبا أكتر ما بنقعد في بيتنا
أن بقي قضيت عندها أكتر و كنت أكتر واحد بيقعد عندها
كنت أي أجازة أروح عندها علي طول
و كان صحابي عندها أكتر من اللي عند بيتنا و تقريبا مكنش في عند بيتنا صحاب لي
أنا شخصيا من رمضان تقريبا مرحتيش عندها لأني مكنتش عاوز أشوفها و هي كده
هي دي جدة اللي كانت بتبص لحد يترعب هي دي اللي كان الشارع كله يخاف علي زعلها و الناس كلها عارفاها
ربنا يرحمها
أدعو لها و اقروا لها الفاتحة
ربنا يرحمنا و يرحم جميع أمواتنا يارب

14 comments:

رفقة عمر said...

رحمها الله رحمه واسعه واسكنها الفردوس الاعلى اللهم امين يارب العالمين
البقاء لله
كلامك حزنى جدا
لانى مامتى جدة وعارفه قد ايه الاحفاد بيرتبطوا الاجداد
وفعلا مش كانوا بيسبوا البيت ابدا
بس للاسف انا مش ليا جدادت لن الاتنين ماتوا وانا صغيره قوى
ومش حسيت بجمال الجدة
ربنا يصبركم اللهم امين يارب العالمين

MerMaid said...

البقاء لله وحده

بسم الله الرحمن الرحيم

"كل نفس ذائقة الموت ثم الينا ترجعون"

صدق الله العظيم

ربنا يغرلها و يرحمها برحمته الواسعة

و يصبركم

اللهم اغفر للمؤمنين و المؤمنات الاحياء منهم و الاموات

:)))

مـحـمـد مـفـيـد said...

البقاء لله يا محمد
ربنا يرحمها
وبجد مش عارف اقولك ايه ؟

مروة الزارع said...

موضوعك هزنى من جوايا
وفكرنى بأحاسيس حلوة أوى
الله يصبرك
ويرحمها

يا مراكبي said...

شعور طيب جدا منك

ربنا يرحمها ويرحم أمواتنا جميعا

ويرحمنا إذا صرنا إلى ما صاروا إليه

Unknown said...

إنا لله وإنا إليه راجعون

اللهم أنت ربها وأنت خلقتها وأنت رزقتها وأنت هديتها للإسلام وأنت قبضت روحها وتعلم سرها وعلانيتها فاغفر لها وارحمها يارب العالمين

اللهم اغفر لها وارحمها وعافها واعف عنها وأكرم نزلها ووسع مدخلها واغسلها بالماء والثلج والبرد ونقها من الخطايا كما ينقى الثوب الأبيض من الدنس وأبدلها دارا خيرا من دارها وأهلا خيرا من أهلها وزوجا خيرا من زوجها وأدخلها الجنة وأعذها من عذاب القبر ومن عذاب النار

ربنا يفرغ على قلوبكم الصبر
اللهم آمين

mesh2dra said...

ربنا يرحممها يارب
ويجعل مثواها الجنة

مش عارفة اقولك ايه بجد

smraa alnil said...

اسفة اني مش كنت وجودة وقتها جنبك

ربنا يرحمها يارب ويغفر لها

واسفة مرة تانية

انا حاسة بيك وبيها في نفس الوقت

No Fear said...

السلام عليكم
أزيكم جميعا
جزاكم الله كل خير
و ربنا يتقبل دعائكم لها
اللهم أرحم أموات المسلمين يارب العالمين

رفقة عمر said...

السلام عليكم
شكرا ليك كتير
بجد انا اكون سعيدة جدا
لو تبعتلى القران مكتوب
جزاك الله خيرا
ربنا يكرمك يارب

رفقة عمر said...

انهو صورة
الاولى خالص

Anonymous said...

الله يرحمها ويجعل مثواها الجنة
وربنا يصبرك

رفقة عمر said...

مع انى كنت زهقت منها
بس رجعتها تانى

ابو صهيب ( الجمعاوي الاصيل)سابقاً said...

البقاء والدوام لله

كان الله في العون

"كل نفس ذائقة الموت ثم الينا ترجعون"