Sunday, July 08, 2007

السلام عليكم
معلش هي حالة من الطفح البلوجري جت علي بس كان لازم أكتب البوست ده علشان البوست اللي فات يتنسي هتقولولي ما تشيله هأقولكم لأ علشان كنت شلت البوستات القديمة مرة في واحدة قالت لي ليه شلتهم دول كانوا بيمثلوا عنك و عن حاجات حسيت بها و أقتنعت بكلامها جدا
تاني حاجة أنا أسف لبيلا و البنت الشلبية و مانو و سمرا علشان هم اللي قروا البوست اللي فات يعني أتنين أول مرة يدخلوا عندي و أتنين بأحب و أتمني يشوفوني في حالة كويسة محترمة بس للأسف
مش عارف خطر علي بالي حد خنيق كان بيكتب في جرنال خنيق بيكتب عامود خنيق أسمه تلكسات يعني أيام التخلف الأزلي المهم أنتم عارفين للناس القديمة أنا كنت بأحب بأكتب بالطريقة دي و كنت بأسميها عناوين الأخبار
المهم في حاجة جميلة النهاردة حصلت الجماعة العصبجية اللي قدمنا النهاردة واحد منهم أتخانق مع واحد الواحد ده مسكه أكله علقة راح الواد ده جري علي قرايبه و مسكوا المسكين التاني بصرف النظر عن كونه غلطان و لا لا و دخلوه عندهم و ضربوه فعلا مصر تحولت لغابة بشعة القوي فيها هو اللي يعرف يعيش
اللي يخنق إن الناس الرجالة اللي في الشارع اللي عامله نفسها كبرات المنطقة و طبعا أهم صفة بيهرولوا علي الصلاة في وقتها كأنهم مش شايفين حاجة محدش كلف نفسه و اتصل بالمطافي حتي
مش عارف الحل أية
كمان الأخ العزيز بابا النهاردة كان المفروض يروح مشوار النهاردة قلتله خليك و أروح أنا علشان هو تعبان أي خدمة أهوة قالي روح للناس أعمل كذا و كذا و في حاجة لو قالولك عليها أعملها و لو لا خلاص بطريقة السيكوسيكو
طيب يعني أنا اللي عرضت عليك علشان أنت تعبان كبرني و فهمني الموضوع التافهة ده علشان يعني مبنش كوز درة قدام الناس اللي أنا رايح أمثلك عنهم
الغريب إن الناس دي قالت لي علي الموضوع التافهة و الغريب أتضح إن البيت كله هنا عارف الموضوع يعني مش سر أصلا
يارب
في طريقي لهذا المشوار عديت علي مكانين غاليين قوي علي قلبي مكان شغلي السابق الله يحرقه بجاز وسخ و كمان علي جامعة القاهرة مكان التمهيدي الفاشل الله هي كمان
و كنت هأعيط خلاص الحمد لله بس شدني حوار في الكنبة الخلفية لي كان واحد و مراته مطلقين تقريبا و كان الرجل العيل كاتب ورق علي طليقته و كان بيساومها علي تنازل عن أبنها
بس الموضعات خلصت
نرجع لعناوين الأخبار
الأهلي ده مش فاهم هيخسر أمتي
الزمالك بقة محترم قوي الحمد لله و ياريت فعلا منلعبش السوبر
كفاية عاملة حركة خليك بالبيت
مش فاهم يعني إحنا شعب بنفهم
قوي العصيان المدني المسالم ده للناس اللي بتفهم مش لينا و لا مؤاخذه مع كل الأحترام لكفاية لأحسن يرفعوا علي قضية
في حركة خزعبيلة عملتها محدش يعرفها غير روني لما أختفي هي هتقولكم عليها
مش عارف ليه بترن في ودني من شوية كلمة الليمبي فشل يا جدعان مش عارف
حد عارف
مش عاوز أقولكم أخوكم بقي يشوف أي كوز درة معدي في الشارع زي القمر بصراحة
مش عارف روحي كوميدية قوي بالرغم من السعادة اللي أنا عايش فيها
كفاية عليكم كده علشان مفيش حد هيقرا أصلا
سلام

11 comments:

سلسبيل said...

محدش حيقرا ازاي
انت ف كام سطر عرضت فيلم قصير عن الواقع بتاعنا ببساطة وعايزني ماقراش دانا اقرأ واعلق كمااان
انا بس اللي حسيت بيه جدا حكايه والدك لما كلفك بمشوار وبعدين خلاك تحس انك كوز دره باين...انا دايما برضه بحس ف بعض المواقف اني قرطاس جوافه ..وبتغاظ جدا لما باسمع منهم كلمة واحده..انتي تنفذي وبس من غير اسئله..ياااه حاجه تغيظ فعلا خاصه اني ماباحبش الجوافه
عجبتني مدونتك ودي زيارتي الاولي واكيد مش حتبقي الاخيره ان شاء الله

البنت الشلبية said...

هههههههههههههه

ايوا يعنى وبعدين..البطل قتل البطلة ولا كل عليها الفلوس؟

ايه ده كله..لا بس بجد اسلوبك لذيذ اوى فى الكتابة ودى تانى حاجة الاحظها بعد اول حاجة وهى انك زملكاوى

مش عارفة ليه بحس انى اعرف اى زملكاوى او زملكاوية وبحس انى اختهم واننا اخوات او دم واحد

احلى حاجة فينا الزملكاوية الانتماء سواء فى خسارة او نصر

بس انا فهمت انك بتعمل تمهيدى ..هوا التمهيدى بيبقى صعب ولا ايه ..اصلى ناوية اقدم السنة دى ومحتاجة تشجيع

ربنا يستر بقى

انت اسمك ايه صحيح ..انا اسمى نهى هانم خد بالك من هانم دى

سلام

mariam said...

ايوه كده يا محمد
حلوه قوى فكرة العناوين دى
ممكن تعملها على حلقات

واضح انك احسن من الأول

شكرا انك عاجبك اسم مانو
بس مش هينفع اغير كل شويه
ممكن تبقى تقول لى مانو

تحياتى

Unknown said...

الحمد لله انك احسن ومعنوياتك اترفعت حبة

وياناس يازملكاوية ياشر كفاية وارحموا الاهلى من القر

:D

saso said...

:)
طيب دي حرقه الدم بتجيب تأثير كويس اوي
حلوة العناوين
الاخ العزيز بابا.. انا بقيت باتكلم عنه بصيغة الغائب.. اليومين دول بارجع متاخر من الشغل يادوب نلحق نتخانق وانام
سبحان الله بجد بيلاقوا الطاقة دي للخناق كل يوم من فين
--
الاهلي هيخسر امتي
ايه بقي النغمة دي.. ليه كده يا زملكاوي هو انا صحيح مش بافهم في الكورة بس اخر ماتش -لما اتشرحلي يعني ايه اللي بيحصل - كان حلو اوي
والزمالك كان فعلا حلو

سيبك سيبك
البوست حلو وسيبك من خنقة البوست اللي فات.. محمد الدنيا مش مستاهلة
ده حتي مفيش وقت تتضايق منها

No Fear said...

السلام عليكم
سلسبيل
أسم جميل بجد
مش عارف أرد عليكي أقلك أية أنت متفقة معايا في كل حاجة أنا نفسي أفهم بس العيب فيييييييييييين؟
هو أكيد في أنا علشان مش معقول الناس كلها تتفق مع بعض علي
ياريت متكنش الزيارة الأخيرة
بس علي فكرة المدونة كلها سوااااااااااد بعيد عنك

البنت الشلبية
الصديقة نهي
انت موضوع الزمالك ده هيجننك شكله أنا بأعشق الزمالك بس مش متعصب يعني لو الأهلي لعب كويس بأقول لعب كويس هو أة بأكون مخنوق بس بأقول الحق
كويس الحاجات الكويسة بتزيد
يعني أحنا أخوات في الزمالك أنا زي ما قلتلك مش متعصب ممكن تعتبريني أبن خالك بس :)
أنا العبد الفقير إلي الله محمد

مانو
قولي يارب أعرف أكتب تاني أنا مش عاوز أتعود أكتب كتير علشان متجننش هي بتكون لحظات لسعان بس
أنا بصراحة بمجرد ما أعرف صديق أو حبيبة بجد متزعلوش مني مش هأعرفكم تاني:)
خلاص قلت مانو

إنسانة
الحمد لله هي الحالة الكلامية بس اللي أرتفعت الله وحده اللي بعلم بالداخل
ربنا يسترها
بالنسبة للأهلي هو بيحوق فيه حسد
حد يقدر علييييييييييييه
ياسمين مش عاوز تريقه هي دي صورتك و أنت صغيرة

ساسوووووووووووووو
حمد لله علي السلامة
أنا نفسي أعرف بيجيبوا الأفكار اللي تزعلنا منهم إزاي
أنا في موضوع كنت ناوي أكتب عنه بس أقوله لك كسبق بلوجري يعني
ليه كل إنسان بيعامل أبناء أي حد تاني معاملة مش بيعاملها لأبنائه للعلم الموضوع ده منتشر بصورة غريبة جدا جدا جدا
الزمالك الحمد لله في صحوة يارب يبعد عنه الأهلي بس علشان نكمل الصحوة و نرجع لهم
و كل فأر يدخل جحره تاني
هي فعلا الدنيا مش مستاهلة بس الواحد أقول أية إنسان بردوا نفسي في حاجة تشجع علي الدنيا

saso said...

كل فار ايه سيادتك
!!
بلاش سيرة الفيران قدامي .. احتراما للقطة اللي انا حطاها طيب
:P
المهم يا محمد
بوست ايه اللي عاوز تغيره عندي ده يادوب باقله اسبوع هو لحق يبرد

اه صح... موضوع ولاد غيره ده موجود دايما في كل الناس،بس الحمد لله بما اني مبقيتش بالحق اشوف حد فمش بالحق الاحظ
بس زمان كنت بلاحظ ان نفس العيوب اللي عندي بتبقي مميزات في صحابي في عيون بابا.. لا حول الله طيب مانا كده..يبصلي حبه ويقوللي معرفش بس كنت عاوزك تبقي زي بنت اونكل مش عارف مين
يا سيدي ..مش مهم مش مهم

البنت الشلبية said...

ههههههههه ماشى يا محمد يا ابن خالى

بمناسبة اننا بقينا قرايب ,وايه مش هتعزمنى على حاجة ولا ايه؟!!
انا لسه متغدتش

smraa alnil said...

هييييييييييييييه
انا اسمي مكتوب

بتعتذر علي ايه بس
ما كلنا في الهوا سوا

ويكون في علمك بقي مش هحققلك امنيتك واديني رجعت تاني

واي كان اللي بيخش واي كان اللي بتكتبه
انت برضه كبير في نظرنا
وعلي طول شايفينك كويس

وبعدين تعالي هنا
ناس بيتخانقوا
المطافي تجيلهم ليه
هي الشرطة حولت التنسيق علي المطافي

والمقلب اللي اخدتوا من السيد الوالد يانا خدماه كلنا
لست انت الرجل الوحيد
:)

فال الله ولا فالك
ال الاهلي يخسر ال
يا اهلي يا عمهم يا حابس دمهم

المهم انك بقيت كويس ودي اهم حاجة

No Fear said...

السلام عليكم
البنت الشلبية
أكيد أنت أتغديتي أو خلاص من الجوع
بس علي العموم وعد زملكاوي من ابن خالك لما الزمالك يروح كاس العالم للأندية ليكي عندي عزومة جامدة جدا

سمراء النيل
و الله أحلي حاجة في البوست ده إن الناس كلها متفقة معايا في كل حاجة الحمد لله أول مرة الناس تكون متفقة معايا للدرجة دي مش عارف طيب العيب فينا و لا في أهلنا و لا في الظروف و لا إحنا المجانين الله أعلم
زمااااااااالك
سلام

No Fear said...

السلام عليكم

للجمييييييييييييييييع

بجد يا شباب أنتم متعرفوش أنتم خففتم عني قد أية ربنا يكرمكم و يجازيكم خير عني و يقدرني أرد لكم جمايلكم بس ربنا يكرمكم متنسونيش من الدعاء بالهداية
ربنا يكرمكم