Thursday, July 19, 2007

السلام عليكم
أزيكم يا اصدقائي و حشتوني جدا
طبعا مرحتيش أي رحلة و لا نيلة كله كلام بس
المهم الحمد لله الحوافز جت النهاردة و مش عارف أعمل بيهم أية هم كتيييييير قوي أروح الرحلة و لا أشتري هدوم و لا أشيلهم لتقديم التمهيدي و لا أشتري رامة جديدة و لا سماعات جديدة و لا أية و أية و كمان اللي هيفيض هأعمل به أية
المهم
في حاجات كتير عاوز أقولكم عليهامش عارف أقول أية و لا أية
أولا الحمد لله أنا نوعا ما سعييييييييييييييييد و متفائل اليومين دول مش عارف من أية من عند ربنا كده بالرغم من إن الظروف هي هي أو ممكن أسوأ بس الحمد لله الواحد من كتر ما كان يتخيل إن نهاية العالم هتحصل لو أية اللي حصل و بعد اللي يحصل يحصل الحياة تمشي عادي جدا
المهم في واحدة كانت معايا في الكلية قالت لي علي شغل مطلوب عندها مش عارف أقدم و لا لا
أنا مخنوق من الشغل اللي أنا فيه و من الناس و من المجال بس الواحد أسمه بيشتغل شغل مستقر مش عارف أعمل أية مش بأحب أكون في وضع أختيار أحب أكون مسير كده
أمي نداء محبة المهم مش عاوزاني أقدم في التمهيدي مش عارف ليه حاسس من كلامها إني لما هأقدم مش هأقبل أصلا و علشان تكونوا معايا في الصورة هتكون أيام مش حلوة لو مقبلتيش في التمهيدي
أنتم عارفين إني نفسي أتجوز فكرت في واحدة قريبتنا كانوا بيتحايلوا علي من و أنا في الكلية علشان أتقدم لها بس أنا مكنتش مرتاح لها و لعاليتها بس لما فكرت عقليا و نويت الأقيها أية طبعا أتخطبت في نفس اليوم اللي أخدت فيه القرار المهم أتقابلنا في فرح عارفين أنتم الأفلام و الغيظ و الله الواحد لما يعيش ياما يشوف و أنا المفروض بتغاظ اللي مضايقني إن بابا زعل من العايلة دي علشان معاملتهم تقريبا أتغيرت معه من أم البنت دي بس أبوها هو اللي لسه كويس معايا يعني و بيحبني أنا فرحان ربكم و الحق إن الموضوع مكملش أنا لسه عيل أساسا و ربنا يكرمكم لو قلتلكم إني هأخطب و لا حاجة حد يقلي و يفكرني بالكلمة دي أنت عيل
بابا عمال يقلي أتجوز أتجوز يعني أتجوز و هو اللي يصرف علي مش فاهم أنا أروح أقول لأبو اللي هأتقدم لها أنا عاوز أتجوز بنتك و أبويا اللي هيجيب كل حاجة مش فاهم أنا صحيح معنديش دم
الحمد لله الناس في الشغل بأعمل معهم كل خير و الله يعني المفروض يخلوا عندهم دم و مش عاوزين خزوقة
أنا عملت حاجة كده وطنية دعوة لتغيير النفس يمكن البلد عبارة عن أفراد و أنا في فترة إختبار دلوقتي مش عارف أكمل و لا لا انا بأدي نفسي فترة أختبار و الحاجة اللي بعملها ثلاثة شهور هأبقي أقول لكم عليها بعد النتيجة إن شاء الله
نتيجة الثانوية للأسف بالرغم من إن أبن عمتي جاب 92 مش مرحلة أولي مش فاهم أنا حاجة تحرق الدم
الزمالك في فترة إزدهار إن شاء الله ربنا يكرم مشو محمود محمود و القباني عقبال باقي الكتع اللي عندنا
ربنا يخلي هنري ميشيل
شريط عمرو دياب بالرغم من أنه مش في المستوي اللي كنت أتمني بس فيه كم أغنية روعة
عاوز أخرج مع ناس كتير قوي مش عارف اليومين اللي جايين دول هأخرج مع حد و لا مش هأخرج أصلا
أشتريت شيكولاته
الأستاذة ساسو دي مش عارف جابت أغنية بنام اللي حاطها علي البلوج بتاعها دي منين
نفسي أجتهد يا جدعان كسووووووووووووووووووووول جدا مش عارف أعمل أية
تخيلوا ياجدعان لاقيت واحد في شركة خدمات بيجي الشركة عندنا بينظف تخيلوا بكالوريوس زراعة
و كمان عندنا عمال بكالوريوسات كليات و معاهد و تلاقي رئيسهم معه أبتدائية و بيشتم فيهم
نفسي أنطلق يا جدعان
و نفسي أتجوز
و نفسي أكون كويس
و نفسي الزمالك ياخد الدوري و الأهلي ينهار بقة
بس بجد نفسي أرجع تاني أواظب علي الصلاة و الصوم و قراءة القرأن
للأسف لم أصم اليومين اللي فاتوا دول في رجب
يارب أهديني
يارب
.................
الحمد لله
الحمد لله
الحمد لله
الحمد لله
الحمد لله
الحمد لله
الحمد لله

9 comments:

مطرح ما ترسى....دقلها said...

رائع والله

انت بتتكلم زيي بالظبط

بس انت الاصل يا عم

انا فخور انى اكون اول واحد ارد على البوست الرهيب ده

وادعوك لزيارة بلوجييييييييييييي

مطرح ما ترسى....دقلها said...

اه بالمناسبة لو ملقتش حد تخرج معاه


هخرج انا معاك يا عم


بس قدامى بتاع 15 يوم واخلص امتحاناتى

ها هتستنى؟؟؟؟

البنت الشلبية said...

بسم الله ما شاء الله عليك..ربنا يسعدك يارب وتحقق كل الى نفسك فيه وخاصة الامنية الخاصة بنادى الزمالك الغالى

وانا سعيدة انى شايفاك مبسوك ووالله مش حسد ربنا يزيدك سعادة يارب

rony said...

اس اس السلام عليكم
محمد باشا
ازيك ياابنى
انت رجعت لبوستات الرغى الكتير دى تانى
بس والله وحشنى جدا انى اقعد اقرا نافذه على العالم اللى بتقعد تكتبها دى
بحس انى قاعده معاكم فى البيت
بس اهم حاجه ان بقالك كتير اوى مقولتش انك مبسوط وكده وده سبب يخلينى انبسط اكتر ما انا مبسوطه
شكلى هافرقع من الانبساط قريب باذن الله
يارب دايما تبقى مبسوط
ويارب تبطل كسل
ويارب يارب يارب تتجوز
وتبطل نكد
سعيده انى بعلق عندك من تانى

smraa alnil said...

اممممممممممممم
بص يا ابني
طريقك اخضر ان شاء الله وسر علي بركة الله

بالنسية للحوافز فاياك تحرم نفسك من حاجة انت نفسك فيها
او حوشهم
وخليهم معاك عشان تبدء تحوش ولما تروح تخطب علي الاقل تقول انا معايا فلوس وبيوا هيساعدني بس

فاهمني

وبالنسبة للشغل بتاع زميلتك فربك بيقول اسعي يا عبد وانا اسعي معك

وبعدين خطيبي كان زيك كدة
مش كان عايز يسيب شركته القديمة ويروح الجديدة

بس الحمد لله لاقي كل شئ يمكن احسن
قدم انت وصلي استخارة ولو ليك خير في الشغل دة ربنا هيسهلك امورك

بالنسبة للتمهيدي

مش عارفة اقولك ايه
يعني انا بصراحة خلصت اولي وتانية ماجيستير وشغاله في الرساله دلوقتي
بس بيني وبينك جاي علي وقتي وصحتي وعليا مجود كبييييييييير اوي

لو انت اده يبقي قدم
وفي الاخر مهما كان تعبك هتبقي مرتاح في الاخر
وهتحس انك بد ناجح اوي
انا اد ما كنت كارهة الدرسات العليا بس بعد ما نجحت في الدراسات
حاسة بفخر غريب وبعتبر نفسي من دلوقتي مدرس مساعد :)

وبالنسبة لموضوع الجواز

ليا قصة صغننه كدة

اد ما كنت عايزة دة وكنت هموت علي الحب
مش لقيته وكنت مفتقداه ودايما كنت حزينة لدرجة اني حسيت اني خلاص مش هلاقيه

وفضلت خلاص مأقلمة نفسي علي كدة
وعشت حياتي بقي
لحد ما لقيت الحب هو اللي بيترمي تحت رجلي


نفس الحكاية مع شاب برضه
جايز يكون اكبر منك ممكن

فقد الامل انه يلاقي الحب واللي بيتماها
وأقلم حياته خلاص انه يعيش وحيد
لوحده ومع نفسه وبس

لحد ما فجأة برضه لاقي الحب بيترمي تحت رجليه

يعني باختصار هما الاتنين لاقوا بعض

فاوعي تفقد الامل انك هتلاقيها

خليك واثق في كدة بس مش تشتعجل

وعلي فكرة انت لسة عيل :)

وهات حته من الشيكولاته
وتف من بقك ان الاهلي يخسر
وبطلوا حقد بقي

No Fear said...

السلام عليكم
مطرح ما ترسي دقلها
أسم جامد جدا علي فكرة
يا عم أصل مين و صورة أية
أنا بحس بهبل و أنا بأكتب بس أهو بفرغ اللي جوايا و برتاح بعد كده شوية يعني الحمد لله
يشرفني يا باشا أزور بلوجك و حصل
أنا شكلي هأستناك بس المشكلة إني خنيييييييييق جدا مش هتستحمل تتكلم معايا أصلا
ربنا يوفقك في الأمتحانات

البنت الشلبية
ربنا يكرمك و يسعدك انت كمان دايما
بما إن أكبر شئ يشغل بالك هو البلانكو المصري أنا بصراحة متفائل خير إن شاء الله بهنري ميشيل و اللي بيعمله و بالمحترم ممدوح عباس

روني
منورة البلوج
حلوة نافذة علي العالم يا خفة
يارب تكوني مبسوطة و سعيدة دايما أنت يا بنتي قاسيتي كتير من حقك تفرحي بقة عقبالي
بس ياريت متنسنيش ها :) يوم الخميس كان بكرة يبقي التلات كان أية؟:)

الرائعة سمرا النيل
منورة و الله أنا متشكر أنك علقتي علي كل الموضوعات اللي قلتها
أنا متشكر لك جدا و يارب كلامك يحوق في علشان أنا كتير مش بيكون عندي دم
و ربنا يوفقك دايما

___
شكرا لكم كلكم علي تعليقكم عندي بجد أنتم مش ممكن تتخيلوا سعادتي و أنا بتناقش معكم في كل حاجة في حياتي بجد بأستفيد كتير
ربنا يكرمكم و يسعدكم و تفضلوا أصدقائي للأبد

كل سنة و أنتم طيبين بمناسبة شهر جب

البنت الشلبية said...

كل سنة وانت طيب بمناسبة شهر رجب وربنا يبلغنا رمضان جميعا على خير ان شاء الله

وربنا يديم المعروف والطيب بينا كلنا يارب

هيثم محفوظ said...

بعد السلامات
دى اول مرة اجيلك فيها وان شاء الله مش هتبقى الاخيرة.
فكرتنى بموضوع الحوافز ده.. من كام يوم قولت احسب انا مرتبى كام فى السنة بالنسبة للدخل القومى العالمى لقيت دخلى ومش عايز ضحك 240 دولار وعلشان تتاكد ومتفتكرش انى غلطان فى الكتابة 240 دولار يعنى من الاخر يا عم كويس ان فى حوافز.
على فكرة انا اصلا مدرس موسيقى وبغنى وبلحن وعامل انا وجماعة اصحابى فرقة حرة اسمها صبا ممكن تكون شفت حاجة عنها عند ساسو.
ياريت تزورنى
وخد دى كمان www.studiosaba.blogspot.com
دى مش هتلاقى عليها الا مزيكا فى مزيكا انا لسه بادئ فيها صحيح بس هتعجبك.

No Fear said...

السلام عليكم
هيثم محفوظ
منورني و أتشرف يزيارتك يا فندم
ربنا يوفقك كده و يكون دخلك بتاع 300 دولار ياعم
مزيكا في حد بيدرس مزيكا دلوقتي
علي العموم ربنا يوفقك
إن شاء الله هأدور علي فرقتكم دي و أسمعها كفاية إن ساسو تعرفكم
منور و ياريت متكنش أخر زيارة