Saturday, March 10, 2007

السلام عليكم
بعد سلسلة من الحاجات اللي مش حلوة حصلت لي اليومين اللي فاتوا
زي
فشلي في أول أمتحان في الكورس و حاجات رخمة في الشغل و كم حاجة تانية بتحصل مش لذيذة لا داعي لذكرها
و كمان كان في حاجة كمان سيئة قوي عرفت من موقع ساقية الصاوي إن في حفلة بمناسبة ذكري أحمد منيب أتفقت مع واحد صاحبي نروح و للأسف رحنا
كانت حفلة سيئة جدا الحقيقة
للأمانة أنا رحت ساقية الصاوي مرتين مرة في حفلة بمناسبة عيد ميلاد فيروز كانت لسلمي و كانت حفلة أكثر من الرائعة و دي المرة التانية يارب تكون مرة غلط بس علشان جو الساقية بحبه جدا الحقيقة
و علشان أنا أحتفل بذكري أحمد منيب هأكتب بعض كلام أغانيه
أولا
وإن شاء المولي
راح نرسي في مينا
أيامنا علي الله
و قمر ليالينا
يا مراكبي
شد القلوع يا مراكبي
مفيش رجوع يا مراكبي
ياليل من غير حبيب
ياليل أمرك عجيب
الورد كان في كل مكان طارح مطارح لحبي
والكون ده كان زمان ميسعش حتة من قلبي
حاجة كمان
صدقني يا صاحبي
إن خفت متقليش و إن قلت متخفشي
الكدب طبعة يخون
الصدق ميخنش
الكرهه يوم بيهون
الحب ميهنش
فوق الجبين مكتوب الخطوة فين تمشي
أمشي في طريق الخير
في الشر ماتمشي
الدنيا بحر كبير و الحال ما بيدومش
صدقني يا صاحبي إن خفت ما تقليش
و إن قلت ماتخفشي
حاجة أخيرة
مين اللي يسهر جنبي الليل
مين اللي بالو معايا طويل
مين لما أتعب يساعدني و معايا حمل الهم يشيل
مين هي غير ست الستات
و ياها بتصبح و أبات
و أجيب لمن غيرها و أهادي
أم العيال العشرية
يا عم يا بتاع الطيب
المسك ريحه ما يتعيب
إديني من العطر الطيب
و أخد لمحبوبتي هدية
أم العيال العشرية
أخيرا مش عارف الحقيقة أقول أية
الناس مش عارف ليه بتعمل كده
عروستي
صح
حكمه اليوم - من ورق النتيجة-
قبل ان تحكم علي الأخرين احكم علي نفسك
دي بقة تسمي هلوسة ما بعد الصدمة
أو هلوسة الصباح
سلام

14 comments:

35L said...

موضوع جامد جدا يا باشا....و الله أنا بحب الدونة بتاعتك .....انت كمان جيت فى بالى و الله.......موضوع جتمد و أشعار جامدة...الحاجات المحزنة دى اقرالها موضوع لا تحزن فى المدونة بتاعتى.....سلام.....أرجو الزيارة مرة تانية

يا مراكبي said...

هارد لك .. تعيش وتاخد غيرها .. المهم تقف تاني على رجليك

وبعدين إيه الإختيارات الجامدة دي .. جيت على الجرح بجد

الدبور said...

توضيح بخصوص البوست بتاعي اللي عمل قلق وزعل ناس مني انا بحترمهم وبحبهم
تم توضيح وجهه نظري في بوست منفرد
اقراه وقولي ليا رايك ؟
رايك يهمني

تحياتي
الدبور

إنسان || Human said...

والله منيب ..مش محتاج نقاش من اساسه ..بالذات ام العيال العشرية ......إستفهام بسيط عن ....سبب ان الحفلة ماكنتش كويسه ؟
واضح ان المطربين اللي كانوا جابينهم ماكنوش قد كده
أنا شفت تقرير عن الحفلة في الأو تي في وشفت ريكو ...هههههه واضح كانت هايلة فعلا

el_assel said...

هــــــــــــــــاي
يا عم باذن الله تتعدل وترجع الميه لمجاريهاوما يبقاش في حاجة وجشة تاني

أسوور said...

ايه يعنى ما فيش حاجة كويسة خالص حصلت
ولا حتى انك كنت منورنا فى لقاء المدونين فى الأوبرا

انت انسان جميل جدا واتمنى تشارك معانا دايما

أنا فعلا اتشرفت بمعرفتك وسعيدة بحماسك ومشاركتك

تحياتى

No Fear said...

السلام عليكم
35l
منورنا يا باشا و إن شاء الله هأكون عندك دايما

يا مراكبي
فين حضرتك من زمان مش بتتدخل عندنا ليه
الدبور
معتقدش هيدخل هنا تاني بس هو منورنا علي العموم
هيومان
الحفلة كانت تشل جابوا واحدة من المغرب تغني
و الأخ علي حسين كنت بحب أغنيه لو قابلت بس كرهت ه جدا
ده ريكو كان لحظات كده في السريع و كان كويس للعلم و في أغنية جديدة عملنها لأحمد منيب و هي أغنية حلوة بس بتغني فيها مش عارف أسمها أية اللي بتغني الحنطور هي صوتها حلو بس بايعة القضية خالص بتبوس أي حد
الأصيل
يا باشا منورنا و الله و ياريت تيجي عندنا كتير
و متقلقش هتتعدل إن شاء الله و لو متعدلتيش هأموت نفسي يعني
كبر دماغك

ياسمين
بردوا ممكن متتدخلش هنا تاني
بس منورنا
أنا مظهرتيش أي حماس خالص في لقاء الأوبرا و ربك و الحق أنا بحاول أنسي اللقاء ده متسألنيش ليه

35L said...

أدعوكم جميعا للمشاركة فى البلوج بتاعى...موضوع مهم بدأت فيه....و أحتاجكم معى

Unknown said...

ايه التهييس الجامد ده
يااااااااااه
احمد منيب مرة واحدة

انا بجد بمووت فى شجر اللمون

ربنا يكرمك بجد

محمد مفيد said...

محمد
كلامك حلو اوي مش هلوسه والله دي فضفضه جميله

micheal said...

جري ايه يا عم محمد..طب أنت متبسطش معانا في لقاء المدونيين و لا ايه...علي العموم مفيش حاجه تستاهل تضايق روحك عليها
مستنيينك اللقاء القادم
تحياتي لك

No Fear said...

السلام عليكم
فضفضة أية بس
دي خنقة بعيد عنك

ميشيل
صراحة متبسطيش و صراحة مش جاي اللقاء القادم
بس ربنا يخليك متقلش لحد أنت فاهم دول ستين مدون ممكن يتلمو علي يبهدلوني
و هم شكلهم مفتريين
سلام

micheal said...

ههههه....وقعت برضه يا صديقي في الخطأ بتاع كل المدونيين و افتكرت اسمي ميشيل...اسمي مايكل
بخصوص اللقاء عاوز أقولك أن أكيد لازم يكون فيه سلبيات في الاول بس صدقني كله حيتحسن المرة الجايه و مش معقول يكون الانسحاب هو الحل...فكر كويس و الا حتلاقي هجوم كاسح علي مدونتك من 100 مدون علي الاقل و أنت حر...ههههه
تحياتي لك و برضه مستنيينك اللقاء القادم

No Fear said...

السلام عليكم
مايكل
أزيك
يا سيدي مايكل بالإنجليزي هي ميشيل بالفرنسي مش مشكلة يعني
أروح لقاء مدونين تاني ده أنا مصدقت أنسحبت في هدوء في اللقاء اللي فات لعلمك هأكون سعيد جدا لو 100 مدون هاجموني حتي يعملولي شغل بس لعلمك أنا قدها و لا يهمني
بس متقلش لهم ربنا يكرمك