Sunday, March 04, 2007

السلام عليكم
و الله العظيم كنت نايم خلاص بس عندي عادة سيئة إني بسمع البي بي سي و أنا نايم حصاد اليوم الإخباري سمعت ثلاثة أخبار مقدرتيش قلت لازم أبقي أكتبهم بوست بس مقدرتيش و قمت من تحت اللحاف علشان أكتب البوست ده
الخبر الأول
إستقالة الحكومة الكويتية علشان في بكرة إقتراع بسحب ثقة من وزير الصحة اللي هو من الأسرة الحاكمة بيغلوشوا علي النواب يعني قبل أما يشيلوا الوزير
و نعم الديموقراطية
أنا للعلم مش بقول حال مصر كويس يعني علشان لو في حد كويتي هنا و معتقدش هيقولي روح أتشطر علي اللي عندك
الخبر التاني
وصل إلي غزة الرئيس الفلسطيني محمود عباس و كأن محمود عباس ده مش رئيس غزة مثلا ده كويس إنهم مقلوش كان مين في إستقبالة
الخبر الثالث
الأمين العام عمرو موسي يقول هناك محاولات لإقناع ليبيا بحضور القمة العربية و كأنها هتنعقد في إسرائيل مثلا بصرف النظر عن الخلافات بينهم في حاجة أسمها الأهم فالمهم
أقول أية بس
يارب أعرف أتنيل أنام بعد الحاجات دي كلها
الله عليكم يا عرب
ربنا يحميكم كمان و كمان
ملحوظة
انا عندي اليومين دول مرض البوستات و هو عمل بوستات كتيرة مش عارف ليه
ياريت الزباين تبقي تمر علي اللي فات علشان بيجيلي إحباط
يا جدعان وصل للبي بي سي الأن خبر هام
تلقي الرئيس معمر القذافي دعوة رسمية من السعودية بحضور القمة العربية
هم مكنوش دعوة أصلا
يالهويييييييييييييييييييييييييييييييييييييييييييييييييييييييييييييي

10 comments:

Anonymous said...

السلام عليكم

علي قد ما الأخبار تحزن ..بس بصراحة مقدرتش أمسك نفسي من الضحك

الخبر الأولاني عادي جدا...مستغرب ليه

والخبر التالت
خطر علي بالي مثل هو بعيد شويتين تلاتة
بس حقوله برضة

فكرني بأم عماله تقنع في جوزها إنه يحضر فرح بنته ..أصل العريس مش من اختياره

الخبر الأخير بقي فكرنى:P
بالأب اللي محضرش الفرح...
أصل البنت مابعتتلوش دعوة الفرح...بس هنا الحالة مختلفة..لأن الأب هو اللي جايب العريس

ربنا يوفقهم

Unknown said...

مساء الخير

واحدة واحدة
......
بيغلوشوا ؟؟؟
حلوة بيغلوشوا دي
طيب على الأقل في الكويت بيغلوشوا على النواب بحاجات ليها قيمة
استقالة الحكومة مثلاً
والله كتّر خيرهم
عندنا بقى في مصر بيغلوشوا على بلاويهم بحاجات غريبة قوي
فاروق حسني يطلع بزوبعة من بتوعه
يكسروا ماسورة مية رئيسية
يرفعوا سعر البصل
كده يعني
......
الخبر التاني والتالت دول بقى حكاية

القذافي بيجيب الجلسات كلها علي دي في دي من قدام فرغلي اللي في جامعة الدول العربية
الشارع ده اللي في المهندسين
ويتفرج عليها في بيته
هيروح ليه بقى
السعودية بقى ليها حق تضايق
لأنها صرفت على الدعاية كتير ومن حقها تلم اللي صرفته عن طريق التذاكر
بس انت عارف السيديهات المضروبة بتاعت السوق السودة بتخرب بيت شركات الانتاج
ففكرت انها لو تنازلت وعزمت ليبيا على العرض الخاص
ليبيا هتبطل تشتري من برة
......
معهلش
أصل سيرة الناس الحلوة دي
فعلاً بتخلييني أهيّس
........
ربنا يرحمنا جميعاً
......
ضحكتني والله
بوست حلو أحييك عليه

smraa alnil said...

طب والله هم يضحك وهم يبكي

ممكن اجي اقف جنبك واصوت
يا لهووووووووووووووووووي
علي بلدنا والعرب واللي بيحصل في عالمنا
بقولك ايه انا كتبت عن اللقاء تعالي عندي اتحسر شوية وبعد كدة شوف اللقاء

يا مراكبي said...

يا صديقي .. دي عادة سيئة جدا جدا لازم تبطلها

كفاية قوي الهموم بتاعة الحياة اليومية .. مش ناقصة أبدا تزودها بهموم ترفع الضغط وتجيب ذبحة وبرضة مش هتنام أبدا

إنسان || Human said...

ايه ياعم محمد .....حد في الدنيا بينام على البي بي سي ,,,,,حرام عليك .....على فكره انا كنت مابحولش المؤشر من على الإذاعة دي ...بس الحمدلله ربني أكرمني وماعدتش بشغل راديو من اساسه ..لأن الأخبار دي مؤذيه ومضرة بالصحة

Memo said...

aih ya mohammed dah

we homa ygibo mo3mr elkazfy lih hia elmshr7a n2sa 2otlah
we ya rit tgm3 elpostat dih 3shan n3rf n2rah
t7iatshy

mariam said...

البى بى سى
مالها نجوم اف ام
و لا حتى اذاعة الأغانى

على العموم لا داعى للأستغراب
دى عادات العرب
يعنى مش جديد عليهم

تحياتى

smraa alnil said...

انا بس ليا ملحوظة صغيرة اكتشفتها فيك
انت مش كئيب

saso said...

:)
بعثت له ستة وسبعون انذارا
دي كانت من مأثورات حرب الخليج الاولي.. مستجبش ليه للانذارات بقي ده غالبا علشان كانت بتضيع في البوستة تماما زي دعوة انعقاد المؤتمر بتاعة الرئيس الليبي كده

يلا هو الراجل مش غريب برضة

Unknown said...

شفت أديك كنت ظلمت الراجل, وهو ماكنش مدعي أصلا, صحيح هم يضحك وهم يبكي, وده طبعا من النوع اللي بيبكي.