Thursday, March 15, 2007

السلام عليكم
صباح الخير عليكم و علينا إن شاء الله
عندي كلميتن علي السريع
الكلمتين دول بفكر أكتبهم قبل أما أتجنن و أروح أعمل حاجة اندم عليها بقية عمري أو الله أعلم الخير فين بالمناسبة اللي يدخل يدعي لي بالهداية
المهم
الموضوع الأول

مش عارف ليه دايما بحس إن حال البلد دي مش ممكن يتعدل غير بحاجة زي الثورة الفرنسية مش عارف ده بسب تأثير قصة مدينتين علي و لا أية بس المشكلة إننا لو عملنا حاجة زي الثورة الفرنسية الله يمسيها بالخير مدام ريفينج مش هنلاقي حد موجود في البلد لأننا بلا إستثناء بنعمل في بعض اللي نستحق عليه الإعدام
بدأ من عزيزي سائق الميكروباص مرورا بالمدرس المطحون اللي بيطلع غله في الطلبه من أبنائي الطلبة و الطالبات اللي حالهم ما يعلم به إلا ربنا مرورا بالأب اللي بيطلع غل الدنيا في عيالة مرورا لكل واحدة محترمة بتبيع إحترامها بأي شكل مش لازم الشكل اللي هيجي في دماغكم في أشكال كتير لبيع النفس
أة و الله جه في دماغي موقف جامد قوي واحدة بنت شكلا محترمة قوي ركبت معايا الميكروباص مرة هي و واحدة صاحبتها و المفروض يدفعوا جنيه لكنها أبتسمت إبتسامة الموناليزا للسواق و أعطته خمسين قرش بس و لما رفض و صمم علي الجنيه أديته بس و هي عاملة زي فرانكشتين مش عارف حالنا هيوصل لحد فين ده مثال لبيع النفس غير الأنسات المحترمات اللي شغلتها بتجذب الزبون بس في المعارض و المؤتمرات
هأقول أية حسبنا الله و نعم الوكيل
أنا مش بهاجم الأنسات و الله بس بجد حال البلد دي مش هيتعدل غير لو الأمهات أتعدلت و بصراحة الأنسات دلوقتي لا تبشر بالخير أبدا أو علشان محدش يزعل مني نسبة 99بالمائة لا تبشر بالخير
و ربنا يسترها علينا
أنا مش عارف الموضوع بيوسع مني ليه
في أشكال كتيرة بس مش عارف ساعات بحس أنهم عندهم حق في اللي بيعملوه هاياكلوا منين هتقوليلي لا مش المفروض يعملوا كده مش عارف يعني ينزلوا يلموا زبالة من الشارع مش عارف بجد الحل فين
ربنا ياخدني و يريحني من الهم اللي أنا فيه ده
تاني نقطة عاوز أتكلم عنها التحكم في مخاليق ربنا ليه كلنا بتغير لما ربنا بيحكمنا علي حد
سواء أبنائنا حلوة أبنائنا دي اللي يسمعني بتكلم يحس إن عندي تسعين سنة
و الموظفين اللي تحتنا
ليه مش عارف بالرغم من إننا بنكون حاسين بالظلم من اللي فوقنا
مش عارف

الموضوعين دول مش عارف الحل فيهم أية بالظبط

الحمد لله شكلي عقلت و مش هأروح المشوار أياه و هأقوم أنام أحسن علشان أنا أجازة النهاردة من الشغل

تصبحوا علي خير

18 comments:

smraa alnil said...

اولا هو انا كل ما اجيلك الاقيك نايم

وبعدين انت متغاظ من ابنت عشان ابتسمن لواق وانت لا
بطلوا حقد علي البنات بقي

بص انا في مرة يتيمة ركبت ميكروباص
وقاعدة قدامي بنوتة
تقولش ملاك يا اخواتي
الاجرة كام يا اسطي
الاجرة جنية وربع
وكانه قالها انتي بنت كلب
البت صوتت وزعقت وشتما
وبعدين الرجاله ساكتة
راحت مقلوبة علي الرجاله
يا رجاله عرة مش تسوي مليم
اتكلموا
اعترضوا
وقعدت تسخن ف يالعربية
راح السواق راكن وراسه والف سيف البت دي تنزل من العربية
وهي ابدا
والرجاله خلاص يا سيدنا
حصل الخير دي مهما كانت بنت برضه
ههههههههههههه
وبعد مدازولات وندوات
البت برضه دفعت لجنيه وربع
والاعتراض كله ليييييييييييييييه
عشان الاجرة في الاول كانت بجنية وعشرة قرش
يعني الهالومة دي كلها عشان 15 قرش
وانت زعلان
يؤسوفوني اقولك ان البنات اندثرت
وبطل نوم بقي
دة انت فظيع

No Fear said...

السلام عليكم
الكسل أحلي من العسل
كان في أغنية كده زمان كانت بتيجي في برامح الأطفال العقيمة اللي كنت بتفرج عليها
و مش عاوز أفتكر أية اللي حصل للدبة اللي كانت بتقول كده

المهم لو شفتي البنت دي تاني أو حد زيها قوليلها الرجالة ماتوا في الحرب
و أدفعي لها الخمستاشر قرش
البلوج بتاعك مش عارف أدخل عليه انت محددة مين اللي يدخل و مين لا مش عارف في أية
سلام و شكرا لزيارتك

Unknown said...

دايما بقول إن إللي بيحصل ده نتيجة بالدرجة الأولي

فزي ما بيقول الفيلم
V for Vendetta

With so much chaos, someone will do something stupid. And when they do things will turn nasty. And then Sutler will be forced to do the only thing he knows how to do.

smraa alnil said...

انا مش محددة حد انا قفلتها
انا بس اللي بخش فيها
يعني مش تخاف انا مش محددة ولا دعيت اي حد لدخولها

No Fear said...

السلام عليكم
irc
حقا

سمرا
خير في أية هتعتزلي التدوين أنت كمان هي موضة شكلها
و بعدين
نحنا مش نخاف

baby me said...

elslam 3likom
no fear
mthy2ly en kol 7ga feha el7lw w elw7sh
y3ny ah an m3ak en fe bnat b2o la ymto lel elonosa b sela :)
w shwaho sm3t elbnat elkwysa 7sby allh w n3m elwkil fehm
bs fe bnat brdo kwysen awy w kol 7ga kda feh aelkwys w elw7sh

FATMA said...

ربنا يهديك

mariam said...

انا كمان بلاحظ موضوع ان الأنسان يكون كويس
و اول ما يتحكم فى حاجه
يتغير كتير كأنه واحد تانى
مش عارفه دى تركيبه انسانيه
و لا عقده نفسيه
لكن مش الجميع طبعا
تحياتى

saso said...

يوسف ادريس قالك اننا فرافير واقفين فوق راس بعض

مايصدق واحد يبقي سيد يبقي الباقيين كلهم فرافير ..ويتحكم بقي ..وفاكر انه كده بقي فوق راس الكل مع انه برضة فرفور للي فوقية

مش هاعلق علي البنات بتاعتك دي للاسباب المعروفة !!! اصل انا كمان عاوزة انام وبالليل بابقي شرّانية اوي فمش هاعلق
:)
المهم مالك في ايه ..الشغل ماكلنا قرفانين عادي يعني والله يا محمد يا ابني استقلت وكتبت اخلاء الطرف وقلت هيييييه إفراج ..معرفتش افلت برضة قال لازم استني 3 شهور ادرب الناشئين قبل ما امشي.. اكون نسيت انا عاوزة اسيب الشغل ليه.. سبحان الله

الدراسة عااااادي كل حاجة بتتلحق بس انت اصحي من النوم ومتقلدش الدبة بتاعة العسل دي
:)
تصبح علي خير

Anonymous said...

أنا برده جه فى بالى موضوع الثورة الفرنسية ......بس لأ ..أكيد فى طريقة أحسن من ده ثورة
تخيل الثورة الدموية تحصل فى مصر !!!ا


البلد هتتعدل بعدها بسنين كتير أوى أكتر من فرنسا
لاننا مش بنعرف نعمر البلد ده كويس

:(

ربنا يجيب حاجة أحسن من الثورة الفرنسية مصر

No Fear said...

السلام عليكم
lost
أنا معاكي في الكويس و في الوحش بس النسبة حاليا قليلة جدا جدا جدا و كمان في تناقص
ربنا يستر

توتة توتة
ربنا يكرمك

مانو
لكي وحشة بجد منورة علي فكرة شفتك في لقاء المدونين
في الكويس و في الوحش
بس في الموضوع ده مشفتش الكويس الحقيقة

ساسو
عالم فرافير صحيح
زمانك صحيتي ياريت تعلقي علي نوضوع البنات ده
يارب متكونيش سايبة الشغل علشان تقعدي في البيت يارب تكوني رايحة مكان تاني
أنا فاكر لما حكيتي تقريبا عن يوم و أنت راجعة من الشغل في رمضان حبيت كلامك قوي ساعاتها
قعدة البيت وحشة بلاش
و الله نفسي مقلدش الدبة بس اللي بيقلدها بيعيش مبسوط اليومين دول
و أنت من أهله
صباح الخير

noran
أنا بحلم بس
و زي ما قلتلك إحنا أصلا لو عملنا زي الثورة الفرنسة مش هيكون في حد في البلد لأن كلنا بناكل في بعض

شكرا لكم جميعا

أسوور said...

شكرا لدعمك لى فى محنتى

تحية من قلب مجروح

يا مراكبي said...

أنا مش هاتكلم عن الموضوع التاني علشان ده موضوع يوجع البطن

أما الأولاني .. ما تقلقش .. الثورة اللي أسوأ من الثورة الفرنسية جاية في الطريق .. ما تستعجلش

Unknown said...

بعد الشر ياسيدي.
حكاية الثوره الفرنسيه دي أنا كنت بفكر فيها امبارح, ربنا يستر ونلاقي حل غيرها.
أما بقي حكاية اننا بنتغير , فالسلطه بتغر يابني, الا من رحم ربي, أي كان نوع السلطه دي.

yousef said...

وأنت تيع دماغك أبيع يا بيه
اول ما قريت البوست افتكرت المشهد ده عموما كتابتك لذيذة ومنتظر المزيد منك ويا ريت تشرفنى فى مدونتى

saso said...

فكرك عرفت اقعد ..يلا ماعلينا الشغل حلو برضة ومفيد ..بيسرع النوم بالليل ومتحسش بحاجة
:D
عن البنات يا سيدي ..مش شايف ان الايام دي في انحدار خلقي مميز من الطرفين ..احنا بنقول اننا عندنا ضمير واخلاقيات وبتاع ..بس بمجرد نزولي الشارع بشك في اني في مصر بجد ..ربنا رزقني بشغل قصاد اكاديمية خاصة

يووووووة يا محمد
الولاد لابسين زي البنات والبنات لابسين حاجات عجيبة ومش سنهم اصلا، وعربيات بتعمل دواير واتو كروس الضهر وفي تل جميل كده تلقي ولد وبنت نازلين من فوووق يا سلااام كنتوا فين ان شاء الله بترصدوا الهلال؟ حاجة تفرح بجد

اما بقي عن المولد اللي بيتعمل في الميكرو -وسيلة المواصلات الوحيدة للمقطم حيث السلعوة- ربنا يسامحهم .. تخيل ادحرج واجري يا رمان وانا رايحة لبيتنا ومش راجعة في ميكرو الساعة 6بالليل مع التصفيق والزغاريد من الولاد مش بنات وضحك ظريف جدا جنب ودنك وانت راجع من الشغل

سؤال غبي شوية ..هو ليه الولاد بيلبسوا هدوم غريبة الايام دي زي الستينات واسوأ .. سؤال تاني مين العبقري اللي اخترع البادي الترانسبيرنت الأبيض للولاد .. تحس انه رجل فضاء داخل عليك

الموضة الظريفة المعبرة بصراحة عن حالنا بعد كام سنة اللي واضح انه هيبقي احلي كتيييير

توامر حسني منطلقين في كل اتجاة ..نضارة شايلة نص الوش ..شعر منعكش زي العفاريت .. ومتنساااش الجيتار
ولا الصوت ..ولد جنبي بيسال علي الساعة... انا سمعت صوتة تنحت ..كل دة بيطلع الصوت دة؟!!!! دة لو ابني كنت قتلتة مش عاوزة اقولك الهوا مضايقة علشان بيحرك شعرة وطول الطريق ماسك الخصلة اللي تعباة بايدة.. يلا ما علينا انا برضة رايحة انام فميصحش اتنرفز اكتر

ولاد وبنات ايه بس، لو مش هيتعدلوا لوحدهم يبقي احسن خليهم كده، ماهي ناقصة

تصبح علي خير

saso said...

اه عن الثورة ..بعد اللي شفتة النهاردة ..انسي
نحن نؤيد ونبايع ونشجب ونعترض في نفس واحد

مين اللي هيقوم بالثورة ..نص البلد حزب وطني والباقي مقاطعين ..مين اللي هيقوم بالثورة الحزب؟؟؟

No Fear said...

السلام عليكم
ياسمين
كلنا ياريت نقف جنب بعض في محنتنا
يا مراكبي
يارب الثورة دي تيجي بسرعة علشان خلاص أنا تعبت
إسراء
قوليلي الحل أية طيب
يوسف
منورنا
مش هأحرمك من كتابتي متقلقش
saso
حمد لله علي السلامة
أنت اللي كتباه ده المفروض يكون بوست لوحد مش تعليق
أحلي حاجة في الشغل بتاعي إني بأروح و أرجع مش بشوف حد خالص غير البشر اللي معايا في الشغل و كلهم حاجة كده زي مجانس الحمد لله ربنا عافاني من الحاجات اللي قلتي عليها المشكلة في الخميس و الجمعة لما بخرج برجع مكتئب بضطر أقعد في البيت يوم السبت
ربنا يحلها من عنده علشان أنا شايف الحقيقة أن مالهاش حل