Friday, January 26, 2007

بسم الله الرحمن الرحيم
متي نحب؟
خطر علي ذهني هذا السؤال بعد ليلة عصيبة تعرضت فيها لإرتفاع درجة حرارتي فقررت عدم الذهاب للشغل لزيادة الإطمئنان و قد تم الشفاء الحمد لله
فعند إستيقاظي بصوا أنا بصراحة مش عارف أكمل بالعربي هأكتب عامية و خلاص ماشي
المهم صحيت و شربت مج النسكافيه السادة المعتبر وقفت أبص علي الناس في الشارع من الشباك في صباح شتوي جميل أعشقه الحقيقة
وجدت مجموعة من الشباب طلبه و طالبات يبدوا عليهم أنهم أولاد ناس محترمة و هم محترمين الحقيقة و تقريبا هم في ثانوية عامة و غالبا كانت بتبدأ بينهم ملامح صداقة أو مش صداقة علاقة ممكن تكون إعجاب بين كل و لد و بنت
تضايقت من هذا المنظر و قلت لنفسي لماذا يفعلون هذا لماذا يلعبوا أو يتسلوا مع بعض كده مش عارف
و بعدين قلت لنفسي أشمعني أنت و أنت في هذا السن كنت تحب و أة كنت لا تصرح و كنت تخاف من التصريح بهذا الحب ممكن يعني تكون عقدة نقص مش عارف المهم و أة كنت تعرف بعد كده أن الذي شعرت به ليس حب لكن كنت تشعر به فلماذا تحجر عليهم أنهم لا يحبوا و إزاي تعرف أصلا أنهم بيضحكوا علي بعض
بالمناسبة كل قصص الحب التي عشتها كانت من طرف واحد لخوفي من إظهار هذا الشعور للإنسانة التي أحبها ما عدا قصة واحدة أعترفت فيها و ياريتني ما عملت كده و لم أجعلها تستمر أكتر من شهر تقريبا المهم
مش عارف إجابة السؤال الحقيقة متي نحب؟ هل هو الحب الذي يأتي كما يقولون أم يجب أن نحكم العقل أم يجب أن نبدأ هذا الحب إلا عندما يكون هناك شئ ممكن تحقيقه من هذا الحب أنا في رأي أن قصص الحب تزدهر بعد الزواج اكـتر و أكتر و يكون الزواج بداية جديدة للحب الحقيقة في ناس بتقول مش لازم نتزوج الذي نحبه مش فاهم إزاي الحقيقة
و في سؤال تاني عندما نحب و نفشل و نعود نحب من جديد هل نخبر الحبيب الجديد بالقصة القديمة و ما شعرنا به أم لا؟
و كيف نجعل القصة القديمة لا تؤثر علينا في الحب الجديد ؟
و كيف إذا لم نتزوج من أحببناه لا يظهر لنا شبحه في المستقبل بعد الزواج من حد تاني؟
بس كده

14 comments:

nor said...

ياللصدف السعيده أغيب أغيب ثم يتاح لي يكون ردي على بوستك هو الأول.....
والله الموضوع ده باين عليه ملوش حل ممنطق يمكن السير عليه أعتقد الظروف اللي بتحكم كل موضوع على حده هي اللي بتحدده
بالنسبة للي انت شفته أنا أكيد هيكون لي رفض داخلي منبعه معتقداتي.. لكن بالتأكيد تعليقي سيشوبه الكثير من الغل" موضوع كده إذا لم أسقى... فلا نزل المطر" يعني ذي ماانت قلت "من قلة حيلك يازعر" لأصلي المشكله لما الواحد بيكون هيمان مابيمزش الصورة كويس وربما بتاخده مشاعر المراهقة المندفعه بس المشكلة اننا مازلنا في نفس المرحلة لظروفنا الاقتصادية عشان كده حكمنا كمان دلوقتي جائر حبتين.
بالنسبة تقول ولا متقولش .. انا شايف ان الواحد بيبقى مكشوف الناحية التانية وخاصة لو كانواقع فعلاً لششته وكفايه كده .. يتكلم لو في اديه يغير الواقع لشيء أفضل لكن لو غير كده يبقى من الأفضل انه ميعطلش حياته وحياتها بمغامرة غير محسوبة" على نسق مغامرة حسن نصر الله مع اسرائيل... كما أكد ناطق رسمي من الحكومة" وانت الجوز هتدفع الثمن بالكثير من التعطيل الأحمق.!!
اشتقتلك ... سلامي

Unknown said...

إنت بدأت الاول بالفصحى .. كملت عامى .. وبعدين رجعت للفصحى تانى
تنوع برده مش مشكلة
بالنسبة للأسئلة مش هعرف افيدك الصراحة
بس لما بشوف بتوع ثانوى وهما بيتصرفوا كدة دماغى بتلف ونفسى اقولهم مش واقته يا جماعة ركزوا فى المذاكرة يا جدعان
بس تقول لمين بقا وتعيد لمين ومين يسمع اصلا
عمار يا مصر

albida said...

اجابتى واحدة على اسئلتك دى كلها..... مفيش حاجة اسمها حب أساسا


manal

بيجاسوس المصرى said...

اولا الف سلامة عليك
ثانيا يجب ان كل واحد منا يعترف بالحب حتى يظهره الى الناس جميعا و لا يفقد من يحب بسبب لحظة ضعف او انتظار
فاذا فقدنا حبنا فما علينا الاان نجعله فى ماضينا نقلب صفحاته الجميله و لا يكون قوة تأثير ليضعفنا

يا مراكبي said...

إحم إحم

أولا .. فيه حالات حب بتفضى إلى .. زواج .. مش كل الحب بيبقى فاشل .. ده مش قاعدة زي ما الناس فاكرة

ثانيا .. الحب المتبادل بيحس بيه الطرفين حتى لو بدون تصريح .. والإعتراف بالحب هايطلع طبيعي منك ساعتها .. الحب من طرف واحد ده إسمة إعجاب

ثالثا .. الحب اللي بييجي بعد الجواز .. إذا جه إن شاء الله .. بيكون إسمه المودة والرحمة .. وده أكبر وأشمل من الحب العادي لأنه مابيتغيرش بتغير الظروف والشكل والإمكانيات .. إلخ

رابعا .. الإعتراف بالماضي للطرف الآخر مش كل الناس بتهتم بيه .. فيه ناس يهمها جدا إنها تعرف ماضي الطرف الآخر وفيه ناس بتهتم بمستقبل العلاقة بس .. لو الطرف الآخر مهتم بكده يبقى لازم يعرف كل اللي فات

خامسا .. الإخلاص مع الشريك الجديد عمره ما هايسمح بأي شبح من الماضي إنه ييجي في المستقبل

تحياتي

sarah la tulipe rose said...

مممم و الله الموضوع دة نسبي
لان المشاعر نسبية بين فرد و اخر و محدش يقدر يحكم علي مشاعر الي قدامه اذا كانت زايفة و لا لا لانه مش في مكانه
الموضوع فعلا يحير

عماد رفعت said...

بنحب لما المهمه تصبح مستحيله علينا او صعبه فساعتها نحب الوصول الي هذا الشيء الصعب
الانسان مايل الي الصعب والغامض وعشان كده نصيحتي الا من يحب ان تبقي شيء غامض في حياتك او لاتعطي كل شيء لمن تحب لان مجرد احساسه انه عرف ونال كل شيء ستصبح سهلا وبالتالي فسيسعي للوصول لما هو صعب

L M A R said...

مساء الخير

الحب ياسيدي مخلوق حيء
وعايش بينك
وجنبك
وفيك
ومش محتاج عشان تشوفوا
وتلمسه
وينام بحضنك
غير انك تكون اكثر
وضوح
وصدق
وبرائة



تحياتى

.العَبدِالرَحَمن

No Fear said...

السلام عليكم
للأسف معظم تعليقاتكم محبطة بس مش مشكلة بردو منورين
nor
حمدلله علي السلامة منور و الله ياريت الواحد يتأكد أنه مكشوف و خلاص الفكرة الطرف التاني ممكن يستحمل معاك الحالة الإقتصادية لأي مدي

إنسانة
معلش الفصحي عندي مكسرة شوية الله يسامح مدرسين العربي أو مش العربي كل المواد الحقيقة المهم
أنا كمان بصراحة باكون متضايق بس بجد أنا أحيانا كنت زيهم بس جبني هو اللي منعني لذلك مش بتضايق من بعض الحالات اللي شكلها بيكون محترم علشان في حاجات مش محترمة خالص في السن ده

البيدا
علي قد ما إجابتك بسيطة الرد عليها ممكن يطول إزاي مفيش حب لا أكيد في حب بس الفكرة إنننا مش بنقدر نلاقيه أو المشكلة إننا بندور عليه بس مش بنفكر غير فيه كانه هو الهدف الوحيد في الحياة بالرغم من إننا مش ممكن نعمل أي شئ علشان يجي هو بيجي لوحده أو هم بيقولوا كده
و كمان إزاي مفيش حب لا في فيه بجد مش تهريج حب الله و الوالدين و حب الخير مش كل ده حب هو نوع مختلف بس في حب

pegasuselmasry
أولا الله يسلمك ثانيا مين بيجاسوس ده معلش محسوبك جاهل شوية هو ده شخصية شهيرة في قصة يعني و لا من وحي الخيال
ثالثا مش موافق معاك لازم نفكر شوية
التسرع ده أغبي شئ في الدنيا بتفكرني بنفسي لما أتسرعت و للعلم كان زي اليومين دول هجري

الأستاذ المراكبي
أقولك أية الكبير كبير بجد

سارة زهرة التيوليب
جبتك يا عبدالمعين تعيني .....

وله نهاية
منور المدونة المتواضعة بتاعتي
نصيحة مهمة بجد غن شاء الله هاعمل بها بس الأقي اللي أحبه الأول و مش هأقوله علي حاجات كتير بس يجي

العبد الرحمن
و الله هاحاول و يارب أحس به كده
بس علي فكرة شكلك شاعر عبقري
الحب بيعيش بينا الله عليك

dandana said...

انا دخلت هنا مية مرة ....عشان اعلق ...
بس بصراحة ماعنديش رد واحد طبيعى ...
يعنى لو اتكلمت هتلاقى كله تهييس....

بس اعتقد ان اللى قال انه مافيش حب اصلا غلطان جدا بالثلث...

مش عارفة لو انت بتحب ممكن تنسى ازاى...يعى اعتقد انك لو سيبت اللى بتحبه مستحيل هاتنساه....بشكل او بأخر هايفضل جوا ذكرياتك....

احسان عبد القدوس قال ان الحب الاول هو الحب الاخير....او حاجة شبه كدا مش فاكرة النص...
يعنى ممكن يكون يقصد ان اول حب فى حياتك هو اللى هايفضل حب على طول...
وممكن يكون يقصد ان اخر حب اللى ي}دى فى النهاية للجواز او حتى اللى بيج بعد الجواز هو اللى يبقى حب حياتك لدرجة انك هاتعتبره اول حب كانك ماحبتش تانى....
كل واحد هايفسرها على حسب نظرته وتجربته....

بس ...دا اللى جه على بالى اقوله

إنسان || Human said...

أولا عايز أرد على منال ألبيدا ...إزاي مفيش حب أنا مش معاكي خالص ..لولا الحب ما وجدنا ...أما عن بتوع الثانوي سيبهم ياعمي يجربوا ..يقعوا ويقفوا تاني ويتعلمو ...الحب هو أعقد من نناقشه في بوست واحد ولكن ملخص الموضوع هو ان لا تنتظر الحب ولكن هو سيأتي ..وشكرا

يا مراكبي said...

I have two tags today, I recommended you to be the next for both of them. Please see them, thanks.

We2am said...

3gbny comment el marakby..3ndo 7a2..t2reban nfs elle kont ha2olo..mt32dsh el donia enta bs..w 2ool ya baset tla2eha haset :D

baby me said...

الحب احلى حاجة في الدنيا بس المهم انه يكون للي يقدره و يعرف قيمته
و دايما الواحد لما يكون عايش جوه الحب دة بيكون فاكر ساعتها ان دي اول حاجة و اخر حاجة في حياته
و بيحس انه هيموت من غير الي بيحبه بس لما الوقت بيعدي و ربنا بيديله حاجة احسن بيعرف ليه ربنا موفقوش مع الحب الاول و بيضحك على اللي كان بيعمله في نفسه
الاهم من الحب الاحترام و التقدير و الاهم من دة كله ان الواحد يتقي ربنا في الانسان اللي بيحبه
بالنسب للاعتراف للشريك الجديد بالحب القديم بالنسبة للولد انه يعترف متهيالي مفيهاش مشكلة كيبرة براحته ممكن يقول و ممكن لا حسب تقبل البنت او اهتمامها انها تعرف ماضيه او لا
بس البنت اعتقد صعب تحكي بسسب نظرة الولد
مع اني مش فاهمة ايه اللي يقلل من قيمة البنت لو حبت مرة و محصلش نصيب اكيد مش هتنتحر بعدها يعني
انا عن نفسي
نفسي انشاءلله احكى للانسان اللي هرتبط به اي حاجة حصلتلي
لان مش دنب البنت انها حبت حد و ربنا موفقهاش
لازم تكمل حياتها مع حد تاني
نفسي اقدر احكي للانسان دة عشان بس يقدر مشاعري و يحافظ عليها و متجرحش تاني
بس لو بقى خايفة اخسرة بسبب كدة للاسف هضطر مقولوش
الحب من طرف واحد عداب كبير اوي
احلى حب في الدنيا اللي بيحس به الاتنين مع بعض و الاحلى لو اتجوزوا و فضل الحب دة بعد الجواز