Friday, January 19, 2007

بسم الله الرحمن الرحيم
السلام عليكم و رحمة الله و بركاته
أزيكم أخباركم أية ؟
كله تمام إن شاء الله
يارب يوفق كل المدونين الممتحنين و اللي مش ممتحنين كمان
أنا أسف علشان منفذتيش كلامي بزيارة ألف مدونة في اليوم لأني أكتشفت أن ده ممكن يكون غلط فعلا علي رأي الناس اللي علقت علي الموضوع ده
و كمان الظروف اللي كنت متضايق منها الحمد لله أنتهت - يارب تكون أنتهت خالص يعني أنتهت و لا أية؟
الحمد لله
علي فكرة الكلمة دي جميلة قوي حاولوا تكرروها كتير بجد مش تهريج
السنة دي جميلة حتي الأن و يارب تستمر و إن شاء الله هأجتهد في كل حياتي العملية و الإجتماعية و كله إن شاء الله
المشكلة بس ساعات بأكون و الله ماشي في الشارع كده من غير أي حاجة بحس بضيق رهيب مش عارف من أية و تلاقي بعدها علي طول كم حاجة تزود الخوف و القلق و الضيق و الحقد ده مش عارف ليه
بس الحمد لله بتروح علي طول بس أنا نفسي الموضوع ده ميجيش تاني علشان ساعات بتكلم مع نفسي بطريقة سيئة جدا و باكون مخنوق من حياتي لدرجة كبيرة
أصدقائي عاوزين نساعد بعض بأي طريقة مش عارف أية هي الحقيقة بس لو حد يعرف يقترح
الحمد لله صديقي الله يسامحه صلحت علاقتي معه مرة تانية يارب يخلي عنده دم و ميكنش لسه زعلان و أنا مش زعلان
يارب نكون صحاب علي طول
اللغة اللي بتعلمها دلوقتي بأعاني فيها شوية و الحمد لله أتعلمت السواقة مش بإحتراف يعني بس بداية مقبولة
بأحاول أجتهد في الشغل إلي أن يرزقني الله بشغل أحبه علشان كمان الواحد بيبص لصحابي اللي لسه ما أشتغلوش و بيقول الحمد لله
مش قلتلكم الحمد لله كلمة حلوة قوي
اللي بيتعبني كمان دلوقتي قوي حال الناس و تعاملهم مع بعض بكل الصفات السيئة مش عارف ليه و أية الفايدة من كده مش عارف
ده زي ما بيقولوا الكفن مفيهوش جيوب يعني
بس بردوا الحمد لله و واثق فيك يارب و منتظرفرجك و الفرحة الكبيرة و التغير الكبير اللي أنت شايله لي و أنا كمان مش هأسكت و أجتهد
في كمان موضوع مش عاوز يسيبني شوية موضوع الجواز مش عارف أتجوز و لا لا بالرغم من إني واخد القرار و موصي ناس تساعدني علي تنفيذه و هو عدم الجواز خلال الفترة دي المشكلة أنه ساعات بيكون نفسي أتجوز بس بردوا الحمد لله
أستفسارات
لو حد عنده معرفة إقتصادية أو يعرف موقع إقتصادي يقدم بشرح مبسط المفاهيم الإقتصادية ياريت يقولي عليه أنا مش عاوز أكون خبير بس أفهم اللي بيتقال ده معناه أية
لو حد يعرف التغييرات الدستورية اللي بيتكلموا عنها كلها ياريت يقولها
أنا خطي سئ جدا عربي و إنجليزي لو حد يعرف طريقه لتحسينه ياريت يقول
مبروووك لكل الأهلوية الدوري علشان تعرفوا عندي روح رياضية بس علي فكرة اللي باقي من الدوري هيكون رخم جدا
الله يسامح ممدوح عباس علي غلطته في حق الزمالك أقصد عبد الظاهر السقا
تمام كده في حاجة تاني
لا
يارب أشوفكم علي خير دايما و متفوقين و بنحب البلد المظلومة دي
سلام
و إلي لقاء قريب إن شاء الله

17 comments:

raspoutine said...

ايه ياااااااا عم انت حسستنى انى راكب مترو الانفاق مالك بتجرى كده ليه يا عم واحده واحده واحنا كلنا جنبك واصحابك وهنقف جنب بعض ومتقلقش من موضوع الجواز ده
كله بأوانه وبعدين دستور ايه يعنى ايه الكلمه دى انجليزى دى يا مرسى
وشكرا لتحيتك للاهلويه وبعدين خد اميلى من البلوج واكيد هبقى كسبت صاحب وصديق كويس
وقلل السرعه شويه واقف فى المحطات ومتعديهاش

King A.S.R said...

سيبك من الحوار دا كله مش مشكله ....اهم حاجة
لو حد قلك علي طريقه تحسن بيها خطك ابأ قولي عليها ضروري :)

عارف ايه الي عاجبني في الكتابه علي الكومبيوتر .. اني بستخدم لوحه مفاتيح مش القلم ..اصل لو القلم كنت ممكن حد يشتمني والله

Unknown said...

الإقتصاد ده ملعبى
ههههههه
لا بجد انا تخصصى إقتصاد بس مش عارفة إنت عاوز تعرف انهى مفاهيم بالظبط
عشان الاقتصاد فروعه كتيرة
فى الاقتصاد الجزئى والكلى والمالى والدولى دراسات الجدوى والمالية العامة
فهمنى بس إنت عاوز انهى مفاهيم وعاوزهم بالعربى ولا بالإنجليزى وإن شاء الله اجيبلك مواقع تفيدك
وربنا يصلح حالك وحال الجميع يااااااارب
سلام عليكم

Amr Ahmed said...

مساء الجمال

يا راجل دستور مين
مش اسمه تعديل

اسمه تفصيل

عند ترزي يعني

الله يبارك فيك علي الدوري

ماهو ده الطبيعي يا صاحبي

ولو عرفت حاجة لتحسين الخط قوللي

تحياتي

mariam said...

الحمد لله انك صالحت صاحبك
و بالنسبه للسواقه متقلقش فى الاول بس بتبقى متوتر بعد كده خلاص
بالنسبه للتعديلات للأسف ممنهاش فايده و متتعبش نفسك اللى عايزينه هيعملوه
بس اهم حاجه انهم هيلغوا او شبه يلغوا اشراف القضاه على الانتخابات
تحياتى

يا مراكبي said...

بس .. إنت جيت للي هايفيدك .. أخوك مهندس ودارس إقتصاد ومحاسبة .. إنت قول لي بس إيه الكلمة اللي عايز تعرف معناها وانا هأسأل واحد بيفهم وأجاوبك على طول

No Fear said...

السلام عليكم
أصدقائي الأحباء
راسبوتين
أنت لو قرايت البوستات اللي قبل كده هتفهم أنا ليه بجري لو مش فاضي أقولك
أنا حاسس إن فاتني حاجات كتير فعاوز ألحق أعمل حاجات كتير هتقولي غلط هقولك عارف بس مش قادر مجريش
نورتني

كينج
متقلقش لو حد قالي هأقولك
نورت

هيومان
أنا مش عاوز الكلام الكبير ده
انا عاوز مثلا يعني عجز الموازنة تعني أية من بعيد مش بالتفاصيل الدقيقة أو مثلا التضخم أية هو و بيعمل أية في كلمتين و هكذا يعني
ياريت لو عربي علشان يكون أوضح
شكرا للإهتمام

عمرو أحمد
مش هأكلمك علشان صورة الرجل المحترم اللي أنت مستخدمها بس الدوري للزمالك السنة الجاية إن شاء الله
يعني نعرف بس الدستور أية هوة و هم هيغيروا أية أنا متأكد أنه تفصيل يس بردو العلم بشئ واجب
هأبقي أقولك لو حد قالي أحسن خطي إزاي


مانو
ربنا يخليكي ليا كده و تشجعيني دايما
أنا عارف إن اللي هيعملوه هيعملوه بس عاوز أعرف هيعملوا أية علشان أجهز

الأستاذ المراكبي
أنا قلت اللي عاوزة عند هيومان ممكن تفهم انا عاوز أية
مجبتيش سيرة الأهلي اللي مستواه في النازل و دايما كده يارب
أنتظروا الزمالك الموسم القادم إن شاء الله
شكرا لزيارتك

شكرا جزيلا لكم جميعا بجد بتنوروني في المدونة المتواضعة بتاعتي
بحس إن ليا صحاب كتيييييير كويسين و محترمين
كل سنة و أنتم جميعا بخير بمناسبة رأس السنة الهجرية و يارب تكون سنة الخير علينا جميعا إن شاء الله
سلام

Unknown said...
This comment has been removed by the author.
Unknown said...

حاولت اكتب التعريفات هنا والينكات بس المكان مكفاش خالص فبعت إيميل على الايميل اللى موجود هنا فى المدونة ..مش عارفة وصل ولا لا

يا مراكبي said...

بالبلدي كدة

الموازنة هي التوقع المالي بتاعنا
للسنة الجاية .. يعني

نحسب الأول تقريبا إيه الفلوس اللي هاتجيلنا السنة الجاية من إنتاج وتصدير وسياحة وقناة سويس وضرائب وجمارك .. إلخ

ونحسب إيه المصاريف اللي ورانا السنة الجاية من مرتبات وديون ومشاريع ضرورية زي محطات الكهربا وسنترلات التليفون وأي إنشاءات جديدة محتاجينها .. إلخ

لو الدخل أعلى من المصروفات يبقى عندنا فائض

لو الدخل أقل من المصروفات يبقى عندنا عجز ولا مؤاخذة .. ولازم ساعتها نشحت الفرق اللي معجز معانا ده .. ومن هنا بتيدأ الديون الخارجية

يا مراكبي said...

الفرق بين كلمتين: الموازنة والميزانية هو

الموازنة هو التوقع المالي للسنة الجاية

الميزانية هي الموقف المالي اللي حصل فعلا في آخر السنة

يا مراكبي said...

أما التضخم بقى و بالبلدي برضة فهو النسبة اللي بتقل بيها القوة الشرائية للعملة

يعني لو كنت السنة اللي فاتت بتشتري قلم بجنيه - الله يرحمة - والسنة دي لقيته بقى بجنيه وعشرة قروش يبقى فيه تضخم 10 في المائة وهكذا

لو النمو الإقتصادي أقل من التضخم يبقى مصيبة

وفي النهاية يسعدني إني أقول إن إحنا عندنا عجز في الموازنة والميزانية وتضخم وتباطؤ نمو إقتصادي وكل حاجة جميلة

وشكرا

albida said...

بجد فرحت جدا أنك صالحت صحبك وأنك بقيت كويس والحمدلله دلوقتى
:)
لحظات الضيق اللى بتجلنا دى طبيعية جدا.. والهدف منها هو تقريبنا من ربنا مش اكتر

مبروك للأهلى.. بيب بيب.. أهلى
هههههههه

manal

No Fear said...

السلام عليكم
هيومان
شكرا جدا علي إهتمامك و شكرا علي الإيميل
الأستاذ المراكبي
شكر علي شرحك المفيد

بس أنا لسه عاوز الباقي مثلا الناتج القومي و الدخل القومي و هكذا كل التعريفات مش اللي بكتبهم بس

أنا سعيد جدا بإهتمامكم بجد

البيدا
الدنيا بجد مش متاهلة حد يزعل من حد بس ساعات الواحد بيكون مستني حاجة كبيرة من حد و مش بيلاقي اللي متوقعة ممكن يكون غلط مني أنا اللي بفكر في حاجة زيادة عن حقي كصديق
بس الحمد لله بأرجع أفوق تاني
و الحمد لله علي كل شئ

ماشي أنه أخر موسم في زمن الأهلي
أنتظروا الزمالك إن شاء الله الموسم القادم

سلام

No Fear said...

معلش ملحوظة

الناس اللي بتسأل علي تحسين الخط
أحدث ما وصل لنا من معلومات
أكتبوا كتير بتركيز و ياريت تحاولوا تقلدوا خط حلو
و الله أعلم

albida said...

أنا جيت أقولك على فيلم
blood diamond
اللى انت سألتنى عليه
هو هينزل فى مصر يوم 31 يناير... وبالنسبة اذا كان كويس ولا وحش فأنا مش متاكدة قوى لأنى مش بحكم على حاجة الا لما اشوفها
على العموم هو شكله حلو من الاعلانات كمان أنه محقق دلوقتى بره اكتر من 20 مليون.. وواخد تقييم تقريبا 8 من 10... يعنى مش بطال
لو روحته هاجى اقولك رأيى فيه


وبالنسبة للدنيا.. فأنت عندك حق!! احنا مش لازم نتظر اى حاجة من اى حد لا كبيرة ولا صغيرة مهما عملنا للحد ده... أهم حاجة نكون راضيين عن نفسنا ونحس ان ربنا راضى عنا
:)

manal

Carmen said...

ألا بذكر الله تطمئن القلوب


يااااااااه


اخيرا دخلت لقيتك مبسوط ومتصالح مع نفسك ومع الحياة


دى حاجة كويسة جدا

واحييك على انك ابتديت تطور فى نفسك وفى مهاراتك

دى خطوة جميلة قوى وربنا يوفقك فيها

والله يبارك فيك عالدورى

تحياتى ليك