Saturday, January 13, 2007

بسم الله الرحمن الرحيم
السلام عليكم و رحمة الله و بركاته
معلش هأصدعكم بكلامي أنا مش متعود أكتب أكتر من بوست في اليوم المهم اللي عاوز يقرأ أهلا و سهلا و اللي مش عاوز براحته طبعا كفاية أنه وصل هنا
المهم
مش عارف أقول اية
أنا أكتشفت مؤخرا أن فيه صفة كمان أتضح لي أنها موجودة فيا مكنتش واخد بالي منها خالص هي بعيد عنكم جميعا الغباء مش عارف إزاي وصل بيا الحال إن أنا مش بفهم خالص اليومين دول أنا كنت حاسس إن دماغي فعلا بدأت تصدأ بعد الكلية لذلك أخذت القرار العجيب إني أكمل دراسة بس مكنتش متصور أن ده هيحصل في الحياة العادية انا أصبحت الناس تقولي الكلام كده و أنا مش عارف مش بفهم ليه أو يمكن مش عاوز افهم و لا ممكن ده يكون سبب القعدة أمام الكمبيوتر و النت كتير مش عارف متخافوش مش هأخد القرار اللي كل مدونة تلاقي خمسة كاتبن أنا مش هأدون تاني لأني بجد مش متخيل حياتي بدون تدوين التدوين ده شئ رائع و بجد اللي أبتكر الموضوع ده بصرف النظر عن أهدافه في التدوين ده و ده ممكن أتكلم عنه بعدين بس أنا سعيد بالفكرة قوي جميل جدا أن في حد يشاركك حلمك و كلامك و أحلامك بدون أدني سبب للمشاركة و التشجيع فقط بصرف النظر عن المواهب بجد اللي الواحد بيشوفها في عالم التدوين المهم مش عاوز أخرج عن موضوع الغباء اللي أنا فيه مش عارف ده من أية
الغباء هل هو قدر و لا جهل و لا ممكن يكون الواحد بيتعمد بس أنا مش متخيل إني ممكن أكون متعمد لأني في موضوعات نفسي أنساها و مفكرش فيها زي كتير من صحابي عايشين و خلاص يسلام لو أوصل للمرحلة دي يبقي ربنا راضي عني أروح الشغل أرجع أكل و أتفرج علي التلفزيون و خلاص بعد كم سنة أتجوز و أعيش كده أنتخة و خلاص
مع إني عارف أن ده مش هيحصل و أنا مش هأكون مبسوط لو حصل الحقيقة
نفسي أكون إيجابي الإيجابية دي أجمل شئ في الدنيا هي بالرغم من المشاكل اللي ممكن تسببها بس هي حلوة قوي
و يااه لو أكون أديب و لا شاعر زي الناس اللي مش عارف هي مش مشهورة ليه في البلد الغريبة دي و بشوفها هنا
بس الحمد لله علي كل شئ أنا عارف أنكم مش فاهمين أنا كاتب البوست ليه بس أنا عارف و متزعلوش مني البوست ده لنفسي مش ضروري يعني تعلقوا لو مش لاقين حاجة تكتبوها
بس الغباء دي شئ صعب الحقيقة
و بما إني داخل كمان علي دور وحدة رهيب فممكن تجدوني أكتب شوية بوستات في اليوم مش بوست و لا أتنين أنا هأعمل عكس كل الناس اللي بتعتزل التدوين أنا هادمن التدوين بس إدمان حميد إن شاء الله
و مش هأكون سلبي أو أدعو ربنا إني مكنش سلبي و هأعمل علي كده إن شاء الله و هأقضيها فترة كده نت كتيرررر
و إحتمال تلاقوني زاير بتاع ألف مدونة يوميا يمكن الواحد يلاقي طريقة في الحياة في مدونة من المدونات المحترمة اللي بدخلها
محدش يقلق و يقول كده غلط أو مش حل انا عارف أنا هأعمل أية إن شاء الله متخافوش
بس أنا بأدعي ربنا و أحمده علي كل نعمه اللي نعمها علي
بس الغريب إن نفسي أعيط قوي مش عارف أنا كان سهل علي من كم سنة إني أعيط مع نفسي طبعا بس دلوقتي بحس بالدموع محبوسة في عيني و مش عاوزة تنزل مش عارف ليه
يمكن علشان مفيش سبب طيب هي أتجمعت في عيني ليه من الأول مش عارف و لا ممكن عيني تكون تعبانة مش عارف بردو
مش عارف دي كلمة رخمة قوي كتير بكررها
هأحاول أبطلها إن شاء الله
أقول لكم أية كمان كفاية كده
و لو في جديد و أكيد هيكون في هأكتب لكم علي طول
بس أنتم متزهقوش و لو حتي زهقتم أهوه بردو هأكتب و اللي مش عاوز يقرأ ممكن ميكلفش نفسه و يدخل هنا بس بجد أنا كل اللي بأقوله ده جوايا و ياريت لو في حد حاسس أنه ممكن يفيدني ميبخلش عني بأي نصيحة
سلام

14 comments:

يا مراكبي said...

إقرأ القرآن .. ألا بذكر الله تطمئن القلوب

rony said...

اعتقد ان البوست ده ردك على كلامنا اللى كنت المفروض بتفكر فيه وانا يعنى مستنيه ردك وكده واعتقد ان هو ده "دور وحده رهيب " ده غير كلامك الاعجب النهاره او امبارح بمعنى اصح عموما ياريت تخلى بالك من نفسك وربنا يكرمك بصديق احسن ان شاء الله يعوضك عن غبائى فى صداقتنا وتفانيك فيها

albida said...

كونك حاسس أنك عايز تعمل حاجة.. فصدقنى دى ايجابية فى حد ذاتها
شوف ايه أحسن حاجة بتعملها وحاول طور نفسك فيها أكتر وأكتر.. مش شرط يكون شعر أو رسم أو تدوين ومش شرط كمان أنك تأثر بيها على الناس بطريقة مباشرة, لأن تأثيرها على نفسك ممكن يخليك مثال الناس تقتدى بيه... وربنا يوفقك يارب

وبالنسبة للغباء فمتقلقش!! الظاهر أنها عدوى منتشرة فى البلد
هههههه

تحياتى

manal

Unknown said...

فى مقولة قريتها قبل كدة واعتقد ممكن تفيدك
من نذر نفسه ليعيش لدينه سيعيش متعباً ولكنه سيحيا كبيراً ويموت كبيراً

اهم حاجة فى الايجابية إنها تبدأ من دلوقتى .. متتأجلش ولا لحظة
أما الغباء مهما كان هيبقى ارحم من خمس دقائق بس فى محاضرة دراسات الجدوى ... شعور رهيب بالغبااااااء لدرجة انى قعدت اعيط فى المحاضرة

حبة فلسفة بقا
اعتقد ان مافيش حاجة اسمها غباء .. كل الناس بتفهم ، بس بتفهم على طريقتها وعلى مزاجها
مافيش حد غبى

فضفض يااخى .. الفضفضة بتريح وربنا يصلحلنا جميعاً الحال
سلام عليكم

Amany said...

انت عارف ان ده حال كثير من الناس وخاصة احنا اللى تقريبا صغيرين فى السن
اتخرجنا واشتغلنا لكن ده مش كفاية لاحساسنا ان احنا جوانا طاقة كبيرة ومش عاريفين نستغلها صح

mariam said...

و لا يهمك اكتب زى ما انت عايز
و حاجه كويسه انك عايز تعمل حاجه زى ما قالت منال
على العموم ربنا يوفقك

Malk Almasria said...

اولا شكرا لزيارتك مدونتى ويارب بعودة

على فكرة مش انت بس الى حاسس بالمشاعر دى كلنا ساعات بنحسها لكن بنقول فى الاخر دى ازمه وانشاء الله تمر
بس المهم انك متسيبش نفسك للاحساس دة يسيطر عليك

بالتوفيق
وتحياتى

ملك المصرية

Unknown said...

اللي انت فيه حاله وهتعدي, لكن كونك تفكر في حل ليها وانك تكون عايز تكون ايجابي دي حاجه حلوه جدا وتفكير جميل.
ربنا معاك ويوفقك ويريح بالك(:

Memo said...

انا كملت عشان محبطكش بس و الله الغباء داء متفشي بنكتشفوا متأخر جدا استمر

elgharep said...

أنك تعمل حاجة مش مجرد أنك عايز لازم تكون على قناعة من اللى أنت ناوى تعمله
ونصيحة متعملش حاجة وأنت ملكش نفس تعملها
الغريب

albida said...

على فكرة عنوان البلوج بتاعى اتغير الى

albidalife.blogspot.com

manal

Unknown said...

انا عن نفسى التدوين فرق معايا كتير

بس انا ضد ادمان التدوين لانه باخدنا من عالم الواقع ومن الحياه الاجتماعبه و بعوضنا بدائل تانيه و علشان كده بعد فتره ممكن تلاقى نفسك من غير نشاطات من غير اصحاب و علشان كده انا مش عايز ادمنه او اديله اكتر من حقه
لازم برضه زى مايكون ليا دور على الكمبيوتر يكون ليا دور اكبر فى الحياه ووسط الناس

تحياتى

يا مراكبي said...

على فكرة .. الإسماعيلي إتغلب من إنبي .. علشان تبقى تصدقني

LAMIA MAHMOUD said...

بص يا سيدي انت عارف طريقك خلاص اشطة دوس

بس مش حساه طريق مشرق ده طريق مقفول حبتين يعني

اصلك حتفضل من مدونة لمدونة وداخل نفس كل واحد شوية

طيب ما تجرب تدخل نفسك شوية اكتر

وبعدين فين الف مدونة في اليوم دي اية ده انا مطلعتش واحد من الالف
نهار اسود:)