Wednesday, January 03, 2007

السلام عليكم
كل سنة و أنتم طيبين
مش عارف أبدأ البوست ده إزاي من القديم للجديد و لا من الجديد للقديم زي نشرات الأخبار
و مش عارف ليه جو نشرات الأخبار ده لذيذ معاي من البوست قبل اللي فات المهم
أنا صحيت علشان عندي ورق للشغل المفروض يتذاكر المهم كنت عاوز أصحي الساعة 9 بالليل بعد محاولات مضنية من ماما و أختي وأنا شخصيا قمت علي الساعة 1و نص بالليل
الحمد لله إني قمت أصلا في البرد ده
المهم جهزت جو المذاكرة بتاع زمان و سمعت أسامة منير قدرا علي نجوم إف إم أنا بصراحة مش بحب البرنامج ده بس بحب أسمعه و محدش يزعل مني ساعات بضحك جدا في البرنامج ده من القصص و الحكايات الغريبة اللي بسمعها محدش يزعل كل واحد له رأية و الإختلاف في الرأي لا يفسد للود قضية
بس بعد البرنامج شغلت فيروز علي حليم
و الحقيقة كل حاجة بالليل لها جو مختلف حتي إذاعة القران الكريم من الساعة 12 بالليل لها جو غريب
أسمعوا كده برنامج قطوف من حدائق الإيمان خصوصا حلقات الأستاذ شحاته العرابي و لا برنامج المستغفرون بالأسحار
المهم كنت بسمع البرامج دي أيام المذاكرة و يارب ترجع تاني و أذاكر
المهم جو الليل ده جو لازم يكئبك أو يخليك تخاف من المستقبل انا الحمد لله مؤمن و كل حاجة بس مش عارف خايف من المستقبل
يعني مثلا مش عارف قلتلكم و لالا
أنا كنت في تمهيدي السنة دي و فشلت و هأغير الجامعة اللي كنت فيها و مش عارف الجامعة التانية دي هتقبلني و لا لا السنة الجاية و لا ممكن تاخد من تقدير عالي و لا ظروف الحضور أية نظامها و مش عارف حاسس إني كبرت قوي و خلاص مفيش وقت للفشل و أي فشل تاني حاسس أنه النهاية و حتي لو جه عارف أنه مفيش نهاية للحياة بس بردو بخاف
و نفسي أسافر بره و مش عارف مؤهلاتي هتساعدني و لالا و هأنجح أزودها علشان تسهل لي السفر و لا لا
و مش هأكلمكم عن الموضوع الأزلي اللي بتكلم فيه دايما
مش عارف أعمل أية الحقيقة
جو رعب اللي أنا فيه يارب يكون في حد معايا
و تكون يارب أنت كمان معايا و تهديني و تثبت قلبي علي دينك و الثقة بك
نشرة الأخبار
مش عارف ليه مصر الطيبة الشعبية اللي كلها شعراء و مغنين محترمين مش بشوفها غير في الأفلام زي مثلا فيلم
خيانة مشروعة هو حلو بس تحس أن مصر اللي في الفيلم مش هي اللي أنا شخصيا عايش فيها خصوصا جو الأستاذ العبقري اللي بأعشقه إبراهيم عيسي
الزمالك اتغلب من الأهلي كما هو متوقع بس الحمد لله ملامح التغيير بدأت تهل
قضيت رأس السنة مع هاري بوتر 1 و 2كان نفسي أشوف الفيلم ده قوي
تاني يوم شفت إعادة الفيلم العبقري تيتانيك
و الله متفائل جدا الحمد لله الأيام دي و يارب يدوم التفاؤل ده
سمعت لواحد صاحبي سورة النبأ و أدعو لي أستمر في حفظ القرآن
مش عارف أنتم بتوحشوني جدا بجد
و أنا بحبكم كلكم و الله
سلام و تصبحوا علي خير

23 comments:

sherehan84 said...

أولا كل سنه وانت طيب
ثانيا بيب بيب أهلي بيب بيب أهلي
ثالثا خدها مني كلمه متخليش الفشل هو النهايه خليه دايما بداية النهايه اللي هتكون نجاح بإذن الله .. وللعلم بقى مفيش أحلى من فشل وراه فشل وراه فشل وراه نجاح ..بيبقى له طعم تاني .. ويا رب يرزقك دايما بالنجاح ..ولو سافرت بره ابقى خدني معاك :)))

mariam said...

لسه ادامك فرصه تعمل كل اللى انت عايزه
و محدش عارف الخير فين
ان شاء الله تتقبل فى الجامعه اللى انت عايزها
متقلقش و كله هيبقى تمام

مش عارفة ليه الناس بتكتئب بالليل مع انى بحبه اكتر من الصبح

و بعدين ليه مش عاجبك خيانه مشروعة
انا لسه مشفتوش بس عندى احساس انه حلو و خالد يوسف افلامه مختلفة و كمان بحب ابراهيم عيسى جدا
بس يمكن المشكله انه بيناقش شخصيات من طبقات عاليه قوى بس فى ناس قالولى ان مش كل الشخصيات عاليه قوى كدة
مش عارفة ايه الرغى دة كله
معلش طولت عليك

rony said...

رغى رغى رغى...ولما احنا نتكلم تبقى بطه بلدى...ماشى ماشى وماله
ياابنى افقد الامل فى الزمالك ده بقى ...مش والنبى لو كانوا عملوا كاس للخسرانين ولا دورى الفاشلين كان الزمالك استحق اللقب عن جداره
او الزمالك ده اخره اوى يهزم فريق اشبال كفر او طشت
يلا انا مالى اساسا
المهم حلو انت كده وكويس وبتسمع حاجات غريبه فى الراديو...بس اخص عليك مجبتش سيره ال بى بى سى عشقك وادمانك ليه والله كده ازعل
الف حمد لله على السلامه والف مبروك على سوره النبأوعقبال باقى القرأن ان شاء الله

No Fear said...

Sherehan 84
شكرا علي مرورك
ثانيا حق بصراحة للأهلي
هو النجاح بعد الفشل حلو بس مش فشل فشل فشل فشل فشل فشل هأزهقك كده عاوزين نجاح بقة
و هو قريب إن شاء الله
أكيد هأخدك معايا لو تحبي بس أدعي قوي بس و متقلقيش هأنسي أخدك معايا

Mano
شكرا علي مروك
يارب كل اللي قلتيه يتحقق
أنا بحب الليل جد بس المشكلة حاليا بيفكرني بأحاسيس حلوة كنت بحسها فيه زمان و هي مش موجودة دلوقتي بيقلب علي المواجع يعني
أنا عاجبني الفيلم جدا بس بقول جو مصر اللي في الفيلم جو القهاوي و إبراهيم عيسي اللي بأعشقه بجد مش موجود او مش عارف ألأقيه في مصر أندثر من زمان و قهاوي نجيب محفوظ و الحاجات دي مش موجودة كلها مسخ دلوقتي

روني
مش شكرا علي مرورك
بطة بلدي ماشي ماشي
و من أمتي أنت لك في الكورة طيب
الزمالك حديد بردو متقلقيش
و هيقوم من كبوته
و لكل حمار كبوة
زي ما أنا قلت في البوست صحيت الساعة واحدة و نص و أنت عارفة أن البي بي سي بتقفل الساعة 1 علشان كده مجبتيش سيرتها
و علي فكرة أنا مشغلها دلوقتي

sherif gharib said...

كل سنه و انت طيب يا زملكاوى
انا و الله كنت فرحان زيك كده فى التغيير اللى حصل للفرقه ده
نصيحه بقى حاول تشد حيلك شويه علشان تخلص
و يا ريت بلاش تسيب نفسك لحاله الاكتاب الليلى ديه علشان بتاخد الواحد لبعيد
اسال مجرب
تحياتى

يا مراكبي said...

عدنا

أنا طبعا وصلتني نتيجة المباراة وأنا راجع من مني لمكة وإستغربت إنها كانت 2 ل 1 بس .. يمكن علشان ما جاش في بالي أدعي للأهلي؟

المهم أنا عايز أقول لك حاجة من قبل ما أروح الحج .. باين على كتاباتك جدا كمية الحاجات الكتيرة اللي شغلاك ومخلية شكل الكتابة مش مركز .. يعني بتقول كمية كبيرة من الحاجات وبسرعة وكأنك بتجري ورا نفسك

يا عزيزى حاول تهدي نفسك .. كل حاجة بتاخد وقت علشان تستوي .. مش هاتعمل كل حاجة في نفس الوقت وإلا مش هايكون فيه إتقان في كل اللي بتعمله .. ولازم تعرف إن ما فيش حد بياخد كل حاجة زي ما كل الناس بتتمنى

أنا على فكرة مش بأنتقدك ولا قصدي أضايقك .. بس الأمانة تقتضي إني أنصحك وخصوصا إنك مشروع شخص ناجح وواعد بإذن الله

حاول تبدأ بتنظيم مواضيع البوستس اللي بتكتبها وخليها مركزة أكتر .. و بعدين طبق الموضوع ده في كل جوانب حياتك واحدة واحدة .. إن شاء الله ربنا يكرمك بالنجاح

ولو كلامي ضايقك إبقى قول لي وأنا أسحبه على طول

Amany said...

كل سنة وانت طيب
والدنيا ابسط من كده
وان شاء الله خير وتفائل واعمل اللى عليك وربنا ان شاء الله هيكرمك

واحد من الناس said...

كل سنه وانت طيب
ويارب السنه الحايه تقدر تحقك كل احلامك وتبطل خوف ورعب وترسى شويه
وتصبح على خير

No Fear said...

السلام عليكم
شريف غريب
و أنت طيب يا باشا
متقلقش حالة الأكتئاب زمنها ولي خلاص اليوم عمل و كفاح بجد مش تهريج
بس محتاج دعوات من القلب

الأستاذ المراكبي
أنا عمري ما أزعل من حد بينصحني
ثانيا كل اللي بتقوله حقيقي بس بجد أنا حاسس إني أستهرت و ضيعت وقت كتير علشان كده مستعجل و عاوز أعمل حاجات كتير عاوز أعوض اللي راح يعني
أنا فعلا بدات تنفيذ اللي بتقولي عليه بس مش في البوست في حفظ القرأن و يارب أقدر أنفذه في حياتي كلها
شكرا علي النصيحة

أماني
شكرا علي مروك
و أنت طيبة
مش عارف أنت ليه معتقدة إني شايل الهم ده أنا كده فل لو عندك وقت شوفي النكد السابق يعني بوستات اللي قبل كده بشوية هتعرفي إن أنا في فيلم كوميدي دلوقتي

واحد من الناس
و أنت طيب و بخير
ربنا يسمع منك
أرجوك الدعاء بجد

Unknown said...

والله الصحيان فى البرد ده يومياً بعيد عن السامعين كلهم عشان الامتحانات وبكالوريوس ولازم نركز
اما بالنسبة لعمو أسامة فده الطبيعى انه يضحك ، البرنامج ده بالنسبالى كوميدى من الدرجة الاولى
بس عجيبة ان المدونة اسمها
No Fear
وتبقى خايف ، أومال احنا نعمل ايه بس ، يلا الحمد لله على كل حال
أما بالنسبة للسفر برا تصدق إنى سهل أوى اسافر واعيش واشتغل برا لو حاولت ودورت بس المشكلة مش هينفع اسافر لوحدى
وطبعا طبعا طبعا مليون مبروك للأهلى واعتقد إنه كفاية اوى كدة للزمالك صبرنا عليه كتير ، والمفروض يتشال الفريق ده اصلا ، وعلى فكرة بنات خالتى حولوا من زمالك لأهلى:D

وطبعا الفيلم العجيب خيانة مشروعة اول ما شوفت اعلانه قلت كلمتى المشهورة : لو دفعولى فلوس عشان ادخل الفيلم ده هاخد الفلوس ومش هدخله برضه .. بجد باين اوى انه تمثيل مش حقيقة حتى الضرب شكله مقذذ ومش معقول أبداً
وأخيراً يارب يثبت الايمان فى قلبك ومش بس يثبت يزيد اللهم آمين

Anonymous said...

بعد كل سنة و أنت طيب ....

أنت خوفتنى من جو اليل بتاعك ده ..رغم أنه فيه حليم وفيروز ....و قران

ربنا يطمن قلبك .....ويقبلوك فى الجامعة التانية ...بس شد حيلك وربنا يعمل الفيه الخير .......

ذاكر الصبح ...بيقولوا أفيد
:)

DoOoOoOdY said...

الاول كل سنه وانت طيب
ويارب يريح بالك ويحققلك كل اللى انت عايزه وخليها على ربنا وكل حاجه هتتحل
وعلى رأى شيريهان بيب بيب بييييييييب اهلى

سلام

أجدع واحد في الشارع said...

أولا كل سنه وانت طيب
مع انها جت متأخرة اوى

بس معلش

ليه انت بتفكر كده

ليه ميكنش الفشل نقطة البداية

ليه احنا كلنا بنستعجل فى كل حاجة


ها ؟؟

No Fear said...

السلام عليكم
Human
شكرا علي الزيارة
مبرووك للأهلي الحق حق يعني
يمكن مسمي المدونة كده بتمني ميكنش في خوف اللي هو موجود
أيوة كده أدعي لي علي طول ربنا يكرمك

Noran
شكرا علي الزيارة الجميلة
و أنت طيبة
يارب يسمع منك الدعاء الجميل ده
مش بعرف أذاكر الصبح ثانيا مش هينفع كمان دلوقتي علشان الشغل

Dody
أنت أصبحتي زائرة دائمة يارب دايما
و أنت طيبة و بألف خير يارب
ربنا يسمع منك
ماشي بيييب أهلي بس مش كتير إن شاء الله هنري هيظبط إن شاء الله

أجدع واحد في البلوجات كلها
شكرا علي الزيارة بعد الغيبة
أنا ناوي أجعل الفشل نقطة إنطلاقة بس المشكلة الفشل كتير اليومين دول بس إن شاء الله لا يأس و لا خوف

albida said...

كل سنة وأنت طيب وبصحة وخير وتحقق اللى أنت نفسك فيه أن شاء الله

أنا حظى حلو أن ده أول بوست أقرائه ليك... حسيت أنك أنسان كويس أوى
:)

أسامة منير ايه بس؟!! حد يذاكر على أسامة منير؟.. ده اخره يكفنوا عليه الميتين
هههههههه
بجد بيستفزنى جدا... عندك حق والله! الناس اللى بتكلمه بيضحكوا أوى

وبالنسبة للماتش... بلاش نتكلم فى السياسة
:)

والله أنا فيه أصحابى راحوا فيلم خيانة مشروعة ده وقالولى أنه حلو بس هكس حبتين... يعنى البوليس بتاعنا مش بالصورة اللى هما عاملينها دى خالص!! الظاهر اتعدوا من أفلام جيمس بوند

أما عن الأفلام الأجنبى.. فتقريبا مقدرش أعيش من غيرها!! عندك حق
Titanc
من الأفلام اللى مهما الواحد شافها ما يزهقش منها... خصوصا أنى بعشق تمثيل
Billy Zane
فى الفيلم ده

عجبنى اوى كمان اعتمادك على ربنا!! طول ما أنت بتعمل اللى عليك وضميرك مرتاح.. بجد حط فى بطنك عربية بطيخ, لأن الله لا يضيع أجر من أحسن عملا.. حتى لو موفقكش للحاجة اللى أنت فيها دلوقتى اكيد هيعوضهالك فى حاجة تانية

يا خبر!! ايه الرغى ده كله؟ بقى أول زيارة ليا وأصدعك كده؟... معلش بقى, هبقى احط على بقى بلستر المرة اللى جاية
:) :)

manal

No Fear said...

السلام عليكم
منال
نورتي المدونة
ميهمكيش أتكلمي براحتك خالص
أنا عامل المدونة علشان حضراتكم يعني
مين بقة billy zane معلش معرفش غير الناس السهلة
المهم
متقلقيش
أنا أخدت حقي في الكلام في مدونتك انا كمان
شكرا علي مرورك
سلام

L M A R said...

مساء الخير
وكل سنة وانتا طيب
وربنا يحقق كل الإي تتمناه ويارب لو في مخك فكرة انك تدرس برا يكون اجمل جدا
وبالتوفيق

.العَبدِالرَحَمن

smraa alnil said...

بص بقي
مش عارفة اقولك ايه
بس انت طبيعي يا ابني والله
الحال من بعضه
انا السنة اللي فاتت نجحت في اولي ماجيستير
بس السنة دي بقي
بصراحة مش متفائلة
حاسة انها هتخرب فوق دماغي
بس بحاول اعمل اللي عليا
بحاول هه خدت بالك انت
بالنسبة بقي لبليل
فدة له مذاق خاص كدة
بحس فيه بحريتي اي نعم بحس بوحدة بس برتاح فيه اوي
وعلي رغم اني بحس بحزن عميق اوي جوايا بس بيبقي في ابتسامة حتي ولو مرة

بالنسبة بقي لموضوع انك كبرت علي الفشل دة فاسمحلي اقولك انك لسة صغير
مش اقصد في السن
لكن اقصدان طول ما حياتك بتمر لازم تفشل وتنجح الشاطر هو اللي يتعلم انه مش يفشل نفس الفشل مرتين
انت ممكن تحس انك كبرت علي اللعب او كبرت علي الفرح زي انا كدة
بس علي الفشل لا
صعب ونصيحة مني مش تفكر بالاسلوب دة
لان حياتنا كلها تجارب يا تفشل يا تنجح
وبنجربها من واقع تاني
الشعور بالخوف من المستقبل د شئ طبيعي
لانه شئ مجهول مش عارف انت هتكون ايه او ازاي
بس مش تخليه يحتويك ويتغلب عليك
لانك بمرور الوقت هو اللي هيقتلك ويموتك
معلش بقي رغيت معاك
بس كلنا هذا الرجل

No Fear said...

السلام عليكم
عبد الرحمن
شكرا علي مرورك
و أنت طيب و بخير دايما
و يارب يسمع منك

سمرا النيل
أنا سعيد بمرورك
مش فكرة أن أنا كبير و مش صغير
فكرة إني مش محقق حاجة خالص دلوقتي
بجد أنت لسه متعرفنيش بس بجد لو عرفتي حالتي هأصعب عليكي و في نفس الوقت هتتخنقي مني
و بردو شعور الوحدة ده من أرخم الحاجات ممكن يخليني أقضي حياتي كلها نوم بلا عمل
كلنا هذا الرجل أية
فرق كبير بيني و بينك بلاش تواضع
سلام

Malk Almasria said...

كل عام وانت بخير
تفائل يا اخى فغدا افضل بأذن الله
ملك المصرية

albida said...

محمد... بجد مرسى أوى على زيارتك الجميلة للمدونة بتاعتى, واسفة انى اتاخرت فى الرد.. أصلى اليومين دول مطحونة فى الامتحانات

Billy Zane
ده يبقى الممثل اللى عمل دور خطيب
Kate Winslet
فى فيلم
Titanic
بحب تمثيله جدا ومتابعة أعماله!! بجد ممثل رائع

أه على فكرة.. عجبتنى مشاركتك فى البوست بتاع الحفلة.. وأنا جاوبت على سؤالك!! بس نسيت تاخد الجاتوه وأنت ماشى
:) :)

manal

albida said...

مش عارفة ليه حاسة أنك بعد ما تقرأ التعليقات بتاعتى فى مدونتك هتيجى تضربنى من الرغى ده
:) :)
معلش أصل مدونتك كلها بتدور عن فكرة الوحدة وأنا لما بتكلم فى الموضوع ده مابقفلش

البلوج بتاعك بجد جميل وكلامه كله طالع من القلب

manal

حنيــــــن said...

من احلى الاخبار حفظك لسورة النبأ
ربنا يكرمك ويثبتك على الحفظ ده

كل سنه وانت طيب

انا معاك فى ان كل حاجه طعمها مختلف فى الليل

ذاكر كويس