Thursday, December 21, 2006

السلام عليكم
كل سنة و أنتم جميعا بخير
طبعا مصمتش أول يوم في ذي الحجة و صوم ذي الحجة لم يحافظ الرسول علي صومها بإستمرار و هذا ما علمته مؤخرا
المهم طيعا إعلامنا المحترم لم يعلن عن بدء ذي الحجة غير لما فطرت أو علشان لا أظلمه و أنا نايم
هتضايق علي أية ماجدة الخطيب ماتت عرفت يعدها بساعتين الشيخ عطية صقر مات عرفت بعدها ب 3 أيام
حسبنا الله و نعم الوكيل
المهم مش عاوز أكئب عليكم في الأيام المفترجة دي
كل سنة و أنتم طيبين و بخير و أحذركم من المعاصي في هذه الأيام كلها الأشهر الحرم خاصة
مش عارف مفيش نفس الواحد يكتب في أي موضوع بس أنتم وحشني جدا و عاوز أكتب لكم أي حاجة
تصدقوا جه علي دماغي موضوع دلوقتي
الجمعة اللي فاتت أتقابلت مع أتنين صحابي المهم طبعا أنتم عارفين أن أهم موضوع بيشغل دماغي هو موضوع البنات
المهم أتفقت مع واحد كان جايب لي عروسة علشان أخرج معها و أنا قلتله أنا مش بفكر خالص في الجواز دلوقتي و بيني و بينكم موصي كم واحد لو قلتله أتجوز قبل سنتين يمنعني بأي شكل
المهم أقنعته إني أقابل البنت دي و لو ربنا كرم و عرفت أتعرف عليها كان بها كصداقة فقط و ليس جواز
و الأخ التاني ظبطت معها علشان بردوا يعرفني علي بنت تانية بس بدون إحراج منكم علشان أنتم إخواتي مش محترمة يعني
بس مش زي ما أنتم هتفهموا عادي يعني صداقة بردوا بس متقدمة شوية
المهم صاحبي الأول قلق و خاف خصوصا أن البنت اللي كان جايبها دي صديقة خطيبته و قال لا يا جواز يا بلاش قلتله بلاش
أما صديقي التاني للأسف أنه صديقي فهو يعرفني كويس
طبعا طنش علشان عارف هبلي و إني قفل مصدي و هكذا و للأسف فشلت القصتين اللي كنت معلق عليهم أمل كبير قوي
الحمد لله الجايات مش أكتر من الريحات
خلاص
المهم محدش يقولي ليه عاوز تعمل كده و لا الكلام ده يدور في البوستات السابقة علشان يعرفني و يعرف بفكر إزاي
في حاجة تاني عاوز أكلمكم فيها
أنا سعيد جدا إني بدأت أكتب تاني الإلهام نزل علي و لا أية مش عارف
لو في حد عنده حل لمشكلتي لا يتردد في الكتابة لي
بس
معرفش اليومين دول بسمع حليم بطريقة غريبة
الزمالك يا جدعان مش عاوز أقولكم أكيد كلكم عارفين متبهدل خالص ربنا معانا
لبسو الأخ التوربيني حادثة قطر كمان
ممكن علي يوم الأحد يشيل مسؤلية البطالة و التضخم كمان علشان بيقولوا أنهم كل يوم بيطلبوا ياكلوا كفته
الباشمهندس مانويل جوزيه بيقبض 46 ألف دولار في الشهر يا بلاش
هيدو كاجودا 100 ألف دولار تعويض بس أومال لو كان جاب الدوري كان أخد كم
حسبنا الله و نعم الوكيل

أنا زملكاوي بس ياريت مصر كلها تكون زي المحترم المؤدب الجامد قوي الخلوق بجد المتواضع اللي فعلا ربنا كرمه علشان أخلاقة أبو تريكة
الإخوان لها ميليشيات كمان
حماس و فتح بيقتلوا في بعض
البانجو سمعت أنه هيتسعر

(دي من عندي )
نفسي أذاكر و أقرا
لو حد عنده حاجات تساعدني علي الموضوع مستني نصائحكم
معتقدش إن في حد منكم هيوصل هنا
لسه متفرج علي كم فيلم عجب
فيلم كيفن كوستنر كنت هأعيط فيه
الزنبقة في الشغل علي نار و علي قدم و ساق
كفاية كده أنا حاسس إني شخصيا تهت مش عارف أنتم هتوهوا و لا لا

علي العموم
كل سنة و انتم بخير و صحة و في عبادة و قرب من الله إن شاء الله
أرجوكم أدعوا لي من قلبكم

10 comments:

يا مراكبي said...

إدعي ربنا إنة يفكرني بيك وأنا في طواف الحج علشان أدعيلك .. ربنا يصلحلك الحال

أنا بعد ما كنت زعلان على الزمالك .. زعلت منه علشان كسفنا هنا في الكويت

nor said...

ياااه خبر سعيد أخيراً
حج مبرور انشاء الله
أمانة عليك تدعيلي هناك.... يفرجها ويحلهالي من عنده

على فكرة يا "نو فير" ايه انت كنت بتحرك مؤشر الراديو ولا كنت بتشم حاجة ولا مؤاخذة ....
ولا كنت أكيييد....ماسك جرنان
مش حذرتك....

يالا كل سنة وانت طيب

mariam said...

ياه اخيرا
كل سنه وانت طيب

rony said...

انا عماله اضحك زى الهبله بالظبط
طبعا انت عارف الحاله المعدنيه المصديه بتاعتى دلوقتى بس والله ضحكت اوى على اللى انت كاتبه
ربنا يكرمك ويهديك ويعقلك وتبطل بنات والبى بى سى والنيسكافيه والفيشار مع على
ضحكتنى بجد اوى
ربنا يخليك ليا يااااااااااارب
كل سنه وانت طيب

saso said...

:)
كل سنة وانت طيب
فاتني انا كمان الصيام بس معلش تتعوض ان شاء الله
المهم...حلو انك فايق المرة دي شويتين..والنبي اخر حاجة تفكر فيها الشغل بعد معادة مايخلص ارميييييية
انا باكتبلك وانا حاسة ان في حاجة حاصلة غلط بس مش هافكر هاعرف بكرة يعني هاستعجل علي ايه
سيبك..عارف لو طلعت موضوع حدود الصداقة ولعبة بنت وولد دي من دماغك حبة والله هتتحل ان شاء اللة..بس كقاعدة كل مابتفكر في حاجة كل مابتكبرها عن حجمها ..كل مابتبوظ زيادة
؟؟
ماجدة الخطيب ماتت؟ طيب انا معرفتش غير منك دلوقتي ..دي فايدة تانية للشغل ..مفيش وقت تتفرج علي روتانا
:)

meho said...

kol sanah wentah tayeeb ,,we merci kteer 3alah el zyarah ,,,nort ya fandeem ,,benesbah lell zamalek matgbshy sertoh wenaby..la7san ana ma7too2 damy .....ta7yatee

elgharep said...

أيه ياعم ده ده مش بوست ده نشرة
بالنسبة للبنات العبد لله زيك وبيفكر للأسف بنفس الطريقة الرومانسية البائدة وأهو الحال القلب فاضى وأدينى قاعد قدام الكمبيوتر للتدوين
كل سنة وأنت طيب
أسف على التأخير فى الزيارة
الغريب

dandana said...

لا لا بجد اكتر حاجة عجبتنى نشرة اخبار سبعة ونص دى...
ماكنتش عارفة اضحك ولا اقول برافو...

ربنا يهديك وتبعد عن البنات نهائيا...
بص...الحل انك تبطل شرب نسكافيه
وتلبس شرابين فوق بعض

karakib said...

كل سنه و أنت طيب

albida said...

بجد عاجبنى أوى أسلوبك فى سرد أهم تفاصيل حياتك بالصورة دى.. وثقتك فى الناس اللى بتقرأه. أحيانا الواحد بيبقى جواه الكلام ده كله ويبقى عايز يطلعه مرة واحدة بس ما بيعرفش!! يمكن علشان ما بيلاقيش الوقت المناسب ولا الشخاص المناسبين حواليه

manal