Thursday, September 28, 2006

أرجوكم ...........أستمتعوا بكل لحظة
أنا كنت فكرت في كتابة الموضوع ده مش عارف ليه نسيت لكن الحمد لله قرايت مدونة فكرتني إني أكتبه
الموضوع عبارة عن المتعة
إحنا ليه مش بنحس بقيمة الشئ غير لما نفقده
يعني فاركين لما كنا في الابتدائي و بنقول ياااه نطلع إعدادي بس و الحياة تبقي تمام
نكدنا علي نفسنا طول مرحلة الابتدائي و بعدين نروح إعدادي الحياة و لا تتعدل و لا نيلة بالعكس بنفقد أصدقاء عرفناهم منغير مصلحة و عرفناهم علي بياض و نضافة قلب
الاعداي لو أروح ثانوي زي أخويا كده و أقضي الحياة و أرجع من المدرسة بدري و مخدش كتب معايا
المهم نكدنا علي نفسنا و خلاص و منحسش بحلاوة الاعداي غير أمتي
طبعا لما نروح ثانوي
و هكذا الحياة نروح الكلية طيب و ناخد كم يوم أجازة و أطنش المحاضرات و أظبط بنات
و لا أتنيلنا ظبطنا بنات و لا حضرنا محاضرات
و كنت بروح الكلية كل يوم
طيب الكلية تخلص
و كل المشاكل تتدمر بعد كده
المشاكل زادت يارب أستر هأدخل الجيش و لا اية
المهم نفدنا الحمد لله
نشتغل بقي
رحلة البحث
الفشل في المقبلات
الحمد لله شغل
ترك الشغل
شغل تاني
مش مرتاح فيه
ياااااه فاكر الشغل الاولاني كانت الناس فيه حلوة قوي
يعني معرفتيش غير لما سيبتهم
أرجوكم أستمتعوا بكل لحظة الحياة جميلة جدا جدا جدا
أة غالبا هتستغربوا إني أنا خصوصا اللي بقول كده
بس أعمل أية
أنا مش سعيد في حياتي
قلت أحاول أساعاد الناس تكون سعيدة يمكن حد منهم يدعي لي أكون سعيد في الايام المباركة دي و
و ربنا يستجيب ليه
رسالة الي الجميع أستمتعوا بحياتكم في جميع مراحلها
ملحوظة:
أنا مش بعرف أكتب عنوان المدونة لوحده لو حد يعرف ياريت يقولي أكتب العنوان لوحده إزاي
شكرا
سلام

7 comments:

Anonymous said...

اننا لا نتعلم الا بعد فوات الأوان . ان قيمة الحياه ان نحياها . في ان نحيا كل يوم منها وكل ساعه-ستيفن ليكوك

LAMIA MAHMOUD said...

استمتع بكل شيء في حياتك .. حتى الحزن

rony said...

منك لله يامحمد
ايه السواد اللى جواك ده كله ..وانا اللى كنت فاكرانا اصحاب...طلعنا حمير احنا الاتنين...مشكره جدا
وبعدين الحياه اكيد مش فى المدرسه ولا الكليه ولا الشغل مش كل واحد على حدا...الحياه كل دول على بعض بحلوهم ومرهم بتجاربك الفاشله قبل الناجحه وبعدين محسسنى انك رجل بره ورجل جوه ياابنى انت لسه فى عز سن اليأس وقولتلك الحب والصداقه الجميله هاييجوا لما ربنا يأذن
بس افتكر
الحب بعض من تخيلنا على الارض...ان لم نجده عليها اخترعناه

إنسان || Human said...

فعلا عندك حق

No Fear said...

شكرا ليكم كلكم علي تعليقاتكم
واحد من الناس
أزاي الواحد يتعلم قبل فوات الاوان لو تعرف ياري تفيدني
لمياء
صعب جدا الاستمتاع بالحزن ده الشئ الوحيد اللي الاستمتاع بتاعه بيكون بعد رحيله
رونتي
معلش هأصالحك
هيومان
هو أنا اللي كتبت الكلام ده بس مش بحب حد يكون متشائم زيي حرام عليك نفسك

Anonymous said...

تعلم تعيش كل لحظه بكل ما فيها من حاجات حلوه لان الحظه الي تعدي عمرها مترجع تاني
طبعاهتقول ان الكلام الي انا قلته ده كلام جميل لكن مثالي زياده عن اللزوم لما الواحد يخرج كل يوم من الشغل قرفان و طالع عينه يلاقي المواصلات زاحمه والدنيا مش جميله
بس نعمل ايه بقا كل الي عليها تعبان وربنا يرحمنا برحمته بس ارجع و اقول حاول تعيش الحياه بمرها وافرح ان المر ده عدا لانه مش هيرجع وعيش لحظاتك الحلوه بكل ما فيها من فرحه
ربنا يجعل ايامك وايامنا كلها افراح

No Fear said...

و الله أنا الحاجات اللي أنت قلت عليها دي مش بتضايقني خالص و فعلا بحس بمتعتها لما أري اللي أقل مني لكن المشكلة في أخلاق و أحوال الناس
الناس بتكره بعض للكره مش علشان أي حاجة بكرهك علشان مش بعرف أحب و للأسف الكلام ده ممكن يكون ساعات من ناس المفروض و الطبيعي تكون أعز الناس عليك و في ناس بتنكد عليك في أعز فرحتك مش عارف بيكونوا قاصدين و لا ده قدر ربنا أني أزعل منهم
كفاية كده علشان مغلطش في حد