ليلة من ليالي الأعياد

هأرغي و زي ما الكلام ياخدني
تخيلوا النهاردة كان يوم عصيب أوي منورش شوية غير لما حد بعت لي و قاللي إن عنده صداااع
هو مش النهاردة بس اللي عصيب بصراحة الواحد بقاله فترة ضايع و زادت أوي كل أما بأقابل حد من صحابي و زمايلي القدام و الأقيهم موفقين في حياتهم بأحس بفشلي أوي
أنا عارف معني كلامي ده إني شخص مش كويس بس أنتم مني و مش بأتحرج أفضفض معاكم و أنتم أساسا مبقيتوش تتدخلوا في شخص واحد بس نفسي أقوله الكلام ده و عارف إنه مش هيزعل مني بس أنا مش عاوز أضايقه بكلامي و أرمي عليه حمولي علشان هو مذنبوش حاجة يشيل همي و قرفي
فكرت أكتب ملخص لحياتي لقيته بيتلخص في جملتين
إني بأتأني في حاجات مهمة لحد ما بتضيع مني
و إني بأتسرع في حاجات مهمة مينفعش أتسرع فيها و بردوا بيكون قرار غلط
تخيلوا حياتي بتتلخص في الجملتين دول
ههه
أنا زعلان منك أوي يارب
معرفش الجملة دي ممكن توديني فين بس جملة في دماغي كتير و حاولت أكتبها في ورق و أقطعها بس مش عاوزة تروح من دماغي
الموت هو الحل الأمثل لكل المشاكل شخص واحد بس بأخاف يزعل لو مت و بأخاف يحس بالوحدة من غيري
الإنتحار خطوة جريئة كنت زمان بأستغرب أي حد بينتحر و بأزعل من فعلته جدا بس بصراحة محتاج شجاعة كبيرة
أخو مالك جاي في الطريق الإسم المقترح ياسين و اللي نفسي فيه ادم مش عارف أية اللي هيحصل
في ناس مذنبهاش حاجة غير إن حظها العاثر حطني في حياتها هأحاول مجرحهمش
سبحان الله دايما بأفتكر في ليلة العيد أحلي ليلة عيد و أحلي يوم عيد في حياتي(ويمكن يكون يوم العيد الوحيد اللي محسيتش فيه بالوحدة) و في نفس الوقت أسوأ و أصعب يوم عيد في حياتي و الغريب إنهم نفس اليوم
نصيحة لو حد من صحابك اللي اتصاحبت عليهم من غير ما يكون في مصلحة بينكم والأيام بعدت بينكم و هو حاول يرجع و يقولك أزيك متخليهوش يستني كتير متعرفش باقي في العمر قد أية

بأزعل أوي لما بأحس بقلة الإهتمام و التقدير من عيلتي و كمان إحساس وجود حاجات مستخبية عني أو بأعرفها أخر واحد و ممكن منقوصة بس بيني و بينكم هم عندهم حق واحد فاشل زيي ممكن يفيدهم بأية علشان يحبوه أو علي الأقل يبقي ليه أولوية عندهم

أنا زعلان منك أوي يارب

أمانة عليك لو عديت قولي إنك قريت و فرح قلبي

ذكريات (خواطر عاطل سابقا) قبل الثورة بأيام

السلام عليكم

البوست ده من المرات القليلة جدا اللي هأكتب فيها بوست و منزلوش و ممكن أستعيل و أنزله المهم النهاردة العاشر من يناير ألفين و أحدي عشر في الساعات الأولي من هذا اليوم

حاولت أنام الساعة اتناشر قلت أسمع الأخبار علي البي بي سي و انا لكني لم أستطع و بعد كده برنامح نقطة حوار عن إنفصال السودان و لم أستطع قلت أقوم و أترمي قدام الكمبيوتر ألعب أقرا أعمل أي حاجة و كان نفسي أوي أتكلم مع أي حد بس للأسف ملاقيتش قلت خلاص أكتب البوست ده

الأرق من أشد جنود الله و في تفسير للشعراوي ملخصة إن الأرق أشد جنود الله لأنه مالوش علاج و مفيش شئ أقوي منه

قلة النوم

طيب أنام ليه مفيش شغل الصبح و مفيش حاجة أعملها و ماليش نفس أقرأ حاجات للشغل و لا حتي للثقافة و لا حتي للمتعة

إحساس رهيب بالفشل و باليأس و الضياع و حاسس إنها بتقفل معايا علي الأخر و سبحان الله عندي إحساس إنها هتفرج مش عارف إزاي الإحساسين دول مع بعض الأتنين ضد بعض عارف بس أعمل أية ساعة بأكون كده و ساعة بأكون كده

المهم أديني صحيت علي أمل إن أي شركة من الشركات اللي عملت فيها مقابلة و لا بعت لها السي في تتصل بيا الصبح أنا علي الحال ده من زمان بأقوم أجري علي الموبيل لو رن الصبح لحد الساعة 3 تقريبا و يومين الجمعة و السبت مش بأهتم بالموبيل و أهم جرنال بأجيبه يوميا الأهرام و خصوصا بتاع يوم الجمعة

ساعات بيكون نفسي أسافر و ساعات بيكون نفسي مسافرش و نفسي في شغلانة بصرف النظر عن المرتب نفسي أعيش عيشة بسيطة مفرحة فيها متعة بسيطة مش عاوز أصيف و لا فرنسا و لا أسبانيا نفسي أضحك من قلبي نفسي أقابل ناس طيبة نفسي الناس تبقي فرحانة عارف مفيش حاجة تفرح في حياتنا حاليا بس أهوة نفسي الناس بقيت كئيبة أوي عنيفة أوي قليلة الأدب أوي مش متربية أوي أوي محدش بيهمه حد محدش بيخاف علي حد و لا جار و قريب و لا صديق يمكن بسبب إنشغالنا بالرزق بس و الله ياجدعان الرزق بأيد الرزاق مش بأيد أي حد

يافرحتي أكون غني و ابني مدمن يافرحتي أكون رجل أعمال و بنتي مش متربية

نفسي في العائلات البسيطة بتاعت زمان و الله كانت موجودة من قريب أوي و لا كنت أنا اللي مش عارف حاسس إني دخلت قوقعة لمدة عشرين سنة الناس أتغيرت أوي و بسرعة كبيرة

ساعات بأتخيل إني أذيت حد علشان كده ربنا بيعاقبني بكل ده أة ممكن أكون عملت حاجة غلط ممكن أكون جرحت حد أو زعلت حد بس مش للدرجة اللي تخلي العقاب كده أو في ناس تانية غلطت غلطات أكبر و أكتر مني و ماشي الحال معها

من كم يوم حلمت حلمين حلوين أوي بجد مش فاكرهم بس كنت فرحان أوي و أنا بأحلمهم

في فرصة شغل في بورسعيد مش عارف هتيجي و لا لأ يمكن تيجي و تكون فترة إعادة ترتيب أوراق بالنسبة لي

تصدقوا مش عارف نفسي في أية؟

في سؤال نفسي أسأله لحد هو ليه كده؟

نفسي أبعد عن كل حاجة النت و الفيس بوك و التدوين و المسنجر و كل شئ

من كم يوم منذر أقترح علي إني أخد حتة أرض و أتجوز فلاحة و أعيش هناك و مدخلش أولادي مدرسة و لا حاجة نعيش كده و الله هي فكرة جميلة و لاسعة زييه بس مين هيعملها معايا مبقاش في فلاحين أساسا دلوقتي

البوست ده لو نزل معناه إني أشتغلت و مش عارف لو أشتغلت هيبقي عندي الشجاعة إني أنزله و لا لأ

بس هي مما لا شك فيه فترة قاسية أوي يمكن اللي مخففة علي إحساسي بعدم الندم الحمد لله و عدم الخطأ و الله أعلم

مش بأتصل بأي حد خالص

الجمعة 14 يناير 2011 بعد أذان العصر الدنيا لسه ممطرة جامد من شوية

الكم ليلة اللي فاتوا مروا بصعوبة جدا و بطئ جدا جدا مش بأعرف أنام بالليل من قلة التعب و الإجهاد واحد بيصحي الساعة 11 و لا 12 ينام بدري ليه مش فاهم

ابن أختي الصغير كان بايت عندنا لوحده الكم يوم اللي فاتوا علشان خلص إمتحانات و أخوه لسه عوضت معاه الأيام اللي كنت قضيتها مع أخوه و هو صغير و معرفتش أقعدها معاه و كان بيعمل معايا زي أخوه بالظبط يصحيني الصبح و لازم أشغل له الكمبيوتر و بعدين لازم أتفرج معاه علي الكرتون عافيه كنا بنتفرج علي نيكولوديون الحيوانات المدهشة و الأغنية الشهيرة الهاتف يرن و بعد كده دورا و مرورا بتوم و جيري اللي هو بيعرف الحلقة من أول أما التتر بيجي و بعدين يستخدم الكمبيوتر عافيه مني و يدخل علي جي نين جي موقع ألعاب و يقعد يلعب و الملاحظ بينه و بين أخوه إنهم قدام الكمبيوتر و الألعاب بيقدوا جميع الحواس و لا بيسمع و لا بيشوف و لا بيتكلم مه أي إنسان المهم

ملحوظة جديدة أكتشفتها إني مبيقيتش أسمع أي حاجة جديدة من فترة طويلة أوي أوي عايش في منير و خلاص و حتي لما سيبت الشغل مبيقتيش أسمع حاجة خالص غير قليل أوي و عايش في القديم بردوا و مفيش أي جديد معرفش ده عادي و لا أعراض شيخوخة و لا علشان المستوي هابط و لا ده مرض و لا حتي بردوا اسمع قران و لا أي حاجة هي البي بي سي و خلاص و ساعات بأشغلها علشان تعمل صوت جنبي و خلاص و لا علشان أنام عليها المشكلة إنها دلوقتي بتقفل الساعة واحدة باليل و ده بيكون بدري أوي بالنسبة لمواعيد نومي حاليا

حد يفكرني أبقي أحط تحذير في أول البوست ده لما أجي أنزله أنوه فيه إن البوست طويل و يارب ميطولش أكتر من كده و أبقي عاطل سابقا بقة

مش عارف أنا حاسس إني مرتاح نفسيا مش علشان أنا قاعد في البيت يمكن علشان بعيد عن ضغط و توترات الشغل و يارب ميكونش علشان كده و يكون ثقة بالله

الثورة التونيسية شغالة أنا بأفكركم لأحسن أسرح في كتابة البوست ده و تمر سنين طويلة و أنا مش واخد بالي أبعد فورا هذه الأفكار السوداوية عن دماغك يابني أدم

المهم تفتكروا ممكن نبقي زي تونس كده و لا هنفضل في ميه اللفت اللي إحنا فيها دي حين ميسرة و نستني الدبدبات لما تنزل الشارع و لا يعملوا حزق تجول الواد عمرو عبدالجليل ده مالوش حل

كمان الكم يوم اللي فاتوا كنت بأفتح الفيس بوك و المسنجر و أقعد مستني و لا كان بيحصل حاجة و كنت بأفضي نفسي يوم الجمعة و لا كان بيحصل حاجة عادي جتتنا نحست خلاص

أنا مش عاوز أشترك في أي حاجة دلوقتي علشان ميبقاش بسبب إني قاعد من الشغل

و ناوي في نفس الوقت لما ربنا يكرمني و اشتغل أفكر في البلد دي و إزاي نصلحها طبعا مش هأنفذ الوعد ده لما أتشغل

حد يشرب نسكافيه بلاك

إمبارح كنت قاعد مع واحد صاحبي و كآبني الجدول كان لسه ناقص فيه ختة بيضا علشان هو يجي يسودها أصلي بس هو أهبل و غلط غلطة بسيطة جدا و عامل الحبة قبة بالإضافة إنه عايش في فيلم عربي قديم أبيض و أسود أو إحتمال قبل الأبيض و الأسود من فيلم من أيام السينما الصامتة

الجمعة بردوا 14 يناير الساعة أتناشر باليل نقول السبت

يوم تنحي بن علي و هروبه من تونس

عندي إحساس بالرخص رهيب و يقيني بس مش عارف ليه

حسيت إني رخيص أوي عند ناس غالية عندي و مش عارف ليه غلط في أية؟ مش عاوز حاجة و مش طامع في حاجة بس عاوز أفهم غلط في أية

مش فارق إن فكرتهم عني تتغير خلاص مبقاش يفرق و مبيقيتش تهم بس نفسي أعرف ليه

لييييييييييييييييييييييييييييييييييييييه؟؟؟؟؟؟؟؟؟؟؟؟؟؟؟

الثلاثاء 18 يناير 2011

كنت و للأسف مازلت عبيط

أما بعد ......

السلام عليكم و رحمة الله و بركاته

و بعد غيبة طويلة نعود لمدونتنا سالمين بحمد الله

واحشني ياناس يامدونين ياطيبين أو ياللي كنتم طيبين بقالي كتير متعاملتش معاكم

المهم ياجدعان بعد أما غسلت الطبقين اللي في الحوض و الواد مالك نام قلت أجي أرغي معاكم شوية قبل أما أنام و أفضفض لكم بشوية حاجات ملعبكة و ياريت مغيبش عنكم كتير

كل مرة بأكتب بيكون نفسي أكتب تاني يوم علي طول بس الموضوع بيطول شوية

المهم

قدمت تاني في تمهيدي الماجستير يمكن ربنا يوفق المرة دي للناس الجديدة مرة قدمت و فشلت و مرة نجحت بس مسجلتش الماجستير بسبب قعدة البيت قبل الثورة بكم شهر كانت فترة سودا بعيد عنكم

المهم قلت أهوة استغلال للوقت المتاح وتشغيل دماغ و تحقيق أمنية مش مهم بقي عندي كم سنة و هأستفاد بيه في الشغل ولا لا بس

علي الأقل هيخلي دماغي تشتغل

و أهوة كما تقول الحكمة المهم تبدأ دلوقتي أكيد أحسن من بعد كده

دعواتكم إني أقبل في التمهيدي و أنجح و أسجل الماجستير و أكمل للدكتوراة يحينا و يحييكم ربنا

 

مقصر أوي في علاقاتي الإجتماعية و مبقاش ليا خلق أقابل أي صحاب خالص و لا حتي أكلمهم في التليفون معرفش ليه كسل و لا مفيش جديد في الحياة نتكلم فيه مفيش تتطور في حياتي فخور بيه مش عارف بس مقصر مع الأصدقاء كلهم و بالرغم من إني نفسي أخرج بس مبيحصلش و يمكن علشان بعد المسافة و الله أعلم

 

بالنسبة للشغل رجعت لأول شركة أشتغلت فيها خالص و ماشي الحال الحمد لله و بأحاول أحارب الفساد بس الفساد طبعا بينجح هههههه و بأحاول أرجع المعمل اللي كنت شغال فيه علشان المعمل اللي أنا فيه كله قلق و مفيهوش خبرة أوي

 

نفسي أحكي لكم عن مغامراتي في الشركة

 

أحيانا بتيجي لحظات توتر و قلق بأحاول أتغلب عليها و دماغي بتقعد تفكر في مليون حاجة لدرجة ممكن يعدي علي أسابيع مش بأعرف أنام فيها كويس

 

عندي حوضين زرع في البلكونة حاطط في واحد مسك الليل و التاني نعناع علي ريحان

السياسة طبعا حدث و لا حرج هبل في هبل في ظلم في جهل في كذب في كل حاجة وحشة

الزمالك ياجدعان أخد الدوري و الكأس و ده شئ محصلش من ساعة أما دخلت عالم التدوين

نفسي الواد مالك اربيه كويس و ربنا يبارك فيه  و يبقي فخور بيا و يتفشخر بيا وسط صحابه

و السلام ختام و علي أمل اللقاء القريب

كسل

السلام عليكم

 

الواحد بقاله فترة كده مش بيعمل حاجة إيجابية و لا أنشطة و لا قراية و لا إطلاع ده بالإضافة إلي ضياع فرصة الماجستير و عدم التطور في الشغل بصورة كبيرة فين أيام زمان الواحد كان كل سنتين في شركة شكل :) و مغامرات شكل إنما خلاص بعد الجواز بقة الإستقرار و التفكير بالعقل و بعد الخلفة كمان أصبحت الأمور أصعب و أصعب

و أساسا مفيش فرص كبيرة في البلد و بردوا الواحد بقي كسلان خلاص يعني أنا بأكتب البوست ده و أنا بأقاوم النوم بالرغم من إن لسه الساعة تسعة بس مفيش ماتشات النهاردة دي الحاجة الوحيدة اللي بتسهرني و أشتركت في كورسات تبع  الغرفة الأمريكية للتجارة و أهوة شهر نوفمبر و لسه مخلصتش و لا كورس و مش عارف أزود مهاراتي خالص و بالرغم من إن عندي وقت بس مش عارف أستفيد بيه بتيجي لي حالة كسل رهيبة في البيت

 

الموضوع اللي مضايقني بجد هو موضوع الماجستير ده كل شوية بيحز في نفسيتي أوي خصوصا إني كنت خلصت التمهيدي الحمد لله علي كل حال بس نفسي الموضوع ده أنساه خالص بس مش عارف إزاي أنا عارف إن مالوش علاقة بالشغل أوي لأن الشغل مختلف بس معرفش بيضايقني خصوصا كمان إن بابا كان نفسه أكمل في الماجستير جدا

 

الحمد لله علي كل حال و يارب أنسي و الأقي حاجة مفيدة تشغلني

 

 السنة دي جريت أوي مش عارف ليه بس كويس

 

دعواتكم ليا

أخيرا

السلام عليكم و رحمة الله

أخيرا هأكتب تاني هو أينعم ماتش ريال مدريد و ليفربول شغتل بس هأحاول ما صدقت نزلت نسخة الويندوز علشان كانت اتضربت بسبب الإعلانات و الاسبام
بس الحمد لله مفيش خسائر

من فترة طويلة أوي نفسي أكتب و مش عارف مفيش وقت مش عارف اليوم بيجري في أية
عندي أخبار كتير  و مواقف كتير و أحلام كتير و إيجابيات كتير و سلبيات كتير

نسيت أقولكم إن من أكتر الحاجات اللي خلتني أقل في الكتابة هي عدم التفاعل فبرجاء اللي يقرأ ينتش تعليق
و من الحاجات اللي شجعتني علي الكتابة موضوع رجوع يوسف و ماماته اللي قلب الدنيا و بوست من إنجي سمراء النيل و حديثها عن لقاءات المدونين في 2006 و في نفس ذات الوقت عدم مقابلة الشلة من فترة ليست بقصيرة

علي فكرة المعلق حفيظ دراجي اللي بيعلق علي الماتش ده خنيق أوي

الحمد لله الدنيا ماشية اليومين دول في الشغل كويس و مفيش أفكار تراودني عن تغيير الشركة و لا المجال حاليا بعد الجواز و الخلفة و كده

الحمد لله في فترة نفسية متزنة
ناقصني بس إني أجتهد شوية و مضيعش وقتي في كلام فاضي

ريال مدريد جاب جول
رئيسي في الشغل اليومين دول عاوز بوستات لوحده و حال الشركة اللي بأشتغل فيها كله محتاج بوستات لوحده و لا أبالغ لو قلت عاوز مدونة لوحده بإختصار هي عاملة زي مصر سرقة كتير كلام كتير خناقات كتير حقد كتير رضا وشغل قليل جدا

بس اللي لاحظته في تنقلي المهني إن كل أما المرتب يزيد حرص الناس علي الفلوس و المناصب و صراعاتهم تزييييييييييد جدا

مفيش رضا مفيش قناعة مفيش إقتناع إن الدنيا دي مش مستاهلة و مش مضمونة و المتعة اللي في الحياة  صدقوني مش في الفلوس و لا المناصب
المتعة الحقيقية في السعادة و السعادة مش بتيجي غير بالرضا و القناعة

يعني ممكن يكون واحد مليونير و يبص علي اللي عنده مليارات فيبقي تعيس
و ممكن يكون واحد عنده أوضه علي السطوح فيبص للي بيبات في الشارع فيرضي فيسعد

المهم التدوين وحشني أوي و ناس التدوين وحشوني أكتر

اليومين دول بقيت أحلم و أنا نايم و أفتكر الحلم و أصحي منتعش معرفش ده بسبب الشتا و لا أية
في أغاني بترن في ودني كتير اليومين دول زي علي قد ما حبينا و مدام معاي و أنا عايز صبية

الريال جاب التاني

هأعتبر البوست ده بداية العودة و ياريت أكتب لكم تاني قريب
وحشتوني و الله

السلام عليكم و رحمة الله و بركاته

أزيكم ياشباب ده لو في حد لسه بيدخل علي هنا

أتمني لو في حد بيدخل هنا يسيب تعليق حلو كده و محترم

 

هذا البوست علي أنغام أوكا و أورتيجا و محمد رمضان (يالها من دوشة و صداع)و لكن بتفوقني

مبدئيا مش نادم علي 25 يناير و مش نادم علي 30 يونيو

و أي كان اللي هيكسب دلوقتي مش فارق معايا اللي هيعمله

أنا كنت مخنوق من مرسي و الإخوان علشان كانوا بيشتغلوا بإسم الثورة يعني دلوقتي لو حبوب الهلوسة اللي بياخدوها دلوقتي جابت نتيجة و مرسي رجع مش هيفرق معايا و مش هأكون متضايق زي الأول لأنهم هيكونوا أشتغلوا و يستحقوا اللي هيعملوه

كنت مخنوق جدا من إن مرسي و الإخوان هم اللي بيتكلموا بإسم الثورة مش عارف صح و لا غلط بس ده اللي جوايا هتقولي يعني الحل عودة الفلول بالنسبة لي أة و اللي عاجبه عاجبه و اللي مش عاجبه حبيبي بردوا

 

و اللي بيطمني بردوا إن اللي حصل في 30 يونيو صح العمليات الإرهابية اللي بتحصل دلوقتي و الأسلحة اللي بيتسخدموها أكيد بيجمعوها من قبل مرسي و في وجوده بردوا كانوا بيجمعوها ليه معتقدش علشان تحرير الأقصي يعني هتقولي هم إرهابيين ملهمش علاقة بمرسي و الإخوان طيب ليه مكنوش بيستخدموا الأسحلة دي أيام مرسي و ليه مرسي محاربهمش و قضي عليهم يبقي علي الأقل هم كانوا مستفيدين بوجود مرسي في الحكم يبقي كان في صفقة بصورة مباشرة أو غير مباشرة

 

أنا اللي صعبان علي دلوقتي الدم اللي بيحصل كل يوم فنفسي كل صاحب عقل يفكر قبل ما ينزل هو هيعمل حاجة و لا هيموت ببلاش اللي معارض يعارض براحته بس ميضيعش قوته في الفاضي

 

الناس كرهت الإخوان و كرهت مرسي (طبعا ما عدا الناس اللي تشل اللي معايا في الشغل)بس مش مهم

الناس اللي معايا في الشغل دي محتاجة مدونة لوحدهم

 

اللي كان بيكرهه مرسي من السلفيين دلوقتي بينزل علشان يرجعه و اللي شايف إن مرسي بقي زعيم بعد ما أتعزل و اللي مصدق إنها حرب علي الإسلام و  شايف إن مرسي خلاص راجع واللي شايف إن الإنقلاب فشل و الليهلم جره و اللي بردوا نفسوا السيسي يمسك  حاجة كده تشل

 

المهم الواحد مهروس في الحياة و مش عارف الدنيا بتجري كده إزاي

 

النهاردة اليوم كان جميل الحمد لله توضيب و ماتشات و قعدة في البلكونة في الهواء الطلق و كمان كتبت بوست ده فل الفل

 

نفسي بس ياجدعان ترجعوا تتدونوا بقة واحشيني جدا جدا جد

 

و نفسي أشوف المدعوييين مفيد و منذر و الحسيني و عبقرينو و ميدو و الساعاتي

 

كفاية رغي بقة

كلمة لكل الخنافس هل من منافس

ليلتكم بتشكل (أغنية قلب الأسد)و السلام عليكم 

I'll never hate 25 Jan

السلام عليكم و رحمة الله

أزيكم ياشباب

نفسي أكتب لكم من زمان

ده لو أنتم موجودين أساسا

مبدئيا ياجدعان هو إزاي نقدر نحارب فكرة إلغاء الريدر

الريدر ده حاجة مهمة جدا بالنسبة لي و يوم إكتشافها كان يوم عالمي طبعا الكلام ده من يجي 7سنين تقريبا يانهار الواحد علي البلوج دي من زمان

 

المهم بقة البوست ده فكرت أكتبه في أستاتيوس علي الفيس بوك بس لاقيت نفسي عاوز أكتبه في بوست خصوصا بعد أما لاقيت رسالة من صديق غالي من زمان مبدأش هو بالإتصال بيا

 

مش هأكرهه الثورة مهما حصل إن شاء الله

مهما أستمر الفساد و النفاق

مهما حال البلد لسه متعدلش

مهما حصل بيني و بين صحابي اللي نزلنا مع بعض في الثورة

مهما المتخلفين اللي معايا في الشغل شتموا  في الثورة

مهما دعاة الإستقرار في كل زمان و مكان أتكلموا و فتو

مهما حصل

مش هانسي اليوم ده يوم غالي يوم شم قنابل الغاز لأول مرة

يوم الحلم اللي مش مصدق إني عشته لحد دلوقتي

اليوم ده هأفضل أفتخر بيه قدام  ولادي إن شاء الله مهما حصل حتي لو طلع اللي عملناه غلط بس وقت ما كنا بنعمله  كنا متأكدين إننا بنعمل الصح

اللي مضايقني بس إن مقصر  في حاجات كتير اليومين دول و مش قادر أنظم وقتي و أستغله صح

ربنا يكرم

 و اللي  مضايقني جدا هو رؤية بعض أصدقائي الأعزاء جدا و هم بيتغيروا و بيتغروا و اتمني إنهم يفقوا علشان ميصحوش علي كارثة و مش هأقدر للأسف أقولهم علي خوفي عليهم بصورة مباشرة لأسباب خاصة

حلو كده و كفاية عليكم

بالمناسبة الحمد لله لسه متفرج علي الحلقة الأخيرة من مسلسل علي مر الزمان الحلقة ال200 و إن شاء الله مش هأتفرج علي الجزء الثالث علشان أنا هيجي لي أمراض الضغط و السكر لو أتفرجت عليه

 

 

الرغي المعتاد

السلام عليكم

أزيكم يامدونين ياللي مش بتيجوا هنا أساسا

تامهم تاحمد لله وصلت للكيلو الثامن بعد المائة و ذلك من حيث الكتلة

نفسي أنام و هأقاوم النوم علشان أكتب البوست ده

الواحد معندوش ثقة في حد خالص من السياسيين اللي موجودين حاليا

الواحد بردان و هو قاعد يدون في البلكونة

نفسي أقابل العيال مفيد و منذر و الحسيني و الزعيم و ميدو و فاروق و الساعاتي

نفسي أستغل وقتي

نفسي أبطل أسمع أوكا و أورتيجا

نفسي أستمر في الإستقرار النفسي و الروحي اللي بيجي لي كتير

نفسي التعليقات المخنقة اللي بتيجي من أنيموس دي متجيش عندي علشان بأفتكر حد من المدونين جه و علق عندي

رينا يرزقني بذرية صالحة

كفاية عليكم كده تصبحوا علي خير

السلام عليكم و رحمة الله و بركاته

أزيكم ياشباب أخباركم أية؟

واحشني من زمان نفسي  أكتب لكم من زمان لكن بقة ظروف النوم و الأنتخة تحول دون ذلك الواحد حاسس بحالة ملل زيادة شوية اليومين دول و إن شاء الله مش هتطول و هننتفض

الواحد تخطي الوزن مائة كيلو و نفسي أرجع تاني لما قبل ذلك و إن شاء الله هأرجع

 

الأخوة المدونين الواحد مبقاش يشوفهم خالص و الدنيا لهيت الواحد عن صحابه كتير بس بردوا هأرجع تاني إن شاء الله

هو مال البوست ده عمال يتحول لأمنيات ليه كده مع إني مكنتش ناوي أكتب كده بالتحديد يعني

بس أهوة الكلام جاب بعضه

الحج مرسي كان لسه بيخطب إمبارح و الحمد لله كنت نايم من الساعة ستة و نص تقريبا و شكله مقلش جديد يعني حوار جديد إنتخابات بتوافق هجايص هجايص يعني مش مشكلة

بس السؤال اللي بيشغلني دلوقتي هو مين هيروح الحوار بعد حزب النور ما قلب علي مرسي مش معقول بقي يبقي عصام سلطان بسحنته التنحة دي

 

يالا بردوا مكنتش ناوي أكتب ده بردوا الغريب إن مش فاكر كنت عاوز أكتب لكم أية؟

يمكن الزمالك بيكسب بالتي شيرت البينك

 

يمكن الواحد ...... ولا بلاش خليها في سري علشان السر لو طلع من الواحد ميبقاش سر

 

هو الثورة فشلت؟؟؟؟

هو مين الصح و مين الغلط؟؟؟

هو في أمل؟؟؟؟؟

نفسي أعمل حاجة مفيدة نفسي أخد شهادات نفسي أعلم نواة شغل خاص نفسي أجتهدو أسيب الكسل نفسي أنجح أوي

نفسي أشوفكم ترجعوا تتدونوا تاني

يالا و السلام ختام و لو أفتكرت حاجة تاني هأبقي أقولكم

Loading New Post

اللهم لك الحمد كما ينبغي لجلال و جهك و عظيم سلطانك

السلام عليكم و رحمة الله

اللهم لك الحمد كما ينبغي لجلال وجهك و عظيم سلطانك

 من فترة و أنا نفسي أستفرد بنفسي و بالكمبيوتر و أقعد في البلكونة أكتب بوست كده حلو من بتوع زمان و في أفكار كتير في دماغي

 عاوز أكتبها  لكن مش هتيجي في بوست واحد المهم هأحاول أكتب علي قد ما أقدر  الواحد بعد النقلة اللي أتنقلها مش عارف لسه يظبط الحياة أوي و كنت متخيل إن الواحد بمجرد ما هيتجوز هيستقر نفسيا و الأمور اللي بتضايقه هتقل طبعا الحمد لله الحياة تمام أوي بس 

لسه موصلتش للإستقرار الكامل بس في الطريق ليه إن شاء الله 

اللهم لك الحمد كما ينبغي لجلال وجهك و عظيم سلطانك

الحمد لله الدنيا تمام أوي بس ناقص شوية حاجات بسيطة أهمها تظبيط الدنيا في الشغل و لو عرفت أكمل الماجستير كان بها معرفتش 

خلاص قدر الله و ما شاء فعل 

اللي نفسي فيه بجد إني الأقي نفسي في حاجة بحبها و اعشقها و أعملها بحب و بحماس هي دي دعوتي اليومين دول

اللهم لك الحمد كما ينبغي لجلال وجهك و عظيم سلطانك

رب اشرح لي صدي و يسر لي أمري و احلل عقدة من لسان

الحمد لله رمضان ده بيعدي علي في هدوء و سعادة و خير و فضل من ربنا عكس رمضانات سابقة عديت علي في ضيق و وحدة اللم دمها علي نعمة من فضلك يالله

الشئ الوحيد اللي مفتقده بشدة الأيام دي وسط البلد من ساعة أما أتجوزت منزلتش علي البستان غير مرة واحدة قبل رمضان بس إن شاء الله مع تظبيط الأمور هأرجع أنزل تاني و أشم هواء وسط البلد و يارب لما أنزل يكون وسط البلد رجع زي وسط البلد بتاع زمان الهادي النضيف المنعش و يكون الحج مرسي ظبط وسط البلد و ظبط البلد كلها من الزبالة و الباعة الجائلين و الإنفات الأمني بس معتقدش إنه هيعمل كده بس أهوة ندعي و خلاص و الأجر علي الله

كفاية كده في البوست ده علشان أنا في الشغل و المية كانت مقطوعة الصبح و هأقوم أتوضأ و أصلي الصبح

 كل عام و انتم بخير

دعواتكم

أخيرا كتبت

اللهم لك الحمد كما ينبغي لجلال وجهك و عظيم سلطانك

أخيرا قدرت أفتح المدونة و أكتب

مشتاق للكتابة من زمان أوي وحشتيني يامدونتي و حشتوني يامدونين بجد بجد وحشتوني و نفسي أشوف تعليقاتكم نازلة ترف علي البوست ده

كنت علي وشك إني أصدق فعلا إني مش بأعرف أكتب هنا غير و أنا في حالة إكتئاب بس الحمد لله بدأت أكتب البوست ده و أنا في حالة كبيرة جدا من الإستقرار النفسي و المهني و العاطفي و العائلي و الروحي إلي حد ما يعني

مش عارف أبدأ منين و لا منين

الحمد لله ربنا وفقني و رجعت لشركتي الأولانية خالص و الدنيا أتظبطت فيها ماديا بعد الثورة و بقي في تثبيت بالرغم من إني من الناس اللي مش مؤيده لموضوع التثبيت ده لأنه بيخلي العامل قليل الأدب و قليل الضمير و غير طموح بالمرة العامل المقصود بيها هنا من أكبر كيميائي أو مهندس لأصغر عامل

و الحمد لله خطبت و إن شاء الله عن قريب هأتجوز

و الحمد لله مستقر نفسيا مع نفسي و مع عائلتي

و مهما حمدت ربنا فعلا مش هأقدر أشكره علي أقل نعمة واحدة من اللي أنعم بيها علي و يمكن اللحظات الصعبة المريرة اللي مرت علي طول حياتي و بالأخص من أكتوبر 2010 حتي أكتوبر 2011 هي نفس اللحظات اللي بتحسسني بمدي النعم اللي أنا فيها حاليا و مخلياني سعيد في حياتي و بأحوالي و بظروفي بالرغم من إن في ناس أحسن مني لكن مش حاسين بالنعمة اللي هم فيها لأنهم محسوش بعدم وجود النعم دي

اللهم لك الحمد كما ينبغي لجلال وجهك و عظيم سلطانك

و من المفاجات التانية اللي حصلت لي إني لاقيت إن فرصة إستكمال الماجستير لسه موجودة و هي معصلجة شوية بس ربنا يسهل و أكمل و لو محصلش عن يقين و ثقة هيكون في عدم التكملة الخير لأن ربنا مقدر الخير في كل شئ للإنسان

كنت خلال شهور بطالتي في البيت من أكتوبر 2010 حتي مارس 2011 عامل درافت لبوست عن الفترة دي و مسجل فيه شوية مواقف لكن مسحتة علشان منزلوش بس بجد ياشباب كانت فترة من أصعب فترات حياتي تقعد في البيت بعد خمس سنين شغل كان إحساس رهيب و كان في فرصة شغلانة كويسة علي الأبواب و الأنترفيو بتاعتها كانت يوم الأربع 26 يناير 2011 و تقريبا عديت بس طبعا أنتم عارفين اللي حصل يوم 28 و ما أحلي ما حصل حتي الأن يعني

المهم بعد كده أشتغلت في شركة صغيرة في أكتوبر و ما أدراكم ما أكتوبر و ما المحور و ما العمل في شركة صغيرة بعد العمل في شركات كبيرة و كانت من أصعب أيامي لكني كنت كل يوم ما أدخل المعمل أقعد أقول لربنا ضاقت أوي يارب الفرج يارب و كنت حاسس إن فرجه قريب أوي و الحمد لله عدي حوالي ست شهور و كان الفرج لأنها كانت ضاقت أوي علي

بجد نفسي ربنا يكرمني و أنجح و أنجح في حياتي و هيكون أكبر أهداف حياتي هي القضاء علي البطالة لأنها فعلا بتتدمر الإنسان معنويا و جسديا و عقليا

الملحوظة اللي تستحق الدراسة بجد ياشباب إن تعامل الناس مع بعض في الشركة الصغيرة أطيب و أحن و أرق مع بعضهم من الناس اللي بتشتغل في شركة كبيرة و الشغل فيها ترفيهي و المرتبات فيها محترمة

و ربنا يهدي الجميع و يجازي كل واحد علي قد نيته و عمله و ضميره

أنا فرحان أوي إني بأكتب البوست ده و لأول مرة من ساعة أما دخلت العالم المجنون ده يكون نفسي البوست بتاعي الناس كلها تقراه و تعلق عليه

مش هو ده كل الكلام اللي كنت عاوز أقوله في كلام تاني كتير بس مش كله مرة واحدة علشان متزهقوش مني

نصيحتي لكم ياشباب تتلخص في كلمتين فقط

ثقوا بالله

اللهم لك الحمد كما ينبغي لجلال وجهك و عظيم سلطانك

2011

اللهم لك الحمد كما ينبغي لجلال وجهك و عظيم سلطانك

الحمد لله

الحمد لله

الحمد لله

2012

يارب تكون علي الأقل زي السنة اللي فاتت

و

طمعان في كرمك يارب إنها تكون أحسن

الحمد لله

السلام عليكم

و كل سنة و أنتم طيبين و بألف خير و يارب يكتب لنا زيارة بيته الحرام السنة اللي جاية إن شاء الله

قبل لحظات قليلة من الوصول كالعادة لنقطة الضعف المعتادة ليلة كل عيد و اللي متعود عليها من و أنا صغير و الشعور المفرط بالوحدة و اللي لم يستثني منها غير عيد واحد تقريبا

أفتكرت إني مصليتش العشاء و مع السلام في نهاية الصلاة تذكرتك أيتها المدونة العزيزة فقلت أخش أفضفض معاكي كعادتنا اللي يارب تتقطع بقة

قبل أما أبدا كتابة البوست ده لفيت لفة سريعة علي كم بوست معينين مميزين عندي البوستات نفسها غير مميزة لكن التعليقات هي اللي مميزة بالنسبة لي

الحمد لله علي كل حال

خايف أتسرع و خايف أضعف و خايف أكسل و خايف أفشل و خايف أعمل ذنوب

أحيانا الشعور بالخوف بيكون شعور إيجابي و ساعات كتير بيكون شعور سلبي

مشغل دلوقتي رباعيات صلاح جاهين بصوت علي الحجار بتحسسني بالدفء شوية و بتخفف الوحدة شوية معايا

كانت من عاداتي من زمان دايما في دعائي و رجائي لربنا كنت دايما أقول لو حصل كده هأتغير و هأبقي إنسان تاني و أجتهد و أنجح بس مؤخرا مبقيتش أعمل كده علشان أنا مش هأعمل كده و مش عاوز أخلف وعد مع ربنا و ثانيا إن ربنا كريم و مش محتاج وعود مننا علشان يلبي دعائنا لأنه خزائنه لا تنفذ الحمد لله علي كل حال

بمناسبة الجزء ده كان في لقطة في فيلم بيرل هاربر بتقول كده بس بطل الفيلم بينفذ وعده و مبيطلبش حاجة تاني من ربنا و كان طلبه إنه يشوف وش حبيبته مرة واحدة و هو كان ساعتها غرقان في البحر و فعلا حصل و فعلا مطلبش حاجة تاني من ربنا ده في الفيلم يعني

علي الحجار بيقول : لابد من يموت شئ علشان يحيي شئ عجبي

للأسف الواحد مش قادر ينفذ الوعد اللي خده علي نفسه

و بأقلق كل مرة زيادة و نفسي أتكلم بس خايف أتفهم غلط بس أرجع و أقول ربنا موجود معانا كلنا و اللي مقدره هيكون و إن شاء الله هيكون فيه الخير للكل

ياااااااااااااااااااااااااااااااااااااااااااااااااااااااااااااااااااااااااااااااااااااااااااااااااارب

يالله

اللهم ارضني بما قسمته لي ثم بارك لي فيه

من سخريات الكلام اللي سمعته من الناس مؤخرا كنت بأقول قدر الله و ما شاء فعل حد بيقولي يعني خلاص شئ تافهة و عدي و ده دليل علي إن كل حاجة نسبية حتي الكلام الواحد بيقوله بنية معينة و الناس بتستقبله بنية تانية مناقضة تماما

الحمد لله بقالي فترة مقاطع الفيسبوك و التويتر

الحمد لله الحياة ماشية في سلام و هدوء ممكن تكون مصحوبة بإحساس بنقص شئ مهم في الحياة لكن هي دي الحياة مش بتدي كل شئ و لازم نرضي باللي مقسوم لنا و نتعامل مع فقدان أي شئ نفقده أوي أي حد و نرجع نقول الحمد لله

أحيانا كتيرة كنت بأكون علي وشك الضعف و ممكن يكون البوست ده من هذه الفترات بس أهو المدونة بالنسبة لي أهم من الفيسبوك و تويتر و الضعف في المدونة مش ضعف

الحياة كانت ممكن تكون أحسن من كده بكتير بس بردوا الحمد لله قدر الله و ماشاء فعل

حسيت إني كبرت أوي بعد عيد ميلادي 29 و حسيت إن خلاص يالا حسن الختام

حلو أوي شوية الفضفضة دول و كفاية لحد كده علشان منعكش

اعتذار إلي معلمتي

السلام عليكم

كالعادة من ساعة أما عملت هذه المدونة المجنونة بيجي لي إفراط في الكتابة فيها في رمضان بس مش مشكلة

إمبارح بالليل و أنا علي البستان و قدرا أشتريت و أنا راجع المجلد الأول من مجلدات دستوفيسكي و بدأت أقرأ فيه و نمت لي حوالي ساعة و صحيت للسحور و نمت تاني خلال ده كله كنت بأفكر في كتابه البوست ده نقدر نقول اعتذار أو شئ أكبر من الإعتذار لو ينفع فكرت فيها و لاقيت نفسي لا أستحقها و فعلا هي كانت اللي هتخسر كتير لو كنا أستمرينا و ممكن كنا نفشل بسببي أنا

أنت إنسانة جميلة و رائعة كان نفسي علي الأقل نفضل أصدقاء بس ده كان هيبقي صعب علي

كان نفسي أشوفك دايما كان نفسي أمسك أيدك كان نفسي ربنا يجعلني سبب لفرحتك

كان نفسي أستني رنتك علي الفطار و في السحور

أشكرك إنك علمتيني أعرف أعيش إزاي و أستمتع بحياتي إزاي

أشكرك علي إنك كنتي سبب إني أعيش أسعد أيام حياتي لحد دلوقتي

أسف إني مسمعتش نصايحك في حاجات كتير

أسف إني سببت لك أي جرح

محيراني يا2011

كنت قاعد مستني 2010 تخلص علشان كنت قرفت منها علي الأخر و كنتس مستني 2011 بفارغ الصبر

بدأت 2011 من سؤال علي الفيس بوك حد هنا من أسكندرية ليه ليه لقينا تفجير كنيسة القديسين بيني و بينكم أتشائمت قلت ياريتك يا2010 كنتي أستمريتي

بعدها بشوية كمان لقينا الشهيد سيد بلال قلت كملت

بعد بشوية بن علي هرب بن علي هرب شعب تونس العظيم

بدأت تندع شوية أهيه

هب 25 يناير و التنحي و أيام في جنة التحرير

هب حبة قلق و إنفلات أمني و بلطجة

هب نزلت شغل بعد خمس شهور تقريبا في البيت

طبعا الشغل تعبان و ظروفه مش و لا بد

بعد كده فرقه و وحده من جديد

عروسة جديدة هتنورنا علي شهر 12

مش عارف أنت غريبة أوي يا 2011 بتخلي كل الناس حواليا فرحانة و الطبيعي و المفروض و اللي نفسي فيه أفرح معهم لفرحتهم بس مش عاوزاني أفرح مش عارف أعملك أية؟

أفراح عامة كتير و أحزان شخصية كتير مخليناني مش عارف أفرح بالأفراح العامة

يارب أفرجها في الكم شهر اللي فاضلين منها

فضفضة مضلمة

السلام عليكم

بما إن الحمد لله مش ناس كتير بتتدخل هنا الواحد يفضفض براحته بقة و مفيش سياسة

اليومين دول عمال أسمع كم أغنية غريبة مالهمش علاقة ببعض و زهقت منهم و مش عارف أسمع غيرهم Sway و أسكت متقوليش و أنا مش كداب و علي قد ما حبنا التسجيل القديم و حاحا للشيخ إمام و أخيرا فاتت جنبنا علي إذاعة حليم اللي فتحت و تقريبا الأغنية بتيجي كل ساعة مرتين

الأسبوع ده زميلي في الشغل مجاش أجازة مرضي و أتدبست في الشغل طحن الأسبوع ده و كملت كمان نازل شغل الجمعة و السبت و ربنا يسترها بكرة و ميحصلش قلق علشان الواحد ميبقاش هيتجنن في الشغل

أرجع و أقولك يامدونتي العزيزة الله يسامحك أنت تقريبا السبب في كل ما أنا فيه أنت السبب

ضلمت و قفلت أوي أوي و بجد مش قادر و بجد أتخنقت و بجد مفيش غير فكرة الموت بس هي اللي مسيطرة علي اليومين دول و ربنا يستر

هو بجد زي ما علي الحجار بيقول كل عذاب الدنيا هيروق بكرة لينا و هو أنا هأبقي ذكري في الليلة الجميلة و القصة هتخلص علي كده و لا أية اللي هيحصل

أتخنقت أتخنقت أتخنقت

أفرجها يارب في كل حاجة

نفسي أسافر مع إني عارف و متأكد إن السفر صعب بس بجد نفسي في حياة جديدة مع ناس معرفهاش و بيئة مختلفة نفسي يبقي لي فرصة إني أتولد من جديد

نفسي أرجع صغير تاني تعرفوا و أنا بأفطر الصبح في الشغل أحيانا كتير بأشم ريحة السندوتشات اللي ماما كانت بتعملها لي في المدرسة كنت أحيانا كتير بأخبي شوية من السندوتشات دي في البيت علشان ماما كانت بتعمل لي سندوتشات كتير أوي

نفسي في جو الصبح بتاع زمان لما كنت بأصحي و أنزل في الصيف و أنا قاعد عند جدتي أشتري فطار و شيبسي اللي في الكيس الأحمر ده مكنش في غيره أساسا الهوا نفسه الأيام دي كان له طعم تاني

نفسي ماشيليش هم بكرة نفسي أصحي الصبح فرحان نفسي أنام كل يوم الساعة أتناشر مش الساعة تسعة تعرفوا أنا الأيام دي بأنام بدري أوي علشان اليوم يخلص بسرعة و الأسبوع يجري و الشهر يمر و السنة تعدي و العمر يفوت يمكن أموت بقة و نخلص

كلكعت أوي و أنا مش حمل كده أنا عارف حالي الحمد لله أحسن من ناس كتير بس مش عارف أوصلها إزاي نقول مثلا أن أنا مش حمل اللي أنا فيه يعني ممكن يكون في ناس أقل مني كتير و ربنا حرمهم من نعم كتير عندي بس كمان رزقهم القدرة و الصبر علي حالهم و القدرة و الصبر دول مش عندي أنا ياريت حد يكون فاهمني

هو أنا غلطت في أية سؤال في ذهني تقريبا مغلطتش الحمد لله غلطات كارثية بس مش عارف الحال عمل كده ليه معايا

كل اللمبات أتحرقت في وقت واحد

إمبارح شفت علي المحور حادثة و شفت للأسف شخص ميت و كنت شفت حوادث قبل كده و كانت الفكرة اللي بتخطر علي بالي علي طول حال أهل الشخص ده حد خارج الصبح يجري علي رزقه يرجع جثه ربنا يرحمنا جميعا و يحسن ختامنا

هو أنا غلطت في أية؟ غلطت إني أستنيت سنتين و عشت في وهم كبير غلطت إني حبيت غلطت إني حبيت الشخص الغلط غلطت إني حبيت في الوقت الغلط غلطت إني حبيت و أنا عارف إنه مش وقته بالنسبة لي غلطت إني أتسرعت نفسي أعرف غلطت في أية؟

المهم إني مش عارف أصلح اللي أنا عملته و حطيت نفسي فيه ساعات بأكون سعيد بالألم ده تخيلوا سعيد إني بتألم

طيب ليه بأتعامل كده قبل و بعد و في خلال؟؟ غلطت في أية

بيجي علي بالي اليومين دول جملتين من فيلمين ليوسف شاهين

الرجل أبو سويلم ده أخرته وحشه لسانه مبيبطلش كلام أبدا

و التانية من فيلم صلاح الدين

عسكري صليبي بيقول للتاني كل هذا نهايته الموت

في كلام كتير ممكن أقوله بس مش هأقوله لسببين إنه ممكن يزعل شخص معين مني و أنا مش عاوزه يزعل بالرغم من إني عارف إنه مش بيدخل علي المدونة لكن أهوة الإحتياط واجب

و السبب التاني ممكن كلامي يدخل في مجال الهرطقة و بكرة جمعة الإسلاميين و مش طالبة قلق

نفسي أنعزل عن العالم نفسي أقفل الأكونت علي الفيس بوك و علي تويتر نفسي أعيش مع نفسي لو مش هأعيش مع الناس اللي عاوز أعيش معهم بعد مش عارف أية الأمور كلها واحد

و تصبحوا علي خير و ياريت الرسالة تكون وصلت

نوم الطفولة

السلام عليكم

أزيكم يا أصدقائي

بداية لازم أشكركم علي تعليقاتكم الغالية علي البوست اللي فات طبعا هم عددهم قليل بس من أشخاص أعتز بصداقتهم و معرفتهم

بجد شكرا

بعد كده اللي خلاني أكتب البوست ده هو إني كنت عاوز أكتب أستاتيوس علي الفيس بوك بس من ساعة الثورة الواحد مش عارف يرجع للإهتمام بالحياة الشخصية خالص الواحد بيستصغر أي حاجة قصاد اللي بيحصل و بيمر بالبلد بس قلت أكتب هنا في المدونة المتواضعة بتاعتي سبب فرحتي و شقائي

الأستاتيوس هو

مينفعش الواحد يرجع عيل صغير لمدة ساعة بس

الأستاتيوس دي سببها إني إمبارح قلقت من النوم الساعة 3 إلا عشرة و معرفتش أنام تاني لحد الصبح و قمت رحت الشغل و الحمد لله يوم الشغل عدي بسلام من دون أخطاء نتيجة قلة التركيز بسبب قلة النوم

الواحد مفتقد النوم الهادي نوم اللي بينام و مش شايل هم حاجة نوم الطفل بينام و خلاص

أنا الحمد لله أحسن من غيري كتير بس شايل هم الشغل و التفوق و المستقبل و عيلتي و إزاي أفرحهم و مستقبلي و جوازي و مراتي و أولادي بإعتبار ما سيكون بإذن الله

أنا دلوقتي علي أعتاب التلاتين و مش مصدق و مش حاسس أنا حاسس إني لسه طفل بهموم رجل كبير و إمكانيات و أحلام الطفل مش متوافقة مع واقع و متطلبات الرجل الكبير و مش عارف الأقي أرض محايدة يقعد فيها الطفل مع الرجل الكبير أبدا

أحيانا كتير بأمسك نفسي و أنا بأحلم أحلام خيالية طفولية بأحاول أوقف نفسي ساعات بأنجح و ساعات لأ

مشغول بمحاولات البحث عن وظيفة جديدة تقريبا بقة شئ أساسي في حياتي موضوع البحث عن وظيفة ده و من المحاولات دي العودة للشركة اللي كنت بأشتغل فيها زمان تقريبا أول ما بدأت التدوين مديري في الشركة دي أترقي و بيحاول يرجعني الشغل مش عارف هينجح و هيقدر يقنع العضو المنتدب و لا لأ

ظروف الشركة دي أتحسنت جدا بعد الثورة بالرغم من إن معظم اللي فيها كانوا كل شوية بيتصلوا بيا و أنا في التحرير علي إعتبار أنا قائد الثورة يعني و يقولولي كفاية كده دلوقتي أتظبطوا و أتروقوا من خير الثورة دي

صحيح ده من الأشياء اللي خلتني أزعل من نفسي الفترة اللي فاتت و هي وجود نوع من الغصة في حلقي تجاه الناس دي بالرغم من إنهم شغالين و مش شغالين بس عايشين و حياتهم بتتظبط علي حساب ناس تانية يعني الشركة دي شغالة و بتبيع منتجات من غير ما بتعمل حاجة بتبيع بإسمها و منتجاتها القديمة و بالرغم من إن كل الشركات الخاصة اللي طلعت بعدها عمالة تكبر و تستثمر أكتر هي تقريبا زي ما هي هي أة بتكسب أرباح رهيبة بس ممكن الأرباح دي تكون أكتر من كده بكتير بشوية تنظيم و شوية شغل صح

بس أنا وحش أوي في النقطة دي و زعلتني جدا من نفسي و مش عارف أعمل أية؟

و يمكن يكون ده بردوا نتيجة كثرة الذنوب و البعد عن ربنا الفترة اللي فاتت و بردوا مش عارف أرجع

نفسي أرجع طفل لمدة يوم و لا ساعة نفسي أنام علي السرير مفكرش في حاجات كبيرة نفسي أفكر في أمور تافهة بسيطة نفسي أضحك من جوة قلبي نفسي ألعب في الشارع كنت شوارعي أية كنت من الساعة 5 المغرب لحد الساعة 1 بالليل في الشارع

نفسي أحب زي زمان حب من طرف واحد و مستخبي

نفسي أشتاق إني أروح السينما

نفسي أبطل أرغي و أصدعكم

:))

نفسي أسمع صوت البحر في ودني علي طول و مسمعش صوت الناس نفسي مسمعش صوت الدوشة و لا الزعيق و لا الخناق

.

بالنسبة للشغل في واحدة كانت معايا هتقدم لي في الشغل عندها في وزارة هو مرتب ضعيف بس موظف بحت أخلص الساعة 3 أنا مش حابب الشغلانة دي بس أهوة هأعمل أية

أنا حابب جو المصانع و المشاكل و البلاوي و الصراع الأزلي بين الجودة و الإنتاج حتي الشركة اللي بأحاول أرجع لها دمها واقف علشان شركة كبيرة بس للأسف الواحد بيدور علي الأستقرار بقة الشركة اللي أنا فيها جو شغلها حلو بس للأسف صغيرة أوي أوي أوي و بعيد و كمان العائد المادي في الضياع

ربنا يكرم

نفسي بقة دكتور سمير الصياد وزير الصناعة و بالمناسبة كان دكتوري في التمهيدي و أكيد جبت سيرته أيام الشكوي و النواح أيام التمهيدي نفسي يعمل حاجة كويسة كده لتنشيط الصناعات الصغيرة و المتوسطة زي ما قال فعلا و قريت خبر النهاردة عن وضع خريطة بالمناطق اللي هيشجعوا فيها الصناعات دي يارب أعرف أدخل الحتة دي أو أخد حتة أرض و نستصلح بالرغم من إني لا أفقهه شئ عن الزراعة بس أهوة بقة الواحد زهق

هأخصل الشاي بالقرنفل و أقوم أنام

أدعو لي أنام نوم الأطفال و لو لليلة واحدة

الثورة و الخجل

السلام عليكم

بعد السلام و التحية

سؤال لم أكن أتخيل أن أسأله لنفسي

هل سيأتي يوم أخجل فيه من إشتراكي في ثورة مصر

كان في مواقف و أحداث كتيرة ممكن تخليني أسأل نفسي السؤال ده لكن عديتها و لم يخطر ببالي اللي خلاني أسأل نفسي السؤال ده هو موقف ابن عمتي النهاردة من الثورة معايا حسيت إنه فعلا مغلول من الثورة و ماصدق يخلي الكلام عن الثورة يجي علشان يشتم و يدعي علي اللي اشتركوا في الثورة فقلت له ليه بس بتهريج قالي ما أنا عارف إنك كنت منهم فتخيلت في الأول إنه بيهرج لكن من كلامه و إنفعاله معايا في الكلام لأول مرة تقريبا نتناقش في موضوع مع بعض لفرق السن بينا

حسيت إنه قاصد يدخل معايا في معركة مش مناقشة عنده غل كبير من الثورة و اللي اشتركوا فيها و تقريبا ميعرفش حد غيري أشترك فيها و كان قاصد يطلع الشحنة اللي جواه منها فيا أنا

من جمل المعركة

عاوز تفهمني إن جملين و حصانين رايحين يموتوا مليون

قلتله ساعتها مكنوش مليون و لا حاجة كانوا حوالي عشر الأف و بعدين هي الفكرة في العدد لا الفكرة في الموقف نفسه

بيقولي اللي نزلوا التحرير نزلوا غلط كانوا فاكرين إن اللي في عبدالمنعم رياض مؤيدين و اللي في التحرير المعارضين

أقوله إزاي يعني يقولي أنا شفت ناس في مصطفي محمود راجعين متبهدلين قلتله أية اللي وداهم التحرير

أقوله ياعم أنا صحابي كانوا بيجوا من المحافظات يوقفهم و يمنعوهم في المؤسسة و عبود

يقولي أنا كنت هناك يوم خطاب حسني مبارك بالليل اللي قبل موقعة الجمل أقوله أنا كنت بايت هناك يقولي يعني مسمتعتش اللي قعد يقول في الميكروفون بيضحك عليكم و مش هنمشي و هنقول أية لأمهات الشهداء

أقوله ياعم دول لو صبروا يوم كانت الناس مشيت لوحدها

يقولي يسلام أنا سامع الواد بيقول كده في الميكروفون الساعة 2باليل

يقولي أنتم شباب ضايعين حضرتوا العفريت و مش عارفين تصرفوه

.

أقوله أنت مستني اللي قعد يخرب تلاتين سنة إحنا نعدله في شهرين تلاتة

أقوله أقرب مثل إمبارح قريت خبر عن تعديل في خط في خط سير الخط التالت للمترو هيوفر أتنين و نص مليار جنيه يقولي و بعدين و أية اللي أنا أستفدته أقوله ياعم مش لازم تكسب بطريقة مباشرة مش في ناس مرتبتها زادت و اللي كانوا بعقود أتثبتوا يقولي أنا مفيش جنيه زدته

الرد بتاعه هو أة حسني مبارك كان حرامي هو اللي حواليه و كل حاجة بس كنا عايشين في أمان

الحكومة مكنش عندها كرامة بس كان ليها هيبة

تعالي عندنا كل يوم في ضرب نار و الدنيا كلها بقيت عصابات

ده الأول لو كان عيل ضرب طلقة كانت الدنيا بتتقلب و مبتقعدش و البوليس مش بيسكت

.

وبردوا في كلامه جاب سيرة الناس اللي ماتت في الهجوم علي الأقسام يقولي دول شهداء أقوله ياعم شهيد و لا مش شهيد مش بالأسم هي حسابه علي ربنا بس نسأل ليه حتي لو هو بلطجي ليه هاجم قسم الشرطة مش علشان كان بيتنفخ هناك سواء عمل حاجة و لا معملش يقولي إحنا شعب كده لو متعملوش كده الناس دول هيبقوا بلطجية يعني هيبقوا بلطجية أقوله ياعم ربنا بيخلقنا كلنا علي الفطرة السليمة و البيئة و التربية و التعليم هي اللي بتأثر و أقوله يعني لو هو أتعلم كويس و أتعالج كويس هيبقي بلطجي بردوا يقولي أة هو أنت لو جبت أسد و ربيته و نيمته علي ريش هيبقي كويس

أقوله المقارنة مش في محلها إحنا بني أدمين

يرجع يقولي جملين و حصانين هيموتوا مليون

أقوله ياعم و النعمة أنا كانت بايت هناك

و لا كأني بأتكلم

.

أيقولي دلوقتي لو في واحدة عاوزة تتطلق من جوزها بتنزل تعمل مظاهرة

البلد خراب

خربتوها

حسبي الله و نعم الوكيل

بجد مش تهريج

.

أنا كل المواقف اللي فاتت أتعرضت لها بالإضافة إلي حملات التهكم و التريقة علي كل حاجة و لزقها بالثورة من الكائنات العجيبة اللي بتركب معايا أتوبيس الشركة اللي لسه الثورة لم تصل لها بردوا هي كمان يعني مفيش عقود مفيش تأمينات مفيش تأمين صحي مفيش ظروف بيئية مناسبة للعاملين و لما يجوا بتوع البيئة بيعدوا مرور الكرام

الناس شبعت و تعودت علي الفساد

تخيلوا أتنين بعربيات علي المحور بيتخانقوا تخيل بيقولوا أدي الثورة ياسيدي قال يعني بروح أمهم الناس مكنتش بتتخانق مع دبان وشها قبل الثورة شوف سواقين الميكروباصات غلوا الأجرة و بيركبوا الناس أربعات قالي يعني قبل الثورة كان لو الواحد ركب مرتين بياخد التالتة مجانا و كانوا بيقعدوا أتنينات في الكنبية يعني

أنا خايف الثورة دي تفشل

اللي قلقني أوي إن في مؤشرات كتيرة بتقول إنها هتتجه للفشل أو الإلتفاف أو إستمرار الوضع السابق بوجوه جديدة فقط

و للعلم اللوم مش هيبقي علي الناس اللي هتعمل كده

اللوم هيبقي علينا إحنا لأننا مش عارفين نتفق مع بعض و مش عارفين نبقي ديموقراطين و لا ليبرالين مع بعض

و الأخطر من كده الناس اللي أنا بأتفق معهم في الفكر لغتهم وحشة و منفرة جدا للناس البسيطة دول لو تنازلوا و تواضعوا و أتكلموا معاهم بالرغم من الناس اللي أنا شايفهم فاسدين أو أصحاب منهج مش سليم من وجهة نظري كل يوم بيكسبوا أرض جديدة و بيثبتوا أقدامهم و أيديهم علي الثورة سواء بطريقة مباشرة أو بطريقة غير مباشرة من الهجوم و إظهار غلط الثوار و الثورة و قلة أدبهم

الثوار حاليا يا إما إخوان و إسلاميين مع المجلس العسكري و الخطوات اللي بياخدها يا إما ناس بتهاجم الإخوان و الإسلاميين و معاهم المجلس العسكري

و فلول الحزب الوطني و الفاسدين و المفسدين و المنافقين و الرقاصين عمالة تكسب أرض جديدة كل يوم و لو مكسبتش أرض بتنقص من قيمة الثورة كل يوم

المجلس العسكري

الإخوان

الأقباط المتشددين

السلفيين

المعتصمين

الثوريين اللي لسانهم طويل

توفيق عكاشه

شوبير

مرتضي

محمد حسان

حسين يعقوب

البرادعي

الغزالي حرب

بثينة كامل

نوارة

بلال

نجيب ساويرس

إئتلاف الثورة

إتحاد الثورة

صفوت حجازي

ابراهيم عيسي

عبود الزمر

وائل غنيم

عمرو موسي

البرادعي

شفيق

مني الشاذلي

ريم ماجد

زويل

فاروق الباز

عصام شرف

و أخرين كتير

من منكم خائن و منافق ومن منكم منقض علي الثورة و من منكم سألعنه و من منكم سأشكره و من منكم سيخذلني

و من منكم سيجعلني أخجل من إشتراكي في الثورة؟؟؟