أخيرا

السلام عليكم و رحمة الله

أخيرا هأكتب تاني هو أينعم ماتش ريال مدريد و ليفربول شغتل بس هأحاول ما صدقت نزلت نسخة الويندوز علشان كانت اتضربت بسبب الإعلانات و الاسبام
بس الحمد لله مفيش خسائر

من فترة طويلة أوي نفسي أكتب و مش عارف مفيش وقت مش عارف اليوم بيجري في أية
عندي أخبار كتير  و مواقف كتير و أحلام كتير و إيجابيات كتير و سلبيات كتير

نسيت أقولكم إن من أكتر الحاجات اللي خلتني أقل في الكتابة هي عدم التفاعل فبرجاء اللي يقرأ ينتش تعليق
و من الحاجات اللي شجعتني علي الكتابة موضوع رجوع يوسف و ماماته اللي قلب الدنيا و بوست من إنجي سمراء النيل و حديثها عن لقاءات المدونين في 2006 و في نفس ذات الوقت عدم مقابلة الشلة من فترة ليست بقصيرة

علي فكرة المعلق حفيظ دراجي اللي بيعلق علي الماتش ده خنيق أوي

الحمد لله الدنيا ماشية اليومين دول في الشغل كويس و مفيش أفكار تراودني عن تغيير الشركة و لا المجال حاليا بعد الجواز و الخلفة و كده

الحمد لله في فترة نفسية متزنة
ناقصني بس إني أجتهد شوية و مضيعش وقتي في كلام فاضي

ريال مدريد جاب جول
رئيسي في الشغل اليومين دول عاوز بوستات لوحده و حال الشركة اللي بأشتغل فيها كله محتاج بوستات لوحده و لا أبالغ لو قلت عاوز مدونة لوحده بإختصار هي عاملة زي مصر سرقة كتير كلام كتير خناقات كتير حقد كتير رضا وشغل قليل جدا

بس اللي لاحظته في تنقلي المهني إن كل أما المرتب يزيد حرص الناس علي الفلوس و المناصب و صراعاتهم تزييييييييييد جدا

مفيش رضا مفيش قناعة مفيش إقتناع إن الدنيا دي مش مستاهلة و مش مضمونة و المتعة اللي في الحياة  صدقوني مش في الفلوس و لا المناصب
المتعة الحقيقية في السعادة و السعادة مش بتيجي غير بالرضا و القناعة

يعني ممكن يكون واحد مليونير و يبص علي اللي عنده مليارات فيبقي تعيس
و ممكن يكون واحد عنده أوضه علي السطوح فيبص للي بيبات في الشارع فيرضي فيسعد

المهم التدوين وحشني أوي و ناس التدوين وحشوني أكتر

اليومين دول بقيت أحلم و أنا نايم و أفتكر الحلم و أصحي منتعش معرفش ده بسبب الشتا و لا أية
في أغاني بترن في ودني كتير اليومين دول زي علي قد ما حبينا و مدام معاي و أنا عايز صبية

الريال جاب التاني

هأعتبر البوست ده بداية العودة و ياريت أكتب لكم تاني قريب
وحشتوني و الله

السلام عليكم و رحمة الله و بركاته

أزيكم ياشباب ده لو في حد لسه بيدخل علي هنا

أتمني لو في حد بيدخل هنا يسيب تعليق حلو كده و محترم

 

هذا البوست علي أنغام أوكا و أورتيجا و محمد رمضان (يالها من دوشة و صداع)و لكن بتفوقني

مبدئيا مش نادم علي 25 يناير و مش نادم علي 30 يونيو

و أي كان اللي هيكسب دلوقتي مش فارق معايا اللي هيعمله

أنا كنت مخنوق من مرسي و الإخوان علشان كانوا بيشتغلوا بإسم الثورة يعني دلوقتي لو حبوب الهلوسة اللي بياخدوها دلوقتي جابت نتيجة و مرسي رجع مش هيفرق معايا و مش هأكون متضايق زي الأول لأنهم هيكونوا أشتغلوا و يستحقوا اللي هيعملوه

كنت مخنوق جدا من إن مرسي و الإخوان هم اللي بيتكلموا بإسم الثورة مش عارف صح و لا غلط بس ده اللي جوايا هتقولي يعني الحل عودة الفلول بالنسبة لي أة و اللي عاجبه عاجبه و اللي مش عاجبه حبيبي بردوا

 

و اللي بيطمني بردوا إن اللي حصل في 30 يونيو صح العمليات الإرهابية اللي بتحصل دلوقتي و الأسلحة اللي بيتسخدموها أكيد بيجمعوها من قبل مرسي و في وجوده بردوا كانوا بيجمعوها ليه معتقدش علشان تحرير الأقصي يعني هتقولي هم إرهابيين ملهمش علاقة بمرسي و الإخوان طيب ليه مكنوش بيستخدموا الأسحلة دي أيام مرسي و ليه مرسي محاربهمش و قضي عليهم يبقي علي الأقل هم كانوا مستفيدين بوجود مرسي في الحكم يبقي كان في صفقة بصورة مباشرة أو غير مباشرة

 

أنا اللي صعبان علي دلوقتي الدم اللي بيحصل كل يوم فنفسي كل صاحب عقل يفكر قبل ما ينزل هو هيعمل حاجة و لا هيموت ببلاش اللي معارض يعارض براحته بس ميضيعش قوته في الفاضي

 

الناس كرهت الإخوان و كرهت مرسي (طبعا ما عدا الناس اللي تشل اللي معايا في الشغل)بس مش مهم

الناس اللي معايا في الشغل دي محتاجة مدونة لوحدهم

 

اللي كان بيكرهه مرسي من السلفيين دلوقتي بينزل علشان يرجعه و اللي شايف إن مرسي بقي زعيم بعد ما أتعزل و اللي مصدق إنها حرب علي الإسلام و  شايف إن مرسي خلاص راجع واللي شايف إن الإنقلاب فشل و الليهلم جره و اللي بردوا نفسوا السيسي يمسك  حاجة كده تشل

 

المهم الواحد مهروس في الحياة و مش عارف الدنيا بتجري كده إزاي

 

النهاردة اليوم كان جميل الحمد لله توضيب و ماتشات و قعدة في البلكونة في الهواء الطلق و كمان كتبت بوست ده فل الفل

 

نفسي بس ياجدعان ترجعوا تتدونوا بقة واحشيني جدا جدا جد

 

و نفسي أشوف المدعوييين مفيد و منذر و الحسيني و عبقرينو و ميدو و الساعاتي

 

كفاية رغي بقة

كلمة لكل الخنافس هل من منافس

ليلتكم بتشكل (أغنية قلب الأسد)و السلام عليكم 

I'll never hate 25 Jan

السلام عليكم و رحمة الله

أزيكم ياشباب

نفسي أكتب لكم من زمان

ده لو أنتم موجودين أساسا

مبدئيا ياجدعان هو إزاي نقدر نحارب فكرة إلغاء الريدر

الريدر ده حاجة مهمة جدا بالنسبة لي و يوم إكتشافها كان يوم عالمي طبعا الكلام ده من يجي 7سنين تقريبا يانهار الواحد علي البلوج دي من زمان

 

المهم بقة البوست ده فكرت أكتبه في أستاتيوس علي الفيس بوك بس لاقيت نفسي عاوز أكتبه في بوست خصوصا بعد أما لاقيت رسالة من صديق غالي من زمان مبدأش هو بالإتصال بيا

 

مش هأكرهه الثورة مهما حصل إن شاء الله

مهما أستمر الفساد و النفاق

مهما حال البلد لسه متعدلش

مهما حصل بيني و بين صحابي اللي نزلنا مع بعض في الثورة

مهما المتخلفين اللي معايا في الشغل شتموا  في الثورة

مهما دعاة الإستقرار في كل زمان و مكان أتكلموا و فتو

مهما حصل

مش هانسي اليوم ده يوم غالي يوم شم قنابل الغاز لأول مرة

يوم الحلم اللي مش مصدق إني عشته لحد دلوقتي

اليوم ده هأفضل أفتخر بيه قدام  ولادي إن شاء الله مهما حصل حتي لو طلع اللي عملناه غلط بس وقت ما كنا بنعمله  كنا متأكدين إننا بنعمل الصح

اللي مضايقني بس إن مقصر  في حاجات كتير اليومين دول و مش قادر أنظم وقتي و أستغله صح

ربنا يكرم

 و اللي  مضايقني جدا هو رؤية بعض أصدقائي الأعزاء جدا و هم بيتغيروا و بيتغروا و اتمني إنهم يفقوا علشان ميصحوش علي كارثة و مش هأقدر للأسف أقولهم علي خوفي عليهم بصورة مباشرة لأسباب خاصة

حلو كده و كفاية عليكم

بالمناسبة الحمد لله لسه متفرج علي الحلقة الأخيرة من مسلسل علي مر الزمان الحلقة ال200 و إن شاء الله مش هأتفرج علي الجزء الثالث علشان أنا هيجي لي أمراض الضغط و السكر لو أتفرجت عليه

 

 

الرغي المعتاد

السلام عليكم

أزيكم يامدونين ياللي مش بتيجوا هنا أساسا

تامهم تاحمد لله وصلت للكيلو الثامن بعد المائة و ذلك من حيث الكتلة

نفسي أنام و هأقاوم النوم علشان أكتب البوست ده

الواحد معندوش ثقة في حد خالص من السياسيين اللي موجودين حاليا

الواحد بردان و هو قاعد يدون في البلكونة

نفسي أقابل العيال مفيد و منذر و الحسيني و الزعيم و ميدو و فاروق و الساعاتي

نفسي أستغل وقتي

نفسي أبطل أسمع أوكا و أورتيجا

نفسي أستمر في الإستقرار النفسي و الروحي اللي بيجي لي كتير

نفسي التعليقات المخنقة اللي بتيجي من أنيموس دي متجيش عندي علشان بأفتكر حد من المدونين جه و علق عندي

رينا يرزقني بذرية صالحة

كفاية عليكم كده تصبحوا علي خير

السلام عليكم و رحمة الله و بركاته

أزيكم ياشباب أخباركم أية؟

واحشني من زمان نفسي  أكتب لكم من زمان لكن بقة ظروف النوم و الأنتخة تحول دون ذلك الواحد حاسس بحالة ملل زيادة شوية اليومين دول و إن شاء الله مش هتطول و هننتفض

الواحد تخطي الوزن مائة كيلو و نفسي أرجع تاني لما قبل ذلك و إن شاء الله هأرجع

 

الأخوة المدونين الواحد مبقاش يشوفهم خالص و الدنيا لهيت الواحد عن صحابه كتير بس بردوا هأرجع تاني إن شاء الله

هو مال البوست ده عمال يتحول لأمنيات ليه كده مع إني مكنتش ناوي أكتب كده بالتحديد يعني

بس أهوة الكلام جاب بعضه

الحج مرسي كان لسه بيخطب إمبارح و الحمد لله كنت نايم من الساعة ستة و نص تقريبا و شكله مقلش جديد يعني حوار جديد إنتخابات بتوافق هجايص هجايص يعني مش مشكلة

بس السؤال اللي بيشغلني دلوقتي هو مين هيروح الحوار بعد حزب النور ما قلب علي مرسي مش معقول بقي يبقي عصام سلطان بسحنته التنحة دي

 

يالا بردوا مكنتش ناوي أكتب ده بردوا الغريب إن مش فاكر كنت عاوز أكتب لكم أية؟

يمكن الزمالك بيكسب بالتي شيرت البينك

 

يمكن الواحد ...... ولا بلاش خليها في سري علشان السر لو طلع من الواحد ميبقاش سر

 

هو الثورة فشلت؟؟؟؟

هو مين الصح و مين الغلط؟؟؟

هو في أمل؟؟؟؟؟

نفسي أعمل حاجة مفيدة نفسي أخد شهادات نفسي أعلم نواة شغل خاص نفسي أجتهدو أسيب الكسل نفسي أنجح أوي

نفسي أشوفكم ترجعوا تتدونوا تاني

يالا و السلام ختام و لو أفتكرت حاجة تاني هأبقي أقولكم

Loading New Post

اللهم لك الحمد كما ينبغي لجلال و جهك و عظيم سلطانك

السلام عليكم و رحمة الله

اللهم لك الحمد كما ينبغي لجلال وجهك و عظيم سلطانك

 من فترة و أنا نفسي أستفرد بنفسي و بالكمبيوتر و أقعد في البلكونة أكتب بوست كده حلو من بتوع زمان و في أفكار كتير في دماغي

 عاوز أكتبها  لكن مش هتيجي في بوست واحد المهم هأحاول أكتب علي قد ما أقدر  الواحد بعد النقلة اللي أتنقلها مش عارف لسه يظبط الحياة أوي و كنت متخيل إن الواحد بمجرد ما هيتجوز هيستقر نفسيا و الأمور اللي بتضايقه هتقل طبعا الحمد لله الحياة تمام أوي بس 

لسه موصلتش للإستقرار الكامل بس في الطريق ليه إن شاء الله 

اللهم لك الحمد كما ينبغي لجلال وجهك و عظيم سلطانك

الحمد لله الدنيا تمام أوي بس ناقص شوية حاجات بسيطة أهمها تظبيط الدنيا في الشغل و لو عرفت أكمل الماجستير كان بها معرفتش 

خلاص قدر الله و ما شاء فعل 

اللي نفسي فيه بجد إني الأقي نفسي في حاجة بحبها و اعشقها و أعملها بحب و بحماس هي دي دعوتي اليومين دول

اللهم لك الحمد كما ينبغي لجلال وجهك و عظيم سلطانك

رب اشرح لي صدي و يسر لي أمري و احلل عقدة من لسان

الحمد لله رمضان ده بيعدي علي في هدوء و سعادة و خير و فضل من ربنا عكس رمضانات سابقة عديت علي في ضيق و وحدة اللم دمها علي نعمة من فضلك يالله

الشئ الوحيد اللي مفتقده بشدة الأيام دي وسط البلد من ساعة أما أتجوزت منزلتش علي البستان غير مرة واحدة قبل رمضان بس إن شاء الله مع تظبيط الأمور هأرجع أنزل تاني و أشم هواء وسط البلد و يارب لما أنزل يكون وسط البلد رجع زي وسط البلد بتاع زمان الهادي النضيف المنعش و يكون الحج مرسي ظبط وسط البلد و ظبط البلد كلها من الزبالة و الباعة الجائلين و الإنفات الأمني بس معتقدش إنه هيعمل كده بس أهوة ندعي و خلاص و الأجر علي الله

كفاية كده في البوست ده علشان أنا في الشغل و المية كانت مقطوعة الصبح و هأقوم أتوضأ و أصلي الصبح

 كل عام و انتم بخير

دعواتكم

أخيرا كتبت

اللهم لك الحمد كما ينبغي لجلال وجهك و عظيم سلطانك

أخيرا قدرت أفتح المدونة و أكتب

مشتاق للكتابة من زمان أوي وحشتيني يامدونتي و حشتوني يامدونين بجد بجد وحشتوني و نفسي أشوف تعليقاتكم نازلة ترف علي البوست ده

كنت علي وشك إني أصدق فعلا إني مش بأعرف أكتب هنا غير و أنا في حالة إكتئاب بس الحمد لله بدأت أكتب البوست ده و أنا في حالة كبيرة جدا من الإستقرار النفسي و المهني و العاطفي و العائلي و الروحي إلي حد ما يعني

مش عارف أبدأ منين و لا منين

الحمد لله ربنا وفقني و رجعت لشركتي الأولانية خالص و الدنيا أتظبطت فيها ماديا بعد الثورة و بقي في تثبيت بالرغم من إني من الناس اللي مش مؤيده لموضوع التثبيت ده لأنه بيخلي العامل قليل الأدب و قليل الضمير و غير طموح بالمرة العامل المقصود بيها هنا من أكبر كيميائي أو مهندس لأصغر عامل

و الحمد لله خطبت و إن شاء الله عن قريب هأتجوز

و الحمد لله مستقر نفسيا مع نفسي و مع عائلتي

و مهما حمدت ربنا فعلا مش هأقدر أشكره علي أقل نعمة واحدة من اللي أنعم بيها علي و يمكن اللحظات الصعبة المريرة اللي مرت علي طول حياتي و بالأخص من أكتوبر 2010 حتي أكتوبر 2011 هي نفس اللحظات اللي بتحسسني بمدي النعم اللي أنا فيها حاليا و مخلياني سعيد في حياتي و بأحوالي و بظروفي بالرغم من إن في ناس أحسن مني لكن مش حاسين بالنعمة اللي هم فيها لأنهم محسوش بعدم وجود النعم دي

اللهم لك الحمد كما ينبغي لجلال وجهك و عظيم سلطانك

و من المفاجات التانية اللي حصلت لي إني لاقيت إن فرصة إستكمال الماجستير لسه موجودة و هي معصلجة شوية بس ربنا يسهل و أكمل و لو محصلش عن يقين و ثقة هيكون في عدم التكملة الخير لأن ربنا مقدر الخير في كل شئ للإنسان

كنت خلال شهور بطالتي في البيت من أكتوبر 2010 حتي مارس 2011 عامل درافت لبوست عن الفترة دي و مسجل فيه شوية مواقف لكن مسحتة علشان منزلوش بس بجد ياشباب كانت فترة من أصعب فترات حياتي تقعد في البيت بعد خمس سنين شغل كان إحساس رهيب و كان في فرصة شغلانة كويسة علي الأبواب و الأنترفيو بتاعتها كانت يوم الأربع 26 يناير 2011 و تقريبا عديت بس طبعا أنتم عارفين اللي حصل يوم 28 و ما أحلي ما حصل حتي الأن يعني

المهم بعد كده أشتغلت في شركة صغيرة في أكتوبر و ما أدراكم ما أكتوبر و ما المحور و ما العمل في شركة صغيرة بعد العمل في شركات كبيرة و كانت من أصعب أيامي لكني كنت كل يوم ما أدخل المعمل أقعد أقول لربنا ضاقت أوي يارب الفرج يارب و كنت حاسس إن فرجه قريب أوي و الحمد لله عدي حوالي ست شهور و كان الفرج لأنها كانت ضاقت أوي علي

بجد نفسي ربنا يكرمني و أنجح و أنجح في حياتي و هيكون أكبر أهداف حياتي هي القضاء علي البطالة لأنها فعلا بتتدمر الإنسان معنويا و جسديا و عقليا

الملحوظة اللي تستحق الدراسة بجد ياشباب إن تعامل الناس مع بعض في الشركة الصغيرة أطيب و أحن و أرق مع بعضهم من الناس اللي بتشتغل في شركة كبيرة و الشغل فيها ترفيهي و المرتبات فيها محترمة

و ربنا يهدي الجميع و يجازي كل واحد علي قد نيته و عمله و ضميره

أنا فرحان أوي إني بأكتب البوست ده و لأول مرة من ساعة أما دخلت العالم المجنون ده يكون نفسي البوست بتاعي الناس كلها تقراه و تعلق عليه

مش هو ده كل الكلام اللي كنت عاوز أقوله في كلام تاني كتير بس مش كله مرة واحدة علشان متزهقوش مني

نصيحتي لكم ياشباب تتلخص في كلمتين فقط

ثقوا بالله

اللهم لك الحمد كما ينبغي لجلال وجهك و عظيم سلطانك

2011

اللهم لك الحمد كما ينبغي لجلال وجهك و عظيم سلطانك

الحمد لله

الحمد لله

الحمد لله

2012

يارب تكون علي الأقل زي السنة اللي فاتت

و

طمعان في كرمك يارب إنها تكون أحسن

الحمد لله

السلام عليكم

و كل سنة و أنتم طيبين و بألف خير و يارب يكتب لنا زيارة بيته الحرام السنة اللي جاية إن شاء الله

قبل لحظات قليلة من الوصول كالعادة لنقطة الضعف المعتادة ليلة كل عيد و اللي متعود عليها من و أنا صغير و الشعور المفرط بالوحدة و اللي لم يستثني منها غير عيد واحد تقريبا

أفتكرت إني مصليتش العشاء و مع السلام في نهاية الصلاة تذكرتك أيتها المدونة العزيزة فقلت أخش أفضفض معاكي كعادتنا اللي يارب تتقطع بقة

قبل أما أبدا كتابة البوست ده لفيت لفة سريعة علي كم بوست معينين مميزين عندي البوستات نفسها غير مميزة لكن التعليقات هي اللي مميزة بالنسبة لي

الحمد لله علي كل حال

خايف أتسرع و خايف أضعف و خايف أكسل و خايف أفشل و خايف أعمل ذنوب

أحيانا الشعور بالخوف بيكون شعور إيجابي و ساعات كتير بيكون شعور سلبي

مشغل دلوقتي رباعيات صلاح جاهين بصوت علي الحجار بتحسسني بالدفء شوية و بتخفف الوحدة شوية معايا

كانت من عاداتي من زمان دايما في دعائي و رجائي لربنا كنت دايما أقول لو حصل كده هأتغير و هأبقي إنسان تاني و أجتهد و أنجح بس مؤخرا مبقيتش أعمل كده علشان أنا مش هأعمل كده و مش عاوز أخلف وعد مع ربنا و ثانيا إن ربنا كريم و مش محتاج وعود مننا علشان يلبي دعائنا لأنه خزائنه لا تنفذ الحمد لله علي كل حال

بمناسبة الجزء ده كان في لقطة في فيلم بيرل هاربر بتقول كده بس بطل الفيلم بينفذ وعده و مبيطلبش حاجة تاني من ربنا و كان طلبه إنه يشوف وش حبيبته مرة واحدة و هو كان ساعتها غرقان في البحر و فعلا حصل و فعلا مطلبش حاجة تاني من ربنا ده في الفيلم يعني

علي الحجار بيقول : لابد من يموت شئ علشان يحيي شئ عجبي

للأسف الواحد مش قادر ينفذ الوعد اللي خده علي نفسه

و بأقلق كل مرة زيادة و نفسي أتكلم بس خايف أتفهم غلط بس أرجع و أقول ربنا موجود معانا كلنا و اللي مقدره هيكون و إن شاء الله هيكون فيه الخير للكل

ياااااااااااااااااااااااااااااااااااااااااااااااااااااااااااااااااااااااااااااااااااااااااااااااااارب

يالله

اللهم ارضني بما قسمته لي ثم بارك لي فيه

من سخريات الكلام اللي سمعته من الناس مؤخرا كنت بأقول قدر الله و ما شاء فعل حد بيقولي يعني خلاص شئ تافهة و عدي و ده دليل علي إن كل حاجة نسبية حتي الكلام الواحد بيقوله بنية معينة و الناس بتستقبله بنية تانية مناقضة تماما

الحمد لله بقالي فترة مقاطع الفيسبوك و التويتر

الحمد لله الحياة ماشية في سلام و هدوء ممكن تكون مصحوبة بإحساس بنقص شئ مهم في الحياة لكن هي دي الحياة مش بتدي كل شئ و لازم نرضي باللي مقسوم لنا و نتعامل مع فقدان أي شئ نفقده أوي أي حد و نرجع نقول الحمد لله

أحيانا كتيرة كنت بأكون علي وشك الضعف و ممكن يكون البوست ده من هذه الفترات بس أهو المدونة بالنسبة لي أهم من الفيسبوك و تويتر و الضعف في المدونة مش ضعف

الحياة كانت ممكن تكون أحسن من كده بكتير بس بردوا الحمد لله قدر الله و ماشاء فعل

حسيت إني كبرت أوي بعد عيد ميلادي 29 و حسيت إن خلاص يالا حسن الختام

حلو أوي شوية الفضفضة دول و كفاية لحد كده علشان منعكش

اعتذار إلي معلمتي

السلام عليكم

كالعادة من ساعة أما عملت هذه المدونة المجنونة بيجي لي إفراط في الكتابة فيها في رمضان بس مش مشكلة

إمبارح بالليل و أنا علي البستان و قدرا أشتريت و أنا راجع المجلد الأول من مجلدات دستوفيسكي و بدأت أقرأ فيه و نمت لي حوالي ساعة و صحيت للسحور و نمت تاني خلال ده كله كنت بأفكر في كتابه البوست ده نقدر نقول اعتذار أو شئ أكبر من الإعتذار لو ينفع فكرت فيها و لاقيت نفسي لا أستحقها و فعلا هي كانت اللي هتخسر كتير لو كنا أستمرينا و ممكن كنا نفشل بسببي أنا

أنت إنسانة جميلة و رائعة كان نفسي علي الأقل نفضل أصدقاء بس ده كان هيبقي صعب علي

كان نفسي أشوفك دايما كان نفسي أمسك أيدك كان نفسي ربنا يجعلني سبب لفرحتك

كان نفسي أستني رنتك علي الفطار و في السحور

أشكرك إنك علمتيني أعرف أعيش إزاي و أستمتع بحياتي إزاي

أشكرك علي إنك كنتي سبب إني أعيش أسعد أيام حياتي لحد دلوقتي

أسف إني مسمعتش نصايحك في حاجات كتير

أسف إني سببت لك أي جرح

محيراني يا2011

كنت قاعد مستني 2010 تخلص علشان كنت قرفت منها علي الأخر و كنتس مستني 2011 بفارغ الصبر

بدأت 2011 من سؤال علي الفيس بوك حد هنا من أسكندرية ليه ليه لقينا تفجير كنيسة القديسين بيني و بينكم أتشائمت قلت ياريتك يا2010 كنتي أستمريتي

بعدها بشوية كمان لقينا الشهيد سيد بلال قلت كملت

بعد بشوية بن علي هرب بن علي هرب شعب تونس العظيم

بدأت تندع شوية أهيه

هب 25 يناير و التنحي و أيام في جنة التحرير

هب حبة قلق و إنفلات أمني و بلطجة

هب نزلت شغل بعد خمس شهور تقريبا في البيت

طبعا الشغل تعبان و ظروفه مش و لا بد

بعد كده فرقه و وحده من جديد

عروسة جديدة هتنورنا علي شهر 12

مش عارف أنت غريبة أوي يا 2011 بتخلي كل الناس حواليا فرحانة و الطبيعي و المفروض و اللي نفسي فيه أفرح معهم لفرحتهم بس مش عاوزاني أفرح مش عارف أعملك أية؟

أفراح عامة كتير و أحزان شخصية كتير مخليناني مش عارف أفرح بالأفراح العامة

يارب أفرجها في الكم شهر اللي فاضلين منها

فضفضة مضلمة

السلام عليكم

بما إن الحمد لله مش ناس كتير بتتدخل هنا الواحد يفضفض براحته بقة و مفيش سياسة

اليومين دول عمال أسمع كم أغنية غريبة مالهمش علاقة ببعض و زهقت منهم و مش عارف أسمع غيرهم Sway و أسكت متقوليش و أنا مش كداب و علي قد ما حبنا التسجيل القديم و حاحا للشيخ إمام و أخيرا فاتت جنبنا علي إذاعة حليم اللي فتحت و تقريبا الأغنية بتيجي كل ساعة مرتين

الأسبوع ده زميلي في الشغل مجاش أجازة مرضي و أتدبست في الشغل طحن الأسبوع ده و كملت كمان نازل شغل الجمعة و السبت و ربنا يسترها بكرة و ميحصلش قلق علشان الواحد ميبقاش هيتجنن في الشغل

أرجع و أقولك يامدونتي العزيزة الله يسامحك أنت تقريبا السبب في كل ما أنا فيه أنت السبب

ضلمت و قفلت أوي أوي و بجد مش قادر و بجد أتخنقت و بجد مفيش غير فكرة الموت بس هي اللي مسيطرة علي اليومين دول و ربنا يستر

هو بجد زي ما علي الحجار بيقول كل عذاب الدنيا هيروق بكرة لينا و هو أنا هأبقي ذكري في الليلة الجميلة و القصة هتخلص علي كده و لا أية اللي هيحصل

أتخنقت أتخنقت أتخنقت

أفرجها يارب في كل حاجة

نفسي أسافر مع إني عارف و متأكد إن السفر صعب بس بجد نفسي في حياة جديدة مع ناس معرفهاش و بيئة مختلفة نفسي يبقي لي فرصة إني أتولد من جديد

نفسي أرجع صغير تاني تعرفوا و أنا بأفطر الصبح في الشغل أحيانا كتير بأشم ريحة السندوتشات اللي ماما كانت بتعملها لي في المدرسة كنت أحيانا كتير بأخبي شوية من السندوتشات دي في البيت علشان ماما كانت بتعمل لي سندوتشات كتير أوي

نفسي في جو الصبح بتاع زمان لما كنت بأصحي و أنزل في الصيف و أنا قاعد عند جدتي أشتري فطار و شيبسي اللي في الكيس الأحمر ده مكنش في غيره أساسا الهوا نفسه الأيام دي كان له طعم تاني

نفسي ماشيليش هم بكرة نفسي أصحي الصبح فرحان نفسي أنام كل يوم الساعة أتناشر مش الساعة تسعة تعرفوا أنا الأيام دي بأنام بدري أوي علشان اليوم يخلص بسرعة و الأسبوع يجري و الشهر يمر و السنة تعدي و العمر يفوت يمكن أموت بقة و نخلص

كلكعت أوي و أنا مش حمل كده أنا عارف حالي الحمد لله أحسن من ناس كتير بس مش عارف أوصلها إزاي نقول مثلا أن أنا مش حمل اللي أنا فيه يعني ممكن يكون في ناس أقل مني كتير و ربنا حرمهم من نعم كتير عندي بس كمان رزقهم القدرة و الصبر علي حالهم و القدرة و الصبر دول مش عندي أنا ياريت حد يكون فاهمني

هو أنا غلطت في أية سؤال في ذهني تقريبا مغلطتش الحمد لله غلطات كارثية بس مش عارف الحال عمل كده ليه معايا

كل اللمبات أتحرقت في وقت واحد

إمبارح شفت علي المحور حادثة و شفت للأسف شخص ميت و كنت شفت حوادث قبل كده و كانت الفكرة اللي بتخطر علي بالي علي طول حال أهل الشخص ده حد خارج الصبح يجري علي رزقه يرجع جثه ربنا يرحمنا جميعا و يحسن ختامنا

هو أنا غلطت في أية؟ غلطت إني أستنيت سنتين و عشت في وهم كبير غلطت إني حبيت غلطت إني حبيت الشخص الغلط غلطت إني حبيت في الوقت الغلط غلطت إني حبيت و أنا عارف إنه مش وقته بالنسبة لي غلطت إني أتسرعت نفسي أعرف غلطت في أية؟

المهم إني مش عارف أصلح اللي أنا عملته و حطيت نفسي فيه ساعات بأكون سعيد بالألم ده تخيلوا سعيد إني بتألم

طيب ليه بأتعامل كده قبل و بعد و في خلال؟؟ غلطت في أية

بيجي علي بالي اليومين دول جملتين من فيلمين ليوسف شاهين

الرجل أبو سويلم ده أخرته وحشه لسانه مبيبطلش كلام أبدا

و التانية من فيلم صلاح الدين

عسكري صليبي بيقول للتاني كل هذا نهايته الموت

في كلام كتير ممكن أقوله بس مش هأقوله لسببين إنه ممكن يزعل شخص معين مني و أنا مش عاوزه يزعل بالرغم من إني عارف إنه مش بيدخل علي المدونة لكن أهوة الإحتياط واجب

و السبب التاني ممكن كلامي يدخل في مجال الهرطقة و بكرة جمعة الإسلاميين و مش طالبة قلق

نفسي أنعزل عن العالم نفسي أقفل الأكونت علي الفيس بوك و علي تويتر نفسي أعيش مع نفسي لو مش هأعيش مع الناس اللي عاوز أعيش معهم بعد مش عارف أية الأمور كلها واحد

و تصبحوا علي خير و ياريت الرسالة تكون وصلت

نوم الطفولة

السلام عليكم

أزيكم يا أصدقائي

بداية لازم أشكركم علي تعليقاتكم الغالية علي البوست اللي فات طبعا هم عددهم قليل بس من أشخاص أعتز بصداقتهم و معرفتهم

بجد شكرا

بعد كده اللي خلاني أكتب البوست ده هو إني كنت عاوز أكتب أستاتيوس علي الفيس بوك بس من ساعة الثورة الواحد مش عارف يرجع للإهتمام بالحياة الشخصية خالص الواحد بيستصغر أي حاجة قصاد اللي بيحصل و بيمر بالبلد بس قلت أكتب هنا في المدونة المتواضعة بتاعتي سبب فرحتي و شقائي

الأستاتيوس هو

مينفعش الواحد يرجع عيل صغير لمدة ساعة بس

الأستاتيوس دي سببها إني إمبارح قلقت من النوم الساعة 3 إلا عشرة و معرفتش أنام تاني لحد الصبح و قمت رحت الشغل و الحمد لله يوم الشغل عدي بسلام من دون أخطاء نتيجة قلة التركيز بسبب قلة النوم

الواحد مفتقد النوم الهادي نوم اللي بينام و مش شايل هم حاجة نوم الطفل بينام و خلاص

أنا الحمد لله أحسن من غيري كتير بس شايل هم الشغل و التفوق و المستقبل و عيلتي و إزاي أفرحهم و مستقبلي و جوازي و مراتي و أولادي بإعتبار ما سيكون بإذن الله

أنا دلوقتي علي أعتاب التلاتين و مش مصدق و مش حاسس أنا حاسس إني لسه طفل بهموم رجل كبير و إمكانيات و أحلام الطفل مش متوافقة مع واقع و متطلبات الرجل الكبير و مش عارف الأقي أرض محايدة يقعد فيها الطفل مع الرجل الكبير أبدا

أحيانا كتير بأمسك نفسي و أنا بأحلم أحلام خيالية طفولية بأحاول أوقف نفسي ساعات بأنجح و ساعات لأ

مشغول بمحاولات البحث عن وظيفة جديدة تقريبا بقة شئ أساسي في حياتي موضوع البحث عن وظيفة ده و من المحاولات دي العودة للشركة اللي كنت بأشتغل فيها زمان تقريبا أول ما بدأت التدوين مديري في الشركة دي أترقي و بيحاول يرجعني الشغل مش عارف هينجح و هيقدر يقنع العضو المنتدب و لا لأ

ظروف الشركة دي أتحسنت جدا بعد الثورة بالرغم من إن معظم اللي فيها كانوا كل شوية بيتصلوا بيا و أنا في التحرير علي إعتبار أنا قائد الثورة يعني و يقولولي كفاية كده دلوقتي أتظبطوا و أتروقوا من خير الثورة دي

صحيح ده من الأشياء اللي خلتني أزعل من نفسي الفترة اللي فاتت و هي وجود نوع من الغصة في حلقي تجاه الناس دي بالرغم من إنهم شغالين و مش شغالين بس عايشين و حياتهم بتتظبط علي حساب ناس تانية يعني الشركة دي شغالة و بتبيع منتجات من غير ما بتعمل حاجة بتبيع بإسمها و منتجاتها القديمة و بالرغم من إن كل الشركات الخاصة اللي طلعت بعدها عمالة تكبر و تستثمر أكتر هي تقريبا زي ما هي هي أة بتكسب أرباح رهيبة بس ممكن الأرباح دي تكون أكتر من كده بكتير بشوية تنظيم و شوية شغل صح

بس أنا وحش أوي في النقطة دي و زعلتني جدا من نفسي و مش عارف أعمل أية؟

و يمكن يكون ده بردوا نتيجة كثرة الذنوب و البعد عن ربنا الفترة اللي فاتت و بردوا مش عارف أرجع

نفسي أرجع طفل لمدة يوم و لا ساعة نفسي أنام علي السرير مفكرش في حاجات كبيرة نفسي أفكر في أمور تافهة بسيطة نفسي أضحك من جوة قلبي نفسي ألعب في الشارع كنت شوارعي أية كنت من الساعة 5 المغرب لحد الساعة 1 بالليل في الشارع

نفسي أحب زي زمان حب من طرف واحد و مستخبي

نفسي أشتاق إني أروح السينما

نفسي أبطل أرغي و أصدعكم

:))

نفسي أسمع صوت البحر في ودني علي طول و مسمعش صوت الناس نفسي مسمعش صوت الدوشة و لا الزعيق و لا الخناق

.

بالنسبة للشغل في واحدة كانت معايا هتقدم لي في الشغل عندها في وزارة هو مرتب ضعيف بس موظف بحت أخلص الساعة 3 أنا مش حابب الشغلانة دي بس أهوة هأعمل أية

أنا حابب جو المصانع و المشاكل و البلاوي و الصراع الأزلي بين الجودة و الإنتاج حتي الشركة اللي بأحاول أرجع لها دمها واقف علشان شركة كبيرة بس للأسف الواحد بيدور علي الأستقرار بقة الشركة اللي أنا فيها جو شغلها حلو بس للأسف صغيرة أوي أوي أوي و بعيد و كمان العائد المادي في الضياع

ربنا يكرم

نفسي بقة دكتور سمير الصياد وزير الصناعة و بالمناسبة كان دكتوري في التمهيدي و أكيد جبت سيرته أيام الشكوي و النواح أيام التمهيدي نفسي يعمل حاجة كويسة كده لتنشيط الصناعات الصغيرة و المتوسطة زي ما قال فعلا و قريت خبر النهاردة عن وضع خريطة بالمناطق اللي هيشجعوا فيها الصناعات دي يارب أعرف أدخل الحتة دي أو أخد حتة أرض و نستصلح بالرغم من إني لا أفقهه شئ عن الزراعة بس أهوة بقة الواحد زهق

هأخصل الشاي بالقرنفل و أقوم أنام

أدعو لي أنام نوم الأطفال و لو لليلة واحدة

الثورة و الخجل

السلام عليكم

بعد السلام و التحية

سؤال لم أكن أتخيل أن أسأله لنفسي

هل سيأتي يوم أخجل فيه من إشتراكي في ثورة مصر

كان في مواقف و أحداث كتيرة ممكن تخليني أسأل نفسي السؤال ده لكن عديتها و لم يخطر ببالي اللي خلاني أسأل نفسي السؤال ده هو موقف ابن عمتي النهاردة من الثورة معايا حسيت إنه فعلا مغلول من الثورة و ماصدق يخلي الكلام عن الثورة يجي علشان يشتم و يدعي علي اللي اشتركوا في الثورة فقلت له ليه بس بتهريج قالي ما أنا عارف إنك كنت منهم فتخيلت في الأول إنه بيهرج لكن من كلامه و إنفعاله معايا في الكلام لأول مرة تقريبا نتناقش في موضوع مع بعض لفرق السن بينا

حسيت إنه قاصد يدخل معايا في معركة مش مناقشة عنده غل كبير من الثورة و اللي اشتركوا فيها و تقريبا ميعرفش حد غيري أشترك فيها و كان قاصد يطلع الشحنة اللي جواه منها فيا أنا

من جمل المعركة

عاوز تفهمني إن جملين و حصانين رايحين يموتوا مليون

قلتله ساعتها مكنوش مليون و لا حاجة كانوا حوالي عشر الأف و بعدين هي الفكرة في العدد لا الفكرة في الموقف نفسه

بيقولي اللي نزلوا التحرير نزلوا غلط كانوا فاكرين إن اللي في عبدالمنعم رياض مؤيدين و اللي في التحرير المعارضين

أقوله إزاي يعني يقولي أنا شفت ناس في مصطفي محمود راجعين متبهدلين قلتله أية اللي وداهم التحرير

أقوله ياعم أنا صحابي كانوا بيجوا من المحافظات يوقفهم و يمنعوهم في المؤسسة و عبود

يقولي أنا كنت هناك يوم خطاب حسني مبارك بالليل اللي قبل موقعة الجمل أقوله أنا كنت بايت هناك يقولي يعني مسمتعتش اللي قعد يقول في الميكروفون بيضحك عليكم و مش هنمشي و هنقول أية لأمهات الشهداء

أقوله ياعم دول لو صبروا يوم كانت الناس مشيت لوحدها

يقولي يسلام أنا سامع الواد بيقول كده في الميكروفون الساعة 2باليل

يقولي أنتم شباب ضايعين حضرتوا العفريت و مش عارفين تصرفوه

.

أقوله أنت مستني اللي قعد يخرب تلاتين سنة إحنا نعدله في شهرين تلاتة

أقوله أقرب مثل إمبارح قريت خبر عن تعديل في خط في خط سير الخط التالت للمترو هيوفر أتنين و نص مليار جنيه يقولي و بعدين و أية اللي أنا أستفدته أقوله ياعم مش لازم تكسب بطريقة مباشرة مش في ناس مرتبتها زادت و اللي كانوا بعقود أتثبتوا يقولي أنا مفيش جنيه زدته

الرد بتاعه هو أة حسني مبارك كان حرامي هو اللي حواليه و كل حاجة بس كنا عايشين في أمان

الحكومة مكنش عندها كرامة بس كان ليها هيبة

تعالي عندنا كل يوم في ضرب نار و الدنيا كلها بقيت عصابات

ده الأول لو كان عيل ضرب طلقة كانت الدنيا بتتقلب و مبتقعدش و البوليس مش بيسكت

.

وبردوا في كلامه جاب سيرة الناس اللي ماتت في الهجوم علي الأقسام يقولي دول شهداء أقوله ياعم شهيد و لا مش شهيد مش بالأسم هي حسابه علي ربنا بس نسأل ليه حتي لو هو بلطجي ليه هاجم قسم الشرطة مش علشان كان بيتنفخ هناك سواء عمل حاجة و لا معملش يقولي إحنا شعب كده لو متعملوش كده الناس دول هيبقوا بلطجية يعني هيبقوا بلطجية أقوله ياعم ربنا بيخلقنا كلنا علي الفطرة السليمة و البيئة و التربية و التعليم هي اللي بتأثر و أقوله يعني لو هو أتعلم كويس و أتعالج كويس هيبقي بلطجي بردوا يقولي أة هو أنت لو جبت أسد و ربيته و نيمته علي ريش هيبقي كويس

أقوله المقارنة مش في محلها إحنا بني أدمين

يرجع يقولي جملين و حصانين هيموتوا مليون

أقوله ياعم و النعمة أنا كانت بايت هناك

و لا كأني بأتكلم

.

أيقولي دلوقتي لو في واحدة عاوزة تتطلق من جوزها بتنزل تعمل مظاهرة

البلد خراب

خربتوها

حسبي الله و نعم الوكيل

بجد مش تهريج

.

أنا كل المواقف اللي فاتت أتعرضت لها بالإضافة إلي حملات التهكم و التريقة علي كل حاجة و لزقها بالثورة من الكائنات العجيبة اللي بتركب معايا أتوبيس الشركة اللي لسه الثورة لم تصل لها بردوا هي كمان يعني مفيش عقود مفيش تأمينات مفيش تأمين صحي مفيش ظروف بيئية مناسبة للعاملين و لما يجوا بتوع البيئة بيعدوا مرور الكرام

الناس شبعت و تعودت علي الفساد

تخيلوا أتنين بعربيات علي المحور بيتخانقوا تخيل بيقولوا أدي الثورة ياسيدي قال يعني بروح أمهم الناس مكنتش بتتخانق مع دبان وشها قبل الثورة شوف سواقين الميكروباصات غلوا الأجرة و بيركبوا الناس أربعات قالي يعني قبل الثورة كان لو الواحد ركب مرتين بياخد التالتة مجانا و كانوا بيقعدوا أتنينات في الكنبية يعني

أنا خايف الثورة دي تفشل

اللي قلقني أوي إن في مؤشرات كتيرة بتقول إنها هتتجه للفشل أو الإلتفاف أو إستمرار الوضع السابق بوجوه جديدة فقط

و للعلم اللوم مش هيبقي علي الناس اللي هتعمل كده

اللوم هيبقي علينا إحنا لأننا مش عارفين نتفق مع بعض و مش عارفين نبقي ديموقراطين و لا ليبرالين مع بعض

و الأخطر من كده الناس اللي أنا بأتفق معهم في الفكر لغتهم وحشة و منفرة جدا للناس البسيطة دول لو تنازلوا و تواضعوا و أتكلموا معاهم بالرغم من الناس اللي أنا شايفهم فاسدين أو أصحاب منهج مش سليم من وجهة نظري كل يوم بيكسبوا أرض جديدة و بيثبتوا أقدامهم و أيديهم علي الثورة سواء بطريقة مباشرة أو بطريقة غير مباشرة من الهجوم و إظهار غلط الثوار و الثورة و قلة أدبهم

الثوار حاليا يا إما إخوان و إسلاميين مع المجلس العسكري و الخطوات اللي بياخدها يا إما ناس بتهاجم الإخوان و الإسلاميين و معاهم المجلس العسكري

و فلول الحزب الوطني و الفاسدين و المفسدين و المنافقين و الرقاصين عمالة تكسب أرض جديدة كل يوم و لو مكسبتش أرض بتنقص من قيمة الثورة كل يوم

المجلس العسكري

الإخوان

الأقباط المتشددين

السلفيين

المعتصمين

الثوريين اللي لسانهم طويل

توفيق عكاشه

شوبير

مرتضي

محمد حسان

حسين يعقوب

البرادعي

الغزالي حرب

بثينة كامل

نوارة

بلال

نجيب ساويرس

إئتلاف الثورة

إتحاد الثورة

صفوت حجازي

ابراهيم عيسي

عبود الزمر

وائل غنيم

عمرو موسي

البرادعي

شفيق

مني الشاذلي

ريم ماجد

زويل

فاروق الباز

عصام شرف

و أخرين كتير

من منكم خائن و منافق ومن منكم منقض علي الثورة و من منكم سألعنه و من منكم سأشكره و من منكم سيخذلني

و من منكم سيجعلني أخجل من إشتراكي في الثورة؟؟؟

الثورة المصرية

الحمد لله

الحمد لله

الحمد لله

ياااااااااااااااااااااااااااااااااااااااااااااااااااه

بعد الذي حدث بدءا من يوم 25 يناير حتي يوم 11 فبراير 2011 و مازال يتبعه من أحداث لا توجد كلمات أستطيع بها التعبير عن ماحدث

لكني سعيد إني الحمد لله شاركت و لو بجزء قليل جدا من هذا

هذا أشرف شئ شاهدته في حياتي و أشتركت فيه

أنا أسف ياشعب مصر إنني كنت فقدت فيكم الأمل لكنكم كالأفلام بالظبط ظهر معدنكم الأصيل عند الوقت المناسب و لم يكن أفلام بل حقيقة مرئية للعالم كله

سامحوني بقة و يشفع لي إني كنت معاكم

:))

تحيا مصر

تحيا مصر

تحيا مصر

أنا أسف

أنا أسف ياشباب مصر

و فخور إني كنت معاكم إمبارح

أجمل يوم في عمري

هو ممكن نكون زي تونس؟

السلام عليكم

أحلي حاجة إن يكون عندك بلوج تقعد ترغي فيه و تفش غلك فيه من غير ما تحس بقلق لأنه أساسا محدش بيتابعه كتير و اللي بيتابعوه يعرفوني و عمرهم ما هيبيعوني إن شاء الله

البوست ده مش هأنزله غير يوم خمسة و عشرين أو بعده علشان محدش يقول إني بأكسر في مجاديف حد و لا عاوز أشتهر و لا حاجة يعني ده لو حد جديد دخل عندي بالغلط

و بالمناسبة بأتمني أكون غلط و أنزل البوست ده مصحوب بإعتذار مني لأصحاب الثورة الناجحة يوم خمسة و عشرين

السؤال هو إحنا ممكن نعمل زي تونس؟ اللي أقصده من السؤال هو ممكن نغير بنفس طريقة تونس

إجابتي الواضحة و الصريحة طبعا لأ

ليه بقة أولا التعداد السكاني هنفرض اللي نزلوا في مظاهرات تونس خمسمائة ألف فرد يبقي دول بيمثلوا نسبة خمسة بالمائة من تعداد تونس هنفرض نفس العدد ده نزل من مصر دول هيمثلوا بوينت ستة في المية من تعداد مصر ده لو نزل نص مليون مصري يعني

ثانيا المظاهرات بدأت في تونس مش من العاصمة لا بدأت من محافظة في أقصي جنوب العاصمة و بعيد عن مركز الحكم تماما

و مثال علي كده بردوا من مصر أهم حاجة حصلت يوم الإضراب كانت مصدرها مدينة المحلة

ثالثا بحكم تعاملي و معرفتي الشخصية بكتير من الناس من الفلاحين و قاطني الدلتا أعرف إنهم لسه غرقانين في عادات و تقاليد أقرب للجاهلية بالرغم من تعلمهم و حصولهم علي شهادات عالية جدا و أيضا عدم إهتماهم بأي أمور أخلاقية من ناحية التعامل بينهم وبين بعض و بينهم و بين الناس و علاقاتهم في الشغل و أحلامهم العظيمة التي تكمن في الهروب لإيطاليا و أية هي الأمور التي تهمهم و تشغل بالهم سواء بقة كورة موبيلات أفلام سكس علاقات غير شرعية مشروعات إستهلاكية تبوير أراضي و بناء مساكن حتي الدين عندهم لا يتمثل غير في أداء الصلاة في و الصوم في رمضان

رابعا بالنسبة للشرارة اللي ولعت مظاهرات تونس هي إنتحار الشاب بوعزيزي سواء مختلفين أو متفقين علي الإنتحار إحنا كل يوم بنقرا في الجرايد و بنشوف في الفضائيات إنتحار كل يوم علشان اللي مش لاقي وظيفة اللي معرفش يجيب فلوس هدوم العيد لولاده اللي معرفش يجيب عشا لمراته والشاب اللي أنتحر علشان سقط في إمتحان الخارجية لأنهم قالولوه إن أبوه فلاح فأستحي يرجع يقول لأبوه كده و أنتحر وبعد كده بنعمل أية بنمصمص شفايفنا و بنكمل فيلم السهرة يعني إحنا شعب مبقاش عندنا دم خلاص

و بعدين خلاص موضوع حرق النفس إستهلك في خمس ست أيام كل واحد عاوز مصلحة شخصية بيقولك هأولع في نفسي و من قبل كده الوقفات الإحتاجاجية حتي لو الحكومة هتعمل حاجة علشان المصلحة الناس بتعمل إضراب و تلاقي الإعلام معاه و خلاص زي موضوع المقطورات ده

خامسا معندناش حد يقوم بموضوع الثورة أو يعمل لها عملية تنظيم لوجهه الله تعالي كل بيعمل لمصلحته و تلميع نفسه في وسائل الميديا ده حتي بتوع البرطمان الموازي بعد ما عملوه فشكلوه دول تقريبا كانوا بيتفقوا علي الفشكلة و هم بينظموه هتقولولي التوانسة مكنش عندهم زعماء طبعا ده شئ جميل أقول لكم نرجع بقة لنقطة رقم تلاتة و نعممها بردوا علي معظمنا وإننا مش مثقفين و لا عندنا وعي و لا أهداف و لا نقدر حتي نفكر نتيجة التعليم الفذ اللي في مدارسنا و جامعتنا و أهم حاجة عندنا لقمة العيش حتي لو هناخدها من دم أخويا و هنا تظهر عبقرية مصطفي الحسيني لما كتب أستاتيوس عن الديكتاتور الشاطر و الديكتاتور الفاشل و مثال علي الفشل هو بن علي لأنه أهتم بتعليم و تثقيف التونسين علي حق لذلك قدروا يغيروه

سادسا حصلت عمليات نهب و سرقة في تونس بعد الثورة طبعا الناس هولتها في الإعلام علشان محدش يفكر يعمل كده و في ناس كتير خافت و غالبية الناس الكبيرة خافت و حماسها لو كان زاد قيراط نقص خمسة و تلاتين قيراط

هم في تونس كونوا لجان شعبية علشان يحموا بعض أنا بقة من مخبأي هذا بأؤكد لكم إنها هتبقي مجزرة عندنا و كلنا هناكل في بعض و الحق يقال التقارير بتقول إن بن علي و أعوانه هم اللي كانوا بيعدوا الناس دي علشان تعمل كده لو حاجة حصلت في مصر الشعب كله هيقوم بكده من غير ما حد يعده تعليم ذاتي يعني

ده إحنا يارجل دلوقتي الشباب مبقاش حد منهم يقوم يقعد حد كبير مكانه في المترو و لا الأتوبيس هتقولولي نعمل ثورة

سابعا الإخوة قادة الحملات الفيس بوكية بتلاقيهم ناس من عائلات كبيرة و مسنودة و بتلاقيهم ماسكين في أيديهم عبوات ماك و بيتزا هت الغالبية يعني و طبعا لا أنسي تحيا جموع الشعب من أكله الفول و الطعمية و البتنجان و تلاقي معظمهم عالم فرافير كده معظم مجال شغلهم في الصحافة و الإعلام و الكمبيوتر يعني يقدروا يشتغلوا بالقطعة أو حتي شغلهم هو بيساعد علي كده يعني تلاقيه صحفي معارض أحسن من صحفي موالس و بيكون معارض و خلاص يعني واحد زي الأستاذ مصطفي بكري يقعد يشتم و يسب في الحكومة و يقولك حكومة لازم تمشي بس الريس حسني مبارك الرجل مقطع نفسه يسلام هو مين اللي مختار الحكومة يعني أمي

و في أماكن كتير و تلاقي أساسا ناس كتير منهم شغالين بالواسطة و المحسوبية و تلاقي الأخوة الناشطين المتحمسين مدعمين الثورة الفيس بوكية من الخارج عملتوا أية أنتم ما أنتم لاقيتوا الدنيا قفلت هنا رحتوا مسافرين و فاكين علي برة علي طول ما تقعدوا هنا و تشوفوا الذل و المهانة في سبيل التغير و الثورة و لا هو لازم الفقرا و الكادحين هم اللي يكونوا وقود الثورة يعني

و غالبيتكم مش بيفكر في العودة لو حصل تغيير في مصر هيقولك هأرجهع ليه اللهم إلا شوية قليلين منكم

و بعدين كتير من الأخوة شباب المجاهدين تلاقيه ساحب لك مزة معاه في وسط البلد و ماسك لك كتاب من الشروق و لا ميريت هو كده بقة ليبرالي يبوسها و يظبطها هم كده بقوا متحررين و ثوريين و لا أساسا تشوفوا لغتهم مع بعض هي دي الليبرالية و التحررية و الثورية كتكم القرف مليتوا وسط البلد

و كمان نتخيل الناس اللي بتشتغل في مجال البترول و الأسمنت و البنوك و الوزارات و المصالح الحكومية اللي مش بيتشغلوا و في أخر الشهر بيقبضوا عادي جدا و تلاقيهم بيسيبوا الشغل و يطلعوا يشتغلوا شغلانة تانية تفتكروا الناس دي هتقوم معاكم بثورة و لا لو الثورة قامت هتساندكم

و بعدين كمان الحكومة كل فترة بتختار شوية من الناس تديهم إمتيازات علشان تسكت شوية يعني من فترة ابني بيتك و بعد كده شقق للشباب و بعدين تثبيت في الوزارات ده حتي اليومين دول سعر السكر رخص

و كل ده فعلا بيأثر علي غالبية كتيرة من الناس و بيسكتهم

و بردوا اللي بيهد الناس المتحمسة اللي نفسها في التغيير إنهم كل شوية يعملوا حاجة لا تصد و لا ترد بس هي بتنفس عنهم شوية و بيخرجوا الكبت اللي جواهم و بينزلوا علي مفيش يعني مرة أيمن نور و إنتخابات الرياسة و بعدين بشوية كم مقال لإبراهيم عيسي علي كم مذيع يطلع يتفزلك بكلمتين و الناس الشحن اللي جواها خلاص يطلع

و سؤال تاني مهم جدا هل لو التجمعات و الوقفات الإحتجاجية دي تتطورت و كبرت أوي هل الجيش المصري هيقف علي الحياد زي الجيش التونسي؟

و بعدين الشعب اللي يعرف إن واحد زي جوزيه يجي ياخد هو و مساعدينه أتنين مليون جنيه في الشهر و شيكابالا و فتح الله خمسة مليون و لا سبعة مليون في السنة و لا واحد زي عادل إمام ياخد أربعة مليون دولار و يسكت لا و كمان تلاقيه بيشجعوا الناس دي و هو مش لاقي ياكل ده شعب مفيش من رجاء

أنا أسف لو حد زعل مني و لا من كلامي بس بجد خلاص زهقت منكم ومن أفكاركم الأمريكية المصطنعة اللي وراها ياإما بطولة فيس بوكية تافهة يا إما وراها مصلحتكم الشخصية

و الله ياجدعان أنا بحب البلد دي أوي و نفسي تتغير و مستعد أموت في سبيل إنها تتغير بس مش عارف أعمل أية و لا أموت نفسي في سبيل البلد دي إزاي و بيني و بينكم مستحرم أموت نفسي و الناس تقعد تمصمص شفايفها و تكمل فيلم السهرة خصوصا لو كان فيلم ياأنا ياخالتي

حد ممكن يسألني عن الحل الحل أكيد سهل أوي بس أنا معرفوش

و يارب يارب يارب يكونوا عملوا حاجة و منحتاجش لأي حلول تانية

و أقول أنا أسف و أستاهل ضرب القباقيب الخشب علشان الجزم الجلد هتبقي خسارة فيا

لماذا؟؟؟

لماذا توقفتم عن التدوين؟؟؟

كل اللي هيلاقي اسمه في القايمة اللي علي اليمين دي لماذا توقفتم عن التدوين

أرجوكم عودوا ياأصدقاء

بالمناسبة بأكتب لكم بوست أطول من السنة السودا هأنزله أول أما أشتغل إن شاء الله