MISS YOU

مفتقدك جدا مدونتي العزيزة

دي بقة وجعها كوم تاني خالص

أزيكم ياشباب أخباركم أية؟

طبعا غبت عنكم فترة طويلة و كادت أن تتطول أكتر من كده و كاد البوست الأخير يكون أخر بوست بس محصلش

اللي حصل بقة واحد صاحبي عزمني علي كتب كتابة كان يوم سبت و كان عندي شغل و كنت هأطنش و مرحش علشان مش هألحق بس لاقيت ناس كتير من الكلية أتصلت بيا علشان نتقابل هناك قلت خلاص نروح و أمرنا لله كتب الكتاب كان في السيدة نفيسة

طبعا المنطقة دي و الطريق لها ليها ذكريات معايا المهم و بعد كده في يوم الأحد عيد القيامة اليوم اللي قبل شم النسيم كان أجازة بالنسبة لي من الرصيد في الشغل لاقيت اليوم طويل و كنت خلاص علي وشك عمل كارثة محققة الحمد لله بمساعدة بعض الناس لم تحدث و قلت طيب ما يلا أروح أصلي العشا في السيدة نفيسة جوها حلو و قلت يمكن أروح أرتاح هناك المهم و أنا داخل علي السيدة نفسية كده خطرت علي بالي فكرة إني أروح أعمل عمرة بعد ما صليت العشا و قعدت شوية نزلت علي وسط البلد أتصلت بواحد صاحبي قلتله يسألي علي أي عمرة طالعة قريب و لما روحت قلت لماما تسألي هي كمان يوم الأربعاء قالت أة في واحدة طالعة يوم تلاتة و عشرين أبريل و كانت المفروض تتطلع أول الشهر بس العدد لم يكتمل فأتأجلت قلت بس دي كده ربنا كاتبهالي أنا مخصوص

وديت جواز السفر و الفلوس و بعد أسبوع كله تمام خلاص بس الموضوع بقة يوم خمسة و عشرين مفيش أي مشاكل

هم كده كده أسبوعين أجازة في الشغل و اللي يحصل يحصل

و بقيت مستني اليوم ده بفارغ الصبر و كل حاجة أصبحت هينة جدا جدا جدا ما خلاص بقة رايح أرمي كل حاجة علي ربنا و كتبت الأجازة يوم الأربعاء و قلت للناس في الشغل و أتصلت بصحابي بلغتهم و أحلي حاجة لما كانت أي أفكار و لا أي مواقف تتطلب الإكتئاب كنت بتاجهلها و كأنها مش موجودة ما خلاص بقة هانت فاضل كم يوم و كله يتفك إن شاء الله

يوم الخميس سلمت علي الناس في الشغل و ودعتهم و الساعة خمسة بالظبط ميعاد خروجي من الشغل و أنا خلاص هأسجل إنصرافي لأخر مرة بالحالة المقرفة دي علشان الختم الجاي هيكون يوم تسعة مايو في ظروف و حالة تانية مختلفة تماما تماما لاقيت أختي بتتصل بيا و بتقولي الجواز أترفض و مفيش عمرة و مفيش سفر و مفيش فضفضة و مفيش أي حاجة

يرضيكم كده

تفتكروا أية الحل؟

ربنا ما يكتب عليكم الإحساس ده أبدا و لا تفسيري للموضوع ده خالص

ربنا يتوب علينا جميعا و يغفر لنا و يرحمنا برحمته

.

حاولت أتجنب ذكر الموضوع ده في المدونة و الفيس بوك و كل حاجة بس بردوا مكملش تفتكروا بقة العيب في مين

أكيد فيا أنا مش في المدونة و لا الفيس بوك

بجد مش عارف أعمل أية؟

و لا عارف الأيام الجاية دي هتعدي إزاي

واحشني جدااااااااااااا

السلام عليكم

أزيكم ياشباب و الله العظيم واحشني جدا جدا و علشان كده أنا باكتب البوست ده مش لأي مشاكل و لا شكوي لا علشان أنتم واحشني فعلا

أمبارح و أنا راجع من الشغل فكرت إني أكتب لكم و قعدت أفكر طيب أكتب لهم عن أية عن أية؟

خطرت في بالي فكرة إن أنا أكتب لكم عن الطريق الدائري مش عارف ليه و فعلا الفكرة تبلورت في دماغي و أنا مروح تصدقوا الكلام ده كان أول أمبارح علشان أنا إمبارح إتأخرت في الشغل و رجعت البيت الساعة عشرة إلا ربع المهم دلوقتي و أنا بأتفرج علي ماتش الزمالك تحت قيادة حسام حسن و تألقه عندا في مفيد و بأقوله شايف يامفيد عمك حسام حسن بيعمل أية

أسستنوا هأروح أعمل نسكافيه و أرجع أكمل رغي عملت شاي أخضر مش نسكافيه

المهم و أنا بأتفرج علي الماتش قررت أحكي لكم عن الشغل حاليا

انا حاليا مهندس إنتاج أو علشان الدقة كيميائي إنتاج و حاليا يوجد بالشركة صراعات كبيرة بين الجودة و الأبحاث و التطوير طبعا كانت في الأول بين الجودة و الإنتاج بس غالبا بما إننا دعينا الله و قلنا اللهم أهلك الظالمين بالظالمين فربنا قوم الأتنين علي بعض فحاليا الواحد مش محطوط تحت أي ضغط في فنيات الشغل لأنهم الأتنين منشغلين عن الإنتاج بالتخبيط في بعض

الجميل بقة إن مؤخرا حصلت شوية تغييرات في إدارة و تنظيم الشركة كمان دي عاملة شوية لغبطة أكبر و أكبر و صاحبكم متنيل عمالين يشيلوني فوق طاقتي بس الغريب إني مستحمل و بأجاهد إني أسد بالرغم من إني يعتبر شغال لوحدي و بأحارب لوحدي بس أنا سعيد إني مفيش حد بيخبط فيا حتي لو بأغلط و بأجري علشان أصلح الغلط مش بأكون زعلان و لا متوتر علشان مش حاسس إن في حد بيتلكك لي دلوقتي

و طبعا مديري العزيز جدا بعد إستقالة مدير المصنع و تخبيط الناس في بعضها خايف جدا يلطش معايا علشان مفيش غيري حاليا علي الحياد و مطمن لي بالرغم من إن اللي في النفوس لسه موجود

المشكلة الأكبر إن المدير العام سايب الشركة لمدير الموارد البشرية و المدير الإداري و طبعا الأتنين لا يفقهوا في الفنيات في شئ بس أهم لاقوا ناس هبلة عمالة تخبط في بعض و تهزق بعض قالوا ليه مناكلش علي قفاهم حلاوة و تلاقي مدير الجودة عنده خمسين سنة بيطلع للمدير العام اللي من دور ولاده يهزقه و ينزل محمر و تلاقي مديري نازل من فوق دي قلة أدب طيب مادام أنتم كرامتكم بتنقح عليكم كده متغلطوش و تهزقوا نفسيكم من الأول و لو أنتم بقة شايفين اللي بتعملوه صح دافعوه عنه و متقبلوش التهزيق

صاحبنا مدير الجودة دخل في صراع و تنطيط مع مدير الأبحاث و قام مدير الجودة ملبس نفسه في الحيط و في تنك حاليا واقف و مش عارفين هنيل فيه أية؟

في نقطة كمان قلت أكلمكم فيها و هو زميلي السابق في الشغل اللي بعد التغييرات اللي حصلت إتنقل لإدارة تانية و لكنه لسه معانا عمال يحدف علي شغل من شغله و ينزل لمديره يلعب له في دماغه و ينزل لمدير التطوير الإداري يلعب له في دماغه علشان يفتحوا لي و يقفلولي شاشات علي الفورث شيفت ده برنامج للإ أر بي سيستمز للي فاهم في الحوارات دي و عمال يكربس علي شغل و يوهمني إنهم هم اللي بيقولوا كده و طبعا أنا عارف إن ده من تخطيطه ليه مش فاهم المهم هو شخصية زبالة و من أسوأ الناس اللي في الشركة و بينقل الكلام و بيوصل المعلومات و بيخلي الناس تخبط في بعضها بس هو فاهم شغله و بيداري عن الناس المعلومات الكاملة بس الحمد لله أنا بأحاول أتجنب شره علي قد ما قدر لأن مفيش حد فاهم معايا و لا مدير قوي ذو شخصية يسندني

بس الحمد لله مش فارق معايا و يمكن ده اللي مخليني مرتاح في الشغل و مش متوتر

إني ضاربها صرمة زي ما بيقولوا و مش فارق معايا و و لا بلاش

كمان من فترة رحت إنترفيو و في مشروع سفر للسودان الشقيق بس مفيش حد لسه عاوز يبعت لي الميل بالعرض كاملا دعواتكم

طبعا لسه محاولاتي للنقل من الإنتاج لأي قسم حتي لو الحسابات في الشركة مستمرة بس الموضوع بيزداد صعوبة لأني الوحيد حاليا اللي في قسم الإنتاج فاهم معظم الدنيا بعد نقل زميلي السابق لإدارة تانية و ربنا يكرم

أحلي حاجة بقة في الحوارت دي كلها إن الواحد تحول إلي طور في ساقية مش شايف قدامه عمال يلف يلف يلف مش بيحس بحاجة و الأيام بتعدي و خلاص و الله أحيانا بأكسل أغير الهدوم اللي بأروح بيها الشغل حاجة مقززة جدا :)))

ممكن أكلمك عن أية كمان

الرخم الأيام دي إني مش باسمع حاجة و لا متبع حاجة

زمان و أنا في الكلية كنت بأقول لنفسي إزاي الناس مش متابعة أخبار فلسطين مش متابعة التتطورات العالمية انا بقة تحولت للناس دي مبقيتش أتابع حاجة هي رنات ساعة بج بن في البي بي سي قبل ما أنام و مش بألحق أسمع بقية النشرة

و أصحي الصبح أخد الشدوشتات و أروح علي الشغل أتريق في الطريق مع السواق بتاع الميكروباص بتاعنا عن الأهلي و الزمالك و أروح الشغل أشرب النسكافيه و أشتغل و أدخل علي الفيس بوك وقت البريك و أرجع البيت الساعة ستة و عشرة لو يوم شغل عادي أو الساعة تسعة و عشرة لو سهرت في الشغل و في كلتا الحالتين مش باعمل حاجة و أنام الساعة عشرة أو حداشر

انا عارف إني هأندم علي الأوقات دي بعد كده بس أنا مش عارف أستغلها أو مش عاوز يمكن و عاوز الأيام تعدي و خلاص بأقولكم أية شكلها كده هتغمق لو كملت كلام حلو قوي عليكم

و مبروك للزمالك

و عاوز كيك تودو كيك

و مبسوط في شوبير قوي

و ربنا يبارك لنا في فريدة يارب و هتكون أول إمراة تمسك الحكم في مصر

و ربنا يشفي سيادة الريس و يرجعه لنا بالسلامة

و كل يوم الصبح بأسمع طقم أغاني أطفال أصحي يادنيا و جرس الفسحة و البنات البنات و جدو علي و بسم الله و في البحر سمكة و حبيبة بابا رشا

و طبعا كل يوم الصبح لازم أسمع منير العبقري

و أسمع القران الكريم من ستة لستة و نص و أنا بألبس و بأسمع شوية للشيخ محمد رفعت الساعة سبعة و أحيانا بأسمع مصطفي بكري علي الردايو و كلام بالعقل

و الله الكلام معاكوا ممتع قوي بس أنا خايف أقعد أتكلم تغمق معايا

من كم يوم كده الواحد قابل بنات قطايط صغننين و فرحت بيهم قوي قوي و أتصورت مع بنت منهم و الصورة دي اللي أنا حاططها علي الفيس بوك و أنا فرحان قوي بالصورة دي

و أخيرا بقة تصبحوا علي خير علشان أتضح إن بكرة لسه الخميس مش الجمعة

الشئ الناقص

حاولت كتير مكتبش البوست ده

جه علي بالي أكتبه إمبارح بالليل بعد قراءة قصتين اللي قبل القصة الأخيرة اللي قريتها النهاردة الصبح من مجموعة الخطوبة لبهاء طاهر

و فعلا قاومت و مكتبتش و قلت خلاص سخونية القصتين راحت مني بالنوم

لكن صحيت لاقيتها لسه موجودة طنشت بردوا حاولت أدور علي خروجة بالنهار من خروجات النهار اللي مفتقدها محدش يفتكر إني يعني عربيد و مقضيها سهر كل يوم لا هو كل فين و فين بس بتكون الدنيا ليل

و قعدت شوية أتكلم مع محمد فتحي علي الفيس بوك و بسم الله ماشاء الله نكد علي أكتر

:))

قريت في الأهرام عن حفلة عمر خيرت في ساقية الصاوي و رخمت علي أتنين علشان أدعوهم للحفلة و محدش رد و في حل من حلين يا إما أتصل بزيمو و منصو و نروح يا إما هأقرر إني أروح لوحدي و أقعد أتدلع و مرحش و أنزل علي البستان أضرب حجرين التفاح التمام

دلوقتي مشغل محطة أم كلثوم و فيها أغنية فات الميعاد

طبعا المحطة دي بتتديني جو ابن كئيبة من إبتدائي لأني كنت بأبدأ عمل الواجب في الوقت ده تقريبا و تلاقي كل الناس في الفترة دي متفقين ضمنيا علي تشغليها

المهم

الشئ اللي خطر علي بالي كتابته إمبارح بعد الإنتهاء من قراءة قصتين من الخطوبة إن الشئ اللي ناقص حياتي هو الحياة نفسها حياتي ناقصة حياة

طبعا محدش فاهم حاجة طبعا و لا أنا فاهم حاجة بس هو ده اللي حسيته

و تفيد بأية ياندم ياندم و تعمل أيييييييييييييييييييييية

يسلام ياست

ياما كنت أتمني أقابلك بإبتسامة أو بنظرة حب أو كلمة ملامة

.

النهاردة كان في شغل و طبعا علشان أنا مرحتش الخميس و قفلت الموبيل محدش قالي بس أنا عرفت من مصادري و طبعا لم أنسي وعدي لكم في البوست اللي فات و تأكدت من إن بزازة أجازة بكرة و موعدنا يوم الأتنين زي ما قلتلكم

النهاردة يوم كئيب كعادته مش فاهم يعني مش بحب أروح الشغل و مش بحب السبت في البيت مش عارف ممكن أعمل أية

و مش بأعمل أي شئ

يااااااااااااااااااااااااااااااااااااااااااااااااااااااااااااااااااااااااااااااااارب

فكرة مشعشة

السلام عليكم

البوست ده بوست قصير

النهاردة بعد ما قعدت مع مفيد و الساعاتي و عبدالعدل و النجم منذر

و انا مروح و مكنتش قادر و نفسي أروح علشان أنام و أنا راكب الأتوبيس أتصلت بمشرف العمال في الشغل عرفت الدنيا حصل فيها أية النهاردة في فترة الإضافي و قررت إني مش هأروح الشغل بكرة

الشغل بكرة مكربس و في مشرف مش جاي و أنا اللي هأدبس مكانه

قلت يلا نسيب بزازة يتدبس فيها لوحده

و مش هأروح الشغل بكرة

الفكرة المشعشة مش دي

الفكرة تكمن إن سيد بزازة أجازة يوم الأحد

الفكرة أية بقة

إني هأضربه يوم الأتنين

بجد و الله ناويها

لو خنق علي زي النهاردة تاني هأضربه و اللي يحصل يحصل

أية رأيكم

و تصبحوا علي خير

:)))))))

شياطين الإنس

البوست ده زي البوستات بتاعة زماااااااااااااااان اللي كنت بأتوهكم فيها متفهموش أية العلاقة بينهم و بين بعض

المرة دي هأبدأ بالبوست الرئيسي علي طول علشان لو ملحقتش و نمت يبقي قلت اللي عاوز أقوله

أمبارح الصبح خرجت في مشوار لحديقة الطفل بمكرم عبيد و قضيت كم ساعة حلوين الحمد لله مع ناس كتير قوي المجال هنا لا يساع لذكر أسمائهم بس هأقول البلطجية بتوعهم كريم و شريف و عرفة و كفاية عليكم كده

المهم بعد العودة الساعة خمسة تقريبا و كنت فاكر إن ماتش الأهلي الله يحرقه الساعة خمسة لاقيت ماتش الحرس و الجيش أتفرجت شوية و أتغيدت و نزلت و قلت أفترج علي الماتش في البستان

و أنا بأجيب الغداء من برة علشان مكنش فيه غير بابا معايا أمبارح لاقيت الجامع اللي حكيت لكم كتير عليه اللي تحول بقدرة قادر من جامع للعلوم لمبني أقرب للمول التجاري

لاقيته بسم الله ما شاء الله حاطط دباديب حمرا و قلوب حمرا و هدايا حمرا

سخنت بصراحة يعني الجامع بسم الله ماشاء الله بيحتفل بيوم القديس فالنتين و بيقولوا في أضطهاد في مصر

طلعت أتغديت و قلت لنفسي أنا هأنزل قصة يوم الفالنتين من علي النت و أطبعها و أخدها لأكبر مسئول في الجامع و بالفعل طبعتها و أخدت القلم الماركر و علمت علي جمل معينة من باب يعني التوضيح و المختصر للرجل لو فكر يقرا

و بعد كده أستعديت للنزول قلت هأديه الورق و أطلع علي البستان أتفرج علي ماتش الأهلي هناك

معرفش لاقيت نفسي بأقول لنفسي

أنت هتعمل كده ليه هتعملي لي فيها بطل و حامي حمي الإسلام

يعني أنت لو عندك حد تحتفل معه بالفالنتين مش هتحتفل

و رحت مطبق الورق و شيلته و رحت علي البستان علي طول و كمان الأهلي كسب و بقيت أحمر في أحمر

.

النهاردة بقة صحيت الجو كان حر و كئيب جدا و بعد أما فطرت قلت هو شكله يوم نكد فخدها من قصيرها و نام ياعم

و نمت شوية و بعد كده العيال و لاد أختي جم صحوني من النوم الله يسامحهم و معرفتش أنام تاني

و قمت أتفرجت علي التلفزيون و أخيرا لاقيت فيلم بخيت و عديلة بيخلص و أخيرا هأقدر أتفرج علي فيلم من أوله لأني دايما لما بأرجع من الشغل بيكون كل قنوات الأفلام عليها أفلام من نصها و مش باعرف أتفرج هب لاقيت فيلم أية اللي جاي عن العشق و الهوي و الفيلم ده أنا عارف قصته بس عمري ما أتفرجت عليه

قلت أتفرج

و ياريتني ما أتفرجت

:))

.

من أمبارح في فكرة عماله تتدور في دماغي أنا ليه شايل هم حاجات معينة يعني شايل هم الشغل و شايل هم الماجستير و شايل هم إني عاوز أنجح

طيب ما علي كلامك مع نفسك شكرا كده و خلاص و مش فارقة تتضرب تولع الدنيا باللي فيها و هأقضيها لوحدي و خلاص و أهوة تمانية و عشرين سنة عدوا و أنت لوحدك إن شاء الله مش هتعيش ربعهم تاني و شكرا يعني

و قلت نفرض أنك خلاص مش هتفرق معاك طيب ما تحط نقط تشتغل عليها نجحت أهلا و سهلا منجحتش خلاص أنت بايع القضية كده كده

كلام معقول و الله

قلت طيب عاوز أقعد معاك مع نفسي يعني نشوف هنعمل أية مع بعض الفترة اللي جاية لسه هأقعد مع نفسي و أشوف أية اللي هيحصل

و القرارات اللي هأخدها طبعا هتكونوا أول و أخر ناس تعرفها

طبعا الموضوع ده مش علي طول علشان أنا شخصيا مشغول دلوقتي باية الله أعلم و نفسي بردوا مشغولة بأية الله أعلم

:))

تعرفوا أنا فكرت شوية في الموضوع ده و أكتشفت سبب خوفي من الحاجات الغلط اللي بأعملها دلوقتي بالرغم من إنها مش فارقة معايا حاليا بس تعرفوا سبب خوفي إني أنجح و ربنا يوفقني خايف لو ده حصل تكون الحاجات اللي بأعملها دلوقتي تأثر علي قدام و ملحقش أفرح باللي ربنا هيجيبه لي قدام و أرجع أندم علي اللي فات و اللي ضيعته مني زي ما بأندم دلوقتي تاني

ربنا يسترها

.

النهاردة بعد الفيلم العيال ولاد أختي كانوا عاملين دوشة كبيرة و حالتي مكنتش تمام علشان ألعب معهم علشان هم لما بتركبهم العفاريت بيكونوا شئ لا يطاق

قلت أنزل أقعد شوية علي البستان و أرجع يكونوا روحوا أو ناموا لو باتوا عندنا

المهم قعدت شوية علي البستان معرفش لاقيت نفسي بعد كده قايم و ماشي في طريق ممشتش فيه من فترة و شغلت الموبيل و سمعت قرأن و أنا ماشي و عديت علي المكان اللي وقف فيه أحمد عرابي قصاد الخديو و دخلت يمين في شمال و مشيت لحد ما وصلت لكشك و قفت عنده شوية و بعدين مشيت لحد جامع السيدة زينب

و روحت

عندي حلم من أحلام اليقظة بأحلمه دلوقتي

إني شايف بنوتة صغيرة لابسة أبيض في لفة بمبي و لابسة جوانتي بمبي و كوفية بمبي و نفسي أعرف أسمها مش عارف أية الحلم العجيب ده

لو حد عنده تفسير يقول علي طول

و ياه لو يعرف أسم البنت

و هابي فالنتين

تساؤل حد متابع الأستيوتس بتاعتي علي الفيس بووك؟

غزوة معرض الكتاب 2010

السلام عليكم

أزيكم ياشباب أخباركم أية يارب تكونوا بخير و في أحسن حال؟

النهاردة زي ما قلتلكم أو اللي منكم هنا متابعين الأستيتوس بتاعتي علي الفيس بوك رحت معرض الكتاب

أمبارح و أنا في فرح أخت واحد صاحبي جه علي بالي أخد ابن أختي معايا و لاقيت الساعاتي بيتصل بيا بيقولي إنه هيجي معايا و أتصلت بأختي علشان أعرف الظروف أية قالت لي لا بلاش علشان الجو ممكن يكون برد عليه و طبعا صفصفت علي إني أخد الساعاتي و كأنه ابن اختي مفيش فرق كبير في السن بينهم يعني

الجميل في إتفاقي مع الساعاتي إنه أجبرني إني أقوم من النوم و أروح علشان بصراحة لو مكنتش متفق معه كنت كملت بقية اليوم في جزيرة القطن لحد بعد العصر بشوية

رحت المعرض و أستنيت الساعاتي شوية و لفيت في كم صالة قبل ما هو يجي و لما جه لفينا و كملنا اليوم و أكلنا مع بعض و قعدنا في الجونينة و كان يوم جميل بصراحة و بعد كده رحنا حفل توقيع كتاب أحمد الصباغ و قابلت أشرف توفيق و قابلت أحمد عبدالعدل و قابلت مين تخيلوا كان جاي متنكر في هيئة كرومبو ههههه أحمد مهني كان لابس بتاع كده أول ما شفته أفتكرت كرومبو علي طول

ههههههههههههههههه

و من هنا يجب أن أتوجه بكلمة للساعاتي و أقوله متشكرين ياتوشكي

متشكر بجد ياساعاتي علي اليوم الرائع ده

.

بالنسبة للكتب اللي كنت عاوز أجيبها كان همي الأول ساحر الصحراء لباولو كويليو ترجمة بهاء طاهر و لم أجدها في أي مكان في المكتبات و في سور الأزبكية

بس و أنا بأدور عليها في سور الأزبكية لاقيت تحفتين

التحفة الأولي العجوز و البحر لهيمنجواي و كانت في مدونة كاتبة عنها من سنة أو أتنين تقريبا و علي ما أعتقد هي سارة زهرة التيوليب

التحفة التانية اللي لحد دلوقتي مش مصدق إني لاقيتها و افتكرتها فورا هي الفردوس المفقود لجون ميلتون ترجمة د/محمد عناني انا سعيد جدا جدا جدا جدا جدا جدا جدا جدا بالتحفة دي لأنها لها مقدرش أقول ذكري لكن لها سعادة بإقتنائها حتي لو مقريتهاش

كمان أشتريت كفاح طيبة طبعا السؤال التقليدي أية ده مدرستهاش في إعدادي الرد أنا و الله العظيم درست الصقر الجرئ اللي كانت بتحكي قصة أحمد عرابي اللي بدايتها من عند قصر عابدين و كنت باقرا الإجزاء بتاعت كفاح طيبة اللي كانت بتيجي في كتاب الإمتحانات و كانت عجباني أوي

و كمان أشتريت تاكسي لخالد الخميسي و بيت سئ السمعة لنجيب محفوظ

هنا أنتهت الكتب أو التحف اللي أشتريتها من سور الأزبكية و أخدت و عد من الساعاتي أنه هيجيب لي ساحر الصحراء اللي عنده

و أشتريت من دار الشروق المجموعة الأتية

سفينة نوح خالد الخميسي

نقطة نور و الخطوبة و أنا الملك جئت و أبناء رفاعة لبهاء طاهر

و في المخطط أشتري خالتي صفية و الدير و الحب في المنفي

حجرتان و صالة لإبراهيم أصلان

و أشتريت من مكتبة مش عارف اسمها وكالة عطية لخيري شلبي

أية رأيكم في اللي أشتريته؟

طيب أية رأيكم فيا بقة؟

شطور جدا

صح

و الله مش شطور و لا نيلة و ربنا يسترها علشان الروايات اللي أشتريتها دي ليها دلالة منيلة بنيلة طبعا محدش فاهم حاجة بس مش مشكلة

طبعا أنا مش شايف قدامي و عمال أشرب في شاي و نسكافيه علشان أفوق و للأسف بكرة شغل و نرجع لأبوح و أيامه السودا

يلا يارب تكوني بخير و في أحسن حال

سلام ياشباب

الوحدة

أولا ربنا يسترها علشان دخلة البوستات الكتير اللي ورا بعض دي مؤشر مش ظريف خالص خصوصا علشان اللي هأعمله يوم الأثتنين و ربنا يسترها يعني أنا أمبارح كنت لسه منزل بوست و بالصدفة عديت علي كم مدونة كده و كان منهم مدونتين واحدة ماسكة فيلم أفاتار نقض لاذع و بهدلة و التانية طالعة بيه السما

أنا بصراحة الفيلم عاجبني الرجل قعد أربعتاشر سنة بيعمل فيلم و محقق أعلي إيرادات خيالية لم تتحقق قبل كده يبقي إزاي فيلم وحش للدرجة اللي صاحبة المدونة نقضت بيها الفيلم يعني حتي لو فيلم مش حلو مش هتفصصه كده

المهم باليل خرجت مع أتنين صحابي و قررنا ندخل سينما و صفي القرار علي كلمني شكرا و كان نفسي أكتب بوست عنه أمبارح بس قلت لا مش هأكتب و الحمد لله إني مكتبتش علشان أعرف أكتب البوست ده

المهم فيلم كلمني شكرا أو أنا أسميه زيطة خالد يوسف فيلم مالوش ملامح حسيت إني بأتفرج علي فيلم اللمبي بتتضحك بلا هدف أو أهداف محروقة في أفلام خالد يوسف علي حبه تريقة علي الشيوخ و حبه وطنية و شوية مصلحة بردوا مفيش مشاكل و فيلم قليل الأدب في الألفاظ و الإيحاءات أو هي مش إيحاءات لا دي أفعال و أقوال تخدش الحياء فعلا و بلا هدف

بس فيه شوية مزز تمام

.

البوست بقة

كنت خرجت شوية النهاردة و رجعت علي الساعة 11 تقريبا و كنت راجع بأجري مش عارف ليه كنت حاسس إني راجع البيت بسرعة زي زمان و تخيلت حاجات و كان عندي يقين إنها هتحصل بس محصلتش قعدت قدام الكمبيوتر شوية ملاقيتش حاجة أعملها هبلت شوية و قمت

شغلت التلفزيون لاقيت فيلم حنفي الأبهة شغال و في نفس ذات الوقت فيلم واحد من الناس أخدت منهم لقطتين و بالمناسبة كنت الضهر أتفرجت علي الفيلم الرائع برتي ومان و زهقت من الفيلمين و عملت سندوتش جبنة بريزيدن و حطيت عليها فلفل أخضر دي نصيحة قديمة في حد كان قال لي عليها الأ و هي الإستمتاع بالأكل و عمل تظبيطات للأكل لفتح الشهية

المهم لما كنت قاعد علي الكمبيوتر تمنيت إني أتجوز و حلمت و حلمت و لما عملت سندوتش و كنت بأتعشي حسيت بوحدة غريبة و شعور مخيف و خفت قوي نفسي أتجوز و في نفس الوقت خايف أتجوز مش خوف علشان الدنيا مش متظبطة في الشغل لا علي العكس الرزق علي ربنا و مفيش خوف منه الخوف من حاجات تانية بتوجع قوي و خايف تحصل لي و لو حصلت يبقي كده شكرا النهاية بجد و كمان هأكون أتعست حد تاني معايا و الدنيا مش ناقصة تعساء يعني

تعرفوا أمبارح رجعت من بعد الفيلم لاقيت ابن أختي نايم قدام التلفزيون و هم كانوا قاعدين عندنا الفترة اللي فاتت و مكنتش باعرف أخده ينام جنبي كتير ما صدقت لاقيته سهل الشيل و رايح في النوم و أخدته ينام جنبي علي السرير تعرفوا حضنته جامد قوي و لاقيت الدموع نازلة مش عارف ليه و الله مفكرتش في أي حاجة لاقيتني بأدمع و خلاص ليه مش عارف

تعرفوا أنا مقصر في حق ربنا و في حق نفسي و في حق الناس كتير قوي و مهمل قوي و كسلان جدا بس أحيانا كتير بأصعب علي نفسي و مش باكون عارف أعمل لنفسي أية علشان تتبسط أو حتي مش تتبسط متكونش تعبانة

المهم بقة دعواتكم و تصبحوا علي خير بقة

بلا نكد

و مازالت الهلاوس قائمة

السلام عليكم

أزيكم ياشباب بأفكر جديا أغير إسم المدونة إلي هلاوس من كتر الهلوسة اللي بأكتبها فيها

المهم طبعا لازم تكتبوا ورقة علي صدركم فيها عنوان بيتكم أقصد مدونتكم علشان هتوهوا أكيد لو أستمريتم تقروا البوستات اللي في المدونة بتاعتي

يعني مثلا عندكم كم نكتة حلوة وصلوا لي اليومين اللي فاتوا

جماعة مساطيل عاملين ندوة ثقافية و عاملين يتناقشوا نجيب محفوظ و لا منجيبوش

جماعة صعايدة عرفوا إن مصر هتلاعب الجزاير خدوا أسلحتهم و طلعوا علي السودان

و بمناسبة الفتنة الطائفية واحد مسيحي بيسأل رئيس الجمهورية ينفع واحد مسيحي يبقي رئيس جمهورية قالو و لا مسلم بروح أمك

.

نيجي لماتش أمبارح أنا توقعت الفوز بالثلاثية لكني وجدتها رباعية بحمد الله كان نفسي نكسب و نقطعهم علشان يعرفوا حدودهم بالرغم من إني حاسس إنه كان في تهويل زيادة عن اللزوم من اللي حصل في السودان بس كان نفسي نلقنهم درس كروي و الحمد لله حصل

.

النهاردة بعد محاولات دامت ما يقرب من ثلاث سنوات تقريبا قدرت أصحي الصبح و أقوم بعمل طقوسي ليوم الجمعة و في نفس الوقت و الأهم مكسلتش و رحت صليت الجمعة في مسجد الرفاعي شئ صارعت نفسي عليه لمدة ثلاث سنوات علشان أعمله تفتكروا هأصلي في مسجد السلطان حسن أمتي؟؟ سؤال بيطرح نفسه

و كان في صلاة جنازة بالمناسبة

.

في جملة بتتقال علي لسان جندي من جنود ريتشارد قلب الأسد في فيلم الناصر عجابني قوي

كل ذلك نهايته الموت

.

قرار رئيس الجمهورية رقم واحد لسنة 2010 مادة واحد تقديم إسقالتي من الشركة يوم الأثنين القادم علشان الأحد أجازة

:)

و لو ربنا كرم و نقلوني يبقي الحمد لله و لو ربنا لم يرد و لم ينقلوني و وافقوا علي الإستقالة يبقي بردوا الحمد لله و يا أهلا بالبطالة و محدش يدخل المدونة دي تاني و هتبقي أيام فنننننننننننننننننننننننننن

هو ده البوست الرئيسي بس قلت أتوهكم شوية

و السلام ختام

هلاوس طولينية

أزيكم ياشباب

مع بزوغ شمس الإكتئاب من بعييييييييد و قبل شروقها

و كمان مع عدم تعليقاتكم علي البوست اللي فات

حبيت تشاركوني بعض المواقف اللي أتحكيت لي في الشغل عن بعض الحوادث اللي حصلت في الشركة قبل أما أروحها

طبعا بسبب طبيعة شغلنا في الكيماويات بنتسخدم مذيب اسمه الطولوين المذيب ده له تأثير علي الدماغ لأنه بيحل محل الأكسجين في الدم تقريبا و بيؤدي لنوع من الهلاوس

طبعا العمال في فترة من الفترات كانت تعتبر مدمنة و بتحب المذيب ده و كانوا بيعملوا له قعدات كده زي قعدات المخدرات

القعدة كانت في حلة هي زي حلة البيت بالظبط بس كبيرة و بيحطوا جواها شوية طولين و يقعدوا جواها و ممكن يغطوا الحلة دي بكيس كبير علشان محدش يشوفهم

غالبا ممكن مش تتخيلوا كمية الضحك اللي أنا ضحكتها علي المواقف دي و كنت خلاص هيغم علي من كتر الضحك و غالبا أنتم ممكن تحسوا المواقف مش كوميدية قوي

بس أنا حابب تشاركوني المواقف دي حتي لو مش هتوصل لكم قوي

مرة عامل دخل علي الكيميائي زميلي و مشرف العمال اسمه سيد دخل عليهم و هو ماسك جزمته في أيده و بيقوله أنا شايف شعاع ليزر طالع من عينيك ياعم سيد أنا شايفه من فوق و لازم أضربك علشان يقطع

.

مرة واحد كان لسه جاي جديد و العيال ضحكت عليه و خليته يغسل حلة بالطولين و حظه الهباب بتوع الموارد البشرية طلبوه علشان يمضي العقد دخل عليهم أنت أسمك أية الواد يقولهم مش عارف و يعيط يابني أسمك مش عارف و يعيط حد زعلك مين مضايقك و لا حياة لمن تنادي و الواد يعيط و طلبو مدير الإنتاج أنت يابشمهندس مزعلة ليه يقولهم أنا مزعلتوش يابني مين زعلك مفيش و يعيط

.

مرة مسكوا أتنين جوة حلة واحد عمال يعيط و التاني عمال يضحك و اللي بيعيط عمال يقول الواد ده شبه أخويا عماد الأهبل و يعيط

.

مرة الكيميائي زميلي مسك واد قاعد جوة حلة و عمال يشده علشان يطلع عمال يقوله يابيه سيبني متاخدش الجهاز مني حرام عليك أنا عاوز الجهاز

الواد لما فاق عرفوا إنه دماغه أشتغلت و أتهيأ له إنه رجل أعمال كبير و بيدير عن طريق جهاز لاسلكي و كان متهيأ له إن زميلي هياخد الجهاز منه

.

مرة واحد طلع علي واحد تاني بيجري عليه و بيقوله أجري يامحمد هيقتلووووووووووك هيقتلووووووووووووك

.

مرة واد مسكوه عمال يلعب بصوابعه علي جدار الحلة من جوة و عمال يقولهم سيبوني بأكلم صحابي اليابانين علي النت

.

طبعا ده غير المصايب التانية اللي حصلت بجد أنا كنت هأموت من كتر الضحك خصوصا إني عارف البشر دي و متخيل سلوكهم

خصوصا اللي مكنش عارف إسمه ده

الحمد لله سيطروا علي موضوع المذيب ده لأنه فعلا بيدمر المخ تماما

طبعا كل الحوادث دي في وقتها بتكون مصايب كبيرة ممكن تتحول لمأسأة بس الحمد لله ربنا بيسترها

:))

هلوسة أثناء النوم

السلام عليكم

كنت أجلت كتابة البوست ده إمبارح و أجلته كمان النهاردة لما رجعت من الشغل و كان نفسي أكتبه و كنت هأموت و أنام حاولت النوم من الساعة تمانية لحد دلوقتي و أهوة الساعة عشرة و مش عارف أنام قلت أقوم أكتب البوست ده يمكن أرتاح و أنام

المهم كنا في زيارة لأخويا المتزوج حديثا يوم الجمعة اللي فاتت في أكتوبر و ما أدراكم ما أكتوبر مرورا بهايبر و متحف سيراميكا كليوباترا و شركة ترافكو و ما أدراكم شركة ترافكو

المهم و طلبت من مراته إنها تعاملني معاملة و لاد أختي علشان هي مغرقاهم لعب و كتب و شيكولاته و هي بصراحة متأخرتش دخلت جابت لي كيس شيكولاته و علبة بونبون كده ملحقة بلعبة و كمان أخويا دخل و جاب لي شوية كتب من اللي هي بتقراهم و قالي شوف هتأخد أية دورت و لاقيت مجموعة قصصية لبهاء طاهر لم أعرف أن الطواويس تتطير و طبعا من غير ما أفكر أخدتها يعني صباح النكد طبعا و لا حد فاهم حاجة مفيش مشكلة أمبارح بقة مسكت الكتاب قريته كله مرة و احدة و مقدرتش أنام غير لما خلصته و دي من المرات القليلة جدا اللي أمسك فيها كتاب أخلصه من مرة واحدة و كنت مستمتع جدا به و ياااه علي القصص اللي فيه و الجمل و التعبيرات اللي فيه في جملة شدتني قوي هي في صفحة 102 بتقول و قال لي و هو يقبض علي يدي الموت لن يهزمني يا ايفيت لأني عشت معك بالفعل ألف عام فعيشي أنت أيضا ألف عام قصة الجارة

و طبعا قصة لم أعرف أن الطواويس تتطير حكاية الكتاب كله حكاية طبعا بدليل إني أنا خلصته من مرة واحدة اللي الكتب بتقعد معايا بالشهور و مش بتخلص شكرا لأخويا و مراته و شكرا لك

في كم مشكلة كده مع مراة أخويا إنها نباتية و كمان بتعمل نوعيات أكل غريبة جدا حتي المكرونة اللي عملتها لي مخصوص علشان مش بأحب السمك قوي عملتها لي ملونة مكرونة بني الواحد كان بياكلها علي مضض

:))

و طبعا أكبر مشكلة المرور بترافكو و كمان في مشكلة كبيرة جدا اللي هي إنها بتفكرني بها

.

في الشغل بقة

جابوا لي العقد الجديد علشان أمضي عليه قلتلهم كلا البتا مش هأمضي يا النقل يالحبس قصدي يالبيت قالولي متقلقش موضوع تحت الدراسة و متقلقش لو معرفناش نوصل لحل و أنت قررت تمشي العقد مش هيكون مشكلة بس لازم علشان التأمينات و هكذا

و مضيت و ربنا يسترها و أتنقل علشان لو متنقلتش و روحت البيت هتبقي أيام بلاك بلاك بلاك يا جماعة

و تعرفوا أنا نفسي في فترة تشرد و صياعة شوية أصل أنا ناوي بيني و بين نفسي لو موصلناش لحل و هتضطر أروح مش هأبلغهم في البيت و هأقضي كأني لسه بأشتغل شفتوا الدماغ

:))

قلت لمدير المصنع اللي أنا بحبه و باحترمه عن اللي بلغته لمدير الموارد البشرية كنوع من عدم الظهور بشكل وحش قدامه و قالي ليه كده نقعد نتكلم نتناقش نحدد قلتله أنا قلتلك قبل كده و ملاقيتش رد منك فأضطريت أعمل كده قالي طيب براحتك و تاني يوم عمل لنا إجتماع علشان نحدد المسؤوليات اللي أنا كنت طلبت بيها طبعا بعد فوات الأوان أنا خلاص علي جثتي أكمل في الإنتاج يالنقل يالحبس

و بردوا ربنا يستر

.

خرجت من كم يوم دخلت سينما دخلت فيلم شارلوك هولمز لوحدي و للأسف بعد صمود تقريبا شهر أو أكتر إنهارت و شربت شيشة تاني

و يوم الأتنين اللي فات رحت حفلة أنا مصري في ساقية الصاوي برفقة صديقي منصو صديقي من الكلية و ياريتك يازومي كنت معانا بالمناسبة مفيش ماتش كورة قريب أنت الماتشات بتاعتك من الحاجات اللي باخطط أعملها لو قعدت في البيت

.

من كم يوم فرحت قوي إني نسيت رقم تليفون بس للأسف طلعت منسيتوش و نفسي أشوفه بس مش عاوز

.

عندي إحساس إني كبرت قوي و العمر بيعدي جابوا لنا كيميائي جديد في الشغل دفعة ستة الصبح محسسني إني كبير و خلاص العمر جري بيا

.

أحيانا كتير بأدعي ربنا يقدر لي الخير في الوفاة مش عجز و لا سخط علي حالي بس بجد الدنيا أصبحت صعبة قوي و أنا بجد كسلان جدا و فاشل جدا و بارد جدا و الحياة عندي مالهاش لا طعم و لا لون و لا رائحة

و سلام بقة

تفتكروا هأعرف أنام كده

تصبحوا علي خير

بوست ملغبط

السلام عليكم

معلش أضطريت أنزل بوست جديد بعد الضغط الرهيب و التعليقات الكتيرة علي البوست اللي فات

:)))

المهم البوست ده هأكتبه بسرعة شوية علشان أنا كنت في الشغل النهاردة و بكرة كمان في شغل علشان أنتم عارفين الساعة بخمسة جنيه و الإضافي بيحسب

بعد أما رجعت من الشغل اللي شكل أيام الأخيرة فيه بدأت كانت أختي بتتصل بيا كل شوية تسأل هأرجع أمتي هأجي أمتي و هكذا و هي دي عادتها لما هي اللي بتكون مسؤلة عني و عن أكلي و أكدوا علي أكلي دي علشان في ملامح غريبة بتتغير في شكلي الجسماني بسبب الأكل و بلاش تفصيل أكتير من كده علشان الفضايح

المهم

بعد أما رجعت و أنا بأتغدي فجأة حكيت لي حكاية و بتقولي النهاردة كان يوم غريب مش عارف أية حصل و أية و أية و فجاة فلان الفلاني مات فلان ده خال واحد صاحبي من صحابي القدام عند بيت جدتي الله يرحمها

سبحان الله الموت الفجاة ده كتر قوي الأيام دي الرجل ده صغير يعني نقول في الأربعينات و لمتجوزش و كان عايش مع أخته اللي هي أم صاحبي و هو مسؤل عن ولادها أكتر من أبوهم

الرجل ده كان بيحبني قوي و بيثق فيا خصوصا علي ابن أخته لأنه كان بيعتبرني أكبر منه و أعقل و بأقوله الصراحة

و منساش أول مرة نروح سينما شبرا بالاس و هو بيوصف لنا الطريق و يقولنا لازم تنزلوا عند محل لندن شوب و تمشوا أوعوا تتهوا و خلي بالكم من بعض

و لما رحنا التحرير تقريبا علشان المتحف المصري لازم نركب ميني باص أتنين و ننزل في الأخر و نفس الكلام في العودة

الله يرحمه يارب

فعلا زعلت عليه قوي

.

المهم بعد كده رحت العزاء و قابلت صاحبي اللي الرجل ده خاله و واحد صاحبنا تاني

طبعا اللي خاله متوفي كانت حالته صعبة ربنا يعينه يارب

صاحبي التاني بقة وقفنا مع بعض أفتكرنا الذكريات اللي فاتت

و الله ياحازم مش بأيدي الذكريات هي اللي بتيجي لوحدها أهوة

و عارف إنها مش هترجع بس أنا عاوز أشارك ناس معينة فيها

المهم

قعدنا نحكي مع بعض عن الناس و إزاي العيال الصغيرة فجأة تتضخمت في الحجم و اللي دخل حربية و أتمسك في قضية مخدرات و اللي دخل شرطة و مين اللي طول فجاة و مين مش عارف أية و جه واحد رخم قوي كان أكبر مننا بكم سنة و سلم علي صاحبي اللي خاله توفي و صاحبي التاني قالي شوف بيسلم عليه و عامل صاحبه فين أيام زمان صاحبي اللي خاله متوفي ده ظابط شرطة يعني هو مهتم بيه علشان كده يعني المهم صاحبي ده قالي ممكن يجي يسلم علينا و ممكن أسيبك معه و أمشي قلتله أوعي علشان أنا مش هأقدر أسيبه من غير ما أسأله عن أخواته أخبارهم أية قالي تصدق أنا مرة قعدت معه و كان نفسي أسأله نفس السؤال و كنا هننهار من الضحك بس ربنا سترها

المهم بعد العزاء ما خلص و كان صاحبنا المشترك مشي

طلعت مع خالي عند صاحبي ده و عيلته علشان نشوفهم عايزين حاجة و لا لا و نلم الدنيا معهم و ننزل

المهم شقة صاحبي في أخر دور في بيت جدتي الله يرحمها و الشقة اللي جنبه مش مبنيه و كنا بنستخدمها كسطوح يعني

و فجاة دخلت السطوح

و كأني رجعت خمسين سنة لورا

ياااااااااااااااااااااااااااااااااااااااااااااااااااه

عشش الفراخ و فرن الحمام اللي كنا بنربي فيه حمام و متسألوش ليه مسمينه فرن علشان أنا مش عارف و علي يمينك أول ما تتدخل مكان زلعتين المش المشهورين

و أفتكرت أيام حملاتنا علي السطح كنا بنطلع كلنا جدتي و خالاتي و إخواتي و نعمل حملة علي العشش تسفر عن مقت عشرين فرخة مثلا علي كم بطة و هكذا ياااااااااااااه فين الأيام دي

بس هو ده الموضوع اللي أثار حماسي علي الكتابة دلوقتي بالرغم من إن عندي شغل بكرة و مش عارف هأصحي إزاي

و في تتطورات كتيرة حصلت في الشغل و ربنا يسترها علينا و عليكم يارب

و ربنا يستر و سنة ألفين و عشرة دي تبقي حلوة كده و مزهزة علشان دخلتها كده مش مريحاني

:))))

بس سيبكم

السطوح ده كان مملكة

ملخص 2009

السلام عليكم

أزيكم ياشباب

كل سنة و أنتم طيبين و ربنا يوفقكم دايما يارب

و يارب 2010 تكون أحلي من 2009 يارب

فكرت أكتب بوست عن اللي أنا عملته امبارح في الشغل

و يارب يكون اللي عملته صح

بس لاقيت نفسي عاوز أكتب ملخص سريع الأول عن 2009

العلاقة مع ربنا في تحسن الحمد لله إن شاء الله نستمرعلي نفس الطريق

الشغل خبرة محترمة الواحد أكتسبها السنة دي في الشغل الجديد

الماجستير الحمد لله نجحت في التمهيدي بس لسه مسجلتش

البيت الدنيا ماشية حبة فوق و حبة تحت

الحب لا تعليق

مصر لا تعليق بردوا

الزمالك يامسهل

*

بالنسبة للي عملته أمبارح في الشغل بقة

أخدت قرار من أسبوعين تقريبا إني مش هأستمر في الإنتاج السنة اللي جاية لأنه مينفعش أستمر تحت سيد بزازة و حتي لو هو مشي لأي سبب مش هينفع أنا تعاملي مع الناس يتغير لأنه ببساطة كسر حاجز معين كان المفروض يكون موجود بيني و بين العمال

فكان قدامي حل من اتنين في الشركة إما أتنقل لأي إدارة تانية أو خلاص نهاية عقدي يوم تسعتاشر يناير و يبقي كده شكرا و علي هذه الأساسا بدأت في البحث عن شغل جديد للعلم حتي لو ملاقيتش شغل جديد و منفعش أتنقل إدارة تانية مكنتش هأستمر بردوا حتي لو قعدت في البيت

المهم كنت قبل كده كلمت مدير المصنع في الموضوع ده و أوضاع الشغل في الإنتاج و مدي التدهور اللي فيها و الهبل و عدم التنظيم اللي موجود

هو طبعا كلامنجي جامد جدا و ضحك علي بكلمتين كل مرة و خلاص

و أحيانا كتير كنت بأدخل أكلمه و أنا كاتب إستقالتي بس هو كان بيلفني بكلمتين و خلاص

و أنا كان أهم شئ عندي أكمل سنة في الشغل

و الحمد لله صمدت هذه السنة الصعبة بس بصراحة الواحد أكتسب خبرة كويسة جدا الحمد لله

من أسبوع تقريبا دخلت لمدير الموارد البشرية و كلمته و ده كان بعد موقف معين حصل في الشغل الموقف ده مش معايا بس مع سيد بزازة المهم هو قالي أنا عارف شوية حاجات و في مؤشرات عن اللي بتقوله بس عاوز تفصيل منك شوية و لينا قاعدة تانية مع بعض

و حصلت شوية مواقف في الشغل منعتني من القعدة مرة تانية معاه

أمبارح بقة كلمت الشباب في إدارة الموارد البشرية و قلت لهم إني يا أتنقل يا إما مش هأجدد عقدي هم أفتكروا في حاجة معينة حصلت قلتلهم عادي مفيش حاجة و أنا كنت كلمت أ طارق قبل كده بس مش عارف أقعد معه تاني

خمس دقايق لاقيتهم بيتصلوا بيا تعالي كلم أ طارق

طلعت حكيت له كل حاجة

و قلتله عن البوظان اللي تحت و الدنيا ماشية عشوائي بدون تنظيم و تخطيط و توزيع مهام شغل

و حتي في كيميائي جديد جه الإنتاج المفروض سيد بزازة كمدير يقعد معانا و يقسم و ينظم الشغل بس ده محصلش

و أكدت له إمبارح إني مش هأستمر في الإنتاج يا أتنقل أو أمشي

هم حاولو الأول يقوليلي ممكن ننظم قعدة بينكم نوضح فيها الخطوط الأساسية قلتلهم لا موقفي مش هيتغير

يا النقل يا البيت

أية رأيكم فيا بقة يا شباب؟

:)

كنت علي وشك دور برد امبارح قضيتها كونجستال و نمت و مرحتش الشغل النهاردة

عملتها و هربت

:)

دعواتكم

*

أحلام 2010

أحلام و أمنيات كتير قوي مش هتكفيني المدونة لذكرها

يلا

كل سنة و أنتم طيبين

أفتكرت

المريلة البمبي بتاعت حضانة عمر بن عبدالعزيز

باب العربية لما أتقفل علي صباعي و فرمة

مريلة حدائق شبرا الكحلي الكاروه

أبلة هانم أهم شخصية اثرت في حياتي مدرستي من أولي لتالتة إبتدائي

أحمد و طارق و هيثم و محمدات كتييييير و نشوي و فاطمة و أسماء زملائي في إبتدائي

أستاذ حمدي و أستاذ سعيد

مدرسة الترعة في إعدادي خصوصا سنة أولي السنة الوحيدة اللي في حياتي كانت فترتين

مدرسة التوفيقية ثانوي و مايكل جاكسون و أيشة الشاب خالد

التمثيلية اللي كانت بتيجي الساعة 12

سنبل أبنائي الأعزاء شكرا ضمير أبلة حكمت أبو العلا البشري (إحنا الثنائي محسن و عمرو

ميعاد الفطار عند جدتي الساعة تمانية الغداء أتنين و نص العشا براحتي لما أطلع من الشارع

مدرسة الكورة بنادي إسكو و الرجل بتاع السجق اللي جنب النادي و التروماي اللي أتلغي

أيام الإمتحانات في إبتدائي لما كنت بأذاكر المنهج كله من الأول للأخر مرة تانية ليلة الإمتحان

رحلات الدروس الخصوصية في البيت و الشارع

فاكرين الأذان كان زمان إزاي كان جميل قوي خصوصا أذان الضهر في التلفزيون كان جميل قوي

فاكرين بقة الموسيقي بتاعة الأذان علي القناة التانية

الشيخ الشعرواي يوم الجمعة الساعة أتنين

عالم الحيوان و سر الأرض

تتر الماتشات بتاع زمان هييييييييييييييييييه

سينما مودرن و شبرا بالاس اللي اتهدت و أفلام نادية الجندي و فيفي عبده و عادل إمام

مترو شبرا لما كان بيتعمل و قافل شارع شبرا

الزلزال بتاع 92 لما أخدنا أجازة بتاع شهر في البيت

عفت نصار و إسماعيل يوسف و أحمد رمزي و إيمانويل و حسين السيد و هشام يكن و جمال عبدالحميد و أشرف قاسم و أيمن منصور و نادر السيد و حسين عبداللطيف و الجوهري لما درب الزمالك

و لما مدرس الرسم قال كل واحد يرسم حلم حياته و رسمت ملعب كورة

الشارع و لعب الكورة

بيت هاني صاحبي اللي كنا بنقضي عنده النهار

لما كنت بألعب كورة أنا و أخويا في الشقة و لما نتخانق مع بعض و نضرب بعض و الجيران تقول لماما و هي راجعة من الشغل حرام اللي بيعملوه في بعض ده

سياسية و ربنا يستر

السلام عليكم

مش فاهم ليه إحنا بنهدم في بعض من تحت لتحت و مش بندي فرصة للمنافسة الشريفة المحترمة و لو حتي ظاهريا ليه كلنا بنحاول نظهر ولائنا الأعمي الرخيص للحفاظ علي منصب و لا جاه و بأقول للناس اللي بتعمل كده نظرة بسيطة علي أسلافكم في هذا المجال هتلاقوهم في مكان واحد هو مزبلة التاريخ

أتقوا الله في وطنكم و أولادكم و الأجيال اللي جاية

الدكتور محمد البرادعي بيفكر يرشح نفسه بس لإنتخابات الرئاسة و قال شوية شروط بسيطة علشان يترشح الرجل مكفرش يعني و لا يعني قال هنحارب و هأقاتل علشان الشروط دي تتحق هو قال لو حصلت هأرشح نفسي متحققتش مش هأرشح و شكرا

ليه نقول عليه أوهام ما بعد التقاعد يعني خلاص الرجل أتخبل يعني بعد أما ترك وكالة الطاقة الذرية عيب الرجل لسه عنده سبعة و ستين سنة بس يعني ها

أنت بتتدعي إن الشروط اللي هو بيقولها دي إنقلاب علي الدستور مرة واحدة إنقلاب بالمناسبة طبعا لو يعني حصل و التعديلات دي حصلت بكرة هتبقي فطنة و حكمة و رؤية مستقبلية و ديموقراطية و ووحي من الله لأسيادنا في الحزب

و بتقول كمان إنه معه جنسية تانية الرجل قال مفيش غير جواز سفر مصري عاوز أية يعني يقلع لك ملط في ميدان التحرير و يحلف إنه مش معه غير جواز سفر مصري

و بتقول كمان إنه معندوش خبرة سياسية مش هأقولك لا عنده ياسيدي

طبعا كلنا عارفين الرئيس مبارك كان خريج كلية حقوق و رئيس إتحاد الطلبة و تتدرج في العمل السياسي السري و العلني و أسس تلات جماعات سرية حاربت الإحتلال و أعتقل خمستاشر مرة في المعتقلات السياسية

صح مش هي دي الخبرة السياسية اللي أنت بتقول عليها

و لا أنت تقصد سياسة بوس الأيادي اللي ماشية في البلد اللي خليت السيدة المحترمة وزيرة القوي العاملة مصدرة الخادمات تبوس إيد حرم الرئيس علني عيني عينك ياتاجر

حاجة تقرف أنتم بتبصوا في المراية إزاي و إزاي بتتعملوا مع ولادكم و أهلكم الواحد قرف منكم الحقيقة

.

أنت تعرف الغريب إني حبيت الدكتور البرادعي بسبب مقال أتكتب في الأهرام العربي لما كنت رئيس تحريرها و كنت ساعتها بأقرا الأهرام العربي من الجلدة للجلدة ما عدا المقال بتاعك

:)

عبقري من يومك

.

بالمناسبة طبعا مفيش حد بيدخل المدونة دي اليومين دول علشان يقرأ اللي بأكتبه و طبعا اللي كتب الكلام ده هاكرز جزائريين أحتلوا المدونة بتاعتي علشان أنا حاطط صورة عمرو زكي

The Green Mile

Great Tom Hanks's Movie

COFFEY (Black Man)

I'm tired, boss. Tired of bein' on

the road, lonely as a sparrow in

the rain. Tired of not ever having

me a buddy to be with, or tell me

where we's coming from or going

to, or why. Mostly I'm tired of

people being ugly to each other.

I'm tired of all the pain I feel

and hear in the world ever' day.

There's too much of it. It's like

pieces of glass in my head all the

time. Can you understand?

إفتقاد

السلام عليكم و رحمة الله

أخباركم أية ياشباب يارب تكونوا في أفضل حال يارب

و كل سنة و أنتم طيبين و بخير

و ربنا يكرمكم بالبركة و الخير اللي ربنا مقدرها في الأيام دي

مفتقدكم

هي دي خلاصة هذا البوست

بجد مفتقدكم قوي كل الناس اللي هنا مفتقدهم جدا

و نفسي يظهروا و يعلقوا عندي زي الأول

كلامي ده مش بسبب إن في تعليقات قليلة علي البوستات بتاعتي

انا مش محتاج منكم تعليقات بس بجد مفتقدكم قوي

أنا من زمان التعليقات قليلة عندي بس كنت بأحس إن في ناس معينة متابعة مدونتي و التدوين عموما

لدرجة إني نفسي أكتب بوست من زمان قوي و مش عارف و مش قادر

لأني حاسس إن في ناس كتير بعدت عن التدوين

خصوصا الناس اللي أتعرفت عليهم في بداية التدوين

نفسي يرجعوا تاني و يظهروا تاني و يكتبوا تاني عن مشاكلهم و أحلامهم و حياتهم

للأسف في ناس كتير قوي أختفت من عالم التدوين سواء نهائيا أو بتظهر كل فترة

أنا بأرجوهم يرجعوا تاني و يظهروا تاني

لأني مفتقد فيهم الإخوات قبل الأصدقاء

دعواتكم

حكاوي

مش عارف أبدأ منين

نبدأ إني مني نفسي أكتب و أحكي لكم عن حاجات كتير زي زمان تفهمومها متفهموهاش مش مشكلة بس أفضفض ليكم

حادثة سرقة بالشغل

أكتشفوا يوم الأربعاء قبل اللي فات حادثة سرقة في المصنع من عمال المخازن بالشركة إنهم بيطلعوا منتجات الشركة لحسابهم و طبعا كانت أيام سودا في المصنع و كمية إستقالات رهيبة من بلد الأتنين اللي عرفوا إنهم بيعملوا كده و مدير المخازن أعلن مسئوليته السياسة عن الحادث و قدم إستقالته إسوة بالسيد محمد منصور شيفورليه اللي إستقال من الوزارة بسبب حادثة العياط اللي حصلت قبل اليوم اللي قبل عيد ميلادي مش باقولكم

:)

و طبعا تم عمل جرد كامل علي المخزن و أكتشفوا منتجات ناقصة و منتجات زيادة طبعا النقص مشكلة و الزيادة مشكلة بردوا و طبعا لما سألوا العيال قالوا كنا بناخد حاجات زيادة من الإنتاج و طبعا بما إني من الإنتاج كان هيصيبنا من الحب جانب بس الحمد لله مفيش حاجة لحد دلوقتي و الحمد لله أنا بعيد عن تسليم المنتجات للمخازن

المشكلة بقة كان في مرة مشرف التعبئة مش موجود و حصل موقف كده مرتبط بالموضوع ده و العبد لله أكتشفه قبل السرقة بكتير بس أنا مبلغتش حد كنت متخيل إنها شئ بسيط مش سرقة و خفت علي العمال اللي معايا لو بلغت عنهم كانوا هيرحوا ورا الشمس و لما أكتشفوا العيال اللي تبسرق طبعا قلبي وقع في رجلي و من ساعتها قررت مش هأغطي علي حاجة أبدا بعد كده أنا مالي ياعم و فعلا ياشباب الصح صح و الغلط غلط

.

اليومين اللي فاتوا دول غريبين ساعات باكون فرحان و مبسوط و مطنش و منفض للحياة و ساعات باكتئب لوحدي كده لله في لله

نفسي كده أحدد موقفي

طبعا نفسي مكتئبش بس يعني أثبت علي حال و يارب يكون حال كويس

و الشغل اليومين دول في قرف شوية زيادة عن اللي كان موجود و مديري يارب يصدق المرة دي و يقدم إستقالته بسبب الضغط الرهيب من إدارة الجودة علينا

يسلام لو بزازة إستقال الأمور هتبقي عنب

:)

الجميل في الشغل ده الخبرة العملية و الإدارية و المواقف اللي الواحد بيكون فيها و صباح المكانة في الشغل يعني

بس أنا مش عاوز كده و مش هأستمر علي كده و ربنا يكرم

.

عيد ميلادي عدي و خلص و وأتممت السنة 27 و بدأت ال 28

الزمالك الله يحرقهم

السمكات بتاعتي كلها ماتت و بقي معايا واحد بس من النوع جوبي فقط

نفسي مانمش كتير

و نفسي و لا بلاش

يلا كفاية عليكم كده و إلي اللقاء في فضفضة جديدة

After 27 Years

بعد ساعات قليلة سوف تنتهي السنة السبعة و عشرين من عمري و تبدأ الثامنة و العشرين

أسوا حاجة في عيد الميلاد ده إنه بيفكرك إنك جيت

ملخص بقة السبعة و عشرين سنة اللي فاتوا أية؟

ME = Lonely = Loser

و شكرا

و أنتم طيبين

بيــــــــــــــــــــــان هــــــــــــــــــــــــــــــــــــام

السلام عليكم و رحمة الله و بركاته

لقد أتخذت قرارا أريدكم جميعا أن تساندوني فيه لقد قررت

مادة واحد

عرض طلب نقلي من إدارة الإنتاج لأي إدارة أخري بالمصنع علي مدير المصنع يوم الأحد إن شاء الله بسبب السيد مدير الإنتاج المدعو سيد بزازة

مادة أتنين

في الغالب هيرفض

مادة تلاتة

إستقالة

مادة أربعة

ربنا يسترها

:)))

و مش عاوز حد يثنيني عن هذا الأمر