العيل رجع في كلامه زي ما كنت متوقع

أفكار مبعثرة
هو عنوان بلوج حد صديقي بس مش فاكر مين حاليا
من كم يوم
نفسي أكتب بوست جديد
عنوانه

.
عدنا و الحمد لله و لكن للأسف أضعف ههههههههه
فكرته إني مش قادر أنساها و مش عاوز أنساها و هأعيش كده و هأستمر في الحياة لوحدي و أكمل لوحدي جت علي دماغي فكرة إننا ممكن نكمل كأصدقاء بس مش عارف هتنفع و لا لا
حتي الشغل مش مظبط خالص اليومين دول و الناس بقيت وحشة قوي و الله و كل أما علاقتك تزيد بهم سوادهم بيبان لك أكتر

أسوأ حاجة تلاقيهم بيصلوا و عايشين لي في دور المؤمنين

الله يخرب بيتهم

.
حاولت انساها بكل الطرق مش قادر حاولت أكرهها مقدرتيش حاولت أقول عليها عادي و هتلاقي واحدة تانية يمكن أقدر أنساها مقدرتش
سمعت أغنية أم كلثوم أهرب مني قلبي أروح علي فين ليالينا الحلوة في كل مكان ماليناها حب إحنا الأتنين و مالينا الدنيا أمل
أمل

.
مش عارف ليه معلق معايا اليومين دول الحتة اللي كنتي هتقعي فيها عند جروبي فاكرة لما كنتي هتقعي
:)

.

ساعات بأنساها خالص و أحس إنه خلاص الفترة الصعبة عديت
و الغريب إني بأفتكرها و أنا فرحان قوي و أنا زعلان قوي
و أنا فرحان فرحتي بتقل و ساعات بتروح و أنا زعلان بأقول كلام أقرب للكفر لربنا و أنام
أستغفر الله

.
من كم يوم
محمد مفيد أتخانق معايا
و قالي يا تنساها يا أما مش هأكلمك
و الله أنا نفسي أرتاح يا محمد

.
انا خلاص حاطط قطرة فايزين تحت المخدة للطوارئ لإزالة الإحمرار
بقالي فترة بأحاول أقرا يوتوبيا و مش عارف طبعا واحة الغروب في الدولاب و غالبا مش هتتقري

.

الأتنين الصبح
و أنا في طريقي للدورة لنفسي عادي ياعم مش مشكلة كأنها موافقتش علي اللي قلته لها ولا أي حاجة تانية
الحمد لله علي كل شئ
بأسمع أغنية علي الحجار علي قد ما حبينا و جت علي دماغي أغنية عيد ميلادك لمحمد فوزي هأنزلها لما أروح
الأتنين بردوا و أنا في الدورة
جت علي بالي و تعبت قوي و افتقدتها قوي مش عارف ليه
الأتنين بردوا
بأتفرج علي برنامج للغيطاني علي دريم قاهرة نجيب محفوظ أكيد طبعا أفتكرتها قوي
و العجيب إني قلت لنفسي أنت كنت هتعتمد عليها كتير في حياتك ليه متعتمدش علي نفسك
و كنت جامد قوي
:)

دلوقتي بقة
أفتكرتها قوي
رحت طلعت الكلام اللي قلناه علي المسنجر بعد أخر يوم كنا مع بعض و الحمد لله قفلته قبل أما الأمور تتطور قوي
هأكتب البوست ده علي الوورد و أنام مش عارف هينزل أمتي و هينزل و لا لا
بعد ساعتين تقريبا كل سنة و يويو طيب
ياتري هتديه الهداية أمتي و إزاي

.
رحت من كم يوم مقابلة لشغل جديد يارب أقبل و خلاص

حتي لو أية علشان شكلي هأضرب حد في الشغل اللي أنا فيه و ربنا يستر

.
من كم يوم بردوا
أديت لأول مرة لينك المدونة لصحابي من الكلية زيمو و منصو زيمو خلص المدونة تقريبا و الحمد لله لاقي بوست مكتوب عنه و منصو مش عارف هو فين غالبا راح ورا اللانهائية و ما بعدها
و حكيت طبعا لهم عن الموضوع ده
زيمو سألني يوم بعدها ليه مكنش باين عليك حاجة قلتله علشان الناس مش هتستفاد حاجة لما أنكد عليها و مش هتحل لي مشكلتي قال لي تفكير غريب قلتله عارف مين اللي علمني كده قلتله هي
حكيت لواحد صاحبي تاني عن الموضوع شردت لنفسي جامد أنا اليومين دول كويس إني مش بأركب المترو كان زمان مصر كلها عرفت
حكيت له قالي مش مصدق اللي أنت بتحكيه عنها ده قلتله صدق قالي هو لسه في حد كده أنت صعب تلاقي زيها تاني
و الغريب إنه لفينا بالعربية شوية و أشتري لب من الرجل اللي أنت أشتريتي من عنده لب لأختك فاكرة
حاليا اليومين دول فاتح حساب دائم علي البستان يتضمن شيشة تفاح بتنزل لوحدها و ينسون و نسكافيه بلاك الحساب ستة جنيه أو سبعة ونص لو تلاتة تفاح

.
علي فكرة المكان اللي قعدنا عليه في البستان أسمه شاورمة واحد

:)
عارف في ناس هتشتم علشان الموضوع ده بس الله يسامحهم
الله يسامحك خصوصا أنت يا مفيد

.
صحيح مش بتتصل ليه أنت كويس الحمد لله انا بصراحة خايف أتصل بيك انت لسانك طويل و كلامك طوب اليومين دول علي فكرة انا مش زعلان منك علشان طبعا مقدرش بس بجد مش قادر أنساها
الشغل في لخبطة كتير اليومين دول و ربكم يستر و لا نخلص منه كمان أصل الجدول ناقص في حتة مش كاملة نكد
أنا حاليا في دورة تبع الشغل و هتخلص يوم الأربعاء بس بجملة التعذيب هأنزل الشغل بكرة و بعده أي الثلاثاء و الأربع .
قدمت في دورة إنجليزي و طلعت المستوي العاشر أنا مش مصدق لحد دلوقتي باين عليهم كتع اللي بيمتحنونا

.
أمبارح جه فيلم بحبه لتوم هانكس أخويا خنق علي كالعادة و خلاني أقوم خالص
مش عارلاف لما يجي فيلم حلو يجي بدري أنام بدري يجي الصبح مش عارف أعمل أية

.
قلت لماما عن الأخوة و الأخوات اللي زي الفل اللي بأشترك معهم في المشاوير الخيرية اللي مش بأعمل معهم حاجة غير إني بأروح قلتلها عرفتهم من النت قالت لي خلي بالك مش عاوزين مشاكل
أصل لسه في واحد ابن صاحبتها متاخد غلط مع الإخوان

.
بالمناسبة الناس دي عملت لي أحلي عيد ميلاد في حياتي و أشتروا لي هدية أي كلام بس أشتروا معها حاجة كده أسمها مستر شامبنزي شايلة في الدولاب و مهتم بيه أكتر من الهدية شكرا لكم جميعا خصوصا مروة طبعا
و أكيد مش هأنسي لك الموقف ده يا منذر ماشي

.
أية الصداع ده كله البوست شدني قوي و شكلي هأنزله بس مش عاوز عياط
يارب إذا كانت الحياة خيرا لي فأحيني و إذا كانت الوفاة خيرا لي فتوفني

و يارب فرجك يارب و يارب يكون الفرج في الوفاة علشان بجد مش حاسس بطعم أي حاجة في الحياة و حاسس إني مش هأحس بطعم أي حاجة تاني و مش عارف أعمل أي حاجة تاني

كفاية كده علي يارب

الحمد لله أنا راضي بس بجد مش قادر

يارب رحمتك و نهايتي يارب
يارب
يارب
يارب

مش عارف العنوان ممكن يكون أية غير-خلص الكلام

السلام عليكم و رحمة الله و بركاته

البوست ده ممكن يكون طويل شوية و ملخبط كالعادة و غالبا هتوهوا مني بس مش مشكلة معلش

.

صدق اللي قال المصائب لا تأتي فرادي

أمبارح كان أخر يوم لسه متعلق بالأمل فيه يعني من الأخر علشان مطولش عليكم كان فرحها و ربنا يكرمها بحياة سعيدة و مليانة خير و سعادة

غالبا القدر كان مصمم إني أكره شهر أكتوبر اللي بحبه قوي علشان فيه عيد ميلادي بس مش عارف غالبا هأكرهه

أمبارح بردوا تأكد الخبر الرسمي إن في واحد جاي بعد مني في الشغل و هيسافر تدريب برة قبلي يلا الحمد لله تعرفوا عرفت من زمان قوي الموضوع ده و سبحان الله كان اليوم ده هأقابلها للمرة التالتة حكيت لها عن الموضوع ده قعدت تقولي و لا يهمك الرزق بتاع ربنا أنت تجتهد بس و قالت لي في ناس تانية تعبانة قوي و مش عارفة تعمل أية في حياتها كانت بتتكلم عن جوزها اللي كان لسه متقدم و هي رافضة و أهلها مصممين و إن شاء الله يكون فيه الخير و يطلع ابن حلال و تحبه

علشان كده أمبارح كنت فاكرها قوي فرحها علي موضوع الغم في الشغل اللي هي وقفت جنبي فيه

و تم النهاردة كمان الرجل اللي ظلمني أنا و واحد تاني في الشغل دخل علينا النهاردة و قعد يهزق فينا علشان يقنعنا إننا إحنا اللي مقصرين و هو عادل علشان كده اللي جاي بعدنا إحنا الأتنين هو اللي مجتهد و علشان كده أختاره يسافر

يعني ظالم و عاوز يحسسنا إننا المقصرين يعني هنفرض أنا قصرت معه قبل كده زميلي التاني ذنبه أية و هو مقصرش

يلا الحمد لله بس أنا مفرقش معايا الموضوع ده كتير لأني أفتكرت كلامها و نصيحتها لي و قلت الحمد لله و اللي خلاني متقصرش أكتر زعلي عليها أكبر من زعلي علي أي حاجة تانية

الحمد لله

.

أمبارح بقة كمان أخويا محمد مفيد كان عازمني علي الفطار علشان كنا صايمين و اليوم كان جميل قوي و أحلي حاجة فيه إن منذر كمان كان موجود و قعدنا نتكلم و نفضفض و نحكي

معرفش محمد كان قاصد يعزمنا في اليوم ده بالذات و لا هي جت صدفة

شكرا يا محمد و شكرا يا منذر إنك جيت و يارب تتدوم صداقتنا علي طول

و ربنا يخليكم لي

.

و الشكر واجب كمان لإنسانة محترمة وقفت جنبي الفترة اللي فاتت و هونت علي كتير و ربنا يجازيها خير هي للأسف مش بتتدخل علي المدونة بس الشكر واجب بردوا

.

و شكرا لكل الناس اللي وقفت جنبي و أتكلمت معايا سواء علي المدونة و لا علي المسنجر و ربنا يكرمكم يارب و يخليكم لي و نفضل أصدقاء علي طول

.

خلص الكلام

الفترة اللي فاتت حاسس إن أنا أتكلمت كتير قوي و زمان كنت بأسمع كلمة خلص الكلام دي و باقول لنفسي هو الكلام ممكن يخلص أمبارح بس حسيت و فهمت معني الكلمة دي خلص الكلام

و كمان حسيت إن معظم كلامي هنا ممكن يكون إعتراض علي تدبير ربنا

أنا زمان كنت بأقعد أتكلم مع ربنا كتير و من ساعة أما عملت المدونة حاسس إن الموضوع ده قل قوي

و كمان لو أتكلمت الفترة اللي جاية دي كلامي مش هيكون غير عنها و مش هينفع أتكلم عنها

علشان كده قلت أقعد ساكت شوية

دعواتكم لي إن أطلع رجل و متكلمش فترة طويلة علشان أعيد الحسابات و التفكير و كل أما الفترة اللي هأقعد فيها ساكت تتطول يكون حالي أحسن لحد أما أقدر أرجع أفيد و أستفيد

أنا كده كده طبعا هأتابع المدونات أكيد طبعا علشان هي بقيت إدمان و أساسا شاكك في نفسي إني أقدر أقعد ساكت أنتم متعرفوش مدونتي دي حاليا بتمثل لي أية و أنت كلكم بتمثلوا لي أية بس بجد يارب أقدر و اقعد ساكت شوية

أنا أكيد مش عاوز أشكر حد بالأسم لأنكم كلكم و الله العظيم غاليين عندي قوي فوق ما تتصورا حتي اللي بيقرا و مش بيعلق و معرفوش

.

لها لو دخلت ياريت تتطمنيني عليكي و علي حياتك إن شاء الله تكون مليانة خير و حب و سعادة

.

جزاكم الله جميعا كل خير

و متنسونيش في دعائكم

كان نفسي تكوني معايا إمبارح أنا طبعا عمال أخرج مع اي حد يقولي يلا نخرج علشان مش عاوز أقعد في البيت و مش قادر أقعد في البيت
المهم نزلت مع صحابي قعدنا شوية علي القهوة و قلنا نروح ناكل عند واحد معرفش فين
المهم لاقينا سورضخم قوي و بوابة عليها حراسة سألت صاحبي قالي باب الفتوح و بعد أما أكلنا قلنا ندخل نشوف في أية جوة بمجرد ما دخلت تخيلت يوم نخرج فيه مع بعض نروح هناك و نتصور

المكان جميل و روحه زيك جميلة و مشينا في شارع المعز لحد شارع الأزهر من الناحية التانية و رجعنا و عدينا علي بيت السحيمي اللي أول مرة أعرف مكانه و تخيلت إحنا مع بعض و نتصور هناك و أصورك هناك و كان نفسي نكون لسه علي إتصال علشان أقولك أنا هناك دلوقتي
و نتفق علي ميعاد نتقابل فيه نروح هناك و طبعا لازم يكون بدري علشان نلحق نروح و كمان المكان بيكون الناس فيه قليلة بالليل
و أكيد هترجعي البيت مبسوطة و فرحانة و أنا كمان
من كم يوم مشيت في الطريق اللي كنا بنمشي فيه و مش عاوز أقولك إن أنا شفت حاجات كتير مشفتهاش قبل كده بالرغم من إننا مشينا في الشارع ده كتير مش عارف كنت باكون فين و أنا ماشي معاكي
هأقولك أخيرا بيت شعر لاقيته عندي صدفة في وقت تمنيت أكون فيه باكتب شعر علشان أكتب لك
الأبيات لإبن حزم
وددت بأن القلب شق بمدية
وأدخلت فيه ثم أطبق في صدري
تعيشين فيه ما حييت فإن أمت
سكنت شفاف القلب في ظلم القبر
أخيرا أتمني منك تسامحيني علي أي حاجة عملتها سببت لك أي ألم او حزن زمان أو دلوقتي أو مستقبلا

أنا أسف

.
طبعا يا أصدقائي غلط الكلام اللي أنا باكتبه ده بس هي مش هتقرأ الكلام ده علشان هي مش هتتدخل علي النت لفترة طويلة و إن شاء الله لما هتتدخل هتكون فرحانة و نسيتني و مش هتتأثر بالكلام ده بس بجد أنا مش قادر أشيل الكلام جوايا
مش عارف زمان كنت سهل قوي متكلمش و مكتبش و أشيل جوايا و خلاص بس سبحان الله بعد المدونات و بعد أما وصلت لسن الواحد فيه بيكون أقوي في الكتمان أنا سبحان الله العكس و أنا صغير كنت ممكن أكتم و أخبي جوايا بس حاليا مش بأقدر لازم أطلع أي كلام جوايا حتي لو أنا عارف إن مجرد خروج الكلام ده غلط و حرام بس فعلا مش قادر دعواتكم معايا إن ربنا يعدي الفترة دي علي و عليها بسرعة و يكون ربنا شايل لنا الخير قدام

تعرفوا أنا طلبت منها إن أنا أكتب عن كلامنا مع بعض و هي رفضت طبعا مش هأقدر أكتب ما دام هي قالت لا بس بجد أحلي فرحة في حياتي كلها عيشتها يارب ترجع لي تاني أو أفرح نفس الفرحة تاني بس معتقدش هأفرح الفرحة دي مع حد غيرها

تعرفوا أنا مش بأبعد عن التليفون خالص و كل شوية أبص عليه لو بعدت عنه شوية مستني إنها تتصل و تقولي خلاص المشكلة أتحلت
.
يارب أنا مش عاوز أرجع للحالة اللي كنت عليها اللي بدات فعلا ترجع لي و أعمل حاجات حرام و غلط و أكرهه نفسي
يارب أنت اللي أديتني الأمل وأخدته مني و أنت اللي قادر ترجع لي الأمل مرة تانية
إزاي و لا بأية أنا مش عارف و أي حاجة أنا هأرضي
أنا حتي مش عارف أدعي بأية يارب
حيران حتي في الدعاء
يارب هدايتك يارب

و يارب أجعل لي الخير معها يارب و قدر لنا الخير

أنا حتي مش عارف أتخيل إزاي ده ممكن يحصل في الوقت القليل ده بس أنت يارب مسير الدنيا كلها و مش هيكون صعب عليك و لا بعيد عنك حل الموضوع ده
يارب
يارب

يارب

يارب أنا عصيتك أكيد كتير و لما هتكرمني إن شئت هأفرح و هأنسي ذلتي ليك دلوقتي بس دي حكمتك و مش هأكون العبد الصالح بردوا بس أنت يارب غفور رحيم و أنا إنسان ضعيف و ما بي من ضعف أنت أعلم به مني و قادر تقويني

يارب أنا مش عاوز أرجع للقرف تاني يارب

ياربي

يارب أنت أعلم مني إني عصيتك كتير

و إحتاجت لك كتير

و لجأت لك كتير

و عاهدتك علي الطاعة و العبادة

و رحمتني و خففت عني كتير

و رجعت أخلفت عهودي معك كتير

ورجعت إحتاجت لك

و عاهدتك علي الطاعة و العبادة تاني

و رحمتني و خففت عني و وفقتني كتير

و رجعت بعدت عنك

و تاني

و تاني

يارب بلاش جزائك لي يكون كده يارب

خفف عني يارب

مهما كان أنت رب و أنا العبد الضعيف و ما بي من ضعف أنت أعلم به مني

ياااااااااااااااااااااااااااااااربي

فضفضة

السلام عليكم و رحمة الله و بركاته

أزيكم يا شباب أخباركم أية؟

يارب تكونوا بخير

بالرغم من إعجابي الشديد جدا بالبوست اللي فات و كان نفسي أسيبه أطول فترة ممكنة بس صعبتم علي كل اللي يدخل يترعب و بما إني نفسي أكتب و أفضفض لكم و حاولت كتير أمنع نفسي من الكتابة بس طبعا واضح إني مقدرتش

هتسألوني ليه بأمنع نفسي

.

زهقت تعرفوا أنا حاليا في موضوع منتظره جمييييل و هيغير حياتي كلها للأحسن إن شاء الله بس بردوا زي ما تقولوا كده الواحد بقة متكيف من النكد و الخنقة

.

للأسف مش هأقدر أقولكم الموضوع بس هأديكم مثال له و شوفوا مدي نكدي و خنقتي علي نفسي و كأنني صادقت النكد يعني هنفرض واحد مستني شغل و الشغل ده محتاج واسطة جامدة جدا و هو مش معه أي واسطة و هو مستني الشغل تخيلوا بيتخيل نفسه بيشتغل الشغل ده و بيفشل فيه طيب أحلم بإنك تتقبل بالرغم من الظروف الصعبة و ربنا يوفقك و تتفوق لا أنا بأتخيل إني أتقبل بالرغم من صعوبة القبول و الغريب إني أتخيل إني بأفشل مش عارف ليه

.

و كمان كنت بادئ رمضان مش كويس قوي بس أحسن من السنتين تلاتة اللي فاتوا و أستبشرت خير قلت مش مشكلة مش كويس قوي بس أحسن من مفيش و ربنا يكرم و أكون علي أخر رمضان أحسن بس للأسف أديني أهوة منزلتش أصلي العشا و لا التراويح و كان نفسي تكون السنة دي أول سنة أصلي فيها التهجد بس طبعا واضح إنه محصلش

مش عارف في أية و لا أعمل أية و لا أهمد إزاي و لا هأهمد أمتي

فعلا زهقت

.

ده غير بقة موضوع الشغل مش حابب أستمر فيه و مش بأجتهد علشان أغيره علي موضوع الدراسات مش عارف أكمل و لا لا مش أستمر في الشغل بالشهادة و لا أشوف لي مشروع و لا أعمل أية مش عارف ده حتي طلعت في دماغي رحت رايح مغير الشبكة اللي أنا عليها في التليفون بنفس الرقم قال يعني أنا مثلا وزير و لا رجل أعمال ما كنت أشتري خط جديد و خلاص لا فضي بعيد عنكم علي توهان علي مش عارف أعمل أية

زهقتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتت

البقاء لله
أنا عاوز أقولكم خبر مؤلم وتعبني قوي ومش مصدقه لحد دلوقتي و بأتمني أكون بأحلم توفي إلي رحمة الله أخويا و حبيبي محمد صاحب مدونة نوفير
دعواتكم له بالرحمة وأن الله ينير قبره بالقرأن و يدخله فسيح جناته

متقلقوش أنا لسه حي أرزق
بس الكلمات دي تصوري علي لسان محمد مفيد خصوصا إنه هيكتب كده في مدونته لو أتصل بيا في البيت يتطمن عليا علشان بقالي كتير متصلتش بيه و لا رنيت له فأتصل بالبيت قالوله محمد تعيش أنت

طبعا هيتصدم أو المفروض يتصدم و يخلي عنده دم يعني و ميكتبش فترة طويلة و يكتئب و يقعد في البيت شوية بس هو مش هيربي دقنه علشان هو عنده دقن أساسا اللي ممكن يربي دقنه يومين تلاتة هو الواد منذر

بصرف النظر عن سبب موتي تعددت الأسباب و الموت واحدا هيكون شعوركم أية تعليقاتكم عن البوست ده هتفيدني قوي و حابب أشوفها و أنا عايش مش زي ما الدولة بتكرم الناس دايما بعد أما تموت و تلاقيها و لا مهتمة بيها في حياتها

من ساعة أما دخلت التدوين الفكرة دي علي دماغي إني أموت و اللي كان مجنني أنتم هتعرفوا إزاي
بس الحمد لله الطريقة وجدت بتوطيد علاقتي بمحمد مفيد و مدونين كتير و معهم تليفون البيتو الموبيل و بنتصل ببعض بإستمرار

عاوز كل واحد يكتب نعي محترم
و ميكترش في الكلام علشان النعي تكلفته كبيرة

فرحة

السلام عليكم و رحمة الله و بركاته

أزيكم يا شباب أخباركم أية يارب تكونوا في إحسن حال

و كل سنة و أنتم بألف خير

و كل سنة و أنتم طيبين بمناسبة هذا الشهر الكريم و ربنا يوفقنا لحسن العبادة و العودة فيه لربنا إن شاء الله

أنا بأكتب البوست ده و مش عارف هأقول فيه أية بس أنا حسيت إن أنا مقصر في حقكم من ناحية إن أنا في أي مشكلة كبيرة ولا صغيرة تلاقوني داخل عليكم زي القضا المستعجل و منكد عليكم و أي تقصير و أي فشل أنتم أول و أخر ناس باقول لهم عليه و أقرفهم بيه

بس الحمد لله المرة دي لأ

أنا داخل أفرحكم

انا فرحااااااااااااااااااااااااااااااااااان قوي اليومين دول يارب أفضل كده علي طول و أكتر و أكتر و أكتر

فرحان ليه مش هأعرف أقول لكم دلوقتي بس فرحان و خلاص و قلت لازم أقولكم مش لازم أفتكركم في النكد بس

فرحان فوق ما تتصورا و من كتر الفرحة اللي أنا فيها مش مصدقها

و كمان الحمد لله رمضان الواحد أة مش زي زمان فيه بس مش زي السنتين التلاتة اللي فاتوا اللي كنت مقصر فيهم جدا

الحمد لله نوعا ما يعني مش قوي بس إن شاء الله في زيادة من خير هذا الشهر

دعواتكم لي ربنا يكرمكم مش منغص علي حياتي حاليا غير الشغل و قرفه بس الموضوع التاني مفرحني قوي و منسيني هم الشغل

نفسي بجد أقولكم علي التفاصيل قريب إن شاء الله بس دعواتكم

شكرا لكم قوي إنكم كنتم جنبي دايما في الخير و الشر

و يارب نفضل أصدقاء علي طول و أفضل أحكي لكم فرحتي اللي جاية إن شاء الله

شعور غريب

السلام عليكم و رحمة الله و بركاته

كل سنة و أنتم طيبين و بخير دايما و ربنا يكرمنا كلنا بشهر رمضان و يكون فيه خير لنا كلنا

.

أنا باكتب البوست ده أولا علشان حاسس إن في ناس كتير منكم ممكن تكون زعلانة مني عندي إحساس بكده و بمناسبة رمضان انا باعتذر لهم و ياريت هم كمان يتقبلوا أسفي و يسامحوني بمناسبة الشهر الكريم و الأيام الجميلة اللي جاية

ده أولا

.

ثانيا أمبارح بالليل كنت تعبان جدا و دخل علي دور برد مفاجئ و غريب و قوي بس الحمد لله كله تمام دلوقتي

كنت قلقان علشان رمضان و الصوم و الشغل علشان معنديش أجازات و حاجات تانية

بس الحمد لله

.

معرفش في شعور غريب كده بأحس بيه مش عارف ليه سبب و حتي مش عارف له أسم

ده أنا حتي مش عارف بحب الإحساس ده و لا لأ

ممكن يكون خوف علي قلق علي فرحة علي برد مش عارف

كنت باحس بيه مثلا زمان و أنا صغير لما اسمع صوت نجاة في إذاعة أم كلثوم

كنت باحس بيه الساعة خمسة المغرب كده في الشتا

كنت باحس بيه لما أطلع رحلة مع المدرسة في إبتدائي و أرجع الساعة خمسة المغرب مع صحابي عند المدرسة

كنت باحس بيه لما أقعد أذاكر و أحس إني مش هأقدر أذاكر و مش عاوز أذاكر

كنت بأحس به أول يوم في كل سنة دراسية من إبتدائي لحد البكالوريوس

هو تقريبا الشعور ده متكرر الساعة خمسة المغرب في الشتا مش عارف ليه

دلوقتي الشعور ده عندي و باكتب و أنا حاسس به مش عارف فرح و لا خوف و لا قلق إني أكون باعمل حاجة غلط أو أكون مقصر في حق حد او باخدع حد مش عارف بس هو إحساس مش حلو مش عارف له تفسير و مش عارف له أسم

ياريت لو حد يعرف له تفسير أو علاج أو حتي أسم ياريت يفيدني

شكرا لكم

و كل سنة و أنتم طيبين و ياريت نسامح بعض في الأيام المباركة دي

أنا ماليش غيركم في الأخر

السلام عليكم و رحمة الله و بركاته
أزيكم يا شباب أخباركم أية؟
يارب يكون كله تمام
النهاردة صحيت بدري كالعادة يوم الأجازة اللي بأستناه علشان أنام فيه براحتي بس غالبا الساعة البيولوجية بتاعتي أتظبطت خلاص يا دوب نص ساعة او ساعة بالكتير بعد ميعاد الشغل تلاقيني صاحي زي العفريت
المهم قلقت الساعة سبعة و تلت تقريبا قلت اقوم أتفرج علي ماتش النهائي في الأولمبياد هيكون أول و أخر ماتش أتفرج عليه المهم الأرجنتين كسبت نيجيريا
قلت أنام ساعة بقة الناس لسه نايمة و كمان أنا عندي مشوارين واحد الساعة تلاتة و التاني الساعة سبعة و يارب مكسلش عن الأتنين

.
لاقيت تليفون البيت بيرن و أخواتي عندهم عادة نفسي أكستبها علشان بتسبب لي مشاكل كبيرة لو نايمين و التليفون رن بيطنشوا يعني حتي لو صحيوا انا بقة الوسوسة بتشتغل قوم يمكن حد في مشكلة و لا حاجة محدش بيتصل بدري كده انا بقلق بسهولة يعني

.
المهم رديت لاقيت بابا بيتصل من البلد بيقولي أنزل أعمل قيد عائلي لجدي علشان ابن عمتي بيقدم في الشرطة
و أنا مالي أنا يقدم شرطة ولا مش شرطة المهم قمت جبت صورة شهادة وفاة جدي و نزلت باشتم في سري يعني
المهم كنت خايف الأقي السجل المدني زحمة و شايل همه في الحر ده مع إن الساعة تسعة يعني الجو مش وحش بس أنا عمال أجيب جاز
المهم نزلت الست قالت لي لازم صورة البطاقة بتاعه جدي أجيبها منين ده الرجل توفي من سنة أتنين و ستين قبل أما ابويا يتجوز أمي يعني المهم أتصلت ببابا قالي أدور عليها في شنطة كده عندنا
إحنا الوثائق القيمة السرية عندنا في مكانين الشنطة دي و علبة صفيح طويلة كده شبه مدفع الأر بي جيه و بما إن بابا أكبر إخواته فكل هذه الوثائق عندنا و قالي دور يا عم الحج
أجيب الشنطة و أطلع رزمة رزمة من الورق

.
الورق يا جدعان خلاص بيبوش في أيدي كنت بأتعامل مع الورق زي نبيل الحلفاوي في فيلم الطريق إلي إيلات لما كان بيوسع فتحة الديناميت و كنت عمال أجيب عرق زيه كده و زي لينول ميسي و رفاقه في ماتش الصبح
لاقيت شوية ورق تلاقي الخط جميل و القلم الكوبيا ووثائق بالأنجليزية يعني لاقيت وصل المياه بالأنجليزي ده طبعا غير شهادات الوفاة و الميلاد اللي علي حتة ورقة مالهاش لازمة و أسم الملك فاروق و كمان بطاقات أنتخاب لجدي كان وفدي هو تقريبا عليه علشان تعرفوا إحنا عيلة سياسية من زمااااان
:)

المهم الحمد لله ملقيتش البطاقة علشان منزلش تاني
أنا أنصح الناس اللي شغالة في الأثار تيجي تستولي علي الورق اللي عندنا منها أثار و منها تبعده عننا علشان كل شوية بنطلعه و بيكون ورا تتطليعه مشاوير صعبة
بس المهم كنت لازم أقوم أخد دش علشان حالتي البؤس اللي كنت فيها و أحلي حاجة في الدنيا إنك تأخد دش و متنشفش تلبس الهدوم و تخرج علي طول بس المشكلة إنك ممكن تتضطر تأخد دش تاني علشان تغير الهدوم المبلولة دي
بس يا جدعان في شوية هوا كده جمال قوي الواحد من زمان محسش بيهم هو أينعم الواحد بينزل الفجر بيروح الشغل بس بنقعد بعد كده في المعمل و التكيف و مش بنحس بروعة الهوا الطبيعي سبحان الله

.
أمبارح بالليل نزلت ادفع إشتراك الأية أر تي دفعوني إشتراك قناة السينما إجباري مش عارف ليه
و أنا راجع أتصلت بأي حد أقابلة بس للاسف ملاقيتش قعدت علي القهوة ظبطت نفسي و كان في نسمة هوا بالليل و روحت و أنا ماشي لاقيت اتنين صغيرين بيلعبوا كورة كان نفسي قوي ألعب معهم زي زمان و أفتكرت لما كنت بألعب مع صحابي في الشارع لحد الساعة أتناشر و الناس تخنق علينا و ترش مياه ايام بقة كنت ساعات بتطلب معانا عفانة و نلعب في المياه و الطينة علشان نخنق الناس بس
مش عارف صحيت فجأة قلت لنفسي أية فايدة البوست الطويل ده لاقيت مالوش فايدة
قلت كفاية عليكم كده نكمل حكايات مرة تانية
دعواتكم ربنا يكرمكم
سلام

إن شاء الله بداية جديدة

السلام عليكم و رحمة الله و بركاته

أزيكم يا شباب أخباركم أية؟

ياريت يعني لو أي حد هيعلق يكتب لي أخباره أية علشان انتم وحشني جدا جدا جدا حقيقي و الله معلش الفترة اللي فاتت دي كنت مش بأكتب كتير لأسباب كتير مختلفة يعني النتيجة البؤس إني شيلت مادتين و الغريب إني عرفت إن الدكتور اللي كرهه الدفعة كلها و شيلها كلها مادته اللي هي كمبيوتر و تخصصنا إحنا كيمياء أتغير السنة اللي جاية بعد أما عمل اللي عمله في دفعتنا و كمان بعد أما إحنا عرفنا الكورس بتاعه و بقة سهل المذاكرة يلا الحمد لله

الواحد مش عارف يكمل و لا لا و محتار قوي دعواتكم

و عرفت موضوع في الشغل بيسرع من أسبابي للبحث عن مكان تاني أشتغل فيه و يسلام لو ربنا يكرم و مجال تاني أشتغل فيه

.

بس الحمد لله الحياة لسه فيها أمل إن شاء الله

يعني أهوة الأخ منذر ربنا كرمه و أتجوز و أسف مش هأقدر أنزل الصور علشان ممنوعة النشر

ألف مبروك يا منذر و بجد أنت واحشني قوي و نفسي أشوفك قوي أنت و مفيد و الحسيني علي فكرة من يوم جوزاك متقابلناش خالص مش قادرين نتقابل من غيرك أو بصراحة مش عارفين لو عرفنا هنتقابل متأخدش مقلب في نفسك و قول لمفيد يخف عني شوية أحسن له

.

و كمان في موضوع تاني كده الحمد لله مخليني مش مصدق السعادة اللي أنا فيها بجد ربنا يديمه يارب و مضيعهوش بغباوة مني كالعادة طول عمري

.

معرفش كانت طالبة معايا تفاؤل أمبارح قوي من الصبح

يعني ربنا كرمني بسواق أتوبيس طيب كده و حسسني إن لسه الناس فيها خير و ممكن تخاف علي بعض

معرفش خلاني نفسي أكتب بوست و أدعي فيه ربنا إنه يهدينا كلنا و يخلينا نخاف علي بعض و نحمي بعض و إن شاء الله الأخلاق و التربية الحسنة هترجع لنا تاني و إن شاء الله مش هيكون زمنا اللي الرسول صلي الله عليه و سلم قال فيه ستكون فتن كقطع الليل المظلم و إن شاء الله مش هيكون زمنا اللي ماسك فيه علي دينه كالقابض علي الجمر و هيكون اللي إحنا فيه ده فترة ضعف و بعد عن ربنا مش هتطول و هنرجع كلنا لربنا تاني

.

بيني و بينكم لو زمنا اللي الرسول حذرنا منه ربنا يستر علي علشان أنا مش قوي كده و غالبا ممكن أضعف

لا

إن شاء الله هنرجع تاني لربنا و هترجع الطمأنينة لينا و الأمان

.

و أمبارح كمان زي ما تقولوا ربنا كان كارمني فيه قوي يعني عرفت فيه الموضوع اللي ضايقني في الشغل أو كان المفروض يضايقيني و يخليني أكتب بوست أسب و ألعن فيه بس الحمد لله قبله مباشرة ربنا كان كارمني بهدية من عنده مكنتش أحلم بها

الحمد لله

.

و يوم الجمعة اللي فاتت كان يوم من أسعد أيام حياتي بجد أو يمكن أسعدها فعلا

يوم مفرحتش فيه كده من زمان

الحمد لله

.

و يوم الخميس ظبطت الكمبيوتر تمام لأنه كان خانقني و سبحان الله ناس كنت بأحسدها علي حياتها لاقيتها بتقول علي مهتم عنها في حاجات هي شايفها أهم

هو تقريبا مفيش حد راضي بحالة غير القليل و إن شاء الله أكون من هذا القليل اللي هيكتر إن شاء الله برجعونا لربنا كلنا مرة تانية إن شاء الله

.

معكننش حياتي الفترة اللي فاتت دي غير الزمالك و لاعبيته أقول أية اللي معندهاش دم

.

في حاجة كمان معرفش عندي حالة كسل غريبة و عدم مقدرة علي عمل شئ مش عارف ليه

ربنا يعجل بزوال هذه الحالة علشان مفيش وقت يضيع لسه كمان

.

يوم الجمعة اللي فاتت بردوا بعد الصلاة قابلت واحد صاحبي من الطفولة و هو ألتزم حاليا وأفتكرت أيام حلوة قضيتها و أنا صغير و قعدنا نحكي و نحكي

و أنا قاعد معه جه علي بالي فيلم طيور الظلام علشان إحنا كنا أربعة صحاب واحد مسيحي وثلاثة مسلمين أنا و و احد بقة ظابط شرطة و صديقي الأخير الملتزم

صديقنا المسيحي تجنبنا من إعدادي أو بداية الثانوي و الأتنين التانين واحد ألتزم و التاني ظابط بيسلموا علي بعض بالعافية و أنا اللي طبعا عمال أترنح في هذه الحياة

محدش يسألني فين فيلم طيور الظلام

:)

.

كفاية عليكم كده بقة علشان الواحد صايم وعطشان قوي بيني و بينكم

ربنا يكرمنا جميعا

دعواتكم لي ربنا يكرمكم

أنا أسف

السلام عليكم و رحمة الله و بركاته

مش عارف ليه عندي يقين إني مقصر في حقكم جميعا

بما إنكم أصدقاء الحقيقين و أغلي ناس عندي

أنا أسف لكم جميعا

إن شاء الله هأصالحكم

الحمد لله
من أول ناس كنت ناوي أبلغكم بنجاحي في التمهيدي
بس للأسف هتتضطروا تستنوا سنة كمان علشان أبلغكم الخبر ده
فكرت في ناس كتير أقولها بس مش عارف
مش قادر أقول لحد غيركم
الحمد لله علي كل شئ

يوم الأثنين

السلام عليكم و رحمة الله و بركاته
.

مش عارف أية الداء المنيل ده الواحد مش بيكون مفيش في دماغه حاجة يكتبها و فجأة تلاقي مواضيع كتيييير جت علي دماغك

.

أولا ألف مليوووووووووووووون مبروك لأنجي سمراء النيل و طارق و ربنا يكرمهم يارب و يرزقهم بالذرية الصالحة هم الحمد لله أتجوزوا أمبارح يوم الأحد
.

أنا مؤخرا بصراحة مليان إحباط و نكد داخلي بالرغم من إني بأضحك بهبل علي طول و حاسس إن مفيش أمل بس فرح إنجي و طارق حاسسني إنه في لسه أمل محدش يسألني ليه حسيت كده و خلاص و فرحاااااااااااااااااااااااان قوي ليهم و كمان فرحااااااااان أكتر علشان أفتكروني و عزموني علي الفرح إحساس جميل قوي إن حد يهتم بيك و يعزمك علي حضور أهم مناسبة في حياته بتحس بقيمتك عند أي حد يعمل معاك كده
.

و طبعا كمان سعيد قوي إني مدون و لو لم أكن مدون لوددت أن أكون مدون
.

أنا بداية معرفتي بإنجي كانت طبعا منين من التدوين المهم بعد كده حصل لقاء الأول لي مع المدونين في دار الأوبرا و بعده كرهت نفسي و كرهت المدونين و كرهت كل حاجة و قررت مش هأقابل مدونين تاني و يمكن أكون قررت عدم التدوين مرة تانية و بعد فترة كنت بأكلم إنجي علي المسنجر و قالت لي فاضي بكرة كان يوم سبت عمري ما أنساه قلتلها لا قالت لي تعالي هنتقابل مجموعة من المدونين طبعا قلتلها حد الله مش هتتكر تاني قالت لي لا تعالي العدد هيكون قليل و بالفعل رحت و قابلت أحمد الهواري و واحدة مش بتحب أقول هي مين و أنضم لنا أشرف توفيق و واحدة صحفية و أخيرا طارق اللي بجد متكلمتش معه كتير بس هو تحس إنه شبهي قليل الكلام فطبعا أنا قليل الكلام و هو قليل الكلام فأكيد متكلمناش كتير و بعد كده دخلنا فيلم كده رضا و رقبتنا أتعوجت من المكان اللي كنا فيه
.

المهم بعده بأسبوع أتكررت الخروجة تاني و كانت أجمل و أجمل قابلت فيها حبيبي مصطفي الحسيني و الهواري مرة تانية و رشا مكان في القلب و ابراهيم محسن فاوست

.

و بجد مش هأقدر أوفي حق إنجي في إنها عرفتني علي الحسيني اللي مقابلته شجعتني علي مقابلة مفيد و منذر و كانت الإنطلاقة
.

شكرا لإنجي و الحسيني و مفيد و منذر و مانو و ساسو ورفقة و رنا ووووووو المدونين كلهم بجد أنا مش بازهق من إني أقول أنا سعيد قد أية إني مدون و سعيد قوي إني منضم للعالم ده و بجد يعني لو مفيش غير التدوين في حياتي هأكون أسعد إنسان

شكرا لكم كلكم بجد

.

نخش علي النكد

إحساس الفشل الإحساس ده كل أما أنساه أرجع و أفتكره تاني

مش معتبر نفسي ناجح في أي شئ حتي معاملة الناس

في الشغل فاشل في البيت فاشل ربنا يستر و انجح في التمهيدي

يوم السبت

مش عارف ليه البوست ده أتأخر قوي كده بدأت كتابة فيه من الأثنين و لحد دلوقتي عمال أكتب تقريبا محدش هيعلق مش مشكلة

.

أمبارح كنت رايح عند واحد صاحبي ظبطت نفسي بأعمل شئ مقرف جدا جدا وقعدت أقول هو ده محمد اللي كان و كان و كان كنت هأعيط كان نفسي أكلم أي حد في التليفون و أعيط له ناس كتير جت علي بالي أتصل بيها بس قلت لا مش هأتصل بحد بلاش معيلة بس للأسف مفيش جديد القرف اللي الواحد فيه لسه فيه

و الحاجات السيئة اللي الواحد بيعملها بيزيد فيها

و مش قادر يبطلها

.

يوم الخميس رحت عملت مقابلة في شركة موارد بشرية و دي طبعا مقابلة أولية علشان الشركة اللي منزلة الإعلان و طبعا فشلت ياجدعان

طظظظظظظظظظظظظ

بتقولي تذكر موقف أقنعت فيه حد بفكرة

هو أنا باكلم حد علشان أقنع حد

بلا هم

طظظظظظظظظظظظظ

.

المدير بتاعي أستندل معانا كلنا و نزلنا في الحوافز

طظظظظظظظظظظظظ

.

قاعد لوحدي خميس و جمعة و سبت أحسن حاجة في الدنيا

.

ناوي أنعزل عن الناس في الشغل

أحسن

طظظظظظظظظظظظظظ

.

محدش هيعلق

طظظظظظظظظظظظظظ

.

كله بيفتي في كله

انا كمان قررت أفتي في كله

مش هأعمل زي ما بأعمل و مش بتكلم غير في اللي فاهمه

لا مش هيحصل هأفتي في البتنجان و لا هيهمني

.

هاروح أصب النسكافيه و أجي

و لا مجيش

طظظظظظظظظظ

.

الواحد بيشوف حاجات من ناس بيتسغرب إنه حتي مفكرش في كده و بيستغرب أكتر إن الناس فكرت في كده

.

في طالبة جت المعمل تدريب في الصيف يعني أنا شرحت لها كل حاجة في قاعدة واحدة لأنها مش المفروض تأخد التفاصيل علشان هي مش هتشتغل دي تدريب طبعا الناس كلها في الشغل أستنكرت و أدانت و شجبت الموضوع ده

و كله طبعا بعد كده عمل فيها الشهم النبيل و هو شرحها لها طيب ليه مش من الأول يلا عالم تافهة

في واحد شرح لها حاجات مشرحهاش لي لحد دلوقتي و أنا بقالي سنتين في الشغل

.

نفسي أنفجر يا جدعان مش هينفع كده

.

حتة الحديدة علي رأي إنسانة اللي الإنسان بيشلها اللي إسمها الموبيل ده مالوش لازمة غير إني بأسمع فيه القران و الأناشيد و الأغاني و أنا رايح جاي من الشغل

الشغل اللي هو شغل الروتين و البزرميط اللي أنا فيه اللي بقالي شهر معملتش حاجة

.

في أخبار تقلق عن بعض الدكاترة في التمهيدي

طظظظظظظظظظظظظظظظظظظظظ

بس ربنا يكرمكم أقفوا جنبي لو لا قدر الله حصل شئ علشان هتكون مرحلة صعبة جدا

.

هو الحال هيفضل كده

أفففففففففففففففففففففففففففففففففففففففففففففففففففففف

أتخنقتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتت

فين الناس

و لا أنا مش من الناس

السلام عليكم و رحمة الله

مش عارف ليه من فترة نفسي قوي أحكي لكم عن يوم من أيام زمان اللي كنت بأقضيها عند جدتي الله يرحمها

أنا كنت بأقضي معظم الأجازة هناك و خميس و جمعة في الدراسة هناك بردوا و أي أجازة هناك حتي الأسبوعين اللي أخدناهم أجازة علشان الزلزال قضيتهم هناك

.

اليوم كان بيبدا معايا تقريبا الساعة عشرة كانت جدتي الله يرحمها تصحيني أو أصحي لوحدي الساعة عشرة أغسل وشي و أنزل أشتري فطار و نفطر مع بعض و أعمل شاي و أعمل لها نعناع كل ده في ربع ساعة تقريبا كله بسرعة علشان ألحق أتفرج علي برامج الأطفال اللي كانت بتبدا الساعة عشرة و ربع و طبعا كنت عيل صغير كنت مش بحب القرأن اللي بيشتعغل الصبح و الدرس الديني اللي بيليه علشان كانوا بيبعدوني عن وقت الأطفال

.

من البرامج اللي طبعا مؤثرة معايا يوم الأثنين صباح الخير بتاع ماما نجوي و بقلظ و الأربعاء كان بابا ماجد و الجمعة سينما الأطفال لماما عفاف الهلاوي و من أشهر الحاجات اللي كانت بتيجي فيه الكلبة لاسي و كان في كارتون مازنجر و كابتن ماجد و بابار

كانت المسائل دي كلها تخلص علي الساعة إحدعشر تقريبا و كنت بعد كده أنزل أروح لهاني صاحبي و أنا نازل أعدي علي عمرو أقوله أنا رايح عند هاني علشان يحصلني و كان يجي بعد شوية صديقنا هشام

.

و من أشهر الألعاب اللي كنا بنلعبها كريزي أيت أو التمانية المجنونة و كونكان و نلعب بالبلي وو نلعب بنج علي ترابيوة السفرة عند هاني علي فكرة هاني ده مسيحي و لا كان بيفرق معانا خالص و كنا يوم الجمعة نعدي عليه قبل و بعد الصلاة و مفيش مشكلة و كنا بنقوله تريقة ماتيجي تصلي معانا

.

بعد كده أرجع عند جدتي علشان الغدا و طبعا أقعد شوية و بعد كده أنزل مرة تانية أروح عند هاني و نقعد نلعب و نكمل لعب و كنا بنلعب ولد بنت و جماد أو نكمل أي حاجة تاني

.

و الساعة خمسة بالدقيقة لما الشمس تكون خفت ننزل نلعب كورة في الشارع و طبعا كان في ناس كتير مش بتطيق أهلنا و كانت متخصصة في رش المياة علشان منلعبش بس كنا بنستني ساعة تكون المياة نشفت من حرارة الصيف و نكمل لعب لحد بالليل لحد الساعة حدشر أو أتناشر و بعد كده أطلع أخد دش تمام طبعا لأني مش عاوز أقولكم كمية الطينة اللي كنت بأشيلها كنت بأكون لابس كوتشي و شراب و تلاقي الطينة مخترقة ده كله

.

و بعد كده أتفرج علي التلفزيون لحد الساعة واحدة و نص و طبعا باتعشي كنت و لازلت من عشاق الجبنة الرومي و بردوا كان في سهرات مميزة جدا لكن أكتر حاجة كنت بأحبها أخترنالك كان يوم الأربعاء و كنت بأعشق ماكيفجر بس لحقته في الأواخر و طبعا المسلسل الرهيب العجيب الفظيع الشنيع إكس فيلز

.

يروح هاني منادي علي و أطلع في البلكونة و عمرو يبص لنا من تحت و هشام يكلمنا من فوق و كنا بنطير طيارات ورق أو كيس بلاستيك و خلاص و ساعات كنا بنبهدل الشارع بحوالي مليون قطعة ورق كنا بنسميها عصافير الجنة لدرجة في يوم خفت جدا من كمية الورق اللي رمينها في الشارع و قلت بس هأصحي الصبح علي زعيق من جدتي بس الحمد لله الهوار بالليل قام بالواجب و داري أثار الجريمة

.

و ساعة الليل دي بقي كنا بنتكلم في حاجات كتير و نحلم كتير و نتخيل و نفتي و نقرع علي بعض

.

أيااااااااااااااااااااااااااااااااام

طبعا مكنتش سعيد بيها و كنت بأتخنق من الروتين اللي فيها بس الواحد ما كنش فاهم اللي جاي أية بس الحمد لله علي الأيام الحلوة دي

.

و بعد كده أدخل أناااااااااااااااااااام للصبح

لو طلبت معايا زكريات تاني هأكمل لكم تفاصيل أيام تانية

السلام عليكم و رحمة الله و بركاته
أمبارح و احد صاحبي أتصل بي و أتفقنا إننا نتقابل و نخرج أنا قلت بالمرة أنزل أشتري هدوم و لما قابلت صاحبي قالي هندخل فيلم أية قلت له كده علي طول مش تقولي طيب المهم أنا قلت له فيلم الريس عمر حرب الفيلم ده نزلت دورت عليه يوم الأربعاء اللي فات مشفتوش في و لا سينما و قعدت علي القهوة و روحت من غير ما أدخله المهم دخلنا الفيلم
و للأسف دخلنا الفيلم

.
فيلم مالوش ملامح طبعا أنا مش ناقد زي الأخ منذر ما تكلم عن فيلم ليلة البيبي دول لا أنا بتكلم كواحد عادي جدا
أية فايدة الفيلم
مفيش

.
الناس هتقول طبعا ده واقع و بيحصل و طبعا ده غير مقالات المديح و برامج التلميع اللي هترفع و هتدافع عن القائمين علي إعداد الفيلم و كأنهم الأنبياء المنبوذين زي ما الفيلم أتكلم عن فئة من الناس المختلفة و إزاي بيكونوا وحيدين و بيتحاربوا من كل الناس

.
الفيلم بيشجع علي الفساد أنا مش شايف غير كده و إن ده النجاح الأكيد و هو ده الطريق الوحيد للوصول لتحقيق كل الأحلام بصرف النظر عن التنازل عن الكرامة و الشرف و العرض و الدين
طبعا يا جماعة أنا حمار و رجعي و متخلف علشان محدش بس يقول علي غير كده
ده حتي الحوار تحس إنه عاوز يمثل عمر حرب ده بربنا مرة و الشيطان مرة و إنه عاوز ياخد خالد اللي هو هاني سلامة ابن له و علي ما أعتقد مفيش حد الأيام دي متخيل نفسه كده أة في ظلم و فساد و جهل و كل الحاجات الزبالة بس مش للدرجة دي

.
يعني كلمت أصطفيتك دي مش مستخدمة بين الناس و مش ماشية مع جو الفيلم خالص لا و رجع بعد كده يقول أخترتك طيب ما كان يقول أخترتك من الأول و خلاص تقريبا كاتب السيناريو كانت ميولة في الأول إسلامية و لاقي مفيش منها فايدة قالبها بس لسه بيستخدم المصطلحات الدينية

.
و مش فاهم أنا أية أهمية لقطة من فيلم المسيح اللي من إخراج ميل جيبسون مش فاهم خايف يكون لها معني مش عاوز أقوله

بس أسم المخرج خالد

.

بس بصراحة الجملة الوحيد الكويسة اللي في الفيلم هي إنك لازم متأخدش قرارات و أنت منفعل لذلك لما رجعت مكتبتش علي طول نمت و صحيت كتبت و لاقيت نفسي بأنفعل مرة تانية

.
و مش فاهم أية علاقة الدنيا بالجنة في الفيلم و الحلم الخزعبلي اللي كل شوية بيجي و كمان بيمثل أبو خالد اللي هو هاني سلامة بربنا يعني هو اللي هيدخله الجنة و هو اللي مش هيدخله علشان نهاية الكلام في الموضوع ده وحشه
مش هأطول في الموضوع ده

.

بس من أهم سمات الفيلم
أظهر هذا الفيلم الموهبة الفذة للفنانتين العملاقتين سمية الخشاب و غادة عبدالرازق اللي خسارة فيها إقتران أسمها بالرازق في البوس القبيح و الأفعال النص كم إن دل علي شئ دل علي مشاهدتهم للأفلام النص الكم بإستمرار و بتركيز كبير بصراحة يعني الحق يقال
في حاجة تانية للرد علي الناس اللي هتدافع عن الفيلم و تقول إن ده واقع هأقولهم ماشي واقع فين الحل اللي أنتم قدمتوه علشان نعالج الواقع الأليم ده ده أنتم حتي الأبطال في الأخر كانوا مبسوطين بدخول فرد جديد معهم جهنم معهم إن شاء الله دنيا و أخره

.
يعني مثلا مش يموتوا أو علي الأقل يقعوا في بعض لا كانوا مبسوطين و ناجحين و معهم فلوس و ستات
يعني مثلا فيلم الماسة الدموية لليوناردو دي كابريو هو كان مهرب مات في أخر الفيلم مش أنتصر و عاش عيشة هنية لا لازم نفهم الناس إن الطريق ده أخرته وحشه
و أفلام تانية كتير ده حتي تيتو أهوة مصري تيتو مات في أخر الفيلم

.
و أنا زعلان قوي من نفسي لأني أحترمت المخرج خالد يوسف أول ما أخرج و كان فيلم العاصفة و كان فيه لقطة مش تمام ليسرا بس قلت طنش الفيلم كله حلو مجتش من لقطة بس إتضح إنها البداية فقط
بجد زعلان من نفسي إني أحترمته في يوم من الأيام

.
و طبعا لا يفوتنا أن نشكر المخرج الفذ يوسف شاهين اللي الأخت حنان ترك بتقرأ له القرآن علشان ربنا يشفيه إنه أخرج لنا هذه الموهبة الفذة التي تدعي خالد يوسف

.
و أخيرا هأقول حاجيتن
أنتم طبعا عارفين مدي تشاؤمي من سوء الحال اللي وصلنا له بس مش هي دي مصر و مصر عمرها ما هتكون كده و كل مخططاتكم إن شاء الله هتفسد و هتنقلب عليكم
و إن شاء الله إن تذكرناكم سنتذكركم في زبالة التاريخ أو ربنا يهديكم
و حسبنا الله و نعم الوكيل

.
أخيرا حتة بقة نقدية مش أي حد يأخد باله منها
الفيلم فيه غلطة زي غلطة الساعة اللي بيقولوا عليها في فيلم صلاح الدين البطل أسمه خالد و طول الفيلم لابس يونيفورم الكازينو اللي شغالين فيه و بيحمل أسمه مرة يطلع مكتوب
Khaled
و مرة تانية
Khalid
ده للناس اللي لسه ناوية تتدخل الفيلم و من شابه يوسف شاهين ظلم إن شاء الله
ده سبق لي ماشي علشان لو أي ناقد قال النقطة دي تعرفوا إنه شافها هنا
كان نفسي أتكلم عن موضوع تاني بس البوست زي ماانتم شايفين ده للي هيوصل هنا وسع مني كالعادة
سلام

مشاري راشد

***

يا أمي ما
شكل السماء
و ما الضياء
و ما القمر
بجمالها
تتحدثون
و لا أري منها أثر
هل هذه الدنيا
ظلاما في ظلام مستمر
يا أمي مدي لي يديك
عسي يزايلوني الدجر
عسي يزايلوني الدجر
أمشي أخاف تعثرا
وسط النهار أو السحر
لا أهتدي في السير
إن طال الطريق
و إن قصر
أمشي أحاذرأن يصادفني
إذا أخطو خطر
و الأرض عندي يستوي
منها البسائط و الحفر
منها البسائط و الحفر
عكازتي هي ناظري
هل في جماد من نظر
يجري الصغار و يلعبون
و يرتعون و لا ضرر
و أنا ضريرا قاعدا
في عقر داري مستقر
الله يلطف بي
و يصرف ما أقاصي من كدر
ما أقاصي من كدر

الحل هو

.

ربنا يحلها

.

الموت

.

مالهاش حل هي قفلت كده

.

فكك بلا وجع دماغ

.

بيع

وَزَكَرِيَّا إِذْ نَادَى رَبَّهُ رَبِّ لَا تَذَرْنِي فَرْدًا وَأَنْتَ خَيْرُ الْوَارِثِينَ

89 سورة الأنبياء

الأربعاء

خزعبلات إمتحانات
خلاص باقي من الزمن ساعات قليلة و تنتهي هذه الفترة العصيبة من حياتي الحمد لله مريت بسلام و خير أكتر مما كنت متوقع الحمد لله هو أينعم الواحد كان معظم المواد أو كلها ما عدا أتنين تلاتة اول مرة تتفتح ليلة الإمتحان إو صباح يوم الإمتحان بس الحمد لله

هو كمان أينعم في مادتين خبطت فيهم بس الحمد لله
و مادة بكرة حتي هذه اللحظة الساعة دلوقتي الثانية عشر و النصف ليلا و الصبح الإمحان و لسه متفتحتش بس الحمد لله
مش قادر أذاكر زهقت و كمان النت فصل فأضطريت أكتب البوست ده علي الوورد الأول و بكرة بعد الإمتحان بصرف النظر عن اللي هأعمله فيه هينزل البوست إن شاء الله

للأسف نزل الجمعة
في حاجات كتير عاوز أقولها
كنت عاوز أكتب جملة واحدة في البوست
علي نمط قصيدة فاروق جويدة هذه بلاد لم تعد كبلادي
هذا زمان لم يعد كزماني
مش عارف عندي الشعور ده قوي نفسي ربنا يتوفاني و يكون في الوفاة الخير لي
تعبت بقة بجد
في البيت حاسس إني غريب
في الشغل حاسس إني غريب
مع صحابي حاسس إني غريب
لما بأمشي في الشارع بحس إني غريب
لما بأقف في الشباك بتاع أوضتي بحس إني غريب
الناس بقيت غريبة جدا
أمشي مع ناس ملتزمة أحس إني غريب
أمشي مع ناس صايعة أحس إني غريب
أمشي مع ناس جهلة و عايشة في البطيخ أحس إني غريب
أمشي مع عالم مثقفة أحس إني غريب
أنا لولا بس مش محافظ علي الصلاة كنت قلت علي نفسي من الناس اللي الرسول قال عليها هتكون غريبة بس انا باعمل بلاوي
نقطة و من أول السطر
تخيلوا واحد معايا في الشغل جاي بعدي بسنة و هو بيكمل معايا تمهيدي بردوا و الله مشفش مني غير كل خير و محاولة نصايح علي قد ما أقدر و شوية تريقة يعني زي اللي بأتريق بيها علي كل خلق الله يعني
راح قال للمدير بتاعنا أشمعني محمد بياخد ثلاثة أيام في الأسبوع أجازة علشان الإمتحانات
انا حظي جه ثلاثة أيام في الأسبوع إمتحانات و مش باخد غير أيام الإمتحانات أعمل أية
هو أخد أسبوع أجازة و كان عاوز ياخد أربع أيام في الأسبوع التاني مش شغالين في طابونة إحنا يعني
و بعدين ليه يجيب سيرتي يعني أنا عملت لأمه أية مش عارف ممكن يخلي الرجل يقلب علي و هو ضميره حي لو حس إنه بيفضلني علي الناس بالرغم من إنه مش بيفضلني أصلا
الله يسامحه
يوم الثلاثاء كان عندي إمتحان كمبيوتر خزعبلي و تحويل من بيناري لأوكتا و هبل كده مالوش علاقة بالكمبيوتر الحديث اللي ممكن نستخدمه ككيميائين المهم أتفرجت علي الورق و قلت أروح الإمتحان نزلت ركبت ميكروباص علشان أوصل للمترو لاقيت بسم الله ما شاء الله الرجل السواق مولع عود بخور قلت يسلام علي اليوم الجميل اليوم بيبان من أوله
أنا طول عمري بأتفائل كده لما باركب مع سواق ميكروباص محترم قعدت وراه يا سادة تخيلوا لاقيته ماسك سيجارة ملفوفة حشيش الساعة تمانية الصبح و ماشي في شوارع كبيرة و البوليس في كل مكان و لا همه و لا حد شافه أتاريه مولع بخور علشان يداري ريحة الحشيش
تخيلوا بقة يا سادة الأخ ده هيكون عامل إزاي الساعة تمانية بالليل و لا أتناشر ده بقة مش ممكن يغتصب و لا يسرق واحدة و لا واحد لا ده ممكن يقفل منطقة وصلنا لدرجة الناس خلاص مش خيافة من بوليس و لا حاجة
طبعا حليت أية في الإمتحان بادي اليوم بالحشيش هاعمل أية في الإمتحان
فاصل
اليوم الجمعة
أكمل منين مش عارف
بالنسبة للإمتحان الحمد لله ربنا كرم و متنكدش علينا في أخر يوم يعني نمشي من الكلية فرحانين بس الجو كان حر
رجعت البيت عمال أشرب و أستحمي و أنام نمت نوم مش ممكن يعني
أة نسيت أقولكم إني أخر مادتين بتاعة يوم الثلاثاء و يوم الخميس كنت كل يوم الصبح أحلم بثلاثة كوابيس مرعبة بس الحمد لله كله تمام و عدي
المشكلة إن عندي ثلاثة أيام أجازة في الشغل لحد أخر شهر ديسمبر يعني ربنا يستر
و كمان النهاردة أول يوم جمعة أصحي فيه مش ناوي أذاكر و لا أشغل الكمبيوتر أجهز تقرير و لا أعمل بحث عن حاجة
الحمد لله روقاااااااااااان
عاوز بقة اشوف دورة إي سي دي إل و كمان تويفل و أتدرب في معمل تحاليل و أخرج و أنام و أقرأ كتب مش كيمياء و لا صناعية و لا إدارية و نفسي أذاكر شوية حاجات للشغل و أركز شوية في الشغل
ربنا يكرم
نرجع بقة لخزعبلات الإمتحان اللي كنت باتكلم عليها
الواحد مبقاش حاسس بالأمان و العدل خايف من جارك خايف من زميلك في الشغل خايف من الرجل اللي جنبك في عربية الشغل خايف تروح تشتري حاجة الرجل يضحك عليك في قيمتها أو جودتها خايف تنزل ابنك الشارع
زمان أيام الظلم اللي بنتحصر عليه يعني قراقوش كان حاكم ظالم
حلو واحد بيظلم البلد كلها
دلوقتي كلنا بنظلم بعض و نفتري علي بعض
و ردا علي أصدقائي اللي علقوا عندي علي البوست اللي فات و قالوا كلام جميل
هي يعني اية كلمة بلد
أنا شايفها معناها ناس مش نيل و شوارع و تربة خصبة
الناس بقيت حالها صعب
تعرفوا أنا أية اللي أستفزيني علشان أكتب البوست اللي فات لاقيت خناقة في الشارع و ما أكثرها اليومين دول علي أتفهه الأسباب و بين كل الناس المهم
الخناقة بين واد عيل عنده بتاع عشرين سنة و راجل كبير عنده بتاع خمسة و أربعين سنة الواد اللي بشخه لسه ده انا أسف علي التعبير يعني بيشتم الرجل بأمه و يسب له الدين الغريب بقة كمان إن الناس في الشارع بتهدي الواد ده
و طبعا الرجل هو محترم باين عليه عمال بيزعق و مش قادر حتي يشتم و تقولولي البلد لسه بخير
يعني و لا تربية و لا أخلاق و لا دين و لا حق و لا عدل بين أقل الناس و في أتفهه الحاجات و تقوليلي البلد حالها هيتعدل
إحنا ظلمة و فاسدين كلنا بلا إستثناء فأكيد اللي حاكمنا و هيحكمنا هيكون زينا اكيد طبيعي يعني جدا

تخيلوا كمان النهاردة في صلاة الجمعة الشيخ بعد الخطبة بيقول أية بيقول مفيش فلوس علشان يعملوا الدورة الصيفية لتحفيظ القرأن الكريم حتي دي مش لاقين لها فلوس

حسبنا الله و نعم الوكيل

الزمالك هيجيب مدرب بمليون دولا في السنة و صرح السيد ممدوح عباس بأنه سيواصل دفع مرتب المدرب حتي لو لم يبقي في رئاسة نادي الزمالك

الأهلي بعت ميتين ألف دولار لنادي ستراسبورج لكي يقطع الطريق علي الزمالك في الدخول في صفقة حسني عبدربه

الزمالك سيعلن عن صفقة مدوية اليوم ربنا يستر

في حفل سعيد تم الإعلان عن عرض فيلم ليلة البيبي دول و مش هاحاول أدور علي ميزانيته المفتوحة وصلت كم علشان متعبش

حسبنا الله و نعم الوكيل

و في الجامع مش لاقيين حق دورة تحفيظ قرأن

أمبارح تذاكر المترو بخمسة و سبعين قرش هم بيقولوا بمناسبة يوم البيئة أول ما عرفت قلت يمكن بيحتفلوا بإنتصار خمسة يونيو يعني من باب التطبيع نشاركهم أفراهم يعني بالمرة

يعني كمان بتوع البيئة يعني مالقوش غير اليوم ده علشان يعملوه يوم البيئة يوم التخلص من الأسري المصريين البيئة

في واحد في المصري اليوم كاتب مقالة دفاعا عن جمهور الأهلي ده بالطبع امام مقالة ذم في جمهور الأهلي كل ده علشان الحضري و شيكابالا

أةةةةةةةةةةة

مش هي دي بلدي يا جدعان

بأشهدكم إني دي مش بلدي

مش هي دي بلدي اللي و أنا صغير كنت بأقعد أقرأ أدهم صبري و كنت بأتمني العمر يجري بيا علشان أكون زيه

مش هي دي بلدي اللي لما دخلت كلية العلوم أتمنيت إني أكون زي د زويل و أرفع أسم مصر

مش هي دي بلدي اللي مستعد أضحي بنفسي فداها

مش هي بلدي اللي نفسي ولادي يتولدوا فيها علشان مش هيلاقوا مكان ليهم فيها

مش هي دي بلدي اللي كنت بألعب فيها مع صاحبي هاني المسيحي و مش حاسس بحاجز بيني و بينه

أنا غريب في البلد دي

حاسس إني سافرت و سيبت بلدي أمتي و إزاي مش عارف

أمتي بقة هأرجع بلدي

و هو يعني أية كلمة بلدي

بسم الله الرحمن الرحيم
ليس الغريب
لزين العابدين لعلي بن الحسين

*****
لَيْسَ الغَريبُ غَريبَ الشَّأمِ واليَمَنِ
إِنَّ الغَريبَ غَريبُ اللَّحدِ والكَفَنِ

.
إِنَّ الغَريِبَ لَهُ حَقٌّ لِغُرْبَتـِهِ
على الْمُقيمينَ في الأَوطــانِ والسَّكَنِ

.
سَفَري بَعيدٌ وَزادي لَنْ يُبَلِّغَنـي
وَقُوَّتي ضَعُفَتْ والمـوتُ يَطلُبُنـي

.

وَلي بَقايــا ذُنوبٍ لَسْتُ أَعْلَمُها
الله يَعْلَمُهــا في السِّرِ والعَلَنِ
.

مـَا أَحْلَمَ اللهَ عَني حَيْثُ أَمْهَلَني

وقَدْ تَمـادَيْتُ في ذَنْبي ويَسْتُرُنِي

.

تَمُرُّ سـاعـاتُ أَيّـَامي بِلا نَدَمٍ

ولا بُكاءٍ وَلاخَـوْفٍ ولا حـَزَنِ

.

أَنَـا الَّذِي أُغْلِقُ الأَبْوابَ مُجْتَهِداً
عَلى المعاصِي وَعَيْنُ اللهِ تَنْظُرُنـي

.

يَـا زَلَّةً كُتِبَتْ في غَفْلَةٍ ذَهَبَتْ
يَـا حَسْرَةً بَقِيَتْ في القَلبِ تُحْرِقُني

.
دَعْني أَنُوحُ عَلى نَفْسي وَأَنْدِبُـهـا
وَأَقْطَعُ الدَّهْرَ بِالتَّذْكِيـرِ وَالحَزَنِ

.
كَأَنَّني بَينَ تلك الأَهلِ مُنطَرِحــَاً
عَلى الفِراشِ وَأَيْديهِمْ تُقَلِّبُنــي

.
وَقد أَتَوْا بِطَبيبٍ كَـيْ يُعالِجَنـي
وَلَمْ أَرَ الطِّبَّ هـذا اليـومَ يَنْفَعُني

.
واشَتد نَزْعِي وَصَار المَوتُ يَجْذِبُـها
مِن كُلِّ عِرْقٍ بِلا رِفقٍ ولا هَوَنِ

.
واستَخْرَجَ الرُّوحَ مِني في تَغَرْغُرِها
وصـَارَ رِيقي مَريراً حِينَ غَرْغَرَني

.
وَغَمَّضُوني وَراحَ الكُلُّ وانْصَرَفوا
بَعْدَ الإِياسِ وَجَدُّوا في شِرَا الكَفَنِ

.
وَقـامَ مَنْ كانَ حِبَّ لنّاسِ في عَجَلٍ
نَحْوَ المُغَسِّلِ يَأْتينـي يُغَسِّلُنــي

.
وَقــالَ يـا قَوْمِ نَبْغِي غاسِلاً حَذِقاً
حُراً أَرِيباً لَبِيبـاً عَارِفـاً فَطِنِ

.
فَجــاءَني رَجُلٌ مِنْهُمْ فَجَرَّدَني
مِنَ الثِّيــابِ وَأَعْرَاني وأَفْرَدَني

.
وَأَوْدَعوني عَلى الأَلْواحِ مُنْطَرِحـاً
وَصـَارَ فَوْقي خَرِيرُ الماءِ يَنْظِفُني

.
وَأَسْكَبَ الماءَ مِنْ فَوقي وَغَسَّلَني
غُسْلاً ثَلاثاً وَنَادَى القَوْمَ بِالكَفَنِ

.
وَأَلْبَسُوني ثِيابـاً لا كِمامَ لهـا
وَصارَ زَادي حَنُوطِي حيـنَ حَنَّطَني

.

وأَخْرَجوني مِنَ الدُّنيـا فَوا أَسَفاً
عَلى رَحِيـلٍ بِلا زادٍ يُبَلِّغُنـي

.

وَحَمَّلوني على الأْكتـافِ أَربَعَةٌ
مِنَ الرِّجـالِ وَخَلْفِي مَنْ يُشَيِّعُني
.

وَقَدَّموني إِلى المحرابِ وانصَرَفوا
خَلْفَ الإِمـَامِ فَصَلَّى ثـمّ وَدَّعَني

.

صَلَّوْا عَلَيَّ صَلاةً لا رُكوعَ لهـا
ولا سُجـودَ لَعَلَّ اللـهَ يَرْحَمُني

.

وَأَنْزَلوني إلـى قَبري على مَهَلٍ
وَقَدَّمُوا واحِداً مِنهـم يُلَحِّدُنـي

.

وَكَشَّفَ الثّوْبَ عَن وَجْهي لِيَنْظُرَني
وَأَسْكَبَ الدَّمْعَ مِنْ عَيْنيهِ أَغْرَقَني

.

فَقامَ مُحتَرِمــاً بِالعَزمِ مُشْتَمِلاً
وَصَفَّفَ اللَّبِنَ مِنْ فَوْقِي وفـارَقَني

.

وقَالَ هُلُّوا عليه التُّرْبَ واغْتَنِموا
حُسْنَ الثَّوابِ مِنَ الرَّحمنِ ذِي المِنَن
.

ِفي ظُلْمَةِ القبرِ لا أُمٌّ هنــاك ولا
أَبٌ شَفـيقٌ ولا أَخٌ يُؤَنِّسُنــي

.

فَرِيدٌ وَحِيدُ القبرِ، يــا أَسَفـاً
عَلى الفِراقِ بِلا عَمَلٍ يُزَوِّدُنـي

.

وَهالَني صُورَةً في العينِ إِذْ نَظَرَتْ
مِنْ هَوْلِ مَطْلَعِ ما قَدْ كان أَدهَشَني

.

مِنْ مُنكَرٍ ونكيرٍ مـا أَقولُ لهم
قَدْ هــَالَني أَمْرُهُمْ جِداً فَأَفْزَعَني

.

وَأَقْعَدوني وَجَدُّوا في سُؤالِهـِمُ
مَـالِي سِوَاكَ إِلهـي مَنْ يُخَلِّصُنِي

.

فَامْنُنْ عَلَيَّ بِعَفْوٍ مِنك يــا أَمَلي
فَإِنَّني مُوثَقٌ بِالذَّنْبِ مُرْتَهــَن

.

ِتَقاسمَ الأهْلُ مالي بعدما انْصَرَفُوا
وَصَارَ وِزْرِي عَلى ظَهْرِي فَأَثْقَلَني

.

واستَبْدَلَتْ زَوجَتي بَعْلاً لهـا بَدَلي
وَحَكَّمَتْهُ فِي الأَمْوَالِ والسَّكَـنِ

.

وَصَيَّرَتْ وَلَدي عَبْداً لِيَخْدُمَهــا
وَصَارَ مَـالي لهم حـِلاً بِلا ثَمَنِ

.

فَلا تَغُرَّنَّكَ الدُّنْيــا وَزِينَتُها
وانْظُرْ إلى فِعْلِهــا في الأَهْلِ والوَطَنِ

.

وانْظُرْ إِلى مَنْ حَوَى الدُّنْيا بِأَجْمَعِها
هَلْ رَاحَ مِنْها بِغَيْرِ الحَنْطِ والكَفَنِ

.

خُذِ القَنـَاعَةَ مِنْ دُنْيَاك وارْضَ بِها
لَوْ لم يَكُنْ لَكَ إِلا رَاحَةُ البَدَن

.

ِيَـا زَارِعَ الخَيْرِ تحصُدْ بَعْدَهُ ثَمَراً
يَا زَارِعَ الشَّرِّ مَوْقُوفٌ عَلَى الوَهَن

.

ِيـَا نَفْسُ كُفِّي عَنِ العِصْيانِ واكْتَسِبِي
فِعْلاً جميلاً لَعَلَّ اللهَ يَرحَمُني

.

يَا نَفْسُ وَيْحَكِ تُوبي واعمَلِي حَسَناً
عَسى تُجازَيْنَ بَعْدَ الموتِ بِالحَسَنِ

.

ثمَّ الصلاةُ على الْمُختـارِ سَيِّدِنـا
مَا وَصَّـا البَرْقَ في شَّامٍ وفي يَمَنِ

.

والحمدُ لله مُمْسِينَـا وَمُصْبِحِنَا
بِالخَيْرِ والعَفْوْ والإِحْســانِ وَالمِنَنِ

وَلَا نُكَلِّفُ نَفْسًا إِلَّا وُسْعَهَا وَلَدَيْنَا كِتَابٌ يَنْطِقُ بِالْحَقِّ وَهُمْ لَا يُظْلَمُونَ

الأية الثانية و الستين

سورة المؤمنون
.
إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آَمَنُوا لَهُمْ عَذَابٌ أَلِيمٌ فِي الدُّنْيَا وَالْآَخِرَةِ وَاللَّهُ يَعْلَمُ وَأَنْتُمْ لَا تَعْلَمُونَ
الأية التاسعة عشر

سورة النور

.

لَهُ مُعَقِّبَاتٌ مِنْ بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللَّهِ إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ وَإِذَا أَرَادَ اللَّهُ بِقَوْمٍ سُوءًا فَلَا مَرَدَّ لَهُ وَمَا لَهُمْ مِنْ دُونِهِ مِنْ وَالٍ

الأية الحادية عشر

سورة الرعد

.

مطلوب رأيكم

أنا نفسي أعمل مدونة جديدة منزلش فيها غير أيات قرأن بس

أعملها و لا لأ و لو أعملها شكلها يبقي إزاي يعني

أقدر أقول الجملة الإعتراضية الأشهر في مصر بصوت عالي
السبب إن أنا أقول الجملة دي
هي الأخ الظريف أو مجموعة الأخوة الظرفاء اللي في المحل اللي تحتنا تخيلوا عند بداية قدومهم من كم شهر تقريبا فتحنا لهم شقتنا علشان يجهزوا المحل و اليفطة الخاصة به و كان جزائنا و شكرنا يتمثل في تشغيل الساوندات طوال اليوم علي أعلي صوت و أعلي باز لدرجة مش بنعرف ننام خالص و لا نرتاح طول ما الأرض بالسرير بيتهزوا من كتر الدب
ده أولا
ثانيا بقة طلعت في دماغهم يركبوا تكييف طبعا هيركبوه فين عندنا إحنا في البلكونة بتاعتنا طبعا إحنا قلنا لهم لأ علشان طبعا الغسيل مش هنعرف ننشر ثانيا علشان حرارة التكييف ده هتخلي الأوضة اللي هيتحط قدمها التكييف حر غير إننا قافلين الشباك أساسا علشان الصوت العالي
المستفز بقة كمان إنهم بعتوا بغل من عندهم يستأذت تاني طبعا قلنا لا قالنا و هو مدينا ضهره كده كده التكييف هيتركب
تخيلوا حال البلد بقة كده فتونة و بلطجة
طبعا المحل ده من مجموعة محلات تبع بعض في بيع الموبيل
طبعا و حياة أمهم التكييف مش هيتركب و لو أتركب و أحنا مش في الشقة هيتكسر علي دماغ أهلهم و اللي يتشدد لهم سواء بقة ظابط و لا عضو مجلس اللي بيتحاموا به خلاص بقة طفح الكيل بهم
و الله المستعان

*
يوم الخميس كان حفل توقيع كتاب مدونات مصرية للجيب و طبعا رحت برفقة صديقي محمد مفيد أنا مكنتش ناوي الحقيقة أشتري الكتاب بس الغريب إني أكتشفت إن في ناس كتير قوي أعرفهم ليها بوستات في الكتاب أشتريت الكتاب و لفيت عليهم علشان أحصل علي توقيعهم
بس للأسف كان في ناس أعرفها و معرفش شكلها و معرفش كانت موجودة و لا لا
المستفز بقة كمان في الحفلة كان مجموعة جت علشان تهاجم أحمد مهني علي بوست كتبه أنا لحد دلوقتي مقريتش البوست و مش عارف أوصله
بس اللي نرفزيني الأخوة الحماسيين اللي جايين يهاجموا أحمد مهني و اين هذا اللي مش عارف أية و ما هو تعريف المدونة المحترمة من وجهة نظركم و هؤلاء الناس مخدوعين و لازم نفوقهم و علي الطلاق بالتلاتة مش عارف أية و هو لابس لي حتة جدلة في أيده بيفكرني باللي لامؤاخذه
يعني خلاص هو مش عارف يعمل حاجة مع حد غير أحمد مهني
ما يروح يتشطر علي اللي فاشخين أفكارنا من عشرين سنة و عمالين يفتحوا قنوات قليلة الأدب و لا خلاص هو مش قادر علي الحمار جاي يتشطر علي البردعة يا عم أحمد مهني غلطان فرضا يعني بلاش بقة تعملي عنتر شايل سيفه و لا إحنا مش بنتشطر علي بعض و جايب لي ناس معاه قال يعني هيخوفنا و صحفية باين و واحدة أجنبية هتلاقي مقال محترم نزل مش عارف فين هؤلاء مثقفين مصر هذه هي مصر التخلف طبعا كان في ناس عنترية بردوا في جانب احمد مهني أحلي حاجة إن أحمد مهني مكنش منفعل عادي جدا
و الله يا أحمد الرجل اللي عمل عنتر معاك ده لو عسكري أكله قفا مرة مش هتسمع له صوت تاني
أنا نفسي بقة أقرأ البوست دلوقتي لو حد يعرف اللينك بتاعه يبعته
طبعا أنا عارف إن الرجل اللي هاجم أحمد مهني مش هيدخل هنا علشان كده واخد راحتي
طبعا ظهرت في اللحظة المناسبة فرقة أبناء مصر و أحتوت الموقف بقيادة مها و محمد هانئ و واحد مش عارف هو مين و طبعا مفيد أختفي في الحاجات دي رجولة طول عمره
و أتفقوا يقعدوا مع بعض و يتناقشوا
هو كلام جميل بس علي أية
يعني أحمد مهني مش زعيم وراه ناس هيقولهم كده هيقولوا أمين يعني
و لا إحنا نيجي مش عارف فين و نشمها حاجة تقرف
الموقفين دول يؤكدوا لي قناعتي بإننا لازم نمر في مرحلة العنف الشامل في البلد يعني حاجة كده زي الثورة الفرنسية و لا الحرب اللبنانية و لا حرب العراق يموت نصفنا النصف الأخر علشان نقدر نعيش محدش يقول إن البلطجية قليلين لا هم كتير و في كل مكان و مجال و ممكن هم اللي يكسبوا في الصدام اللي أتوقع و أتمني إنه يحصل بسرعة بقة لأنه كده كده هيحصل
أنا كده أرتحت

****
بخصوص حفلة التوقيع
سعيد جدا بها علشان شفت ناس كتير و الصورة الوحيدة اللي أتصورتها أتصورتها مع يا مراكبي المهندس أحمد تخيلوا الرجل جه من السفر مخصوص علشان يحضر الحفلة و يرجع تاني
و سعيد قوي إني لاقيت ناس كتير أعرفها كويس منزلة بوستات في الكتاب و شفت ناس كتير
زي إنسانة و الأستاذ عصفور المدينة و الباشمهندس المراكبي و كمان لأول مرة أشوف مها من أبناء مصر بسمع عنها من زمان و لأول مرة بأشوفها و أنا مشردتيش لها أهوة علشان هي خافت من كده
و طبعا شفت ناس من فترة مشفتهمش
رشا مكان في القلب و سمرا النيل و طارق و محمد هانئ بالرغم إنه مش عارفيني و أحمد الهواري و أشرف توفيق و طبعا أحمد مهني و البوهي و المتألقة دايما مريم و ناس كتير عارف شكلها و مش عارف إسمها بس الواحد بيكون سعيد لما بيشوفهم
و كان في حد المفروض يجي و مجاش و الله يسامحه

.
مروة حمد لله علي السلامة و ربنا يتقبل و يستجيب لدعائك

.
أبليت بلاء حسنا في الأمتحانين اللي فاتوا و أمتحان بكرة لحد هذه اللحظة مقريتش فيه حاجة يعتبر ده عيب الإنسان

.
الزمالك دقيقة حداد

.
كفاية بقة كده علشان أقوم أتنيل أذاكر
سلام

زمان و أنا صغير

هشام عباس

*****

زماااااااااااان
زمان و أنا صغير كنت بحلم أبقي كبير
تعب القلب و أتحير من الدنيا و من المشاوير
زماااااااااااان
زمان و أنا صغير كنت بحلم أبقي كبير
تعب القلب و أتحير من الدنيا و من المشاوير
و الحلم كان برئ مفروش بالورود
و القلب كان جرئ ماليان بالوعود
و الحلم كان برئ مفروش بالورود
و القلب كان جرئ ماليان بالوعود
و لما كبرت قلت ياريت ما كنت حلمت و لا تمنيت
و لما كبرت قلت ياريت ما كنت حلمت و لا تمنيت
و قلت ياريتني فضلت صغير زي زمان
زماااااااااااان
زمان و أنا صغير كنت بحلم أبقي كبير
تعب القلب و أتحير من الدنيا و من المشاوير
أنا من صغر سني حاسس بشئ جوايا
و حلمت زمان أغني
و الكون يسمع غنايا
أنا من صغر سني حاسس بشئ جوايا
و حلمت زمان أغني
و الكون يسمع غنايا
غنيت غنيت
وف وسط الغنوة بكيت
غنيت غنيت
وف وسط الغنوة بكيت
و لاقيت الكون كله بيتغير
قلت ياريتني فضلت صغير
زماااااااااااان
زمان و أنا صغير كنت بحلم أبقي كبير
تعب القلب و أتحير من الدنيا و من المشاوير
حلمت زمان ببيت و بقلب يكون معايا
و من الأحلام صحيت علي جرح مالوش نهاية
حلمت زمان ببيت و بقلب يكون معايا
و من الأحلام صحيت علي جرح مالوش نهاية
و داريت وداريت
الجرح في قلبي داريت
و داريت وداريت
الجرح في قلبي داريت
و لاقيت العمر يا دنيا قصير
قلت ياريتني فضلت صغير
زمااااااااااااااااااااااااااااان
و أنا صغير

السلام عليكم و رحمة الله
ملحوظة البوست ده المفروض كان ينزل ليلة الإضراب بس النت خانقني لحد دلوقتي

أزيكم ياشباب مختفيين ليه كده
مش مشكلة
بس المهم يارب تكونوا بخير
البوست الخزعبلي ده بوست من بتوع زماااااان اللي وحشني قوييييي
أنا بصراحة مش عارف أرتبه هأقعد أكتب كده و خلاص
يوم الأثنين اللي فات كتبت البوست السابق الحمد لله الفترة عديت علي خير
و الحمد لله بردوا إن مش كتير منكم شافوه
.
يوم الأربعاء اللي فات شفت الصبح و انا رايح الشغل بعيد عنكم حادثة بشعة و كان في واحد ربنا يرحمه متبهدل طبعا كان يوم غم شئ صعب قوي تخيلوا واحد صاحي الصبح راكب العربية النقل بتاعته هو واحد كمان طالعين يسعوا علي رزقهم و رزق و لادهم ميرجعوش تاني لأهلهم و لأولادهم
عارف ربنا رحيم و ده قضاءه و قدره بس شئ صعب فعلا الموت الفجأة ده شئ صعب ربنا يجنبكم كل شر
.
يوم الأربعاء بردوا في الشغل بعد نصف اليوم و الناس كلها نسيت الحادثة بتاعت الصبح و أصبحت ماضي بدأت حمي أفلام الموبيل الزبالة تظهر طبعا بصيت بصة صغيرة علي أحدث الإنتاج كان عبارة عن أية واحدة زبالة مع واحد أزبل في محل بيعملوا شئ مش محترم زيهم
و البنت امها نازلة مش عارف نازلة منين هي كمان أة نسيت أقولكم طبعا البنت محجبة الغريب بقة أو مش غريب المستفز اللي خلاني نفسي الأرض تنشق و تبلعني إن الموبيل بتاعها رن تخيلوا الرنة أية
دعاء الشيخ السديس اللهم أسترنا فوق الأرض شفتوا قذارة أكتر من كده
حأقول أية بس
للعلم قابلت واحد صاحبي و الفيلم ده أنتشر بصورة كبيرة زمان البنت أهلها نفخوها
عارف إنا غلط إني أتفرجت بس سمعت من واحد عنها قلت اشوف
مش معني كده إني ملاك بردوا
.
النهاردة بقة بعد أما خلصت نقطة في بحر من اللي المفروض أجهزه لبكرة في الكلية لاقيت نفسي مش قادر و نفسي أنزل أشم شوية هوا علشان أقدر أواصل للصبح نزلت قلت أروح أقعد شوية علي النيل في وقت الغروب و بعدين أروح أجيب ورقة من النقابة مطلوبة في الشغل لاقيت نفسي مش هألحق الغروب علي النيل رحت علي النقابة علي طول خلصت الورق و طلعت علي القهوة طلبت شيشة و شاي بوست إعترافات خالص و أنا قاعد جه بنتين لو حد قالي تعالي شوف عروسة و طلعت واحدة من الأتنين كنت هأقول موااااااااافق بدون تفكير لاقيتهم داخلين القهوة مع واحد المهم قعدوا و بنت منهم طلبت شيشة و التانية طلعت خايفة علي صحتها شربت عصير بس
جه علي بالي محمد مفيد مش عارف ليه تخيلت كده إن مثلا التغيير اللي هو نفسه يتحقق حصل و الناس أختارت تعيش حياة غلط يعني مثلا اللي هيمسك هيقول أنا هأعمل قناة مخلة مثلا و الناس وافقت أو مثلا الإخوان مسكوا و قالوا هنحكم بالدين و الناس الليبرالية مش عاوزة أيا كان
أية اللي هيحصل لو الناس أختارت الغلط أو مثلا اللي أنا مش موافق عليه
هيكون شعور واحد زي مفيد و منذر الثوري ده أية
بصورة تانية مثلا لو فرضا حصلت إنتخابات ديموقراطية فعلا و دخل جمال مبارك مثلا و كسب
هيكون شعور الناس اللي بتحارب و تعارض و تتسجن و تتبهدل أية
أو مثلا الناس اللي بتتطالب بإصلاح التعليم و صلحنا و ظبطنا و الطلبة بردوا متعلموش
هنعمل أية
.
لما روحت جه علي بالي حديث سيدنا محمد صلي الله عليه و سلم مش عارف نصه بالظبط بس اللي بيقول فيه عليه الصلاة و السلام ستكون فتن كقطع الليل المظلم فقالوا و ما المخرج منها يارسول الله قال كتاب الله و سنتي
صدق رسول الله صلي الله عليه وسلم
.
يعني ده الطبيعي اللي الناس فيه لأن سيدنا محمد قال إن ده هيحصل بس أية الحل
هتقولوا طبعا نتمسك بالقرأن و السنة ده للشخص نفسه بس بقيت الناس و المجتمع أية الحل
هي كده خلاص النهاية يعني
.
أخبار أعتقد إنها مستفذة
الخميس 1 مايو
بوش يأمر بـ 770 مليون دولار كمعونة غذائية
دعا الرئيس الأمريكي جورج بوش يوم الخميس إلى تقديم معونة غذائية دولية جديدة قيمتها 770 مليون دولار للمساعدة في الحد من الزيادة في أسعار السلع الغذائية التي تهدد بنشر الاضطرابات الاجتماعية في الدول النامية.
السبت 3 مايو
بوش يطلب تمويلا اضافيا للحرب بقيمة 70 مليار دولار
طلب الرئيس الامريكي جورج بوش من مجلس النواب التصديق على تمويل بقيمة 70 مليار دولار لتمويل العمليات العسكرية التي يقوم بها الجيش الامريكي في العراق وافغانستان ولمحاولة التخفيف من اعباء ازمة الغذاء العالمية
التعليق شفوا الفرق بين الغذاء و الحرب قد أية
«مبارك» يعلن زيادة العلاوة الاجتماعية 30% والصرف من «مايو»
الزيادة الجديدة - التي أعلنها مبارك خلال كلمته أمس احتفالاً بعيد العمال - جاءت عقب حديث هامس بين الرئيس والدكتور أحمد نظيف، رئيس الوزراء، والدكتور يوسف بطرس غالي، وزير المالية، ضحك خلاله الرئيس وانتهي بإعلانه الزيادة في كلمته التي شهدت تصفيقًا وهتافات تجاوزت الـ ٢١ مرة.
التعليق
هو إحنا شعب أهبل و لا هي البلد ماشية بالبركة قرار زي ده يتاخد كده في همسة بينهم
طبعا لا يبقي إحنا شعب إننا نصدق و صدقنا
التعليق النهاردة

الحمد لله طلعت بأفهم الرئيس في حديث صحفي بيقول مش عارفين هنوفر موارد للعلاوة دي منين و نعم التخطيط

إرحمنا يارب برحمتك
ساويرس ينفي اعتزامه شراء روما الايطالي
نفى الملياردير المصري نجيب ساويرس في تصريحات خاصة ببي بي سي العربية ما تردد عن قرب شراءه لنادي روما الإيطالي

وكانت تقارير صحفية إيطالية ذكرت أن ساويرس، الذي يملك شركة الاتصالات الإيطالية ويند، هو المرشح المفضل من قبل مالكة النادي، شركة إيطالبترولي، لشراء فريق كرة القدم الذي يلعب في الدوري الإيطالي

وقال ساويرس لبي بي سي العربية إن "هذه الأنباء ليست صحيحة. لو فكرت في شراء ناد رياضي فسيكون الأهلي المصري وذلك إذا طرح للخصخصة

يانهار أبيض في حد في مصر ممكن يشتري نادي روما بتاع توتي مش مصدق

طيب يروح يعمل مشروع يشغل فيه العواطلية اللي هنا يعني يكسب فيهم ثواب ما هي فلوسنا بردوا مش لازم يعني يبقي تلاتين مليار دولار

علشان كده قررت أنضم لفوادفون

ردود أفعال ترفض وصول الغاز المصري لإسرائيل.. وقيادات البترول تواصل صمتها
وأكد رئيس الشركة القابضة للغاز الطبيعي «إيجاس» خلال مؤتمر صحفي سابق أن الكميات المصدرة لإسرائيل لا تتعدي ٢.٥% من إنتاج مصر البالغ ٦.٣ مليار قدم مكعب يوميا، بينما ما سيصدر من الغاز المصري لإسرائيل هو ١.٥ مليون قدم يوميا، بينما ذكرت مصادر إسرائيلية أمس الأول أن إسرائيل ستعتمد علي الغاز المصري في إنتاج ٢٠% من الكهرباء خلال العقد المقبل، كما ذكر المصادر ذاته أنه سيتم توريد ١.٧ مليار متر مكعب من الغاز سنويا لمدة ٢٠ عاماً

التعليق
و الله كويس بنديهم طاقة علشان يستعدوا و يطوروا نفسهم علشان يفنونا

ده المطرية مفيهاش غاز طبيعي نقوم نصدر لإسرائيل غاز طبيعي بسعر زمان لمده عشرين سنة

طيب نوصل الغاز للمطرية

هتقوليلي إشمعني المطرية مش عارف أهوة كده و خلاص

.

و في خبر رياضي تاني عن لاعب أسمه أحمد المحمدي بيلعب في إنبي الخبر الأول بيقول صفقة إنتقاله لنادي أوربي توقفها التمانية مليون اللي الأهلي عرضها و النهاردة إنبي قال مش هيفرط في اللاعب غير مقابل خمسة و عشرين مليون هو لولا في ناس محترمة بتخش هنا كان الواحد قال كلمة مش كويسة

.

أنا هأبدا الأمتحانات يوم الأحد بعد القادم دعواتكم معايا و الجدول حد واربع حد و أربع حد و ثلاثاء و خميس من عشرة الصبح للساعة واحدة اللي مشغول يدعي من عشرة للساعة أتناشر بس مش مشكلة

.

أنا خايف قوي ياشباب أنا عارف إني مقصر قوي قوي قوي في المذاكرة و بجد مش عارف أية السبب بالرغم من إني جمعت شوية و رق تحف سهلين و تمام التمام بس مش قادر أقعد أذاكر

و الغريب إني عندي إحساس عجيب إني هأنجح مش عارف ليه و علي أية

بس اللي خايف منه بجد إني منجحش أنا مش هأوعل علي الفشل لأني متوقعة علشان ربنا لا يضيع أجر من أحسن عملا و أنا لم أحسن حتي الأن بس خايف قوي هأحس بالضياع عارف إني ربنا مش بيضيع حد بس خايف انهار مش عارف أعمل أية مش عاوز الفترة الحلوة اللي بامر بيها دي تخلص

أدعو لي ربنا يكرمك بالخير

و أدعو لي إني أرضي بما قسمه الله لي

أين تلك البوصلة التي ترشدني

أين هذا المرشد أو الدليل في هذه الحياة

هل هو موجود من الأساس

و متي سيظهر

و هل سيظهر

أليست تلك أقصي الظروف التي من الممكن أن أمر بها

أم القادم أقصي

كرهت الوحدة

و أتجنب الصحبة

قاسية هي الحياة

...

أيام قاسية في فترة هادئة أمر بها