أخيرا بوست الرضا و الستر

 السلام عليكم و رحمة الله 

أخيرا دخلت هنا لسبب مهم جدا و غالي و هأبدأ في كتابة البوست اللي كان نفسي أكتبه من فترة لكن كنت مكسل لعمل إستعادة للباسورد

بداية من الكورونا تحولت حياتي بصورة غريبة و تعرضت لإختبار قاسي و أتجرحت فيه جدا و بصراحة جرحت فيه بردوا

و ضعفت و إنهارت و لكن الحمد لله ربنا أكرمني و عافاني و سترني 

و خرجت أو تجاوزت المحنة بصورة كبيرة بمنحة من الله 

أستفدت كتير من المحنة و المنحة و أعتقد إنها كبرتني و قوتني أو هكذا أعتقد

أهم حاجة أتعلمتها إن فعلا ممكن تكون محروم من حاجة أنت تتخيل إن فيها قمة سعادتك أة موجوع بس راضي

الرضا

أحد أعظم نعم ربنا علي الإنسان

و الستر

أحد أعظم نعم ربنا علي الإنسان

و واحد صاحبي علمني كلمة حلوة عن الستر هي

رصيد الستر إن كل واحد ليه رصيد متفتكرش إنك بتعدي بمجهودك لا ربنا اللي بيسترها فحاول دايما تزود رصيد من الستر و متخلصوش في الكلام الفاضي

أنا مش هأطول كتير في البوست ده وإن شاء الله مش هأغيب عن هنا تاني كتير خصوصا بعد إستعادة الباسورد 

:)

يارب شركة دعايا مكافحة الحشرات تشيلني من القايمة بتاعتها علشان بتزاولني جدا بالتعليقات اللي بتعملها و بأفرح بيها علي أساس إن في حد منكم أفتكرني 

:)

أتمني تفتكروني 

واحشني طنطاوي اللي مش عارف أتطمن عليه و غاب بطريقة غريبة

و ربنا يرحم محمد عبد الغفار 

وحشتوني

جنان

السلام عليكم 

الأيام اللي جاية شكلها أيام جنان 

ربنا يسترها

Remontada

السلام عليكم ورحمة الله و بركاته

أخباركم أية؟

واحشني جدا طبعا اللي منكم بيكلمني واللي مش بيكلمني

أنا عارف إن تقريبا مفيش حد هيعلق قريب لأن محدش بيعدي من هنا

أنا الحمد لله تمام 

رجعت هنا تاني بسبب الحبسة اللي الواحد فيها بسبب فيروس كورونا كوفيد ١٩ اللي مجنن الكوكب كله

طبعا واخدين أجازة من الشغل للأسف مستغلتهاش كما يجب

و رجعت الشغل الأسبوع ده مع تخفيف العمالة أنا و واحد بس في المعمل 

أنا طلبت معايا أرجع أكتب تاني  و الحمد لله أنا مش مكتئب 

أنا متضايق بس علشان الوقت بيعدي و مش عارف أستغله كويس

ربنا يسهل

ده سلام مبدئي و نتقابل قريب إن شاء الله

ثرثرة في البلكونة

السلام عليكم

أخباركم أية؟

غيبت عنكم كتير علي أساس يعني إن في ناس كتير بتتدخل تشوفني كتبت أية و مكتبتش أية؟

ما علينا

هأقوم أصلي العشاء علشان نقعد نرغي براحتنا

.

منا و منكم

المهم الخلاصة بتاعة البوست ده إني تعبت و مش قادر أستحمل مش هي دي الحياة اللي حلمت و أتمنيت أعيشها و اللي مجتهدش أة بس تعبت علشان أحاول أوصلها أة مش تعبت أوي بس تعبت

علي الأقل كان نفسي مراتي تتدخل تقرأ أي كلام أكتبه مش أقلق إنها تقراه علشان متفتحش معايا تحقيق نفسي عن كل كلمة كتبتها

.

مش عارف محمد مفيد مش بيرد عليا ليه و تقريبا قطع علاقته بيا ليه

.

تعبت من الشغل اللي مش بحبه

و مش عارف أشتغل الشغلانة اللي بحبها و لا هأعرف لأنها ببساطة الطب و للعلم و للتاريخ مكتشفتهاش غير بعد كم سنة من التخرج وبالرغم من إني محلمتش بيها حتي أيام الدراسة

.

تعبت من البيت اللي شايف نفسي مسئول عن كل كبيرة و صغيرة فيه و مسئول عن التفاصيل بزيادة طبعا مراتي لها حق الرد إن ده مش حقيقي بس أنا شايفه حقيقي و تعبت من تحمل المسئولية لوحدي

.

تعبت من العيلة الكبيرة اللي بتحمل عليا شوية بزيادة

و محملني مسئوليات و إلتزامات كتير و فرعية و ممكن أي حد يعملها أو متتعملش أساسا و بيكونوا سيبني في وش المدفع وإني المفروض أقول حاجات و أعمل حاجات مش مقتنع بيها

.

تعبت من الكسل و الضغط العصبي اللي عايش فيهم

.

تعبت من محاولة توفير العيشة المحترمة لعيالي 

.

تعبت من التفكير في المصاريف و التحويش و لو لاقدر الله حصل حاجة و احتجت فلوس هأعمل أية و أستلف من مين.

.

تعبت من تطنيش النليفونات و الرسايل اللي صحابي من الكلية و الأشغال السابقة و الحالية اللي بيبعتوها و مش بأرد عليهم و إحراجهم ليا دايما بالتقصير و عندهك حق

ماليش طاقة للكلام و يمكن الواتساب هو اللي بحافظ علي الشعرة دي

.

تعبت من الماجستير اللي مش عارف أختار موضوعه

.

تعبت من المشروع اللي نفسي أفتحه و اللي أساسا مش عارف هو مشروع أية و منين وأنا مش معايا فلوس

.

تعبت من المنافقين و الحوارات في الشغل

.

تعبت من الخوف علي العيال في البلد الوسخة اللي عايشين فيها دي

.

تعبت من الوقت الضايع في حياتي

.

طبعا تعبت من الزمالك و مرتضي منصور و الأهلي و اتحاد الكورة

.

تعبت من وزني الزيادة اللي مش عاوز يقل

.

تعبت من تأنيب الضمير إني حاسس إني حسدت أخويا علي عيشته فحالته اتدهورت بالشكل ده

.

تعبت طبعا من تقصيري في الصلاة و العبادة و علاقتي بربنا

.

أنا عارف طبعا إن معظم اللي أنا فيه بسببي أنا و أنا بس

بس مش عارف أعمل أية؟

عاجز

عاجز عن الخروج من الدوامة

.

طبعا الأخ اللي ماشي في الشارع هيقول يسلام علي الرايق اللي قاعد بيتشغل في البلكونة ده

و الله ياعم مش ناقصة

.

يمكن اللي مصبر الواحد و بيديه طاقة هم العيال بس للأسف بردوا عايش مابين ظروف الحياة و الخوف عليهم و بيقلب معايا بتوتر و نرفزة و بتتحول لكتير معاهم لزعيق مش بأضرب الحمد لله

.

أنا راضي عن عيشتي و مش معترض بس المشكلة في المتطلبات اللي حواليك و اللي حواليك و الناس اللي مش بتقدر و طبعا العيال الصغيرة مش مطلوب منها إنها تتحمل عجزنا عن حاجات كتير

و السلام ختام

التناحة

.السلام عليكم 

أزيكم ياشباب 

يارب تكونوا بخير و اللي هيطل طلة هنا يطمني عليه و يقوللي إنه بخير

حاسس إني علي مشارف مرض الضغط لذلك أصبح مشروبي المفضل في كثير من الأوقات الكركدية 

و أحد أكبر أسباب شعوري بإرتفاع الضغط هو تناحة الناس 

الناس بقيت تنحة أوي 

و اللي ينرفز في الموضوع إنك لو تغاضيت عن شئ هو مضايقك و الطبيعي يضايق أي إنسان و أنت سكت عنه بسبب العشرة و الجدعنة بيصبح حق مكتسب بالنسبة للناس

و ياريت نقف عن كده لأ ده أنت كمان مطلوب منك تتغاضي عن الزيادة في اللي هيحصل و الغريب بقي في الموضوع إنك لو نه رجعت و اتجننت في عقلك و طالبت بحقك تبقي أنت الغلطان و الغريب و المريع إنه بيتقالك كده بالنص مش سكت في الأول يبقي تسكت في الأخر

و بناءا عليه إن شاء الله قررت مسكتش عن حقي بين قوسين علي قد ما أقدر وش بيضحك

هو ده الملخص

التفصيل الجيران اللي مأجرين شقة عندنا طلبوا مني إنهم يجيبوا كلب رفضت بكل ذوق و جيران تانية رفضت شوية جابوا الكلب بسبب العشرة طنشت و سكت و أنا قرفان من الكلب لأني مش بحب و لا الكلاب و لا القطط و اللي يزعل يزعل

المهم سنتين المحروسة ربنا كرمها بخمسة المهم مامت الناس اللي مأجرة إستأذنت علشان تنزلهم البدروم علشان باباهم عامل عمليه كبيرة في المخ و ممكن يسببوا امراض له

طبعا وافقت مراعاة للظروف الحمد لله سربوا اتين و تبقي الأم و اتنين واحد مع الأم في البدروم و التاني معهم في الشقة

المهم الأم اللي بره و الكلب اللي جوة يجي عليهم المغرب من هنا و يبدأوا الهيجان و النباح و طبعا كلاب الشارع معدية تسلم وتدي التحية و بتبقي ليلة كل ليلة 

ملحوظة جانبية تقريبا بوظوا جميع ليالي رمضان بالنسبة لي

المهم جيران جنبنا اشتكوا لي أكتر من مرة و كل مرة بأقولهم كلمتين ز أكلم الناس اللي عندهم الكلاب وهنا تظهر التناحة أصل القطط السبب فمطلوب مني أركب باغ بلاستيك علي السور الحديد أصل الجيران و بتوع الديليفري بيسبوا الباب مفتوح فمطلوب مني أنبه علي الجيران و بتوع الديليقيري يقفلوا الباب وراهم أصل كانوا بيقتلوا الكلاب بالليل فهم حاسين و زعلانين عليهم أصل الجيران اللي بيشتكوا كان عندهم كلاب كانت ريحتهم وحشة و بيهوهوا و إحنا لم نشتكي و طبعا ده غير حقيقي كان عندهم كلب بوليسي مدرب و 

 كان بيهوهوا قليل جدا و أخر و أحدث المبررات إن الكلب أخرس مش بيهوهو 

فالواحد مرارته اتفقعت و قلت أدخل أفضفض لكم شوية

كفاية عليكم كده و شوية كده أدخل أحكي لكم شوية تنحات أخري

و في الأخر قاعد بأشرب كركدية و عمال أشكي لكم همي

خواطر ملعبكة كالعادة

السلام عليكم و رحمة الله

أزيكم ياشباب أخباركم أية؟

أنتم فين من زمان؟

و أنا فين من زمان بردوا؟

هي خلطة حاجات في دماغي كالعادة ممكن معرفش أطلعها كلها مرة واحدة أو أطلعها و هي مش مترابطة مع بعضها

هي في مجملها كئيب بس مش عارف ليه مش مكتئب أوي بالنسبة للرغي اللي هأقوله؟

الزمن بيجري بسرعة غير طبيعية

يعني مثلا المدونة دي بقالها تقريبا حداشر سنة و متخرج بقالي تلاتاشر سنة و 2008 عدي عليها تسع سنين و مسلسل أم كلثوم بتاع صابرين بقاله عشرين سنة سمعتها في الراديو اتصدمت ده أنا فاكر تفاصيله حتي لما نجح صابرين عملت فيلم إنها هتعتزل

بالمناسبة بأسمع أغاني ألبوم كايروكي الجديد عاجبني فيه السكة شمال في شمال و الكيف وعم غريب و طبعا أخر أغنية بس هي كانت نزلت بدري عن الألبوم

و قاعد في البلكونة بين الريحانة من جانب والنعنانة والعطر والبوتس اللي بتموت كلها من الحر لو أتأخرت عليهم في المية 

بالمناسبة الجنينة اللي علي السطح بتصفصف علي الحاجات المقاومة للحرارة و العطش 

من كم يوم حلمت بيوم قبل نتيجة البكالريوس اللي قضيته في السيدة زينب و قعدت فيه علي قهوة شربت فيها أحلي كوباية شاي بلبن في حياتي و في حد قاللي علي اسمها بس نسيته

بأفتح الفيسبوك دلوقتي لقيت العبارة دي

"أيها النساجون أريد كفنا واسعا لأحلامي " محمد الماغوط

و بالمناسبة بردوا الجملة اللي بتردد في دماغي كل شوية كل أما أشوف مالك  بيكبر و الأيام بتعدي 

متي ترعرع في وادينا الطيب هذه العيال 

الرطوبة عالية جدا ياريت الناس اللي بتتعب في الجو ده تستحمل بقي

نص القمر في وشي و في طيارة ماشية قدامه

صاحبي الأنتيم مسافر أستراليا

أتنقلت في الشغل لنفس المكان الأول اللي اشتغلت فيه في 2006

.

أخويا من شهر فبراير لحد دلوقاي حياته اتقلبت رأسا علي عقب الموجع في الموضوع إني حاسس إني نبرت عليه و مش عارف أعمل أية؟

.

ساعات كتير بأبص علي مالك و ياسين و أستغرب و أقول تقريبا مين دول ده أنا لسه عيل

.

الله يخرب بيته هيخلينا نشحت قريب كل شوية يشيل دعم و الحاجة تغلي و الجشع يزيد و مفيش استثمار و لا مشاريع بتدر فلوس كل مشاريعه صرف صرف عن السيسي اتحدث

.

المشكلة في المبررين اللي ناس كتير بتسميهم معرصين أنا شخصيا نفسي يطلعوا هم اللي صح علشان لو أحنا اللي صح يبقي هنشوف إحنا و ولادنا و إحتمال أحفدانا مستقبل مظلم ده لو عشنا 

.

نفسي أسافر 

نفسي في مشروع 

نفسي أهرب

نفسي الزمن يرجع

نفسي أموت و أخلص

نفسي أقوم أنام

.

مستني شريط عمرو دياب ينزل 

عارف مجنون

.

في العيد مردتيش علي ناس كتير اتصلت بيا

.

حاسس إني مش عاوز أقابل و لا أخرج مع حد

.

زعلان أوي من مفيد

.

لو ده أخر بوست ليه هأفضل أحلم بالحرية

حرية

.

تصبحواعلي خير

أبقوا أسألوا عليا

خلطة مشاعر وأفكار

نفسي من زمان اكتب بوست و كل شوية أقول لازم اكتبه علي اللاب علشان اظبط الخط و حجمه و في الأخر بردوا بأكتبه علي الموبيل
مش عارف أبدأ منين
هأبدأ من افتقادي لشبرا أوي وحشاني بجد و جوها واحشني ونفسي عيالي يبقوا شبراوية جدعان محترمين
كان نفسي اكتب بوست خاص عن حياتي في شبرا و المدارس اللي عديت عليها و علي صحابي و مدرسيني مبدئيا مدرسة حدائق شبرا المشتركة للأسف نصها اتبني عمارة دلوقتي و أشهر المدرسين حمدي و سعيد و الصحاب أحمد أنور و طارق وهيثم و أحمد نبيل و محمد سيد و البنات نشوي و فاطمة وأسماء و داليا و كان ما يميز هذه الفترة لعب الكورة في الفسحة و بعد المدرسة و ياما أ سعيد قفشنا و ضربنا و مرة أتأخرت حوالي ٣ ساعات بعد ميعاد المدرسة و روحت ماما قرصتني من ودني و تقريبا من ساعتها معملتهاش تاني ولا أنا ولا هي 😀
وبعد كده مدرسة الترعة الإعدادية و سنة أوي كنت فترتين و بعد كده فترة واحدة و الصحاب زيزو و محمد صلاح و ثروت وعبدالله ومحمد فايز ومحمد عبدالجواد و ميشو و محمد خليل و بعد كده ثانوي في التوفيقية و كانت أيام صعبة انتهت بدخولي كلية العلوم في نهاية ٩٩ و مع علوم سقطت أول سنة و كأبة و بعد كده السنين بتجري و مش عاوزة تهدي
ياجدعان ده البلوج ده نفسه عدي عليه عشر سنين تخيلوا مش عارف عدوا إزاي
و الثورة عدي عليها خمس سنين و السيسي عدي عليه سنتين ونص
بالمناسبة حسبتها الصبح لقيت مرتبي حاليا يعادل نفس مرتبي ساعة أول مرة اشتغل من عشر سنين بالدولار
بردوا الصبح خطر علي بالي ساعة أما حزب الله طرد إسرائيل من لبنان و هتفنا باسمه و حاليا بندعي عليه و هو هو نفس الشخص
الحمد لله عندي هدوء نفسي كويس يمكن سببه الأساسي مالك وياسين واهتمامي وخوفي عليهم وكمان مرور الحياة بسرعة مبتخليش الواحد يفكر كتير
الحمد لله امتحنت المادة اللي عندي في التمهيدي وربنا ييسر
بأحاول اتحامي بربنا في كل حاجة
الجو برد بشكل غير طبيعي
الشغل عك بس بأحاول أتعايش و بأعمل اللي عليا و العضو المنتدب بيطلب مني شغل بشكل شخصي مني و ده طبعا بيسبب لي عداوات كتير مش هتظهر للعلن غير مع تغيير العضو المنتدب و هينفخوني 😀 بس الحمد لله الواحد مبسوط بنفسه و مبسوط إني حاسس إن ربنا معايا و بيقولي متشيلش أي هم
أول أما خطبت قلت لمراتي علي المدونة دي ودخلت عليها ساعتها كم مرة و مبقيتش تفكر تتدخل تاني و الغريب إنها صممت تتضاف عندي علي أكونتين الفيسبوك
في صورة جت علي الميموري للفيس بوك ليا و لمنذر ولميدو مجدي بصيت لنفسي وحسيت إني وحشتني هو في حاجة اسمها كده ولا ده مرض؟
في مواقف كتير نفسي احكيها لكم بس أنا مش عارف أنتم بتيجوا ولا لأ هأسيب البوست ده و علي أساسه هأكمل 😀
تصبحوا علي خير
برنامج قطوف من حدائق الإيمان ده جميل أوي خصوصا حلقات شحاته العرابي